އައްޑޫސިޓީއަށް ބޯކޮށްވާރޭ ވެހި ބައެއް ގެތަކަށް ގެއްލުން ވެފައިވާތީ އެ ސިޓީގެ ރައްޔިތުންނަށް އެހީވުމަށް މީދޫ ދާއިރާގެ މެމްބަރު ރޮޒެއިނާ އާދަމް ސަރުކާރަށް ގޮވައިލައްވައިފިއެވެ.
ރޮޒެއިނާ ކުރައްވައިފައިވާ ޓްވީޓެއްގައި ވިދާޅުވެފައިވަނީ ވާރޭވެހި ބައެއްގެތަކާއި މަގުތަކުގައި ފެންބޮޑުވުމުން އައްޑޫ ރައްޔިތުން ދަނީ ވަރަށްބޮޑު ތަކުލީފެއް އުފުލަމުން ކަމަށެވެ.
"އައްޑޫގައި ގަދަވިއްސާރައިގެ ސަބަބުން މަގުތަކާއި ގެތަކުގައި ފެންބޮޑުވެ ރައްޔިތުންދަނީ ވަރަށްބޮޑު ތަކުލީފު އުފުލަމުން. ސަރުކާރުން ޚާއްސަ ސަމާލުކަމެއް ދީގެން މިކަމުގައި ރައްޔިތުންނަށް އެހީތެރިކަން ފޯރުކޮށްދިނުމަށް ގޮވާލަން،" ރޮޒެއިނާ ވިދާޅުވެފައިވެއެވެ.
ރޭ އިރާކޮޅުން ފެށިގެން އައްޑުއަށް ވާރޭވެހުމުގެ ސަބަބުން ބައެއްގެތަކަށް ފެންވަދެ ފަރުނީޗަރުތަކާއި ހިފައިގެން ގުޅޭ ބައެއް ސާމާނުތަކަށް ވެސް ވަނީ ގެއްލުން ވެފައެވެ. އައްޑޫ ސިޓީ ހިތަދޫގައި ބޮޑުވެފައިވާ ފެން ހިންދުމުގެ މަސައްކަތް އެމްޑީއެފުން ގެންދަވަނީ ކުރައްވަމުންނެވެ. ގެއާއި ގޯތީގައި ބޮޑުވެފައި ފެން ހިންދުމުގެ މަސައްކަތް އެ ގެއެއްގެ މީހުން އަމިއްލައަށް ވެސް ދަނީ ކުރަމުންނެވެ.
މޫސުމާބެހޭ އޮފީހުން ވިދާޅުވެފައިވަނީ ދެކުނުގެ އަތޮޅުތަކަށް އަދިވެސް ވިއްސާރަ ކުރާނެ ކަމަށެވެ. އަދި ގުގުރުން އަކަށީގެންވާ ކަމަށާއި، ބައެއް ރަށްތަކަށް ބޯކޮށް ވާރޭވެހޭނެ ކަމަށްވެސް މޫސުމާބެހޭ އޮފީހުން ލަފާ ކުރައްވައެވެ. އުތުރާއި މެދުތެރޭގެ މޫސުން އާއްމުގޮތެއްގައި ރަނގަޅުވާނެ ކަމަށް މޫސުމާ ބެހޭ އޮފީހުން ވިދާޅުވެފައިވެއެވެ.
ވައިޖެހޭނީ ހުޅަނގުއުތުރާއި އުތުރުން، ދެކުނުގެ އަތޮޅުތަކަށް ގަޑިއަކު 07 މޭލާއި 17 މޭލާއި ދެމެދުގެ ބާރުމިނުގައެވެ. އެހެންހިސާބުތަކަށް ގަޑިއަކު 03 މޭލާއި 13 މޭލާއި ދެމެދުގެ ބާރުމިނުގައި ވައިޖެހޭނެ ކަމަށް މޫސުމާބެހޭ އޮފީހުން ވަނީ ވިދާޅުވެފައެވެ. ވިލާގަނޑުގައި ގަޑިއަކު ގާތްގަނޑަކަށް 35 މޭލު ބާރުމިނަށް ވައިގަދަވުން އެކަށީގެންވާ ކަމަށް ވެސް މޫސުމާބެހޭ އޮފީހުން ވިދާޅުވެފައިވެއެވެ.
ދެކުނުގެ ކަނޑުތައް އާދައިގެވަރަކަށް ގަދަވާނެ ކަމަށާއި، އުތުރާއި މެދުތެރޭގެ ކަނޑުތައް އާދައިގެ ވަރަކަށް މަޑުވާނެ ކަމަށް ވެސް ވިދާޅުވެފައިވެއެވެ.
