ރައީސުލްޖުމްހޫރިއްޔާގެ އޮފީހުގެ މިނިސްޓަރުކަމަށް އެމްޑީޕީގެ ނައިބު ރައީސް މުޙައްމަދު ޝިފާޒު އައްޔަން ކުރައްވައިފިއެވެ.
ރައީސް އޮފީހުގައި ބޭއްވި ރަސްމިއްޔާތެއްގައި އެމަނިކުފާނު އެމަޤާމަށް އައްޔަން ކުރައްވައި ރައީސް އިބްރާހީމް މުޙައްމަދު ޞާލިޙު ވަނީ މަޤާމުގެ ފަތްކޮޅު އެމަނިކުފާނަށް ދެއްވައިފިއެވެ.
ރައީސް އިބްރާހީމް މީގެ ކުރިންވަނީ ކުރީގެ ފޮރިން މިނިސްޓަރު މުޙައްމަދު ނަސީމްގެ އިތުރަށް ޢަލީ ހާޝިމް ރައީސް އޮފީހުގެ މިނިސްޓަރު ކަމަށް އައްޔަން ކުރައްވައިފައެވެ. އަދި ޢަދާލަތު ޕާޓީގެ ނާއިބު ރައީސް ވަނީ މިނިސްޓަރުންގެ ފެންވަރުގައި ރައީސް އޮފީހުގެ ޗީފް އޮފް ސްޓާފުގެ މަޤާމަށް އައްޔަން ކުރައްވައިފައެވެ.
ޝިފާޒުގެ އިތުރަށް ހެންވޭރު ތިމާވެށި ޢަބްދުﷲ ޖާބިރު ވަނީ ރައީސުލް ޖުމްހޫރިއްޔާގެ ޚާއްސަ މަންދޫބަކަށް އައްޔަން ކުރައްވައިފައެވެ.
ރައީސް އޮފީހުން މިއަދުވަނީ ކުންފުނިތަކުގައި ތިބި ކުރީ ސަރުކާރަށް ނިސްބަތްވާ އިސްވެރިން ވަކިކޮށްފައެވެ. އޭގެ އިތުރަށް ރައީސް މިއަދު ވަނީ ކޮމިޝަނަރ އޮފް ޕްރިޒަންސް އަޙުމަދު ޝިހާން ވެސް މަޤާމުން ވަކިކުރައްވައިފައެވެ. އެ މަޤާމަށް އަދި ބޭފުޅަކު ހަމަޖެއްސެވި ކަމެއް އެނގިފައެއް ނުވެއެވެ.
