މޮރިޝަސްގެ ރައީސާ އަމީނާ ގުރީބް-ފަކީމް އިސްތިއުފާދެއްވަން ނިންމަވައިފި ކަމުގައި އެޤައުމުގެ ބޮޑުވަޒީރު ޕްރަވިންދް ޖަަގަނޯތު އިއުލާންކުރައްވައިފިއެވެ. " (މޮރިޝަސް) ޖުމްހޫރިއްޔަތުގެ ރައީސާ ވަނީ އިސްތިއުފާ ދެއްވާނެ ވާހަަކަ އަހަރެންގެ ގާތުގައި ވިދާޅުވެފައި. އަދި އަހަރުމެން ވަނީ އިސްތިއުފާ ދެއްވާނެ ތާރީޚަކާ މެދު އެއްބަސް ވުމަކަށް އައިސްފައި." އިސްތިއުފާ ދެއްވާނެ ތާރީޚެއް ހާމަނުކުރައްވައި ބޮޑުވަޒީރު ޖަގަނޯތު ވިދާޅުވިއެވެ. އެހެންނަަމަވެސް، އަންނަ ހަފުތާގައި ފާހަގަކުރާ މޮރިޝަސްގެ މިނިވަންކަމުގެ ރަންޔޫބީލަށް ފަހު އޭނާ އިސްތައުފާ ދެއްވާނެކަން ވަނީ އެނގިފައެވެ.
"ގައުމުގެ މަސްލަހަތު އަންނާނީ އެންމެ ކުރިއަށް. އަދި ދުނިޔޭގައި ދިރިއޮތް ޑިމޮކްރަސީއެެއްގެ ސިފައިގައި މޮރިޝަސް ފެންނާތީ އަހަރެން ވަރަށް ފަޚުރުވެރިވޭ" އޭނާ އިތުރަށް ވިދާޅުވިއެވެ.
އެފްރިކާގެ ޤައުމެއްގައި ހުންނެވި ހަމައެކަނި އަންހެން ރައީސު ޤުރީބް-ފަކީމްގެ މައްޗަށް ކުރެވެނީ ހިލޭސާބަހަށް މަސައްކަތްކުރާ ޖަމްއިއްޔާއަކުން އޭނާއަށް ހަދިޔާކުރި ކްރެޑިޓް ކާޑަކުން އެތައް ހާސް ޑޮލަރެއްގެެ ހެދުމާއި، ގަހަނާއާއި، އަމިއްލަފުޅު ބޭނުންމަށް އެހެންތަކެތި ބައްލަަވައިގަތުމުގެ ތުހުމަތެެވެ. މޮރިޝަސްގެ ދުވަހު ނޫހެއް ކަމުގައިވާ ލެ އެކްސްޕްރެސް އިން ވަނީ ލަންޑަނުގައި ރަޖިސްޓްރީ ކުރެވިފައިވާ ޖަމްއިއްޔާ، ޕްލެނެޓް އާތު އިންސްޓިޓިއުޓް (ޕީއީއައި) އިން ހަދިޔާކުރި ކްރެޑިޓް ކާޑުން އޭނާ ކުރައްވާފައިވާ ވިޔަފާރީގެ ބޭންކް ސްޓޭޓްމަންޓެއް ޝާއިޢުކޮށްފައެވެ. އެ ނޫހުން ބުނާގޮތުގައި އޭނާއަށް އެކާޑު ހަދިޔާކުރެވުނީ އެޖަމްއިއްޔާގެ މުސާރަލިބިވަޑައިނުގަންނަވާ ޑިރެކްޓަރެއްގެ ގޮތުގައި މަސައްކަތްކުރައްވާތީއެވެ.
ޕީއީއައިގެ އެެއް ޑިރެކްޓްރަކީ އެންގޯލާގެ ވިޔަފާވެރިޔާ އަލްވާރޯ ސޮބްރީނޯއެވެ. އޭނާއަށް ވަނީ މޮރިޝަސްގައި އިންވެސްޓްމަންޓް ބޭންކެއް ހުޅުވުމުގެ ހުއްދަ ލިބިފައި ކަމަށް ލެ އެކްސްޕްރެސް ނޫހުން ބުނެއެވެ. ރައީސާ ގުރީބް-ފަކީމް ނަހަމަގޮތުގައި ވަަކިފަރާތަށް ފައިިދާ ހޯއްދަވައިދެއްވުމަށް ހަދިޔާ ގަބޫލުކުރެއްވުމުގެ ތުހުމަތުތައް ކުރެވެން ފެށީ އެހެންވެގެންނެވެ.
ރައީސާ ގުރީބް-ފަކީމް އިސްތިއުފާދެއްވަން ނިންމެވީ އެޤައުމުގެ ޤާނޫނު ހަދާ މަޖިލީހަށް އޭނާ މަޤާމުން ވަކިކުރުމުގެ މަައްސަލަ ވަައްދަން ސަރުކާރުން ނިންމުމާ ގުޅިގެންނެވެ. އޭނާ ވިދާޅުވީ އިސްތިއުފާ ދެއްވިޔަސް އޭނާ ކުށެއް ނުކުރައްވާ ކަމުގައެވެ. އަދި އޭނާ ބޭނުންކުރެއްވި ފައިސާ އަނބުރާ ދައްކަވާފައިވާ ކަމުގައެވެ.
އަމީނާ ގުރީބް-ފަކީމަކީ މަޝްހޫރު ސައިންޓިސްޓެކެވެ. ޤައުމީ އުފެއްދުންތެރިކަމުގެ ނިސްބަތުން ބޮަލަކަށް ޖެހޭވަރަށް ބަލާއިރު އެފްރިކާގެ ތިންވަނައަށް އެންމެ މުއްސަނދި ޤައުމު މޮރިޝަސްގެ ރައީސުކަމަށް އޭނާ 2015 ވަނަ އަހަރު ހޮވިވަޑައިގަތީ އެޤައުމުގެ ޤާނޫނު ހަދާ މަޖިލީހުގެ އިއްތިފާޤުންނެވެ. އިންޑިޔާ ކަނޑުގައި އެފްރިކާ ކައިރީގައި އޮންނަ މޮރިޝަސްގައި ރައީސު ކަމަކީ ރަމްޒީ މަޤާމެކެވެ.
ޚަބަރު: ދަ ސްޓްރެއިޓްސް ޓައިމްސް، އެފްރިކާނިއުސް.ކޮމް، ބީބީސީ
