ސައޫދީ އަރަބިއްޔާއިން ދުނިޔޭގައި 'ވައްހާބީ' ފިކުރު ފަތުރަން މަސައްކަތްކުރީ ހުޅަނގުން އެކަމަށް އެދިގެން ކަމުގައި ސައޫދީ އަރަބިއްޔާގެ ވަލީއަހުދު މުޙައްމަދު ބިން ސަލްމާން ވިދާޅުވެއްޖެއެވެ. މިހާރު އެމެރިކާއަށް ކުރައްވަމުން ގެންދަވާ ދަތުރުފުޅުގައި އެމެރިކާގެ ނޫސްވެރިންނާ ބައްދަލުކުރައްވަމުން އޭނާ ވިދާޅުވީ ސައޫދީން ދުނިޔޭގެ ކަންކޮޅުތަކުގައި ދީނީ މަދަރުސާތަކާއި މިސްކިތައް ބިނާކުރަން ކުރި މަސައްކަތަކީ ފިނި ހަނގުރާމައާ ގުޅިފައިވާ މަސައްކަތެއް ކަމުގައެވެ. އޭނާ ވިދާޅުވި ގޮތުގައި އޭރު ހުޅަނގުގެ ރަހުމަތްތެރި ގައުމުތަކުން ސައޫދީ ފައިސާ އެކަމަށް ހޭދަކުރަން އެދުނީ ސޮވިއެޓް ޔުނިއަންގެ ނުފޫޒު އިސްލާމީ ދުނިޔޭގައި ގަދަ ވިޔަ ނުދިނުމަށެވެ.
"އެކަން ފެށުނު ފަހުން އައި ސައޫދީ ސަރުކާރުތައް ވަނީ ކުރިއަށް ދާންވީ މަގުން ކައްސާލާފައި. މިހާރު އަހަރުމެން ބޭނުން ވަނީ މަގަށް އެނބުރި ދާން" އޭނާ ވިދާޅުވިއެވެ. އޭނާ އިތުރަށް ވިދާޅުވީ އެފަދަ ކަންކަމަށް ސައޫދީ ސަރުކާރުން މިހާރު ޚަރަދު ނުކުރާ ކަމަށާއި، ޚަރަދުކުރަނީ ސައޫދީ އަމިއްލަ ކުންފުނިތަކުން ކަމަށެވެ.
ސައޫދީ ވަލީ އަހުދު މިމޭމުރުމުން ވާހަކަފުޅު ދައްކަވާފައި މިވަނީ 'ހައްދު ފަހަނައަޅާފައިވާ އިސްލާމީ ފިކުރު' ގެ ނުފޫޒު ސައޫދީ ތައުލީމީ ނިޒާމުގެ ތެރެއިން ފޮހެލުމަށް ސައޫދީ ތައުލީމީ މަންހަޖު ބަދަލުކުރާ ވާހަކަ ސައޫދީ ތައުލީމީ ވަޒީރު އަޙްމަދު ބިން މުޙައްމަދު އަލްޢީސާ ވިދާޅުވެފައި ވަނިކޮށެވެ.
އަންހެނުންގެ މައްޗަށް ސައޫދީގައި ކަނޑައެޅިފައިވާ ހިފެހެއްޓުންތަކަކީ އިސްލާމްދީނުގެ އެންގެވުންތަކުގައިވާ ގޮތް ނޫންކަން ސައޫދީ ދީނީ އިލްމުވެރިންނަށް ވިސްނައިދެއްވަން ވަރަށް މަސައްކަތްކުރެއްވިކަން ހާމަކުރައްވަމުން އޭނާ ވިދާޅުވީ "އަހަރެން ގަބޫލުކުރާ ގޮތުގައި އިސްލާމްދީނަކީ ބުއްދި ގަބޫލުކުރާ ކަންތައްތައް ހިމެނޭ، ސާދާ ދީނެއް. އެހެނަސް ބަޔަކު މަސައްކަތް ކުރަނީ އެދީން ހައިޖެކްކުރަން"
އޭނާ އިތުރަށް ވިދާޅުވީ ދީނީ މުއައްސަސާތަކުގެ ވެރިންނާއެކު ދިގު ބަހުސުތަކެއް ކުރައްވަން ޖެހިވަޑައިތްކަމުގައްޔާއި މިހާރު "ދުވަހެއް ދުވަހަކަށް ދީނީ މުއައްސަސާތަކުގެ ތެރޭގައި އަހުރުމެންގެ އެކުވެރިން އިތުވަމުން" ދާ ކަމުގައެވެ.
މުޙައްމަދު ބިން ސަލްމާން ސައޫދީ ވަލީއަހުދުކަމާ ހަވާލުވެވަޑައިގަތް ފަހުން ސައޫދީ އަރަބިއްޔާއަށް ބޮޑެތި ބަދަލުތަކެއް ގެންނަވަމުން ދާކަން ފާހަގަކުރެވެއެވެ.
varah varugadha dhuniye nudekey varuge shakhu sihyateh tiyeee