މިޞްރު ސިފައިން އިސްލާމިކް ސްޓޭޓްގެ ހަނގުރާމެރިންނާ ދެކޮޅަށް ސައިނާއީގައި ކުރާ ހަނގުރާމައިގައި އިއްޔެ 36 ހަނގުރާމަވެރިންނާއި، ސިފައިންގެ 4 މީހުން މަރުވެފައިވާ ކަމަަށް މިޞްރުން ބުނެފިއެވެ. މަރުވި ސިފައިންގެ މީހުންގެ ތެރޭގައި އޮފިސަަރަކުވެސް ހިމެނެއެވެ.
ރައީސު ޢަބްދުލްފައްތާޙު އައްސީސީ ވަނީ ސައިނާއީގައި ހަރަކާތްތެރިވާ އިސްލާމިކް ސްޓޭޓް ހަނގުރާމަވެރިން މުޅިން ނައްތާލުމަށް ތިންމަސްދުވަހުގެ އޮޕަރޭޝަނެެއް ފާއިތުވި ފެބްރުވަރީ މަހުގެ 9 ވަނަ ދުވަހު ފައްޓަވާފައެވެ.
އުތުރު އަދި މެދުތުރޭ ސައިނާއީގައި ސަލާމަތީ ބާރުތަކާ ބަދަލުކުރެވުނު ޙަމަލާތަކެއްވައި "ތަކްފީރީ ހަނގުރާމަވެރިން"ގެ 30 މީހުން މަރުވެފައިވާ ކަމަށް މިޞްރުގެ އަސްކަރިިއްޔާއިން ނެރުނު ބަޔާނެއްގައި ބުނެފައި ވެއެވެ. އަދި ފުލުހުންނާ ހަނގުރާމަވެރިންނާ ދެެމެދު ބަދަލުކުރެވުނު ބަޑީގެ ހަމަލާތަކެއްގައި "ތަކްފީރީ ހަނގުރާމަވެރިން"ގެ ނުރައްކާތެރި 6 މީހަކު މަރާލެވިފައިވާ ކަމަށް ވެސް ބަޔާނުގައި ވެއެވެ.
ބަދަލުކުރެވުނު ހަމަލާތަކުގައި ސިފައިންގެ އޮފިސަރަކާ، ސިފައިންގެ ތިން މީހުން މަރުވެފައި ވާއިރު، 3 އޮފިސަރުންނާ، ސިފައިންގެ 5 މީހުން ޒަޚަމްވެފައި ވެއެވެ.
މިޞްރު ސިފައިން ސައިނާއީގައި ހަނގުރާމަވެރިންނާ ދެކޮޅަށް ބޮޑު އޮަޕަރޭޝަނެއް ހިންގަން ރައީސު ޢަބްދުލްފައްތާޙު އައްސީސީ އެންގެވީ 2017 ވަނަ އަހަރުގެ ނޮވެމްބަރު މަހު ސައިނާއީގެ ޞޫފީ މިސްކިތަކަށް ދިން ހަމަލާއެެއްގައި 300 މީހުން މަރުވުމާ ގުޅިގެންނެވެ. 2013 ވަނަ އަހަރު ގެނައި އިންޤިލާބެއްގައި ރައީސު މުޙައްމަދު މުރްސީ ވެރިކަމުން ދުރުކޮށް ސިފައިން ވެރިކަމަށް އެރި ފަހުން، ސައިނާއީގައި ހަނގުރާމަވެރިންގެ ހަރަކާތްތައް ވަނީ ވަރަށް ބޮޑަށް އިތުރުވެފައެވެ. ފަހުން އެބައިމީހުން ވަނި އިސްލާމިކް ސްޓޭޓާ ގުޅިފައިވާކަން އިއުލާނުކޮށްފައެވެ.
