ސަރުކާރު ހިންގާ ކޯލިޝަން ޕާޓްނަރު އެމްޑީއޭގެ ތައުރީފާއި ޝުކުރު ޕީޕީއެމްގެ ނާއިބު ރައީސް އަބްދުއްރަހީމް އަބްދުﷲއާއި، ޕީޖީ ލީޑަރު އަހުމަދު ނިހާންއަށާއި، ޗީފް ސްޕޯކްސް ޕާސަން އަލީ އާރިފަށް އޮއްސާލައިފިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި އެމްޑީއޭގެ ފަރާތުން ވާހަކަ ދައްކަވަމުން އެޕާޓީގެ ނާއިބު ލީޑަރު އަދި ކެނދިކުޅުދޫ ދާއިރާގެ މެންބަރު އަލީ މައުރޫފް ވިދާޅުވީ މިރާއްޖޭގައި ގައުމީ ތަރައްގީ ވުޖޫދު ކުރެއްވި ތިން ބޭފުޅުންނަކީ އެއީ ކަމަށެވެ.
"އަޅުގަނޑު ގަބޫލްކުރާ ގޮތުގައި މިބޭފުޅުންނަކީ މި ގައުމީ ތަރައްގީގެ ފިކުރު މި ރާއްޖޭގައި ވުޖޫދުކުރި ބޭފުޅުން. އިސްލާމް ދީން ނޫން ދީނެއް މިރާއްޖޭގައި ނުބޭއްވޭނޭ ކަމަށް އެފިކުރާއެކީގައި މިހާތަނަށް މަސައްކަތް ކުރައްވަމުން އައި ތިން ބޭފުޅުން،" އޭނާ ވިދާޅުވިއެވެ.
މިފަދަ ބޭފުޅުންތައް ޖުމްހޫރީ ޕާޓީއަށް ވަޑައިގަންނަވަން މަސައްކަތް ކުރެއްވި ވާހަކަ ގާސިމް އިބްރާހީމް ދެއްކެވުމުން އެވާހަކަތައް އަޑު އައްސަވާފައި އަންތަރީވެސް ވަޑައިގެންނެވި ކަމަށްވެސް ވިދާޅުވިއެވެ. "އަޅުގަނޑު މިއަދު ވަރަށް ބޮޑަށް އަންތަރީސްވެފައި މިހުރީ މިވާހަކަތައް އަޑުއަހާފައި. އެއީ އަޅުގަނޑުމެންގެ ޕީޕީއެމްގެ ނާއިބުރައީސާއި، ޕީޖީލީޑަރު އަހުމަދު ނިޔާނާއި، ސްޕޯކްސް ޕާސަން އަލީ އާރިފާ މިބޭފުޅުންނާ ދޭތެރޭގައި އެކަހަލަ ޚިޔާލުފުޅެއް ގާސިމް އިބްރާހީމް ގެންގުޅުއްވީތީ،" މައުރޫފް ވިދާޅުވިއެވެ.
އެ ތިންބޭފުޅުންނަކީ ޑީއާރުޕީ އުފެދިގެން އައިސް އެފަހުން ޕީޕީއެމް އުފެދި އެދެޕާޓީންވެސް ރައީސް މައުމޫން ވަކިވެ ވަޑައިގެންނެވި އިރުވެސް އެ ބޭފުޅުން އެތިއްބެވީ ހަމަ އެފިކުރުގެ މަތީގައި ކަމަށް އޭނާ ވިދާޅުވިއެވެ. "އެހެންވީމާ މިބޭފުޅުންނާ އެއްގޮތަކަށްވެސް ކުޅުއްވަން ނޫޅުއްވާ. މިތިން ބޭފުޅުންނަކީ އަޅުގަނޑު ދަންނަވާނީ ލާމަސީލް ތިން ބޭފުޅުންނޭ. ދެން މަނިކުފާނު (ގާސިމް) ހޫނުފެނަށް ވެއްޓޭ ވެއްޓުން އެއީ އަޅުގަނޑުމެން ޒިންމާވާންޖެހޭނެ ކަމެއް ކަމަށް ނުދެން. އަޅުގަނޑު ކޯލިޝަންގެ ޕާޓްނަރުގެ ހައިސިއްޔަތުން މި ތިން ބޭފުޅުންނަށް އައްސަރިބަހާ ސާބަސް ރައްދުކުރަން. އަދި ވަރަށް ބޮޑަށް ޝުކުރުވެސް އަދާކުރަން،" އަލީ މައުރޫފް ވިދާޅުވިއެވެ.
އޭނާ ވިދާޅުވީ ޕާޓީ ދޫކޮށްފައިވެސް ދާނީ ޕާޓީއަކަށްވާކަހަލަ ޕާޓީއަކަށް ކަމަށެވެ. އެފަދަ ޕާޓީތަކަކީ އަށްޑިހާސް މެންބަރުނާއެކު އޮތް ޕީޕީއެމާއި، ވިހި ތިރީހަކަށް ހާސް މެންނަރުނާއެކު އޮތް އެމްޑީޕީ ކަމަށްވެސް ވިދާޅުވިއެވެ. އެމްޑީއޭ އަކީ ތިންވަނަ ދަރަޖައިގެ ޕާޓީއަކަށްވާއިރު ހަތަރުވަނަ ދަރައިގެ ޕާޓީއަކަށް (ޖޭޕީއަށް) އެއްވެސް މީހަކު ދާން ބޭނުންނުވާނެ ކަމަށްވެސް މައުރޫފް ވިދާޅުވިއެވެ. "އެހެންވީމާ މިބޭފުޅުންނާ މެދު އެކަލަހަ ދޮގު ޕްރޮޕެގެންޑާ ފެތުރުމަކީ ވަރަށް ގޯސްކަމެކޭ އެއްގޮތަކަށްވެސް ތިގޮތަށް އަމަލު ނުކުރައްވާށޭ،" ގާސިމަށް ދެއްވި މެސެޖެއްގެ ގޮތުގައި މައުރޫފް ވިދާޅުވިއެވެ.
