އއ. ސަފާރީ އައިލެންޑް ރިސޯޓު (މުށިމަސްގަލި) އިން މާލެ ދަތުރުކުރަމުންދިޔަ "މިންވަރު" ނަމަކަށް ކިޔާ ދޯންޏަކުން މީހަކު ކަނޑަށް ވެއްޓިގެން ހޯދަން ފަށައިފި ކަމަށް އެމްއެންޑީއެފުން ވިދާޅުވެއްޖެއެވެ.
ކަނޑަށް ވެއްޓިގެން ހޯދަން ފަށައިފައިވަނީ އެ ދޯނީގެ ކެޕްޓަން އަލީފައުޒާންއެވެ. އޭނާއަކީ އުމުރުން އެންމެ 25 އަހަރުގެ ޒުވާނެކެވެ. އެއީ ށ.ބިލެތްފަހި، ކްރެސްޓް ގޭ މީހެކެވެ.
މި ހާދިސާގެ މަޢުލޫމާތު އެމްއެންޑީއެފް ކޯސްޓްގާޑު މެރިޓައިމް ރެސްކިޔު ކޯޑިނޭޝަން ސެންޓަރ (އެމްއާރުސީސީ) އަށް ލިބިފައިވަނީ މިރޭ 21:28 އެހައިކަންހާއިރު ކަމަށް އެމްއެންޑިއެފުން ވިދާޅުވިއެވެ.
ގެއްލުނު މީހާއާއެކު އެ ދޯނިން 3 މީހަކު ދަތުރުކުރި ކަމަށް މައުލޫމާތު ލިބިފައިވާ ކަމަށް ވެސް އެމްއެންޑީއެފުން ވިދާޅުވިއެވެ. އޭގެ ތެރޭގައި ހިމެނެނީ ގެއްލުނު މީހާގެ އިތުރަށް ދެ ބިދޭސީންނެވެ. އޭނާ ކަނޑަށް ވެއްޓި ގެއްލިފައިވަނީ މިއަދު 18:30 އެހައިކަންހާއިރު ކަމަށް ވެސް އެމްޑީއެފުން ވަނީ ވިދާޅުވެފައރވެ. އޭނާ ކަނޑަށް ވެއްޓުނުއިރު އޭނާ ލައިގެން ހުރީ ކަޅުކުލައިގެ ހެދުމެއް ކަމަށާއި، އެމީހާގެ އިސްކޮޅުގައި ގާތްގަނޑަކަށް 5 ފޫޓް ހުންނާނެ ކަމަށް މަޢުލޫމާތު ލިބިފައިވާ ކަމަށް ވެސް އެމްއެންޑީއެފުން ވިދާޅުވިއެވެ.
އޭނާ ހޯދުމުގެ މަސައްކަތުގައި އެމްއެންޑީއެފް ކޯސްޓްގާޑުގެ އުޅަނދުފަހަރުގައި ސިފައިންގެ ޑައިވަރުންނާއެކު އެ ސަރަޙައްދުގައި މިހާރު ދަނީ ހަރަކާތްތެރިވަމުންނެވެ. މި މީހާއާ ބެހޭ އެއްވެސް މަޢުލޫމާތެއް ލިބިއްޖެނަމަ ވީ އެންމެ އަވަހަށް އެމްއެންޑީއެފް ކޯސްޓްގާޑު ހިލޭ ގުޅޭ ނަންބަރު 191 އަށް މަޢުލޫމާތު ދެއްވުމަށް އެމްއެންޑީއެފުން ވަނީ އެދިފައެވެ.
