އިނގިރޭސިވިލާތުގައި ދިރިއުޅޭ ރަޝިޔާގެ ކުރީގެ ޑަބަލް އެޖެންޓް ސަރްގޭ ސްކްރިޕަލްއަށް ދެވުނު ނާވް ގޭހުގެ ހަމަލާއާ ގުޅިގެން ރަޝިޔާގެ ގިނަ ޑިޕްލޮމޭޓުންތަކެއް ބޭރުކުރަން ޔޫރަޕްގެ ގިނަ ގައުމުތަކަކާއި އެމެރިކާއިން ނިންމައިފިއެވެ.
ސްކްރިޕަލްއަށް ހަމަލާދިނީ ރަޝިޔާއިން ކަމަށް ބުނެ އިނގިރޭސިވިލާތުން ވަނީ ރަޝިޔާގެ 23 ޑިޕްލޮމޭޓަކު ބޭރުކޮށްލާފައެެވެ. ޔޫރަޕާއި އެމެރިކާއިން ފިޔަވަޅު މިއަަޅަނީ އިނގިރޭސިވިލާތަށް ތާއީދުކުރުމުގެ ގޮތުންނެވެ.
ރަޝިޔާއާ ދެކޮޅަށް އެންމެ ވަރުގަަދަ ފިޔަވަޅު އަޅާފައި ވަނީ އެމެރިކާއިންނެވެ. އެެމެރިކާގެ ރައީސު ޑޮނަލްޑް ޓްރަމްޕް ވަނީ ރަޝިޔާގެ 60 ޑިޕްލޮމޭޓަކު އެެމެރިިކާއިން ބޭރުވުމަށާއި، ސިޔާޓްލްގައި ހުންނަ ރަޝިޔާގެ ކޮންސިއުލޭޓް ބަންދުކުރުމަށް އަމުރުކުރައްވާފައެވެ.
ރަޝިޔާއާ ދެކޮޅަށް ގިނަ ގައުމުތަކެއް ގުޅިގެން މިހާތަނަށް އަޅާ އެންެމެ ވަރުގަަދަ ޑިޕްލޮމެޓިކް ފިޔަވަޅުގައި އީޔޫގެ މެންބަރު 16 ގައުމަކުން ރަޝިޔާގެ 33 ޑިޕްލޮމޭޓުން ބޭރުކުރުމަށް ވަނީ ނިންމާފައެވެ. އީޔޫގެ މެންބަރު ނޫން ޔޫރަޕްގެ ގައުމުތަކުން ރަޝިޔާގެ 16 ޑިިޕްލޮމޭޓުން ބޭރު ކުރާއިރު، ކެނެޑާއިން 4 އަދި އޮސްޓްރޭލިޔާއިން 2 ޑިޕްލޮމޭޓުން ބޭރުކުރާނެއެވެ.
މި ޑިޕްލޮމެޓިކް ފިޔަވަޅުތަކާ ގުޅިގެން ރަޝިޔާ ވަނީ އެކަމަށް ރައްދުދޭނެކަން ހާމަކޮށްފައެވެ. ރަޝިޔާގެ ފޮރިން މިނިސްޓްރީން ބުނީ ރަޝިޔާ ކުށްވެރިވާކަން ސާބިތުކުރެވޭ ފަދަ އެެއްވެސް ހެއްކެެއް ނެތި، ރަޝިޔާގެ ޑިޕްލޮމޭޓުން ގިނަ ގައުމުތަކަކުން ބޭރުކުރުމަކީ "އާންމު އިންސާނީ ވިސްނުން ގަބޫލު ނުކުރާ، ބައިނަލްއަގްވާމީ ގާނޫނުތަކާ ޚިލާފު"، ބަލައިނުގަނެވޭނޭ ކަމެއް ކަމުގައެވެ. އަދި އެކަމަށް ރައްދު ނުދީ މަޑުން ނުއޮންނާނޭ ކަމުގައެެވެ.
އައިސްލޭންޑުން ޑިޕްލޮމޭޓުން ބޭރުނުކުރި ނަމަވެސް، ރަޝިޔާގެ އެމްބެސެޑަރު ފޮރިން މިނިސްޓްރީއަށް ހާޒިރުކޮށްފައި ވެއެެވެ. އަދި މޮސްކޯއާއެކު މަތީ ފެންވަރުގެ ގުޅުންތައެް މެދު ކަނޑާލާނެ ކަމާއި، މިއަހަރު ރަޝިޔާގައި ބޭއްވޭ ފީފާ ވާލްްޑް ކަަޕުގައި ވެސް އައިސްލޭންޑްގެ އޮފިޝަލުން ބައިވެރިނުވާނެކަން އިއިސްލޭންޑުން ވަނީ އިއުލާނުކޮށްފައެވެ.
