އިންޑިއާގައި އަލަށް ހިންގަން ފަށާފައިވާ ރަށްވެހިކަމުގެ ގާނޫނުގެ އައު އިސްލާހު ބާތިލުކުރަން ސުޕްރީމް ކޯޓުން ދެކޮޅު ހަދައިފިއެވެ. ކޯޓުގެ ފަސް ފަނޑިޔާރުން އިއްތިފާގުވެ ވަޑައިގަތީ މުސްލިމުންނާ ދެކޮޅަށް އެއްވެސް ކަހަލަ އަމަލަކަށް މަގުފަހިވާ ގޮތަށް ގާނޫނުގެ އިސްލާހުގައި ކަމެއް އޮތްތޯ ބަލަން އިތުރު ވަގުތު ދޭށެވެ.
ކޯޓުން ސަރުކާރަށް އަންގައިފައި ވަނީ މި ގާނޫނާ ދެކޮޅަށް ހުށަހެޅި 144 ޕެޓިޝަނަށް 4 ހަފުތާގެ ތެރޭގައި އެދެވޭ ޖަވާބެއް ދޭށެވެ.
ރަށްވެހިކަމަށް ގެނެވުނު އިސްލާހުގައި ބަޔާންކޮށްފައިވާ ގޮތުގައި ރަސްމީ ލިޔުމެއް ނެތި އިންޑިއާގައި ދިރިއުޅޭ މުހާޖިރުންގެ ތެރެއިން މުސްލިމުން ނޫން އެހެން މީހުންނަށް ފަސޭހަކަމާއެކު ރަށްވެހިންނަށް ވެވޭނެއެވެ. މި އިސްލާހު ފާސްކުރީ ފާއިތުވި އަހަރުގެ ޑިސެންބަރު މަހުއެވެ. އިސްލާހަށް އަމަލުކުރަން ފެށީ މި ޖެނުއަރީ މަހުގެ 10 ވަނަ ދުވަހުއެވެ.
މި އިސްލާހާ ދެކޮޅުހަދާ މީހުން ބުނާ ގޮތުގައި މުސްލިމުންނަށް ފަސޭހައިން ރަށްވެހި ނުވެވޭ ގޮތަށް ފާސްކޮށްފައި ވަނީ އިންޑިއާއިން މުސްލިމުން ބޭރުކޮށްލުމުގެ ބޭނުމުގައެވެ.
ސަރުކާރުން ބުނާ ގޮތުގައި އެ އިސްލާހުގެ ބޭނުމަކީ އިންޑިއާގެ އަވަށްޓެރި އިސްލާމީ ގައުމުތަކުން ހިންދޫންނާއި ސިކުންނާއި ކްރިސްޓިއުންނާ ދެކޮޅަށް ހިންގާ ލާއިންސާނީ އަމަލުތައް ހުއްޓުވުމެވެ. ގާނޫނު އޮތް ގޮތުން ބަނގްލާދޭޝާއި އަފްޣާނިސްތާނާއި ޕާކިސްތާނުން އިންޑިއާއަށް އެތެރެވާ މުސްލިމުން ނޫން އެހެންމީހުންނަށް ފަސޭހަކަމާއެކު ރަށްވެހިވެވޭނެއެވެ.
