ބައެއް ކުންފުނިތަކާއި އަމިއްލަ މީހުން ހިތްވަރާއެކު ކުރާ މަސައްކަތް ބަރާބަރަށް ކުރުމުން ނުކުންނަ ހެޔޮ ނަތީޖާގެ ވާހަކަ ކިޔާ ކޮންމެ ފަހަރަކު، އިޚްލާޞްތެރިކޮށް މަސައްކަތްކުރުމުގެ މުހިންމުކަމުގެ މަތީން ވިސްނެއެވެ.
ތިމާ އަދާކުރާ ވަޒީފާއަށް އިޚްލާޞްތެރިވެ، ބަރާބަރަށް މަސައްކަތްކުރުމުން، ދެ ކަމެއް ކާމިޔާބުވެއެވެ. އެއީ، އެ މަސައްކަތް ރަނގަޅުކުރުމުން ނިކުންނަ ނަތީޖާ ރަނގަޅުވުމާއި ތަނަށް އެކަމުގެ ފައިދާކުރާ ކުރުމެވެ. އަނެއް ކާމިޔާބީއަކީ، ތިމާއާ ޙަވާލުވެފައިވާ މަސައްކަތް ރަނގަޅަށް ކުރެވުނުކަމުގެ ފޮނިކަމާއި މީރުކަން ތިމާއަށް އިޙްސާސްވުމުގެ ކާމިޔާބީއެވެ.
މަސައްކަތަކީ، ތިމާއަށް ދިރިއުޅުމުގެ މަޤްޞަދު ޙާޞިލްވުމެވެ. މަސައްކަތްކޮށްދެނީ، އަމިއްލަ ކުންފުންޏަކަށް ކަމަށް ވިޔަސް، ސަރުކާރަށް ކަމަށްވިޔަސް، ތެދުވެރިކަމާއި އިޚްލާޞްތެރިކަމާއެކު، އެ މަސައްކަތްކުރުމުން ނަތީޖާ ރަނގަޅުވެއެވެ. ތިމާއަށް ހިތްހަމަޖެހުން ލިބެއެވެ.
މާތްރަސްކަލާނގެ ދެއްވާ ރިޒުޤުން ހިތްހަމަޖެހުން ލިބެނީ، އެ ރިޒުޤު ހެޔޮގޮތުގައި ހޯދުމުންނެވެ.
ރަނގަޅަށް ކުރެވޭ މަސައްކަތުން ހިތްހަމަޖެހުން ލިބެނީ، ތިމާއަށް ވެސް ކަންކަން ކޮށް، ނިންމުމުގެ ޤާބިލްކަމާއި ކުޅަދާނަކަން ލިބިފައިވާކަން އެނގުމުންނެވެ. ކުރާ މަސައްކަތް ފުރިހަމައަށް ކުރުމުން، އެ ކޮށްދެވެނީ، ހަމެކަނި ވަޒީފާއަދާކޮށްދޭ މިހާއަށް ކޮށްދޭ ހެޔޮކަމެއް ނޫނެވެ. ތިމާގެ އަމިއްލަ ނަފުސުގެ ހިތްހަމަޖެހުމަށް ވެސް އެކަމުން އެހީވެއެވެ. އެހެންވީމާ، ރަނގަޅުގޮތަކީ، ކުރަންޖެހިފައިވާ ކަންތައްތައް ރަނގަޅަށް ކުރުމެވެ. ފަހަށް ނުބެހެއްޓުމެވެ. ޙަވާލުކުރެވޭ މަސައްކަތް ބަރާބަރަށް ކުރުމަކީ، އެހެން މީހުންގެ ޤަދަރާއި އިޙްތިރާމް ލިބޭނެ ކަމެކެވެ. ވަގުތު ބޭކާރުނުކޮށް އަދި ކުރަންޖެހިފައިވާ ކަންތައްތައް، އެހެން މީހުން ލައްވައި ކުރުވަން ނޫޅެ، އަމިއްލައަށް އެ ކަންތައްތައް ކުރުމަށްވުރެ، މޮޅު ގޮތެއް، ރަނގަޅު ގޮތެއް ނޯންނާނެއެވެ.
އަހުރެމެންގެ ޙަޔާތް މާނަހުރި އެއްޗަކަށް ވާނީ ކުރާ މަސައްކަތުންނެވެ. އެ މަސައްކަތް ފުރިހަމަކުރުމުންނެވެ. ޙަޔާތުގައި ރަނގަޅު ގޮތްތައް މެދުވެރިވަނީ، ރަނގަޅު ކަންތައްތައް ކުރާ މީހުންނަށެވެ. ޙަވާލުވެފައިވާ މަސައްކަތް އިޚްލާޞްތެރިކަމާއެކު ކުރާހިތުން ކުރުމުން، އެ ކުރެވޭ ކަމަކީ، ތިމާއަކީ، ދިރިހުރި، ދިރިއުޅުމުން އުފައުވެރިކަން ހޯދާ، ފުދިފައިވާ މީހަކަށް ހެދުމެވެ. އެއީ، ކުޑަކަމެއް ނޫނެވެ.
ރަނގަޅަށް މަސައްކަތްކުރެވުނު ދުވަހަކު އިޙްސާސްވާ އިޙްސާސްވުމާއި އެހައި ރަނގަޅަށް މަސައްކަތް ނުކުރެވި ވަގުތު ބޭކާރު ކުރެވުނު ދުވަހެއްގެ އިޙްސާސް ތަފާތުވަނީ އެހެންވެގެންނެވެ. ކަންކަމު އަންނަ މީހުންނަށް ރަނގަޅަށް، ފުރިހަމައަށް، އޭނާ ބޭނުންވާ ކަންތައްތައް ކޮށްދިނުމުން ހިތްހަމަޖެހުން ލިބެއެވެ. އެފަދަ މީހުންނާމެދު އެހައި ރަނގަޅަށް ކަންތައްތައް ނުކޮށްދެވުމުގެ ސަބަބުން ހިތަށް އުނދަގޫ ވެއެވެ.
ތިމާގެ ވާޖިބާއި މަސްއޫލިއްޔަތު، އިޚްލާޞްތެރިކަމާއެކު އަދާކުރާ ކޮންމެ ދުވަހަކީ، މެޑެއްޔަކާއި ސަނަދެއް ނުލިބޭ ދުވަހަކަށް ވެދާނެއެވެ. އެހެންނަމަވެސް އެ ދުވަހު، އިޙްސާސްކުރަން ލިބޭ އުފަލާއި ހިތްހަމަޖެހުމަކީ، ދިރިއުޅުމުގެ މަޤްޞަދު ފުރިހަމަކުރެވޭތީ، ލިބޭ އުފަލަކާއި ހިތްހަމަޖެހުމެކެވެ. އެކަން އެ މިންވަރުކުރައްވަނީ، ހުރިހާ މަޚުލޫޤުން ހެއްދެވި ﷲ އެވެ.
ޑޮކްޓަރ މާޓިންގ ލޫދަރކިންގ ވިދާޅުވެފައިވެއެވެ. "މަގު ކުނިކަހާ މީހާވެސް އެ ކުނިކަހަނީ، މައިކަލް އެންޖަލޯ ކުރެހިހާ ފުރިހަމައަށެވެ. އަދި ބީތޯވަން މިޔުޒިކް ކުޅުނުހާ ފުރިހަމަކޮށެވެ. ހަމަ އެހެންމެ ސެކްސްޕިއަރ ލިޔުނުހާ މޮޅަށެވެ. އެހެންކަމުން މަގު ކުނިކަހާ މީހާ ނެތިދިއުމުން ބިމުގައި ދިރިއުޅޭ އިންސާނުންނާއި މަލާއިކަތުން ބުނާނެތެވެ. މި މަރުވި މަގުކުނިކަހާ މީހާއަކީ، އޭނާގެ ވާޖިބު ވަރަށް ފުރިހަމައަށް އަދާކުރި މީހެކެވެ."
