އިންޑިޔާގެ ނިއުދިއްލީން އިސްރާއީލުގެ ޓެލްއަވީވަށް ދަތުރުކުރި ފްލައިޓެއް ފުރަތަމަ ފަހަރަށް ސައޫދީ ވައިގެ ސަަރަހައްދު ހުރަސްކޮށް ދަތުރުކޮށްފިއެވެ. މިއީ އިސްރާއީލަށް ދަތުރުުކުރާ ފްލައިޓަކަށް ސައޫދީ ވައިގެ ސަރަހައްދުން އުދުހެން ހުއްދަ ދިން ފުރަތަމަ ފަހަރެވެ.
އެއާ އިންޑިޔާ ފްލައިޓް އޭއައި 139 ނިއުދިއްލީން ފުރީ ބުރާސްފަތު ދުވަހު އިންޑިޔާ ގަޑިން އިރު އޮއްސި 6:26 ގައެވެ. 6 ގަޑި 16 މިނެޓްގެ ދަތަރުކަށް ފަހު ފްލައިޓް ޓެލްއަވީވަށް ޖައްސާފައި ވަނީ އިސްރާއީލު ގަޑިން ރޭ 10:12 ގައެވެ. މިއީ ތާރީޚީ ކަމެެއްގެ ގޮތުގައި ބެލެވިފައިވަނީ، މުސްލިމުންނާ ޢަދާވާތްތެރި އިސްރާއީލަށް ސައޫދީ ވައިގެ ސަރަހައްދުގެ މަތިން ދަތުރުކުރަން ލިބުމުންނެވެ. މިކަމުން ދޭހަވަނީ ސައޫދީ އަރަބިއްޔާއާއި އިސްރާއީލާ ދެމެދު ގުޅުން ރަނގަޅުވަމުން އަންނަ ކަމެވެ.
އެއާ އިންޑިޔާގެ ފްލައިޓުން އިސްްރާއީލަށް އިއްޔެ އަލަށް ދަތުރު ފެށި ނަމަވެސް، ކުރިއްސުރެ އިސްރާއީލުގެ އެލްއާލް އެއާލައިނުގެ ދަތުރުތައް ޓެލްއަވީވުން މުމްބާއީއަށް ކުރެއެވެ. އެ ދަތުރުތައް ކުރަނީ ޓެލްއަވީވުން ފުރައިގެން ރަތް ގަނޑު މަތިން ދެކުނަށް ގޮސް ޔަަމަނުގެ ދެކުނުން އިރަށް ލަނބާލައިގެން އިރަށް ގޮސް މުމްބާއީއަށެވެ. މި ގޮތަށް ދަތުރުކުރުމުން ދަތުރުގެ ވަގުތު 2 ގަޑި އިރު އިތުރުވެއެވެ.
އެއާ އިންޑިޔާގެ ދަތުރުތައް ޓެލްއަވީވަށް ފަށަންވެގެން، ސައޫދީ ވައިގެން ސަރަހައްދުގެ ތެރެއިން އުދުހުމުގެ ހުއްދަ ހޯދަން ހުށަހެޅީ އިންޑިޔާ ސަރުކާރުންނެވެ. މިކަމަށް ހުއްދަ ދިން ޚަބަރު ފާއިތުވި ފެބްރުވަރީ މަހުގެ ކުރީ ކޮޅު އިސްރާއީލުގެ ނޫސްތަކުގައި ޖެހުމުން ސައޫދީ ސިވިލް އޭވިއޭޝަން އޮތޯރިޓީން އެކަން ދޮގުކުރިއެވެ. އަދި ދަތުރުކުރުމަށް ބޭނުންވާ ހުއްދަ ސައޫދީ ސަރުކާރުން ދީފައިވާ ކަމަށް އެއާ އިންޑިޔާއިން މި މާރިޗު މަހުގެ 9 ވަނަ ދުވަހު ބުނުމުން ވެސް ސައޫދީން އެކަމާ ގުޅޭ ގޮތުން އެއްޗެކޭ ބުނެފައި ނުވެއެވެ.
ސައޫދީ ސަރުކާރުން މިކަމުގައި އެެއްޗެކޭ ނުބުންޏަސް ރޭ އެއާ އިންޑިޔާ ފްލައިޓް ސައޫދީ ވައިގެ ސަރަހައްދުގެ ތެރެއިން އިސްރާއީލަށް ދަތުރުތައް ފެށުމުން އެ ހުއްދަ ލިބިފައިވާ ކަން މިހާރު މިވަނީ ޔަގީންވެފައެވެ. ސައޫދީ އަރަބިއްޔާގެ ވައިގެ ސަރަހައްދަށް ވަނުމުގެ ކުރިން އެ ފްްލައިޓް ދަތުރުކޮށްފައި ވަނީ އޮމާނުގެ މަތިންނެވެ. އޮމާނުން އެކަމަށް ހުއްދަ ދީފައިވާކަން އެގައުމުގެ ސަރުކާރުންވެސް ޔަގީންކޮށްދީފައި ނުވެއެވެ.
