ތިމާވެށްޓަށް ގެއްލުން ދިނުމުގެ ކުށުގައި ސ. މަރަދޫ، އަސްރާރުގޭ، ޙަސަން ޢާދިލް ދެ ލައްކަ ހަތްދިހަ ފަސް ހާސް ރުފިޔާއިން ޖޫރިމަނާ ކޮށްފިއެވެ.
އެންވަރަންމަންޓް ޕްރޮޓެކްޝަން އެޖެންސީ (އީޕީއޭ) އިން ވިދާޅުވެފައިވަނީ އޭނާ ޖޫރިމަނާ ކުރީ ދަނޑުވެރިކަމަށް، ފިޝަރީޒް މިނިސްޓްރީން އޭނާއަށް ދޫކޮށްފައި ލ. މެންދޫގައި ހަތަރު ހާސް އަށް ސަތޭކަ ބާވީސް އަކަމީޓަރުގެ ސަރަޙައްދެއް ސާފުކޮށް މަގެއް ހަދައިފައިވާތީއެވެ.
އެރަށުގައި ދަނޑުވެރިކަން ކުރުމުގެ ގޮތުން 2018 ވަނަ އަހަރު ސެޕްޓެމްބަރު 10 ވަނަ ދުވަހުވަނީ އީއައިއެއް ހަދައި އީޕީއެއަށް ހުށަހަޅައިފައެވެ. އެތަނުން ވަނީ އެރިޕޯޓު ފާސްކޮށް ލިޔުންވެސް ހަވާލުކޮށްފައެވެ.
އެހެން ނަމަވެސް ޤާނޫނާއި ގަވާއިދާ ޚިލާފަށް އުސޫލުން ބޭރުން އެރަށުގައި މަގެއް ހަދައިފައިވާތީ އޭނާ ޖޫރިމަނާކޮށްފައިވަނީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާއި ގާނޫނާއޭގެ ދަށުން ހެދިފައިވާ ބަދަލުހޯދުމުގެ ގަވާއިދުގެ ދަށުން ކަމަށް އީޕީއޭއިން ވިދާޅުވިއެވެ. ފިޔަވަޅު އެޅުމުގައި އީއައިއޭ ހެދުމުގެ ގަވާޢީދަށް ވެސް އީޕީއޭއިން ވަނީ ރިޢާޔަތް ކޮށްފައެވެ.
އެ ޖޫރިމަނާ 30 ދުވަހުގެ ތެރޭގައި އީޕީއޭއަށް ދެއްކުމަށް ޙަސަން ޢާދިލަށް ވަނީ އަންގައިފައެވެ.
