އަޑު އިވުމުން މަހްރޫމް ވެފައިވާ ކުދީންނާއި ވާހަކަ ދެއްކުމުގެ ނުކުޅެދުންތެރިކަން ހުންނަ އިންޑިއާ ކުދީންނަށް ޚާއްޞަ ޑިކްޝަނަރީ އެއް އިންޑިއާއިން ނެރެފިއެވެ.
'ދަ އިންޑިއަން ސައިން ލެންގުއޭޖް (އައި.އެސް.އެލް) ޑިކްޝަނަރީ' އުފެއްދީ އިންޑިއަން ސައިން ލެންގުއޭޖް ރިސާޗް އެންޑް ޓްރެއިނިންގ ސެންޓަރ (އައި.އެސް.އެލް.އާރް.ޓީ.ސީ) އިންނެވެ. މި ޑިކްޝަނަރީގައި އާއްމު ދިރިއުޅުމުގައި ބޭނުންކުރާ 3،000 ހިންދީ އަދި އިނގިރޭސި ލަފުޒާއި އެ ލަފުޒު ރަމްޒުކޮށްދޭ ނިޝާންތައް ހިމަނާފައި ވެއެވެ.
އިންޑިއަން ސައިން ލެންގުއޭޖް ޑީކްޝަނަރީ ނެރެފައިވަނީ ދެ ފޯމެޓަކަށެވެ. އެއީ ޕްރިންޓާއި ވީޑިއޯ ފޯމެޓެވެ. ޑިކްޝަނަރީ ނެރުމަށް ނިއު ދިއްލީގައި ބޭއްވި ރަސްމިއްޔާތުގައި ވާހަކަ ދައްކަވަމުން ޔޫނިއަން ސޯޝަލް ޖަސްޓިސް އެންޑް އެމްޕަވަރމަންޓް މިނިސްޓަރ ތާވަރްޗާނދު ގީލޯތް ވިދާޅުވި ގޮތުގައި މި ޑިކްޝަނަރީގެ މަގްސަދަކީ އަޑު އިވުމުން މަހްރޫމްވެފައިވާ ކުދީންނާއި އަޑު އިވުމުގެ ނުކުޅެދުންތެރިކަން ހުންނަ ކުދީންނަށް މުއާމަލާތް ކުރުމުގައި ދިމާވާ ހުރަސްތައް ނައްތައިލުމެވެ. އަދި އިންޑިއަން ސައިން ލެންގުއޭޖް ބޭނުންކޮށްގެން މައުލޫމާތު ފޯރު ކޮށްދިނުމެވެ.
އޭނާ ވިދާޅުވީ ވަރަށް އަވަހަށް ގިނަ އާ ލަފުޒު ޑީކްޝަނަރީ އަށް އިތުރު ކުރެވޭނެއެވެ. ވީހާވެސް ގިނަ މީހުން މި ޑިކްޝަނަރީ ބޭނުންކުރާނެ ކަމަށް އުއްމީދު ކުރައްވާ ކަމަށާއި ސައިން ލެންގުއޭޖްގެ ފައިދާ ގިނަ ބަޔަކަށް ކުރާނެ ކަމަށް އުއްމީދު ކުރައްވާ ކަމަށް ވެސް މިނސްޓަރު ވިދާޅުވިއެވެ.
އިންޑިއާގެ އެކި ސަރަހައްދު ތަކުގައި ދިރިއުޅޭ އަޑު އިވުމުން މަހްރޫމް ވެފައި ތިބި ކުދީންނާއި އަޑު އިވުމުގެ ނުކުޅެދުންެތެރިކަން ހުންނަ ކުދީން ބޭނުންކުރާ ގިނަ ނިޝާންތަކެއް ޑިކްޝަނަރީގައި ހިމަނާފައިވެއެވެ. މިނިސްޓްރީގެ ސީނިއަރ އޮފިޝަލަކާ ހަވާލާދީ ފަސްޓް ޕޯސްޓުގައި ރިޕޯޓްކޮށްފއަިވާ ގޮތުގައި މި ޑިކްޝަނަރީ އަކީ ސަރުކާރުގެ އޮފިޝަލުންނާއި، މުދައްރިސުންނާއި، އެހެނިހެން ބޭބޭފުޅުންނާއި އާއްމުންނަށް ސައިން ލެންގުއޭޖް ދަސްކުރާށާއި ބޭނުން ކުރަން އެހީއަކަށް ވާނެއެވެ.
2011ވަނަ އަހަރުގެ ބޯހިިމެނުމުގެ ތަފާސް ހިސާބުތަކަށް ބަލާއިިރު އިންޑިއާގައި އަޑު އިވުމުން މަހްރޫމްވެފައިވާ 50،71،007 މީހުުން އެބަތިއްބެވެ. އަދި ވާހަކަ ދެއްކުމުގެ އެކި އެކި ނުކުޅެދުންތެރިކަން ހުރި 19،98،535 އެބަތިއްބެވެ.
ޑިކްޝަނަރީ ނެރުނު ރަސްމިއްޔާތުގައި ޑިކްކޝަނަރީގެ 300 ކޮޕީ ބަހާފައިވެއެވެ. އަދި ޑީކްޝަނަރީގެ ޑީވީޑީ ވެސް މިނިސްޓްރީގެ ވެބްސައިޓަށް ވަރަށް އަވަހަށް އަޕްލޯޑް ކުރާނެ ކަމަށްވެއެވެ. އައި.އެސް.އެލް.އާރް.ޓީ.ސީ އިން މި ޑިކްޝަނަރީގެ މަސައްކަތަށް ދޮޅު އަހަރު ހޭދަކުރިއެވެ.
ޑީކްޝަނަރީގައި ހިމެނޭ ލަފުޒުތައް ބަހާފައިވަނީ ފަސް ގިންތިއަކަށެވެ. އެއީ އާއްމު ދިރިއުޅުމުގައި ބޭނުންކުރާ ލަފުޒާއި، ގާނޫނީ ދާއިރާ އާއި އިލްމީ ދާއިރާ އާއި، ބޭސްވެރިކަމުގެ ދާއިރާ އާއި އަދި ޓެކނިކަލް ދާއިރާގައި ބޭނުންކުރާ އިސްތިލާހުތަކެވެ.
އާއްމު ދިރިއުޅުމުގައި ބޭނުންކުރާ އިސްތިލާހުތަކުގެ ތެރޭގައި ހިމެނެނީ ދުވަހީ ދިރިއުޅުމުގައި މުއާމަލާތް ކުރަން ބޭނުން ކުރާ ލަފުޒެވެ. ގާނޫނީ ދާއިރާގައި 237 ގާނޫނީ އިސްތިލާހާއި އެ އިސްތިލާހުތައް ބޭނުންކުރާ ގާނޫނީ ހާލަތްތައް ދައްކުވައިދޭ ވީޑޯއާ ހިމަނާފައިވެއެވެ.
އިލްމީ ކެޓެގަރީގައި ފިޒިކްސް އާއި ބަޔޮލޮޖީ އާއި ހިސާބާއި ޖޯގްރަފީ ފަދަ މާއްދާތަކުގައި ބޭނުންކުރާ އިލްމީ އިސްތިލާހުތައް ހިމަނާފައިވެއެވެ. މިގިންތީގައި 212 އިސްތިލާހަކަށް 229 ވީޑިއޯ ހިމާނފައިވެއެވެ.
މެޑިކަލް ކެޓެގަރީގައި ބޭސްވެރިކަމުގެ ދާއިރާގައި ބޭނުން ކުރާ 200 އިސްތިލާހާއި 200 ނިޝާން ހިމަނާފައިވެއެވެ.
ޓެކްނިކަލް ކެޓެގަރީގައި ވޮކޭޝަނަލް ޓްރެއިނިންގ އާއި ކޮމްޕިއުޓަރ ކޯސްތަކުގައި ބޭނުންކުރާ 204 ޓެކްނިކަލް އިސްތިލާހަކަށް 206 ވީޑިއޯ ހިމަނާފައިވެއެވެ.
މައުލޫމާތު ނަގާފައިވަނީ ފަސްޓް ޕޯސްޓް އިން
