( 6 ޖުލައި 2025 ގައި ޝާއިޢުކުރި ބަޔާގުޅޭ )
މާލިކުގެ މީހުން ، މީރަބް ހޯދައިގެން ގެންގޮސް ، ދަނޑުގެ ގުދަނެއްގައި ބަންދުކޮށްފައި ހުރިކަން އެންގިއެވެ. މީރަބް ހޯދަން އޭނާގާތަށް ސަލާންޖަހަން މުރުތަސިމް އަންނަންދެން ، ބަންދުގައި ބެހެއްޓުމަށްވެސް ޒުބޭރު އެންގިއެވެ. މީރަބް ދޫކޮށްލާނީ ، މާލިކުގެ ހުރިހާ ޝަރުތެއް ޤަބޫލު ކުރުމުންކަމުގައި ޒުބޭރު ނިންމިއެވެ. އޭނާގެ ބޭބެ ، މުރުތަސިމަށް ވިއްކާފައި އޮތްކަމަށްބުނާ ދަނޑު ، އެމީހުންނަށް އަނބުރާ ނުދެނިސް ، މީރަބް ދޫކޮށެއް ނުލާނެއެވެ. ފަތިހު ދަނޑަށްގޮސް ، މީރަބަށް ގޯނާކުރުމަށް ޒުބޭރު ހުރީ ނިޔަތްގަނެގެންނެވެ. މީހުން ނުހޭލަނިސް ، މީރަބަށް ކުރާކަމެއް އޭނާ ކުރާނެއެވެ. ޒުބޭރުގެ ޝިކާރަޔަށްވެފައިވާ އެތައް އަންހެންކުދިންނެއް އެހިސާބުގައި އުޅެއެވެ. އޭނާވަނީ ، އަނިޔާކޮށް ގަދަކަމުން ޢިއްފަތް ފޭރިގަނެ ، އެތައް އަންހެންކުދިންނެއްވެސް މަރާފައެވެ.
މުރުތަސިމްގެ މީހުން ޒުބޭރަށް ގުޅީމަވެސް ، މުރުތަސިމަށް ، އެމީހުންގެ ދަނޑުގެ ސަރަޙައްދަށް ނުވަދެވޭނެކަމަށް ޒުބޭރު އެންގިއެވެ. މުރުތަސިމްގެ އަންހެނުން މިހާރު އެއީ ، އޭނާ ބޭނުންގޮތެއް ހަދަން ލިބިފައިވާ އަންހެނެކެވެ.
އެސަރަޙައްދުގެ ކޮންމެވެސްތަނެއްގައި މީރަބް ހުރިކަމުގެ އިޙްސާސް މުރުތަސިމަށް ކުރެވުނެވެ. އެހެންކަމުން ، މީރަބް ހޯދުމުގެ މަސައްކަތް ހުއްޓާލާކަށް މުރުތަސިމް ބޭނުމެއް ނުވިއެވެ. ޒުބޭރުމެންގެ ދަނޑުގެ ސަރަޙައްދަށްވަދެގެން ނަމަވެސް ، މީރަބް ހުރިތާކުން އޭނާ މީރަބް ހޯދާނެއެވެ.
ޙަޔާ ، ފޯނުކޮށްކޮށް ވަރުބަލިވީއިރުވެސް ، މުރުތަސިމް ފޯނެއް ނުނަގައެވެ. އެކަމުގެ ރުޅިގަނޑުވެސް ޙަޔާ ބޭލީ މީރަބަށެވެ. އަންހެނުން ކައިރީގައި ހުރީމަ މުރުތަސިމް ފޯނުނަގަން ބޭނުން ނުވަނީއެވެ. ޙަޔާގެ ރުޅިގަނޑު ގަދަވެގެންގޮސް ، އަތުގައި އޮތް ފޯނު ، ހޫރައިލިއެވެ. އެ ފޯނުގޮސް ހުއްޓުނީ ، ޚާނަމްގެ ފައިބުޑަށެވެ. ޙަޔާގެ ރުޅީގެ އަސްލަކީ ، މުރުތަސިމާއެކީ މީރަބް ދިއުންކަން ޚާނަމްއަށް އެނގެއެވެ. އެކަމާ އެއްޗެތި ކިޔައިގަތްތަނާ ، މަރިޔަމްއަށް އެތަނަށް އާދެވުނެވެ. އަދި ، ރޭއްސުރެ ޙަޔާގެ ފޯނު ހަލާކުވެގެން އުޅޭވާހަކައާއި ، ޙަޔާއަށް ފޯނު ހޫރައިލެވުނީ އެހެންވެގެންކަމުގައި ބުނެ ، މަރިޔަމް ދޮގުހަދައި ޙަޔާ ސަލާމަތް ކުރުމަށް މަސައްކަތް ކުރިއެވެ. ޙަޔާގެ ފޯނު ހަލާކުވެއްޖިއްޔާ ނުއުކައި ، އެފޯނު ހެދުމަށްބުނެ ، ރުޅިއައިސް އެއްޗެތި ކިޔަމުން ޚާނަމް ދިޔަތަނުން ، މަރިޔަމްވެސް ޙަޔާއާ ދިމާލަށް އެއްޗެތި ކިޔަން ފެށިއެވެ.
ޙަޔާ އެހުންނަނީ މުރުތަސިމާހުރެ މޮޔަވެފައެވެ. ޙަޔާގެ ހިތުގައި އަޅަމުންދާ ވޭނާއި ތަކުލީފަކީ ، އެހެންމީހަކަށް ވަޒަން ކުރެވޭނެކަމެއްނޫނެވެ. މީރަބް ބޭނުންވެސް ނުވަނިސް ، އޭނާގެ ނުރުހުމުގައި ކުރެވުނު ކައިވެނީގެ ސަބަބަކަށް ޙަޔާ އަބަދުވެސް އެހަދަނީ މީރަބެވެ. ބަދު ދުޢާކޮށް އެއްޗެތިކިޔަނީ މީރަބާ ދިމާލަށެވެ. އެކަމުގައި ، މީރަބްކުރާނީ ކީއްހެއްޔެވެ ؟
މާލިކުގެ ހުއްދަނެތި ، މާލިކުގެ ދަނޑަށްވަދެގެން މުރުތަސިމްދާން ހިނގައިގަތުމާއެކީ ، އޭނާގެމީހުން އެކަން މަނާކުރިއެވެ. އެހެންނަމަވެސް ، ވީއެންމެ އަވަހަކަށް މީރަބް އޭނާގެ ލޮލަށް ފެންނަން މުރުތަސިމް ބޭނުންވިއެވެ. އެކަން ފުރިހަމަ ކުރުމަށްޓަކައި މުރުތަސިމަށް ކޮންމެފަދަ ކަމަކާ ކުރިމަތިލާންޖެހުނަސް އޭނާގެ ، ގޮތެއް ދުލެއް ނުކުރާނެއެވެ. މާލިކުގެ ދަނޑަށް ވަދެގެން ދަނިކޮށް ، މީރަބްގެ ދޯޕައްޓާ މުރުތަސިމަށް ފެނުމާއެކީ ، ވަކިންބޮޑަށް މުރުތަސިމް ކަންބޮޑުވިއެވެ. އެހެންނަމަވެސް ، މީރަބްގެ ދޯޕައްޓާ މާލިކުގެ ދަނޑުމަތިން ފެނުމާއެކީ ، އެތަނުން ތަނެއްގައި މީރަބް ހުންނާނެކަން ، މުރުތަސިމަށް ޔަޤީންވިއެވެ.
ދަނޑުގައި ބިނާކޮށްފައިވާ ޢިމާރާތްތަކާ ހަމަޔަށް ދެވުނުތަނާ ، ޒުބޭރުގެމީހުން މުރުތަސިމްގެ ކުރިބައްދައި ހުއްޓުވިއެވެ. އެއީ މާލިކުގެ ދަނޑުބިންކަމާއި ، މާލިކގެ ހުއްދަނެތި ، މުރުތަސިމަށް އެތަނަށް ނުވަދެވޭނެކަން އެންގިއެވެ. އެތަނުގައި ހަދާފައިވާ ޢިމާރާތުގައިތިބީ އެމީހުންގެ ޢާއިލާގެ އަންހެނުންކަމާއި ، އެހިސާބަށް މުރުތަސިމަށް ނުދެވޭނެކަންވެސް އެންގިއެވެ. މުރުތަސިމް އެތަނަށް ވަތްކަން އެނގިއްޖިއްޔާ ، މާލިކުއައިސް އެމީހުން ދިރިތިއްބާ ވަޅުލާނެކަމަށް ބުންޏެވެ. މުރުތަސިމްގެ މީހުންވެސް އެތައް ވަރަކަށް އާދޭސްކޮށްގެން ، އެތަނުން އެބުރި ދިއުމަށް މުރުތަސިމަށް މަޖްބޫރުވިއެވެ. މުރުތަސިމް ތަންކޮޅަކަށް ހިނގައިގަތްތަނާ ، މުރުތަސިމަށް މީރަބް ގޮވައިލިއަޑު މަޑުމަޑުން އިވުނެވެ.
މުރުތަސިމްގެ ހިނގުމަށް ހުއްޓުން އެރިއެވެ. ފަހަތަށް އެނބުރި ބަލައިލިއިރު ، ގުދަނެއްގެ އެތެރެއިން ބިއްލޫރި ދޮރެއްގައި ތަޅަމުން ، މީރަބް ، މުރުތަސިމަށް ގޮވަމުންގެންދިޔައެވެ. މުރުތަސިމްގެ މީހުން ވަގުތުން ބަޑިނަގައި ، މާލިކުގެ މީހުންނާ ދިމާލަށް ބަޑިޖަހައި އެމީހުން މައިތިރި ކުރިއެވެ. މުރުތަސިމް ދިޔަގޮތަށްގޮސް މީރަބް އަތުލަފިކޮށްގެން ނެރެ ، ގެޔަށްދާން ދުއްވައިލިއެވެ. މާލިކުގެ ދަނޑުގައި އެހިނގި ޙާދިސާގައި އިސްކޮށް ޙަރަކާތްތެރިވި ތިންމީހުންވެސް ހައްޔަރު ކޮށްގެން މުރުތަސިމް ގެންދިޔައެވެ.
ގެޔާ ހަމަޔަށް ދެވުނުއިރު ، މީރަބްގެ ހެޔެއްނެތެވެ. މުރުތަސިމްގެ އަތްދަނޑިމައްޗަށް ނަގައިގެން ގެންގޮސް އެނދުގައި މީރަބް ބޭއްވިއެވެ. ނަސީބަކުން ، އެއްވެސް މީހަކަށް ނުފެނެއެވެ. ކޮޓަރިތެރޭ މީރަބް ހޭއަރުވަން މުރުތަސިމް މަސައްކަތް ކުރަނިކޮށް ، އެތަނަށް ނޯކަރަކު އައެވެ. މީރަބާބެހޭ އެއްވެސް މަޢުލޫމާތެއް އެއްވެސް މީހެއްގެ ގާތުގައި ނުބުނުމަށް އޭނާއަށް މުރުތަސިމް އެންގިއެވެ.
ޙަޔާވެސް ޚާނަމްގާތަށްގޮސް ، މުރުތަސިމުގެ މައްޗަށް ޚާނަމްގެ ހިތުގައި ނަފްރަތު އުފެދޭނެހާ ވާހަކަދައްކައި ހެދިއެވެ. މުރުތަސިމް ދިޔަފަހުން ، ޚަބަރެއްނުވާތީ ، އެއީ މީރަބްގެ ސަބަބުން ދިމާވާ ކަންކަންކަމުގައި ޙަޔާ ބުނަމުން ގެންދިޔައެވެ. މުރުތަސިމަށް އެހުރިހާ ބަދަލުތަކެއް އެއަންނަނީ މީރަބާ ކައިވެނިކުރިފަހުންކަމުގައި ޙަޔާ ބުންޏެވެ. ޙަޔާގެ ވާހަކަތަކުން ، ޚާނަމްގެ ހިތަށް އުދަނގޫވެގެން މުރުތަސިމަށް ފޯނުކުރިއެވެ. މުރުތަސިމް ފޯނުނުނަގާ ކަނޑައިލިއެވެ. މުރުތަސިމް އޭނާގެ ފޯނު ކަނޑައިލުމުން ޚާނަމްގެ ހިތަށް ވަރަށް އުނދަގޫވިއެވެ. އެއީ ، ދުވަހަކުވެސް މީރަބްކޮށްފައިވާ ކަމެއްނޫނެވެ. މިއަދު ފޯނު ކަނޑައިލީއެވެ. މާދަމާ ، އޭނާގެ ބަސްވެސް މުރުތަސިމްގެ މައްޗަކަށް ނުވިކޭނެއެވެ. އެއީ ހަމަ މީރަބާ ކައިވެނިކުރިފަހުން ، މުރުތަސިމަށް އައި ބަދަލުތައްކަމުގައި ޚާނަމްއަށް ، ޙަޔާ އިތުރަށް ވިސްނައިދިނެވެ.
މުރުތަސިމާއެކީ ، ގޭގެ އެންމެ އިސް ސަރުދާރުވެސް ޝިކާރަކުރަން ދިޔައެވެ. އެންމެފަހުން ، އޭނާއަށްވެސް ޚާނަމް ފޯނުކުރިއެވެ. އަދި މުރުތަސިމް ކޮބައިތޯ ސުއާލު ކުރިއެވެ. އޭނާބުނިގޮތުގައި ، މުރުތަސިމްވީ ކޮޓަރީގައެވެ. އޭނާ އެބުނިވާހަކަޔަކުން ، ޚާނަމަށް ލިބުނު ޙައިރާންކަމާއި ރުޅިވެރިކަން ވަކިން ބޮޑުވިއެވެ. ފޯނު ކަނޑައިނުލާ ، މުރުތަސިމްގާތަށްގޮސް ، ޚާނަމްއަށް މުރުތަސިމާ ވާހަކަ ދެއްކޭނެގޮތް ހަދައިދިނުމަށް ، ޚާނަމް އެންގިއެވެ. އެހެނަސް ، ސަރުދާރު ބުނިގޮތުގައި ، އެއްވެސް މީހަކާ ވާހަކަ ދައްކަން ބޭނުންނުވާ ވާހަކަ މުރުތަސިމް ބުނެފައިވާކަމުގައި އޭނާ ބުންޏެވެ. އެއީ ، މުރުތަސިމް ވަރުބަލިވެފައި ހުރުމުގެ ސަބަބުންކަމުގައި ވެދާނެއެވެ. އެވާނީ ، ވަރުބަލި ފިލުމުން ، މާދަމާ މީހުންނާ ވާހަކަ ދައްކަން މުރުތަސިމް ބޭނުންވީކަމަށެވެ.
ހެނދުނު މީރަބަށް ހޭލެވުނުއިރު ، އޭނާއޮތީ ، އޭނާގެ ކޮޓަރީގައެވެ. މީރަބަށް ހޭލެވުމާއެކީ ، މުރުތަސިމްވެސް ، މީރަބްގެ ގާތަށް އައެވެ. އަދި ، މީރަބަށް އެޙާދިސާ އިއްޔެ ދިމާވީ ކިހިނެއްތޯ ސުއާލު ކުރިއެވެ. މުރުތަސިމް ގާތަކަށް ރުޅިއެއް ނާދެއެވެ. މީރަބަކަށް ، މުރުތަސިމްގެ އެ ސުއާލަށް ދޭނެ ޖަވާބެއް ކުއްލިޔަކަށް ނޭނގުނެވެ. އެހިސާބުން ، މުރުތަސިމް ގާތަށް ރުޅިއައެވެ.
" އަހަރެން އަންނަންދެން ކާރުން ނުފައިބާ އިންނާށޭ ބުނެފައި ދިޔައިމަ ، ދެންވީ ކިހިނެއް ހެއްޔެވެ ؟ އެއީ ، އަހަރެންނާއި އަހަރެންގެ ޢާއިލާގެ ޤަދަރާއި ޢިއްޒަތާގުޅިފައިވާ ކަމެކެވެ. ވީގޮތެއް ސާފުކޮށް ބުނާށެވެ ! އެގުދަނަށް މީރަބަށް ދެވުނީ ކިހިނެއް ހެއްޔެވެ ؟ " މުރުތަސިމް ބުންޏެވެ.
މީރަބް އިނީ ބިރުންގޮސް އަވަދި ވެފައެވެ. މީރަބް ކާރުން ފޭބީ ކީއްވެގެންކަމާއި ، އޭނާއަށް ފެނުނު ބަކަރީގެ ފަހަތުން ބަކައްޓާކުޅެމުން ، އޭނާއަށް އެދެވުނު ތަނަކަށް ދެވުނީކަމަށް މީރަބް ބުންޏެވެ. އެއީ ، ކޮންތަނެއްކަމެއް މީރަބަކަށް ނޭނގެއެވެ. ބަކަރިއާ ކުޅެމުން މީރަބަށް އެސަކަރާތުގައި އުޅެވުނީ ކހާއިރަކު ކަމެއްވެސް މީރަބަކަށް ނޭނގެއެވެ. އެއީ ، ގަސްތުގައި މީރަބް ކުރިކަމެއްނޫނެވެ. ވަކިހިސާބަކަށް މީރަބަށް ދެވުނުތަނާ ، ތިންމީހަކާ ދިމާވެގެން އޭނާގެ ކުރި ބެއްދިއެވެ. އަދި ، މުރުތަސިމާ ދިމާލަށް އެމީހުން ވަރަށް ހުތުރު އެއްޗެތި ކިޔެވެ. ދެމީހުންދޭތެރެއިން ޖާގައެއް ހޯދައިގެން މީރަބް ދުއްވައިގަތީއެވެ. އެންމެފަހުން ، މީރަބަށް ނުކުމެވުނީ އަނެއްކާވެސް އެމީހުންގެ ކުރިމައްޗަށެވެ. ދެން ، އެމީހުންއައިސް ގަދަކަމުން ، މީރަބް ގެންގޮސް ގުދަނެއްގައި ބަންދު ކުރީއެވެ.
މީރަބްގެ ވާހަކަ ނިމުމާއެކީ ، މުރުތަސިމް އަވަސް ހިނގުމެއްގައި އެތަނުން ނުކުތެވެ. އެދިޔަގޮތަށްގޮސް ، ބަޑިޔަށް ވަޒަންލައި ބޭރަށްދާން ތައްޔާރު ވިއެވެ. މުރުތަސިމް ދުރަށް ޖެހިލިތަނުން ، މީރަބްގޮސް ، މުރުތަސިމް ބަޑިޔަށް ލީ ވަޒަންތައް ނަގައި ހުސްކޮށްލިއެވެ. މުރުތަސިމަށް ނޭނގި ، މީރަބަށް އެކަން ކޮށްލެވުނެވެ.
މުރުތަސިމް އެދާތާކަށްދާން ދޫކޮށްލަން މީރަބް ބޭނުމެއް ނުވިއެވެ. އެއްވެސްމީހެއްގެ ފުރާނަ ، މުރުތަސިމްގެ އަތުން ގެއްލިގެންދާކަށް ، މީރަބް ބޭނުމެއްނޫނެވެ. އެހެންކަމުން ، މުރުތަސިމް ބޭރަށް ދިއުން މީރަބް މަނާކުރިއެވެ.
މީރަބްގެ ބަސް ޤަބޫލުނުކޮށް ، މުރުތަސިމް ނުކުމެގެން ދިޔައެވެ. އޭނާ ދިޔަގޮތަށް ދިޔައީ ، މާލިކުގެ ގެޔަށެވެ. މާލިކުގެ ގެޔަށް މުރުތަސިމް އައުމަކީ ، މާލިކު ހުއްދަކުރާނެކަމެއްނޫނެވެ. އެހެނަސް ، މުރުތަސިމް އެއައީ ، އަންނަން މަޖްބޫރުވެގެންކަމުގައި މުރުތަސިމް ބުންޏެވެ. އޭނާއަށް އަންނަން މަޖްބޫރު ކުރުވީ ، މާލިކުގެ ދަރިފުޅު ޒުބޭރުކަމަށާއި ، އެއީ ކީއްވެތޯ ޒުބޭރުކުރެން އެހުމަށް މުރުތަސިމް ބުންޏެވެ. އަދި ހައްޔަރުކޮށްގެން އޭނާގެންދިޔަ ތިންމީހުން އެތަނަށް ގެންނަން ، މުރުތަސިމްގެ މީހުންނަށް އެންގިއެވެ.
ޒުބޭރުވެސް އެތަނަށް އަތުވެއްޖެއެވެ. ޒުބޭރުގެ ތިންމީހުންގާތު ، އިއްޔެގެ ޙާދިސާ ހިނގީ ކިހިނެއްތޯ މާލިކު ސުއާލު ކުރިއެވެ. އެމީހުން ބުނިގޮތުގައި ، އެމީހުން ޢަމަލުކުރީ ޒުބޭރު އެންގި ގޮތަކަށެވެ. އެ ދަނޑަށް މުރުތަސިމްގެ އަންހެނުންނަށް އާދެވުނުތަނުން އެއަންހެންކުއްޖާ އަތުލައިގަނެގެން ، އޭނާ މާދަމާ އަންނަންދެން ބަންދުކޮށްފައި ބެހެއްޓުމަށް ޒުބޭރު އެންގީއެވެ. މުރުތަސިމް އަމިއްލަޔަށް ، މުރުތަސިމްގެ އަމިއްލަ ފުރާނަ ދުއްވާލާވަރު ، އެކުއްޖާއަށް ކޮށްލާނެކަމަށް އެމީހުންގާތު ޒުބޭރު ބުންޏެވެ.
ޒުބޭރު އެކަމާ ދެކޮޅު ހެދިއެވެ. އަދި ، އެމީހުން އެހަދަނީ ދޮގުކަމަށް މާލިކުގާތު ބުންޏެވެ. ޒުބޭރުގެ މީހުން އެކަމުގައި ދޮގުހަދާނެ ކަމަކަށް މާލިކަށްވެސް ޤަބޫލެއް ނުކުރެވުނެވެ. ޒުބޭރު އެކަމާ ދެކޮޅުހަދައި ، މުރުތަސިމާ ދިމާލަށް އެއްޗެތި ގޮވަންފެށީމަ ، މާލިކުގެ އަތުގައި ނެތްބާރުލާފައި ޒުބޭރުގެ ކަންކަށިމަތީގައި ވިހެލިއެވެ. އަދި ، އަނގަ މަޑުންލައިގެން ހުރުމަށް ޒުބޭރަށް އެންގިއެވެ.
ޒުބޭރު އެހެދީ ވަރަށްބޮޑު ގޯހެއްކަމަށް މާލިކަށްވެސް ޤަބޫލު ކުރެވުނެވެ. އެކަން ޙައްލު ކުރުމަށް މުރުތަސިމް ބޭނުންވާ ގޮތަކީ ކޮބައިތޯ މާލިކު ސުއާލު ކުރިއެވެ. އެމައްސަލަ ޕޮލިހަށް ހުށަހެޅުމުގެ ފުރުސަތު މުރުތަސިމަށް އެބަ އޮތެވެ. އަދި ، ކައުންސިލަށް ހުށަހެޅުމުގެ ފުރުސަތުވެސް އެބައޮތެވެ. އެކަން އެމަގުން ހިނގައިފިނަމަ ، މާލިކުގެ އަބުރާއި ޢިއްޒަތް ވެއްޔާ މޮޑެވިގެން ދާނެއެވެ. ޒުބޭރުގެ އެ ލާއިންސާނީ ޢަމަލު ސާބިތުކޮށްދެވޭނެ އެތައް ހެއްކެއް މުރުތަސިމްގެ އަތުގައި އެބަ ހުއްޓެވެ.
މުރުތަސިމް ބޭނުންވީ ، ޢިއްޒަތުގެ ބަދަލުގައި ޢިއްޒަތެވެ. މީހާގެ ބަދަލުގައި މީހާއެވެ.
މުރުތަސިމް އެހެން ބުނުމުން ، ޒުބޭރުގާތަށް އައިރުޅީގައި ، އޭނާގެ ޖީބުގައި އޮތް ފިސްތޯލަ ނަގައި ، އެ ފިސްތޯލާގައިވާ ވަޒަންތައް މުރުތަސިމްގެ ގަޔަށް އަމާޒުކޮށް ފޮނުވައިލިއެވެ. ފިސްތޯލައިގެ އަޑާއެކު ، މުރުތަސިމްގެ މީހުންކުރެ އެކަކު ، މުރުތަސިމްގެ ގެޔަށް ފޯނުކޮށް ، މާލިކުގެ ދަރިފުޅު ޒުބޭރު ، މުރުތަސމްގެ ގަޔަށް ބަޑިޖެހިވާހަކަ ވަގުތުން އެންގިއެވެ. އަދި ، އިތުރު ވާހަކައެއް ނުދައްކާ އޭނާގެ ފޯނު ކަނޑައިލިއެވެ. އެއީ ، އޭނާއަށް އިތުރު ވާހަކަ ދެއްކޭ ކަހަލަ ވަގުތެއްނޫނެވެ. އޭނާގެ ސާހިބުމީހާގެ ގަޔަށް ބަޑިޖެހީއެވެ. ގެއިން ފޯނުނެގީ ކާކުކަމެއްވެސް އޭނާއަކަށް ނޭނގެއެވެ.
މުރުތަސިމަށް އަމާޒުކޮށް ބަޑިޖެހުމާއެކީ ، މުރުތަސިމްގާތުގައި ޖެހިގެންހުރި ، އެމީހުންގެ އިސް ސަރުދާރު މުރުތަސިމްގެ ކުރިމައްޗަށް ވަގުތުން އެރިއެވެ. ހުރިހާ ވަޒަނެއް އެރީ ސަރުދާރުގެ ގަޔަށެވެ. އޭނާ ވަގުތުން ބިންމައްޗަށް ވެއްޓުނެވެ.
މުރުތަސިމްވެސް ވަގުތުން ފިސްތޯލަ ނަގައި ، ޒުބޭރާދިމާލަށް އަމާޒުކޮށް ބަޑިޖެހިއެވެ. އެކަމަކު ، އޭނާގެ ފިސްތޯލާގައި އެންމެ ވަޒަނެއްވެސް ނެތެވެ. އެކަމާ މުރުތަސިމް އަޖައިބު ވިއެވެ. އެފިސްތޯލަޔަށް ވަޒަންލައި ފުރާލީ ޚުދު އޭނާ އަމިއްލަޔަށެވެ. އެހެންކަމަށްވާއިރު ، އެންމެ ވަޒަނެއްވެސް ނެތެންވީ ސަބަބެއް ނޭނގެއެވެ. މުރުތަސިމަށް ލިބުނު ޙައިރާންކަމުގައި އިންދާ ، ޒުބޭރު އަނެއްކާވެސް މުރުތަސިމަށް އަމާޒުކޮށް ބަޑިޖެހިއެވެ. އެވަގުތު މާލިކު ، ޒުބޭރގެ އަތުގައި ހިފައި ، އެވަޒަންތައް މުރުތަސިމުގެ ގަޔަށް އެރުމަށް ހުރަސް އެޅިއެވެ.
މުރުތަސިމްގަޔަށް ޒުބޭރު ބަޑިޖެހިވާހަކަ އެންގުމަށް މުރުތަސިމްގެ ގެޔަށް ކުރި ފޯނުނެގީ ، ގޭގެ ނޯކަރެކެވެ. އެވަގުތު ، އެތާ ވަރަށް ކައިރީގައި މީރަބްވެސް ހުއްޓެވެ. ޚާދިމްމީހާ އެވާހަކަ ބުނުމާއެކީ ، މީރަބްގެ ހިތް ބިރުންގޮސް ތެޅިގަތެވެ. މުރުތަސިމްގެ ފިސްތޯލައިން ވަޒަންތައް ނަގައި ހުސްކުރީ މީރަބެވެ. އެކަމާ ގުޅިގެން ދިފާޢުގައި މުރުތަސިމަށް ކަމެއް ނުކުރެވި ، އޭނާގެ ގަޔަށް ވަޒަންތައް އަރާނެއެވެ. މީރަބަށް ބިރުންގޮސް ރޮވުނެވެ.
އޭރު ، ނޯކަރުވެސް ރޮމުން ގެންދިޔައެވެ. މާލިކުގެ ގެޔަށް މުރުތަސިމް އެދިޔައީ ، މީރަބްގެ ޢިއްޒަތުގެ ދިފާޢުގައެވެ. މީރަބްދެކެ އިންތިހާއަށް މުރުތަސިމް ލޯބިވާވަހަކަ ، އެ ނޯކަރުމީހާ ބުންޏެވެ. މުރުތަސިމަކީ ، ވަރަށް އޯގާތެރި ، މީހުންނަށް އަޅައިލާ ވެރިޔެކެވެ. މުރުތަސިމްގެ ހެޔޮކަމުން އެތައް ބަޔަކު ދިރިއުޅެމުން އެބަ ގެންދެއެވެ. އެވަރުގެ ދަރިޔަކު މަޔަކަށް ނުލިބޭނެއެވެ. އެވަރުގެ ފިރިޔަކުވެސް ، އަނތްބަކަށް ނުލިބޭނެއެވެ. މުރުތަސިމްގެ ފުރާނަ ސަލާމަތް ކޮށްދެއްވުން އެދި ، ﷲ އަށް ދުޢާކުރުމަށް ، ނޯކަރުމީހާ މީރަބްގެ ކިބައިން އެދުނެވެ.
މުރުތަސިމްގެ މީހުން ސިފައިންނަށް އެންގުމުން ، ސިފައިން އައިސް ޒުބޭރު ހައްޔަރުކޮށްގެން ގެންދިޔައެވެ. މުރުތަސިމްގެ ކިބައިން ، މާލިކު މަޢާފަށް އެދުނެވެ. އެހެނަސް ، ޒުބޭރު އެކުރި ކަންކަމުގެ ބަދަލު ނުހިފައި ، މަޢާފުގެ އަޑުއަހާކަށް މުރުތަސިމް ބޭނުމެއްނޫނެވެ. މީރަބްގެ އަބުރާއި ޢިއްފަތަށް އަރައިގަތުމަށް ، ޒުބޭރުވަނީ ، މީރަބް ހައްޔަރުކޮށްފައެވެ. މުރުތަސިމްމެން ގޭގެ އެންމެ އިސް ސަރުދާރުގެ ގަޔަށް ޒުބޭރު ބަޑިޖަހައިފިއެވެ. އެއީ ، މުރުތަސިމަށް އެންމެ ވަފާތެރި ޚާދިމެވެ. ބައްޕަ ، މަރްޙޫމް ޝާހްނަވާޒްގެ ފަރާތުން މުރުތަސިމަށް ލިބުނު އެންމެ އަގުހުރި ހަދިޔާއެވެ. އެކަމަކު ، އެއީ ، މުރުތަސިމް މަރައިލަން ޖެހި ބަޑިއެކެވެ. ޒުބޭރުގެ ބޭނުމަކީ ، އޭނާ އެކުރިކުށުން ރެކި ، ސަލާމަތްވުމަށްޓަކައި މުރުތަސިމް މަރައިލުމެވެ. ޒުބޭރު އެކުރީކީ އާދައިގެ ކުށެއްނޫނެވެ. ސިފައިން ޒުބޭރު ދޫކޮށްލި ދުވަހަކުން އެކަންކަމުގެ ބަދަލު ، މުރުތަސިމް ހިފާނެއެވެ. އޭނާގެ ހިތަށް ތަސައްލީއެއް ލިބޭނީ އޭގެފަހުންނެވެ. ( ނުނިމޭ )
