ބްރެޒިލްއިން ފުރައިގެން ސިންގަޕޫރަށް ދަތުރުކުރަމުންދިޔަ އާގުބޯޓެއްގައޮތް ބަލިމީހާކު އެމްއެންޑީއެފް ސަދަން އޭރިއާގެ އެހީގައި ހިތަދޫ ރީޖަނަލް ހޮސްޕިޓަލަށް ގެނެސް ފަރުވާ ދިނުމަށްފަހު ދޫކޮށްލައިފިއެވެ.
އެޗުއާރުއެޗުގެ ޑިރެކްޓަރ ޝާހު ސައީދު ވިދާޅުވީ އެމީހާއަށް ފަރުވާ ދިނުމަށްފަހު މިއަދު މެންދުރުފަހު ހޮސްޕިޓަލުން ދޫކޮށްފައިވާ ކަމަށެވެ. އޭނާގެ ސީރިއަސް އެއްވެސް ކަމެއް ދިމާވެފައި ނުވާކަމަށްވެސް ޝާހު ވިދާޅުވިއެވެ.
މާޝަލް އައިލެންޑްސްގެ "އެމްވީ ޔަސަ އީގަލް" ނަމަކަށްކިޔާ އާގު ބޯޓުގައި ދަތުރުކުރި އެމީހާއަށް ސިއްހީ އަވަސް ފަރުވާއަށް ބޭނުންވެހެން އެމްއެންޑީއެފް ގައި އެދިފައިވަނީ ރޭ 19:30 ގައެވެ.
ތުރުކީއަށް ނިސްބަތްވާ އެމީހާ އެޗުއާރުއެޗަށް ގެނެސްފައިވަނީ އެމްއެންޑީއެފްގެ އެހީތެރިކަމާއެކު ޑޮކްޓަރުންގެ ޓީމެއް އެބޯޓަށް ގޮސްގެންނެވެ. އޭރު އެ ބޯޓު އޮތީ އައްޑޫ ސިޓީ ހިތަދޫގެ ދެކުނުން 12 ނޯޓިކަލް މޭލު ބޭރުގައެވެ.
އެމްއެންޑީއެފްއިން އެމީހާ އެޗުއާރުއެޗަށް ގެނެސްފައިވަނީ ރޭ 23:30 އެހައިކަންހާއިރުއެވެ.
