ކުރީގެ މިނިސްޓަރ އަދި ދައުލަތަށް ގިނަދުވަހު ޚިދުމަތް ކުރައްވައިފައިވާ އިއްޒަތްތެރިއެއް ކަމަށްވާ އުމަރު ޒާހިރުގެ އަނބިކަނބަލުން އަވަހާރަ ވެއްޖެއެވެ.
އުމަރު ޒާހިރުގެ އަނބިކަނބަލުން މުއުމިނާ އިބްރާހީމް އަވަހާރަވީ މިއަދު ހަވީރުގެ ވަގުތެއްގައެވެ. އަވަހާރަވީ އައިޖީއެމްއެޗުގައި ފަރުވާ ދެމުންދަނިކޮށްށެވެ. މުއުމިނާގެ ޖަނާޒާ ބޭއްވުމަށް ހަމަޖެހިފައިވަނީ މިރޭ ފަތިހު ފަތިސްނަމާދަށްފަހު އައު ސަހަރާ މިސްކިތުގައެވެ. އެ ހޮސްޕިޓަލުން އޭނާ ފަރުވާހޯއްދެވީ ކޮންކަމަކަށް ކަމެއް އެނގިފައެއް ނުވެއެވެ.
އުމަރު ޒާހިރަކީ ރައީސް މައުމޫނުގެ ވެރިކަމުގައި ދައުލަތުގެ ސީނިއަރ މަގާމަތަކެއް ފުރުއްވައި ރާއްޖެއަށް ގިނަގުނަ ޚިދުމަތްތަކެއް ކޮށްދެއްވައި ނިޝާން އިއްޒުއްދީންގެ ލަގަބު ލިބިވަޑައިގެންފައިވާ ބޭފުޅެކެވެ. އުމަރު ޒާހިރަކީ ތިލަފުށި ހިއްކެވި މޭސްތިރިއެވެ. ރައީސް މައުމޫން ސަރުކާރު ހިންގެވި ތަރައްގީގެ އެތައް މަޝްރޫއެއްގެ އެންމެ އިސްކޮށް ހުންނެވި އެއްބޭފުޅަކީ ވެސް އުމަރު ޒާހިރެވެ.
