އިނގިރޭސިވިލާތުގެ ބައެއް ސަރަހައްދުތަކުގައި ދިރިއުޅޭ މީހުންނަށް ޕޯސްޓް މެދުވެރިކޮށް ލިބެމުންދާ، ޓެރަރިޒަމަށް ހިތްވަރުދޭ ސިޓީއެއްގެ މައްސަލަ އިނގިރޭސި ކައުންޓަރ ޓެރަރިޒަމް ފުލުުހުން ތަހުގީގުކުރަން ފަށައިފިއެވެ.
03 އޭޕްރީލް 2018 ގައި "މުސްލިމަކަށް އަދަބުދޭ ދުވަސް" ފާހަގަކުރުމަށް މުސްލިމަކަށް ނުވަތަ އިސްލާމީ ތަނަށް ގޯނާއެެއްކޮށް ގެއްލުމެއް ދީފި މީހަކަށް ހަގީގަތް ނޭނގޭ ޕޮއިންޓްތަކެއް ލިބޭކަމަށް ބުނާ މިސިޓީ ލަންޑަނާއި، ޔޯކްޝަޔަރ އަދި ވެސްޓްމިޑްލޭންޑް ސަރަހައްދުގެ ބައެެއް ގެތަކަށް ވަނީ ލިބިފައެވެ.
"އެމީހުން ވަނީ ތިބާއަށް އަނިޔާކޮށްފައެވެ. އެމީހުންވަނީ ތިބާ ލޯބިވާމީހުން ވޭން އުފުލަން ޖައްސާފައެވެ. އެމީހުން ވަނީ ތިބާއަށް ތަދާއި ހިތްދަތިކަން ދީފައެވެ. މިކަމާ މެދު ތިބާ ކުރަނީ ކޮންކަމެއް ހެއްޔެވެ؟" އެ ސިޓީގައި ވެއެވެ.
މުސްލިމަކާ ދިމާއަށް ހުތުރު އެއްޗެހި ކިޔައިފިނަމަ 10 ޕޮއިންޓު، މުސްލިމް އަންހެެނެެއްގެ ބުރުގާ ދަމައިގެންފިނަމަ 25 ޕޮއިންޓު، މުސްލިމެއްގެ މޫނަށް އެސިޑް ޖަހައިފިނަމަ 50 ޕޮއިންޓު، މުސްލިމެއްގެ ގައިގައި ތަޅައިގެންފިނަމަ 100 ޕޮއިންޓު، މިސްކިތަކަށް ބޮމުގެ ހަމަލާއެެއް ދީފިނަމަ 1000 ޕޮއިންޓު އަދި "މައްކާ ނިއުކް" ކޮށްފިނަމަ 25000 ޕޮއިންޓު ލިބޭނެކަމަށް ސިޓީގައި ބުނެފައި ވެއެވެ.
ލަންޑަންގެ މެޓްރޮޕޮލިޓަން ޕޮލިސް އިން ބުނީ މައްސަލަ ތަހުގީގުކުރަމުން އަންނަ ކަމުގައެވެ. "މެޓްެރޮޕޮލިޓަން ޕްލިސްއިން މުޖުތަަމައުގައިި ނަފުރަތު އުފައްދަން ހިންގާ އެއްވެސް ޢަމަލަކަށް ފިޔަވަޅު ނައަޅައި ދޫކޮށްނުލާނެެ. މިފަދަ އެއްވެސް ހަމަލާއެެއްގެ ޝިކާރައަކަށް ވެއްޖެ ކަމަށް ގަބޫޫލުކުރާ ކޮންމެ މީހަކު އެކަން ފުލުުހުންނަށް ރިޕޯޓްކުރޭ. އެކަން ރަނގަޅަށް ތަހުގީގުކުރެވޭނެ." މެޓްރޮޕޮލިޓަން ޕޮލިސްގެ ތަރުޖަމާނު ބުންޏެވެ.
ނަސްލީ އަދި ދީނީ ނަފުރަތާ ދެކޮޅަށް މަސައްކަތްކުރާ ޖަމާއަތެއް ކަމުގައިވާ ޓެލްމާމާ ޔޫކޭ ގެ އިސް މަސްއޫލުވެރިއަކު ވިދާޅުވީ ބްރެޑްފޯރޑް، ލެސްޓަރ، ލަންޑަން، ކާޑިފް އަދި ޝެފީލްޑްގައި ދިިރިއުޅޭ މީހުން އެސިޓީ ލިބިގެން ގުޅަމުންދާ ކަމުގައެވެ. "އެމީހުން ސުވާލުކުރަމުން ދަނީ އެމީހުންނަށް އަމާންކަން އެބައޮތްހޭ، އެމީހުންގެ ކުދިން ބޭރަށް ނުކުމެ ކުޅެ އުޅުން ރައްކާތެރިހޭ، އަަހަރުމެން އެބައިމީހުން ކައިރީ ބުނަމުން މިދަނީ ކަންބޮޑު ނުވެ ހަމަޖެހިގެން ތިބޭށޭ. އެފަދަ ސިޓީއެއް ލިބިއްޖެ ނަމަ ފުލުހުންނަށް އަންގާށޭ." ޓެލްމާމާގެ ޑިރެކްޓރ އީމާން ޢަޠާ ވިދާޅުވިއެވެ.
އިނގިރޭސިވިލާތުގައި 2.5 މިލިއަަނަށްވުރެ ގިނަ މުސްލިމުން ދިރިއުޅެއެވެ. މުސްލިމުންނަކީ އެޤައުމުގައި ކްރިސްޓިއަނުން ފިޔަވައި އެންމެ ބައިބޯ އާބާދީއެވެ.
ޚަބަރު: އަލްޖަޒީރާ، ބީބީސީ، ޑެއިލީމެއިލް
