މިޔަންމާގައި ރޮހިންޔާ މުސްލިމުންނަށް މެދު މުޢާމަލާތްކުރާ ގޮތާ ގުޅިގެން އެގައުމުގެ ލީޑަރު އާންގް ސަން ސޫޗީގެ މައްްޗަށް އޮސްޓްރޭލިޔާގެ އިންސާނީ ހައްގުތަކާ ބެހޭ ވަކީލުންގެ ޖަމާއަތެއް ކަމުގައިވާ ހިއުމަން ރައިޓްސް ފޯ އޯލްއިން ދައުވާ އުފުލައިފިއެވެ.
"އަހަރުމެން ވަނީ އިންސާނިއްޔަތާ ޚިިލާފު ޖަރީމާ ހިންގުމުގެ ކުށުގައި އާންގް ސަން ސޫޗީއާ ދެކޮޅަށް ދައުވާކުރުމަށް ވިކްޓޯރިއާ ސްޓޭޓްގެ މެޖިސްޓްރޭޓްސް ކޯޓަށް ފޯމު ހުށަހަޅާފައި. ޚާއްސަކޮށް ގަދަކަމުން ރަށުން ބޭރުކޮށްލުމާއި، ބާރުގެ ބޭނުންކޮށްގެން ދިރިއުޅޭތަން ބަދަލުކުރުމުގެ ޖަރީމާ ހިންގުމުގެ ކުށުގައި." ހިއުމަން ރައިޓްސް ލޯޔަރ އެލިސަން ބެޓިސަން ބުންޏެވެ. ވަކީލުން މިދައުވާ އުފުލީ އޮސްޓްރޭލިޔާގައި ދިރިއުޅޭ ރޮހިންޔާ މީހުންގެ ފަރާތުންނެވެ.
އެމީހުން ތުހުމަތުކުރާ ގޮތުގައި، މަދަނީ އާބާދީއަކާ ދެކޮޅަށް ރޭވިގެން ފުޅާ ދާއިރާއެއެްގަައި ހަމަލާތައް ދެވުނީ އާންގް ސަން ސޫޗީއަށް އެނގިގެެންނެވެ. އަދި އެކަން ހުއްޓުވުމަށް އޭނާ އެެއްވެސް މަސައްކަތެއް ކުރައްވާފައި ނުވެއެވެ. ސޫޗީ މިހާރު ހުންނެވީ އާސިޔާން-އޮސްޓްރޭލިޔާ ސަމިޓުގައި ބައިވެރިވެވަޑައިގެންނެވުމަށް ސިޑްނީގައެވެ.
އުތުރު މިޔަންމާގެ ރަޚައިން ސްޓޭޓްގައި ދިރިއުޅެމުން ދިޔަ ރޮހިންޔާ މުސްލިމުންގެ ތެރެއިން 7 ލައްކައަށްވުރެ ގިނަ މީހުން ފާއިތުވި އޯގަސްޓު މަހުގެ 25 ވަނަ ދުވަހުން ފެށިގެން ބަންގްލަދޭޝްއަށް ހިޖުރަކުރުމަށް ވަނީ މަޖުބޫރުކުރެވިފައެވެ. މިޔަންމާގެ އަަސްކަރިއްޔާ އިން ހިންގި މިއަމަލު އދ. އިން ސިފަކޮށްފައި ވަނީ ނަސްލެއް ނައްތާލަން ހިންގުނު އަމަލެއްގެ ގޮތުގައެވެ.
މި ދައުވާއާ ގުޅިގެން އޮސްޓްރޭލިޔާގެ އެޓާނީ ޖެނެރަލް ވިދާޅުވީ ސަރުކާރުތަކުގެ ވެރިންނާއި، ޚާރިޖީ ވަޒީރުންނަށް މިފަދަ ދަޢުވާތަކުން ރައްކާތެރިކަން ލިބިގެންވާ ކަމުގައެވެ. އެހެންނަމަވެސް، ވަކީލުންގެ ޖަމާޢަތުން ބުނީ އާންގް ސަން ސޫޗީއަކީ ރަސްމީ ސިފައިގައި މިޔަންމާ ސަރުކާރުގެ އެންމެ އިސް ވެރިޔާ ނޫންކަމުގައެވެ. އަދި ސޫޗީގެ މައްޗަށް ކުރެވޭ ދަޢުވާއަކީ އޭނާގެ ޚާރިޖީވަޒީރުކަމުގެ މަސްއޫލިއްޔަތާ އެއްވެސް ގުޅުމެއް ހުރި ކަމެއް ނޫންކަމުގައެވެ. އެހެންވީމާ، އޭނާއަށް ރައްކާތެރިކަން ލިބިގެން ނުވާނެ ކަމުގައެވެ.
