ރާއްޖޭގެ ތަރައްގީއަށް ރައީސް އަބްދުﷲ ޔާމީން މިހާރު ކުރިއަށް ގެންދަވާ ތަރައްގީގެ މަޝްރޫއުތައް ކުރިއަށް ގޮސްފި ކަމަށްވާނަމަ އިންތިޚާބަކުން ރައީސް ޔާމީން ބަލި ނުކުރެވޭނެކަން އިދިކޮޅު ފަރާތްތަކަށް އެނގޭ ކަމަށް ހައުސިން މިނިސްޓަރ ޑރ. މުހައްމަދު މުއިއްޒު ވިދާޅުވެއްޖެއެވެ.
ނޫސްވެރިންނަށް މައުލޫމާތު ދެއްވަމުން މުއިއްޒު ވިދާޅުވީ އެހެންވެ އިދިކޮޅުން އަބަދުވެސް މަސައްކަތް ކުރަނީ މިގައުމަށް ރައީސް ޔާމީން ގެނެސް ދެއްވާ ތަރައްގީގެ އެކި މަޝްރޫއުތައް ހުއްޓުވަން ކަމަށެވެ.
ރިޔާސީ އިންތިޚާބާ މިދޭތެރޭ މީހާރު އޮތީ ހައެއްކަ މަސްކަމަށާއި އެމުއްދަތުގައި ރައީސް ޔާމީންގެ ތަރައްގީގެ މަޝްރޫއުތައް ހުއްޓުވުމަށް އިދިކޮޅުން ވަރަށްބޮޑަށް މަސައްކަތް ކުރަމުން ގެންދާ ކަމަށްވެސް މިނިސްޓަރު ވިދާޅުވިއެވެ.
"އިދިކޮޅު ފަރާތްތަކުން ބޭނުންވަނީ ރައީސް ޔާމީން މިގައުމަށް ގެނެސްދެއްވާ ތަރައްގީ ހުއްޓުވުމަކަށް ގެންނަން. ބާކީ މިއޮތް ހައެއްކަ މަސްދުވަހުގެ ތެރޭގައި އެމަނިކުފާނު ފަށައިފައިވާ ތަރައްގީގެ ހުރިހާ މަސައްކަތްތަކެއް ކުރިއަށް ގޮސްފިނަމަ އިދކޮޅު ފަރާތްތަކަށެއް އެއްވެސް ފުރުސަތެއް ނޯންނާނެ އިންތިޚާބަކުން ރައީސް ޔާމީން ބަލިކޮށްފައި އެހެން ބޭފުޅަކު ހޮވާކަށް،" މިނިސްޓަރ ވިދާޅުވިއެވެ.
އެމަނިކުފާނު ވިދާޅުވީ ރައީސްގެ ތަރައްގީގައި ހިމެނޭ ބުރިޖުގެ މަސައްކަތް ހިނގަމުންދާތަން ބަލަން އެމްޑީޕީ މީހުންވެސް ދާ ކަމަށެވެ. އެހެންކަމުން އެމަސައްކަތްވެސް ކުރިއަށްދާ މިންވަރު އެމީހުންނަށް ވަރަށް ރަނގަޅަށް އެނގޭ ކަމަށްވެސް ވިދާޅުވިއެވެ. "އެބޭފުޅުންނަށް އެބައެނގޭ މި ބުރިޖުގެ މަސައްކަތްވެސް އިންތިޚާބު އަންނަންވާއިރަށް އޮންނާނީ ނިމިފައިކަން. އެތަނަކީ އެމްޑީޕީ މީހުންވެސް އަދި އިދިކޮޅު އެހެންމީހުންވެސް ދަތުރުކުރަންއޮތް ތަނެއްކަން އެބޭފުޅުންނަށް އެބައެނގޭ،" މިނިސްޓަރު ވިދާޅުވިއެވެ. އެހެންނަމަވެސް އެކަންކަމުގެ ހަގީގަތް އޮޅުވާލައި ރައްޔިތުންގެ ހިތުގައި ޝައްކުތަކެއް އުފެއްދުމަށްޓަކައި އިދިކޮޅުން މަސައްކަތްތަކެއް ކުރާ ކަމަށްވެސް މުއިއްޒު ވިދާޅުވިއެވެ.
އެމަނިކުފާނު ވިދާޅުވީ ރިޔާސީ އިންތިޚާބުގެ ކުރިން ބުރިޖު އެއްކޮށް ނިމޭނެ ކަމަށެވެ. އަދި އައްޑޫގައި މިހާރު ގާއިމް ކުރަމުންދާ ހޮސްޕިޓަލްގެ މަސައްކަތްވެސްނިމި ޖުލައި ނިމުމުގެ ކުރިން ޚިދުމަތްދޭން ފެށޭނެ ކަމަށްވެސް ވިދާޅުވިއެވެ. އޭގެ އިތުރަށް މާލޭގައި އަޅަން ފަށައިފައިވާ ސަލްމާން މިސްކިތުގެ މަސައްކަތް ނިމި މި އަހަރު ނިމުމުގެ ކުރިން އެ މިސްކިތުގައި ނަމާދު ކުރަން ފެށޭނެ ކަމަށްވެސް ވިދާޅުވިއެވެ.
