( 28 މޭ 2025 ގައި ޝާއިޢުކުރި ބަޔާގުޅޭ )
ވައްޤާސްގެ މަޖުބޫރީ ޙާލަތު ، މީރަބަކަށް އެއްގޮތަކަށްވެސް ނުވިސްނެއެވެ. ކޮންމެ މީހަކު ކޮންމެ މަޖުބޫރެއްކުރިނަމަވެސް ، މީރަބްހުރީ ، މުރުތަސިމާ ކައިވެނިކުރާ ގޮތަކަށްނޫނެވެ. ބައްޕަޔަށްޓަކައި އެކަމަށް އެއްބަސްވުމަށް ، ވައްޤާސް އާދޭސްކޮށްވެސް ، މީރަބް އެކަމަކަށް އެއްބަހެއް ނުވިއެވެ.
މުރުތަޟާ ބޭރުންއައިސް ގެޔަށްވަނުމާއެކީ ، އޭނާއަށްދޭން ބުނެފައި އޮންނަ ފެންތަށި ހިފައިގެން އައި ނޯކަރު އަތުން ، ފެންތަށި އަތުލައި ، އެފެންތަށި ހިފައިގެން މީރަބްގޮސް ، މުރުތަސިމަށް ދިއްކޮށްލިއެވެ. މުރުތަސިމަށް ލިބުނު ޙައިރާންކަން ކަނޑުވައިލީ ، މީރަބެވެ. މުރުތަސިމާ ވާހަކަ ދައްކަން އޭނާ ބޭނުންވާކަމަށް ބުނެއެވެ. މީރަބް ވާހަކަ ދައްކަން ބޭނުންވީ ދެމީހުން އެކަނި ތިބެގެންނެވެ. އެވަގުތު ޚާނަމް އައިސް ، މީރަބްގެ ޒިންމާ އެހާ އަވަހަށް އަދާކުރަން ފެށިކަން ފާހަގަކޮށް ، މުރުތަސިމާ ދިމާއަށް ކަޅިއެއް އެއްލިއެވެ. ކައިވެންޏަށް މީރަބް އެއްބަސް ވިނަމަވެސް ، އެކައިވެނި ކުރާކަށް މުރުތަސިމްވެސް ބޭނުމެއް ނޫނެވެ. ޚާނަމްގެ ޤަދަރާއި ޢިއްޒަތަށް މުރުތަސިމް އިޙްތިރާމް ކުރެއެވެ. އެހެންނަމަވެސް ، މަންމަގެ އެ ނިންމުމަކީ ، މުރުތަސިމްގެ ހިތް އެއްވެސް ވަރަކަށް އެދޭ ނިންމުމެއްނޫނެވެ. މުރުތަސިމްގެ ދުނިޔެ ބިނާކުރާނީ ، މުރުތަސިމް ބޭނުންވާ ގޮތަކަށެވެ.
ޙަޔާއަށް ލިބުނު ހިތްދަތިކަމުގައި ކޮޓަރިޔަށްވަތްގޮތަށް ބޭރަކަށް ނުނިކުމެއެވެ. ކޮޓަރީގައި ބެހެއްޓިފައިވާ ލޯގަނޑުގައި މުރުތަސިމާއި ޙަޔާގެ ނަން ، ހިތަކާއެކީ ލިޔެފައި ހުއްޓެވެ. ކުރިމަތީގައި ދިއްލިފައިވާ އުއްބައްތިޔެއްގެ ކައިރިޔަށް ޙަޔާ ޖެހިލިއެވެ. އޭނާގެ ކަނާތް އެ އުފުލުނީ ، އެ އުއްބައްތީގެ ހުޅުގަނޑުން އޭނާގެ އަތް ފިއްސައި އަންދާލުމުގެ ބޭނުމުގައެވެ. ނުކުޅަދާނަވާ ވަރަށް ހިތަށް ތަދުވެގެންނެވެ. ހުޅުކޮޅުގައި ކިރިޔާ އަތްނުޖެހި ހުއްޓާ ، ކުއްލިޔަކަށް އެކޮޓަރީގެ ދޮރުގައި މީހަކު ޓަކި ޖެހިއެވެ. އެއީ މަރިޔަމްއެވެ. ދޮރހުޅުވުމަށް ، ޙަޔާއަށް މަރިޔަމް ގޮވަމުން ގެންދިޔައެވެ. މަރިޔަމް ހަޅޭއްލަވާ އަޑަށް ޚާނަމްވެސް އައިސް ދޮރުގައި ޓަކިޖަހައި ، ދޮރުހުޅުވުމަށް ޙަޔާއަށް އެންގިއެވެ. އެހެންގޮތެއް ނެތިގެން ، ޙަޔާގޮސް ދޮރު ހުޅުވިއެވެ.
ކޮޓަރިޔަށް ވަތްތަނުން ، ލޯގަނޑުގައި ޙަޔާ ލިޔެފައިވާ ތަން މަރިޔަމްއަށް ފެނުނެވެ. މަންމަޔަށް އެތަން ފެނިއްޖިއްޔާ ޙަޔާގެ ދުވަސް ދާނެއެވެ. އެހެންކަމުން ، ލޯގަނޑުގައި ލިޔެފައިވާ އެއްޗަކާ ދިމާއަށް ދުވެފައިގޮސް ، ޚާނަމްއަށް އެތަން ނުފެންނަގޮތަށް ، ހުރަހަކަށް ވެގެން މަރިޔަމް ހުއްޓިލިއެވެ.
ޚާނަމްކުރި އެއްވެސް ސުއާލަކަށް ޙަޔާ ޖަވާބެއް ނުދެއެވެ. ހުންއައީތޯ ޚާނަމްކުރި ސުއާލަށް ޖަވާބުދިނީވެސް މަރިޔަމެވެ. ޙަޔާގެ ނިތްކުރީގައި ޚާނަމް އަތްލިއިރު ، ހުމެއް ނެތެވެ. އެހެނަސް ، އެ ހުމަކީ އޭނާގެ އެތެރެހަށީގައިވާ ހުމެއްކަމަށް ޙަޔާ ބުންޏެވެ. ޙަޔާ ދިފާޢުކުރުމަށްޓަކައި ވާހަކަ ދައްކަމުން ގެންދިޔައީ މަރިޔަމެވެ. އެންމެފަހުން ، ޙަޔާގެ މަންމަމެން މަތިން ހަނދާންވެގެން ޙަޔާއަށް އެރޭ ނުނިދުނީކަމަށް މަރިޔަމް ބުންޏެވެ.
ޚާނަމްއަކީ ، އޭނާގެ މަޔެއްފަދަ މީހެއްކަމަށާއި ، މަންމަމެންނާ ދޭތެރޭ ފިކުރުކޮށް ދެރަނުވުމަށް ޚާނަމް އެދުނެވެ.
" މައިންނަކީ ، ބުނެ އާދޭސްކުރުމުގެ ކުރިން އަންހެންދަރިންގެ ހިތުގެ ޙާލަތު އެނގޭބަޔެކެވެ. " ޙަޔާވެސް ބުންޏެވެ.
އެކަމާ ، ޙަޔާ ދެރަވާނެކަމެއް ނެތެވެ. ރަނގަޅު ކުއްޖެއް ހޯދާފައި ، ޙަޔާގެ ކައިވެނިކޮށްދޭނީ ޚާނަމެވެ. އޭގެކުރިން ، މީރަބާއި މުރުތަސިމްގެ ކައިވެނި ކޮށްދޭން ޚާނަމް ބޭނުމެވެ. ޙާޔާއާ ދޭތެރޭ ވިސްނާނީ އޭގެފަހުންނެވެ.
ސައިހަދައިގެން މީރަބްގޮސް ، މުރުތަސިމްގެ ކޮޓަރިޔަށް ވަނެވެ. އެއްތަށި ގިރައިގެން މުރުތަސިމްގާތަށް މީރަބް ޖެހިލިތަނުން އެތަށީގައި ހިފުމަށް މުރުތަސިމްގެ އަތް އުފުލައި ލެވުނެވެ. އެހެނަސް ، ޖޯޑުނަގައި މީރަބް އެސައިތަށި ބޯން ފެއްޓިއެވެ.
" މުރުތަސިމާ އިންނާކަށް އަހަރެން ބޭނުމެއް ނޫނެވެ. ލޮލަށް ފެނިލަންވެސް އަހަރެން ނޭދޭ މީހަކާ އިންނާނީ ކިހިނެއް ހެއްޔެވެ ؟ އެމީހުންނާ އެކަށީގެންނުވާ މީހުންނާ ، މީހުން އިންނަނީ ކީއްވެގެންބާވައޭ ހިތަށް އަރައެވެ. އަސްލު ، މިޢާއިލާގެ މީހަކާ އަހަރެން ކައިވެންޏެއް ނުކުރާނަމެވެ. އެއީ ، މުރުތަސިމް ކަމަށްވިޔަސް އަދި އެހެންމީހެއްކަމަށް ވިޔަސް ، މިއާއިލާގެ މީހަކާ އަހަރެންނެއް ނުއިންނާނަމެވެ. އަހަރެން އިންނާނީ އަހަރެން ބޭނުންވާ މީހަކާއެވެ. " މީރަބް ވާހަކަ ދައްކަމުން ގެންދިޔައެވެ.
މީރަބް ދައްކަމުން ގެންދިޔަ ހުރިހާ ވާހަކަޔަކަށްވެސް އެއްބަސްވުމަށް އާނހޫ ކިޔާލަކިޔާލަ ، މުރުތަސިމް ހުއްޓެވެ. އެ ކައިވެންޏަކީ އެދެމީހުންކުރެ އެކަކުވެސް ، ކުރަން ބޭނުންވާ ކައިވެންޏެއްނޫނެވެ. މުރުތަސިމް ގޮސް ، މަންމަގާތު އެކައިވެންޏަށް އޭނާ އިންކާރުކުރާ ވާހަކަ ބުނުމަށް މީރަބް އެދުނެވެ. އެކަމަކު ، އެކަންކުރާކަށް މުރުތަސިމް ބޭނުމެއްނޫނެވެ. މީރަބް ކަހަލަ ހިތްވަރުގަދަ މީހަކު އެކައިވެންޏަށް އިންކާރު ކުރަން ހުއްޓާ ، މުރުތަސިމް ގޮސް އެވާހަކަ ދައްކަންވީ ކީއްކުރަން ހެއްޔެވެ ؟
ޚުދު އޭނާ ، އެކައިވެނިކުރާކަށް ބޭނުމެއްނޫނެވެ. މީރަބް އަކީ ، އެޢާއިލާގެ ކުއްޖެއްކަމަކަށް ، މުރުތަސިމް ޤަބޫލެއް ނުކުރެއެވެ. އެހެންކަމުން ، މީރަބާ ކައިވެނިކުރުމަކީ ، އޭނާ ކުރާނެކަމެއްނޫނެވެ.
މީރަބްގެ ކައިވެނީގެ ވާހަކަ ދައްކަން ، ވައްޤާސްގެ ދެމަފިރިންނާއި ޚާނަމްއާ އަދި އަންވަރު ، ސިޓިންރޫމުގައި އިށީނދެލައިގެން ތިއްބެވެ. ކުއްލިޔަކަށް ، ބާރު ހިނގުމެއްގައި އެތަނަށް އައިސް އެ ހުއްޓުނީ މީރަބެވެ.
" އަހަރެން ، މި ކައިވެންޏަށް އިންކާރު ކުރަމެވެ. މުރުތަސިމްގެ މީހަކަށް މީރަބް ، ދުވަހަކުވެސް ނުވާނެއެވެ. " ޖެހިލުމެއްނެތި ، އަޑަށް ބާރުލާފައި މީރަބް ބުންޏެވެ.
އޭނާގެ ދަރިފުޅު ޤަބޫލުނުކޮށް ، ކައިވެންޏަށް އިންކާރު ކުރުމުން ، ޚާނަމްގާތަށް ރުޅިއައެވެ. ޚާނަމް ކިތަންމެ ރުޅިއެއް އަޔަސް ، މީރަބް ނިންމައިގެންހުރީ އެކައިވެންޏަށް އިންކާރު ކުރާށެވެ. ބައްޕަމެންނަށް ބަރޯސާވެގެން ، ޚާނަމްމެން ބުނާހާގޮތެއް ހަދައިގެން އޭނާއަކަށް ދެނެއް ނުއުޅެވޭނެއެވެ. މީރަބް އަނގަނުތަޅާ މަޑުން ހުރުމަށް ، ވައްޤާސް ބުނިނަމަވެސް ، އޭނާ މަޑުން ހުންނާކަށް ބޭނުމެއް ނޫނެވެ. އޭނާއާ މެދު ބޭއިންސާފުން ކުރެވޭ ކަމަކަށް އަނގަމަޑުންލައިގެންނެއް ނުހުންނާނެއެވެ. ޚާނަމްމެންގެ ކުރިމަތީ ، ވައްޤާސްއަށް ދެކަކޫ ޖަހާވަރަށް މަޖުބޫރުވެގެން އުޅެން ޖެހުނަސް ، މީރަބްއަކީ މިނިވަނެކެވެ. އޭނާއަކަށް އެއްވެސް މީހަކަށް ، އެއްވެސްކަމެއްގައި މަޖުބޫރެއް ނުކުރެވޭނެއެވެ.
މީހަކާ އިންނަންޏާ މީރަބް އިންނަންޖެހޭނީ އެ ޚާންދާނުގެ މީހަކާކަމަށް އަންވަރުވެސް ބުންޏެވެ. އެހެނަސް ، އެއީ މީރަބްގެ ޚާންދާނެއްނޫނެވެ. އެއީ އަންވަރުގެ ޚާންދާނެވެ. މީރަބްގެ ޚާންދާން ގުޅިފައިވަނީ ވައްޤާސް އާއި އަނީލާއާ އެވެ. މީރަބަކީ އެދެމީހުންގެ ޚާންދާނުން އުފަންވެފައިވާ މީހެއްކަން މީރަބް ސާފުކޮށްދިނެވެ. އެމީހުންނަކާ ، ޚާނަމްއަކާވެސް އަދި އަންވަރަކާވެސް ގުޅުމެއް ނެތެވެ. މީރަބްގެ އެވާހަކަތައް އެއީ ، ޚާނަމްއާއި އަންވަރުގެ ކުރިމަތީ ހުރެގެން ، ވައްޤާސްއަށް އަޑުއަހަން އެހާ ފަސޭހަ ވާހަކަތަކެއްނޫނެވެ.
މީރަބް ދައްކަންހުރި ވާހަކައެއް ދެއްކުމަށްފަހު ، އެތަނުން ދިއުމުން ، ޚާނަމްގެ ހުރިހާ ރޯޅިއެއް ބޭލީ ވައްޤާސް އަށެވެ. މީރަބްގެ އާދަތައް އެހުރީ ، ވައްޤާސް އޭނާއަށްދިން މިނިވަންކަމުން ހަލާކުވެފައެވެ. އެގޭގައި ދިރިއުޅޭ އެއްވެސް އިންސާނަކަށް ، ޚާނަމްއާ ދެކޮޅަށް ބަހެއް ބުނާކަށް ނުކެރޭނެއެވެ. އެކަމަކު ، މީރަބް އެދިޔައީ ، ޚާނަމްގެ މޫނުމަތީ ތަފާލެއް ޖަހާފައެވެ.
އެންމެންގެ މެދުގައި ހަމަނުޖެހުން އުފެދި އެކަކު އަނެކަކަށް ހިތްހަމަ ނުޖެހުން ފާޅުކުރަމުން ދަނިކޮށް ، މީރަބްއަށް ޙަޤީޤަތް ސާފުކޮށްދިނުމުގެ ވަގުތު ޖެހިއްޖެކަމަށް އަންވަރު ބުންޏެވެ. ބައްދަލުވުން ނިމިގެންދިޔައީ ، ވައްޤާސްގޮސް މީރަބަށް ވިސްނައިދިނުމަށް ނިންމާފައެވެ.
މީރަބް ގާތަށް އައިސްހުރި ރުޅި ، އެގޭތެރޭގައި ހުރެގެން މައިތިރިނުވާނެކަން އޭނާއަށް އެނގުނެވެ. ގޯތިތެރެޔަށް ނުކުމެ ، ޗޯކީދާރުއަތުން ކާރެއްގެ ތަޅުދަނޑި އަތުލައިގެން ، ކާރުގައި މީރަބް ބޭރަށް ނުކުތެވެ. ޗޯކީދާރު ހުރީ ހަދާނެގޮތް ބޮޑުވެފައެވެ. މީރަބް ، ކާރުދުއްވާފައި ނުކުމެގެން ދިޔައީވެސް ހެޔޮވަރު ވަރަކަށް ބާރަށެވެ. ޗޯކީދާރުގޮސް ޚާނަމްގާތު އެވާހަކަ ބުންޏެވެ. މީރަބް އެދިޔައީ ކޮންތާކަށްކަމެއް ، އެއްވެސްމީހަކަށް ނޭނގެއެވެ.
އެއީ އެ ޢާއިލާގެ އަންހެންދަރިޔަކު އަލަށް ކުރިކަމެކެވެ. އެގޭގެ އެއްވެސް އަންހެނަކު ، މީހެއްގާތު ނުބުނެ ކާރުގައި އަމިއްލަޔަށް ގެޔަކުން ނުނުކުންނާނެއެވެ. އަނީލާއަށް ހަދާނެގޮތް ބޮޑުވެގެންގޮސް ، ވައްޤާސްގެ ގާތަށްގޮސް މީރަބް ހޯދަން ގޮސްދިނުމަށް އެދުނެވެ. މީރަބަކަށް އެހާދުރަކަށް އަދި ނުދެވޭނެއެވެ. އެހެންނަމަވެސް ، އަންވަރު އެކަން ހުއްޓުވިއެވެ. މީރަބަކީ ، މުރުތަސިމުގެ މީހަކަށްވާންހުރި ކުއްޖެކެވެ. މީރަބް ހޯދުމަކީ ، މުރުތަސިމުގެ ޒިންމާއެކެވެ. މީރަބް ހޯދަން ނުކުންނާނީ މުރުތަސިމެވެ.
މުރުތަސިމް ނުކުމެ ހައިވޭއިން ބާރަށް ދުއްވާފައި ދަނިކޮށް ، މީރަބްއާ އަރާ ހަމަ ކުރެވުނެވެ. މީރަބަށްވެސް މުރުތަސިމް ފެނުނެވެ. މުރުތަސިމް ބަރޮގޮނު އެޅިނަމަވެސް ، ކާރުހުއްޓާކަށް މީރަބް ނޫޅުނެވެ. އެންމެ ތަންފުކެއްވެސް ކާރުގެ ދުވެލި މަޑެއް ނުކުރެއެވެ. މުރުތަސިމާހެދި އުނދަގޫވެގެން ، މީރަބަށް ހެދުނުގޮތަކުން ، ހައިވޭގެ އެއްފަރާތުގައި ހުރި ފާރުގައި މީރަބްގެ ކާރުޖެހި މަޑުވިއެވެ. މުރުތަސިމުގެ ކާރުވެސް ހުއްޓާލައި ، ދުވެފައިގޮސް ބަލައިލިއިރު ، މީރަބް އޮތީ ހުންގާނުގައި އޭނާގެ ބޯ ޖެހިގެން ޚަބަރު ހުސްވެފައެވެ.
މީރަބް ހޭއެރިއިރު ، އޭނާއޮތީ ހޮސްޕިޓަލުގައި އެނދުމަތި ކުރެވިފައެވެ. ދެލޯހުޅުވައިލިއިރު ، އެންމެ ފުރަތަމަވެސް އޭނާއަށް ފެނުނީ ، ކޮޓަރީގެ އެއްފަރާތެއްގައި ހުރި ގޮނޑިއެއްގައި އިށީނދެލައިގެން އިން މުރުތަސިމެވެ. މީރަބްގެ ދެލޯހުރީ ބޮޑުވެފައެވެ. އެތަން ފެނިފައި ، މީރަބް މަރުނުވާކަމަށް މުރުތަސިމް ބުންޏެވެ.
މުރުތަސިމާ ދުރަށް ދާން މީރަބް މަސައްކަތް ކުރާވަރަކަށް ، އެއަންނަނީ މުރުތަސިމާ ގާތްވަމުންނެވެ. ކުރާނީ ކީއް ހެއްޔެވެ ؟ މީރަބްގެ ހަނދާނަށްވެސް ގޮތެއްނުވެ ، ރަނގަޅަށް އެބަހުރިކަމަށް މުރުތަސިމް ބުންޏެވެ. މީރަބް ހޯދަން މުރުތަސިމް އައީތީ މީރަބް ހުރީ ހިތްހަމަ ނުޖެހިފައެވެ. އެހެނަސް ، އެމީހުންގެ ޤަދަރާއި ޢިއްޒަތް ދެމެހެއްޓުން އެކަމާ ގުޅިފައި ނެތްނަމަ ، މީރަބް ހޯދާކަށް ، މުރުތަސިމެއް ނުނުކުންނާނެއެވެ. މީރަބް ހޮސްޕިޓަލަށް އެގެނައީވެސް ، މީހުން މަލާމާތް ކޮށްފާނެތީއެވެ. މުރުތަސިމް އިންނަންއުޅޭ ކުއްޖާ ، އަޙްމަދުއާބާދުގެ ހައިވޭގެ އެއްފަރާތެއްގައި އޮތް ކާރެއްގައި އޮވެ ، އެބަ މަރުވެޔޭ ކިޔައިގެން މީހުން ވާހަކަ ދައްކަފާނެތީއެވެ.
މީރަބަކީ ، މުރުތަސިމާ ކައިވެނިކުރަން ބޭނުންވެގެންއުޅޭ މީހެއްނޫނެވެ. އެހެނަސް ، އެދެމީހުންގެ ކައިވެނި އެއޮތީ ޢާއިލާގެ މެދުގައި އިޢުލާންކޮށްފައެވެ. އެކަމާ ، އެދެމީހުންކުރެ މިހަކަށް ކުރެވޭނެ އެއްވެސްކަމެއް ނެތެވެ.
މުރުތަސިމް ގޮސް ، އޭނާގެ ޢާއިލާގެ މީހުންގާތުގައި ، އެކައިވެނި ކުރަން އޭނާ ބޭނުންނުވާކަމަށް ބުނުމަށް އަނެއްކާވެސް ، މީރަބް އެދުނެވެ. މީރަބްގެ ބަސް އަހައިގެން ، މުރުތަސިމްގޮސް ، އޭނާގެ މަންމަގާތު އެވާހަކަ ބުނެފާނެއެވެ. އެކަމަކު އެކަމުންވާނެ ފައިދާއެއް ނެތެވެ. މީރަބް މިހާރުވަނީ އެމީހުންގެ ކުރިމަތީ ، ކައިވެންޏަށް އިންކާރު ކޮށްފައެވެ. ވީކަމެއް ހަރާމެވެ.
މީރަބަކީ މީހަކު ދެކެ ބިރުގަންނަ މީހެއްނޫނެވެ. އެހެނަސް ، މުރުތަސިމުގެ ޢާއިލާގެ މީހުންދެކެ ބިރުން ، ފިލަން އެއައީ ކީއްވެގެންތޯ މުރުތަސިމް ސުއާލު ކުރިއެވެ.
މުރުތަސިމަކީ ، ކުޑައިރުއްސުރެ މީރަބް ދަންނަ މީހެކެވެ. ކައިވެންޏަށް އަމިއްލަޔަށް އިންކާރު ކުރާވާހަކަ ، ޢާއިލާގެ މީހުންގާތު ނުބުނެ ، މީރަބް ލައްވާ އެވާހަކަ ބުނުވުމަށް މުރުތަސިމް ބޭނުން އެވަނީ ، މީރަބް ލައްވާ ގޯސްވާހަކަ ދައްކަން މުރުތަސިމް ބޭނުންވާތީއެވެ. އެވަގުތު ، ވައްޤާސް އާއި އަންވަރާ ދެމީހުންވެސް އައިސް ކޮޓަރިޔަށް ވަނެވެ. ވައްޤާސް ގޮސް މީރަބްގާތަށް ޖެހިލުމާއެކު ، އަންވަރާއި މުރުތަސިމް އެތަނުން ނުކުތެވެ.
މަންމައާއި ބައްޕަ ދޫކޮށްލާފައި ، އެގޮތަށް ގެއިން ނުކުމެގެން ދާން ޖެހިލުމެއް ނުވޭތޯ ، ވައްޤާސް އޭނާގެ ދަރިފުޅާ ސުއާލު ކުރިއެވެ. މީރަބަށް ގޮތެއް ވެއްޖެނަމަ ، ޚާނަމް އާއިއަންވަރަށް އޭނާދޭނީ ކޮން ޖަވާބެއް ހެއްޔެވެ.
މީރަބް އެގޮތަށް ގެއިން ނުކުމެގެން ދިޔައީ ، އޭނާގެ އަތުން އޭނާގެ މަންމައާއި ބައްޕަ ދޫކޮށްލީމައެވެ. އެނޫންގޮތެއް މީރަބަކަށް އެވަގުތަކު ނެތެވެ. އެގެއާއި މުރުތަސިމުގެ ކިބައިން ސަލާމަތް ވެވެން އޮތް ހަމައެކަނި ގޮތަކީ އެއީއެވެ. މީރަބް ބޭނުންވީ ، ދެވުނު ގޮތަކުން ކަރާޗީއަށް ދާށެވެ. އެކަމަށް އެދިއެދިވެސް ބައްޕަ ، އެކަން ނުކޮށްދިނީމައެވެ. މުރުތަސިމުމެންގެ ގެޔަށްދާކަށް ، އޭނާބޭނުމެއް ނޫނެވެ. އެގެޔަކީ ، އޭނާއަށް ހުރަގެޔެއްފަދަ ތަނެކެވެ. ޝާހްނަވާޒްގެ އެ މަހަލްއިން ނެރެގެން ، ކަރާޗީގައިހުންނަ އެމީހުންގެ އަމިއްލަ ގެޔަށް ގެންގޮސްދިނުން އެދި މީރަބް ، އޭނާގެ ބައްޕަޔަށް އާދޭސް ކުރަމުން ގެންދިޔައެވެ.
ވައްޤާސްއަކީ ، ޚާނަމްމެންގެ އިޙްސާންތެރިކަމުގެ ދަށުގައި ، މަޖުބޫރު ދިރިއުޅުމެއް އުޅެންޖެހިފައިވާ މީހެއްކަން ، ސާފުކޮށްދެވޭތޯ ވައްޤާސް މަސައްކަތް ކުރަމުން ގެންދިޔައެވެ. އެމީހުން އިޙްސާނެއް ވެފައި އޮތިއްޔާ އެ އިޙްސާންތެރިކަމުގެ ބަދަލުގައި ، ވައްޤާސް އަށް އޭނާގެ ދަރިފުޅު ޤުރުބާންކުރަންޖެހެނީ ކީއްވެގެންކަމެއް މީރަބަކަށް ނޭނގެއެވެ. މީރަބަކީ ވައްޤާސްމެންގެ ފުރާނައެވެ. އެހެންކަމަށްވުމާއެކުވެސް ، އެވަރުގެ ޤުރުބާނީއެއް ވާން ވައްޤާސްގެ ކުރިމަތީގައި އޮތީ ކޮން ސަބަބެއް ހެއްޔެވެ. އެއީ ، އަދި މިވަގުތަށް މީރަބްގާތު ، ވައްޤާސްއަށް ބުނެވެން އޮތް ޙަޤީޤަތެއްނޫނެވެ. ވައްޤާސްއަށް ބުނެވެން އޮތްހާވެސް އެއްޗަކީ ، އެކައިވެންޏަށް މީރަބް އާނއެކޭ ބުނުމުން ، ހުރިހާކަމެއް ރަނގަޅުވާނެ ކަމެވެ.
މީރަބް އެކްސިޑެންޓްވީ ވާހަކަ އިވުމާއެކު ، މީރަބް މަރުވުމަށް ޙަޔާއަށް ދުޢާ ކުރެވުނެވެ. ބަދު ދުޢާ ކުރަމުންގޮސް ، މީރަބް މަރުވަންދެން ، މީރަބް މަރުވުން އެދި ޙަޔާ ދުޢާ ކުރާނެއެވެ. އެއީ މަރިޔަމްއަށް ލިބުނު ވަރަށްބޮޑު ޙައިރާން ކަމެކެވެ. ޚުދު މަރިޔަމްވެސް އަދި މުރުތަސިމްވެސް އެ ކައިވެންޏަކަށް ހިތްހަމައެއް ނުޖެހެއެވެ. އެކައިވެނި ކުރުވަން ޚާނަމް ނިންމުމުގައި މީރަބްގެ އޮތީ ކޮންކުށެއް ހެއްޔެވެ. މީރަބަކީވެސް ، މުރުތަސިމާ ގަޔާވާ މީހެއްނޫނެވެ. އެކަމަކު ، އެފަކީރު މަރުވާކަށް ، މަރިޔަމް ، ބަދު ދުޢާއެއް ނުކުރާނެއެވެ. ( ނުނިމޭ )
