ހެރީ އާއި މެގަންގެ ކައިވެނީގެ ކޭކް ހޮއްވަވައިފިއެވެ. މި ދޭބުފުޅުން ހޮއްވެވީ 'އޯގެނިކް ލެމަން އެންޑް އެލްޑަރފްލާވަރ ކޭކް' އެކެވެ. މި ކޭކުގައި ބަހާރު މޫސުމުގެ ރަހަތައް އެކުލެވޭނެ އެވެ. އޭގެ އިތުރުން ކޭކް ޒީނަތްތެރި ކުރާނީ ބަޓަރ ކްރީމާއި ތާޒާ މަލުން ނެވެ.
ހެރީ އާއި މެގަންގެ ކޭކް އަޅާނީ ކެލިފޯނިއާގެ ޕޭސްޓްރީ ޝެފެއް ކަމުގައިވާ ކްލެއަރ ޕަޓެކް އެވެ. ކްލެއަރ އަކީ އިރުމަތީ ލަންޑަންގައި ހުންނަ ވައިލެޓް ބޭކަރީ ގެ ވެރިފަރާތެވެ. އޭނާއަކީ ލިޔުންތެރިއެއް ވެސް މެއެވެ. އޭނާގެ ކޭކްތަކުގައި ބޭނުންކުރަނީ މުޅީންވެސް އޯގެނިކް ބާވަތްތަކެވެ. މާކްލްގެ ލައިފްސްޓައިލް ވެބްސައިޓަށް އެކަމަނާ ޕަޓެކް އާއި އިންޓަރވިއު ކުރެއްވިއެވެ. މެގަންގެ ލައިފްސްޓައިލްވެބްސަޓަކީ 'ދަ ޓިގް' އެވެ. މި ވެބްސައިޓް މިހާރު ވަނީ ހުއްޓައިލައިފައެވެ.
ކެންސިންޓަންޕެލެސް އިން ޓްވީޓް ކޮށްފައިވާ ގޮތުގައި ހެރީ އާއި މެގަން ތިއްބެވީ ކައިވެނީ ގެ ހަފްލާ އަށް ވަޑައިގަންނަވާ މެހްމާނުންނާ ކޭކްގެ ރަހަ ދައްކަވައިލައްވާ ހިތްޕުޅުންނެވެ. މިދޭބުފުޅުންގެ ކައިވެންޏަށް އާއްމުންގެ ތެރެއިން 2،640 މީހަކަށް ދައުވަތު ދީފައިވެއެވެ. ހެރި އާއި މެގަން ގެ ކައިވެނީ ގެ ހަފްލާ އޮންނާނީ މޭ މަހުގެ 19ވަނަ ދުވަހު ވިންޑްސަރ ކާސްލް ގައެވެ.
ނެގީ: ޝާހީ ގަނޑުވަރުގެ ޓްވިޓަރ އިން (@KensingtonRoyal)
