ވަޒީރު ޑރ. މަރިޔަމް މަރިޔާ ފުވައްމުލައް ސިޓީގައި ދަނޑުވެރިކަމުގެ ގައުމީ ލެބޯޓަރީ ރަސްމީކޮށް އިފްތިތާހުކުރައްވައިފިއެވެ.
މި ލެބޯޓަރީ ޚާއްޞަކުރެވިފައިވަނީ ދަނޑުވެރިކަމުގެ ދާއިރާއިން ގައުމީ ފެންވަރުގައި ހިންގޭ ދިރާސާތަކާއި، ބަލި ދެނެގަތުމުގެ ވަސީލަތްތަކާއި، ހާއްސަ ލެބޯޓަރީގެ އިންފްރާސްޓްރަކްޗާގެ މަދުކަމުގެ ސަބަބުން ދިމާވާ އުނދަގޫތަކަށް ހައްލު ހޯދައިދިނުމަށެވެ. މިކަމުގެ ސަބަބުން ދަނޑުތަކުގެ އުފެއްދުންތެރިކަމާއި، ބަލިތަކާއި ފަނިފަކުސާ ކޮންޓްރޯލް ކުރުމުގެ އިތުރުން ގައުމީ ބަޔޯސެކިއުރިޓީ ވަރުގަދަކޮށްދެއެވެ.
ދަނޑުވެރިކަމުގެ ގައުމީ ލެބޯޓަރީން ހިދުމަތްތައް ފޯރުކޮށްދިނުމަށް ހަމަޖެހިފައިވަނީ ދަނޑުވެރިންގެ އިތުރުން، ދިރާސާކުރާ ފަރާތްތަކާއި، އެކްސްޓެންޝަން އޮފިސަރުންނާއި، ސިޔާސަތު ކަނޑައަޅާ ފަރާތްތައް ވެސް ހިމެނޭ ގޮތަށެވެ. އެގޮތުން، ރާއްޖޭގެ އެކި ކަންކޮޅުތަކުގައި ދެމެހެއްޓެނިވި، މޫސުމަށް ހޭނޭ، އަދި ރައްކާތެރި ދަނޑުވެރިކަން ކުރިއެރުވުމުގައި ލެބޯޓަރީން މުހިންމު ދައުރެއް އަދާކުރާނެއެވެ.
މި ލެބޯޓަރީ ގާއިމުކުރެވިފައިވަނީ ޔޫއެންޑީޕީގެ ޕްރޮޖެކްޓް ފޯ ޑިވެލޮޕިންގ ސަސްޓެއިނަބަލް އެގްރިކަލްޗަރަލް އިކޮނޮމީ (ޕީ.ޑީ.އެސް.އޭ.އީ) ގެ ދަށުންނެވެ. މި މަސައްކަތަށް ޖަޕާން ސަރުކާރުގެ އެހީތެރިކަން ލިބިފައިވާއިރު، މި ޕްރޮޖެކްޓް ތަންފީޒުކުރެވިފައިވަނީ ޔޫ.އެން.ޑީ.ޕީ މެދުވެރިކޮށް، ދަނޑުވެރިކަމާއި ދިރޭތަކެއްޗާބެހޭ ވުޒާރާއާ ގުޅިގެންނެވެ.
އަދި މީގެ އިތުރުން ވޯލްޑް ބޭންކާއި އިފާޑް ގެ އެހީތެރިކަން މިވުޒާރާގެ ފަރާތުން ޝުކުރުވެރިކަމާއެކު ފާހަގަކުރެއެވެ.