މޯލްޑިވްސް މީޑިއާ ކައުންސިލް (އެމްއެމްސީ) ގެ އައު ދައުރަށް މެމްބަރުން އިންތިޚާބުކޮށްފި އެވެ.
މި އިންތިޚާބުގެ ވޯޓުލުން ކުރިއަށް ގެންގޮސްފައިވަނީ ސޯޝަލް ސެންޓަރުގައި މިއަދު ހެނދުނު 10 ން 11 އަށެވެ. މިއަދު އިންތިޚާބުކޮށްފައިވަނީ ކައުންސިލަށް މީޑިއާތައް ތަމްސީލު ކުރެއްވުމަށް 7 މެންބަރުންނާއި އާންމުންގެ ތެރެއިން 6 މެންބަރުން ނެވެ.
މި އިންތިޚާބުގައި މީޑިއާތައް ތަމްސީލު ކުރެއްވުމަށް 10 ފަރާތަކުން އަދި އާންމު މެންބަރު ކަމަށް 12 ފަރާތަކުން ވަނީ ކުރިމަތިލާފަ އެވެ.
މިއަދު ކުރިއަށްދިޔަ މި އިންތިޚާބުގައި މީޑިއާތައް ތަމްސީލު ކުރެއްވުމަށް އެންމެ ގިނަ ވޯޓު ލިބިވަޑައިގެންނެވީ އަޙްމަދު އާޒިފު، ސަން އޮންލައިން، 85 ވޯޓު، މުޙައްމަދު ސިމާއު، ވަން އޮންލައިން، 85 ވޯޓު، މުޙައްމަދު އަފްރާހް، ތިލަދުން، 82 ވޯޓު، މޫސާ ރަޝީދު، މިހާރު އޮންލައިން، 80 ވޯޓު އަދި ހުސައިން ޝަރީފު، ވަގުތު އޮންލައިން، 75 ވޯޓު، އަޙްމަދު މުސްތަފާ، ޕަބްލިކް ސަރވިސް މީޑިއާ، 62 ވޯޓު އަދި އަލީ ނިޝާން، އާފަތިސް އޮންލައިން، 58، ވޯޓެވެ.
އާންމުންގެ ތެރެއިން މީޑިއާ ކައުންސިލަށް އިންތިޚާބުވި 6 ބޭފުޅުންނަކީ އަރުމާރު ރަޝީދު، ރޯސްވިލާ، ސ.މީދޫ، 84 ވޯޓު، އަޙްމަދު ޞައްފާނު، މާކޯނި، ރ.ވާދޫ، 79 ވޯޓު، ފާތިމަތު ޝާޒުލީ، ހ.ޝީޝަމް، 77 ވޯޓު، އަޙްމަދު އަމީން މުޙައްމަދު، ރިހިދޯދި، ގދ.ފިޔޯރި، 54 ވޯޓު އަދި މުޙައްމަދު ނަސީރު، ދަނބުގެ، ހދ.ވައިކަރުދޫ، 52 ވޯޓު، އަލީ ރަޝީދު އިބްރާހީމް، ކުންނާރުގަސްދޮށުގެ، ދ.ކުޑަހުވަދޫ، 48 ވޯޓެވެ.
މިއަދު ބޭއްވި އިންތިޚާބުގައި ވޯޓުލުމަށް 99 ފަރާތަކުން ރަޖީސްޓްރީ ކޮށްފައިވާއިރު، 93 ފަރާތަކުން ވަނީ ވޯޓުލާފަ އެވެ.
މޯލްޑިވްސް މީޑިއާ ކައުންސިލަށް މެންބަރުން އިންތިޚާބު ކުރުމަށް ބާއްވާ އިންތިޚާބުގެ ވޯޓުލުން: ވޯޓުލުމަށްޓަކައި ރަޖިސްޓްރީ ކޮށްފައިވާ 99 ފަރާތުގެ ތެރެއިން ވޯޓުލުމަށްޓަކައި ހާޒިރުވެފައި ވަނީ 93 ފަރާތަކުން. pic.twitter.com/VBbhiShwHT
— Home Ministry, MV (@HomeMinistrymv) December 10, 2022
މި އިންތިޚާބަކީ މީޑިއާ ކައުންސިލުގައި މީޑިއާތައް ތަމްސީލް ކުރައްވާ 7 މެންބަރަކާއި އާންމުންގެ ތެރެއިން މީޑިއާގައި ތިއްބަވާ 6 މެންބަރެއްގެ ދައުރުގެ މުއްދަތު މިހިނގާ ޑިސެންބަރު މަހުގެ 14 ވަނަ ދުވަހަށް ހަމަވާތީ އެ ކައުންސިލްގެ ޤާނޫނުގެ 5 ވަނަ މާއްދާގެ ދަށުން މެންބަރުން އިންތިޚާބު ކުރުމަށް ބޭއްވި އިންތިޚާބެކެވެ.
މޯލްޑިވްސް މީޑިއާ ކައުންސިލްގެ މެންބަރުންގެ ދައުރުގެ މުއްދަތަކީ 2 އަހަރު ދުވަހެވެ. މިހާރުގެ ދައުރު އަންނަ ބުދަ ދުވަހަށް ހަމަވާނެ އެވެ.
އެމްއެމްސީގެ މެމްބަރުންގެ އަދަދަކީ 15 އެވެ.
މީޑިއާ ކައުންސިލުގެ އައު ދައުރަށް އިންތިޚާބުވި ވި ހުރިހާ މެމްބަރުންނަށް އާފަތިހުގެ ފަރާތުން މަރުޙަބާ ކިޔަމެވެ.
