ކާއިނާތުގައި އިރު ދައުރުވުން
އިރާއި ހަނދާ އަދި ޖައްވުގައިވާ އެހެނިހެން މަޑިކިލަނބުތައް ދަތުރުކުރާކަން ، ކީރިތި ޤުރުއާނުގައި މީގެ ސާދަސަތޭކަ އަހަރުކުރިން ، ﷲ ތަޢާލާ ވަޙީކުރައްވައި އަންގަވާފައި ވެއެވެ. ދާދި މިދާކަށްދުވަހާ ޖެހެންދެންވެސް ، ބެލެވެމުން އައީ މިދެންނެވި ތަކެއްޗަކީ ، ދައުރުވުމެއްނެތި އެއްތާކު ހުއްޓި ހަރުލާފައި ހުންނަ ތަކެތި ކަމުގައެވެ. އެތަކެތީގެ ވަށައިގެން ބޯޅައެއްހެން އެނބުރެމުންދަނީ ދުނިޔެ ކަމުގައެވެ.
ކީރިތި ޤުރުއާނުގެ އަލްއަންބިޔާ ސޫރަތުގެ ތެއްތިރީސްވަނަ އާޔަތުގައި ، ﷲ ސުބްޙާނަހޫ ވަތަޢާލާ ވަޙީ ކުރައްވައި އަންގަވާފައި ވެއެވެ.
وَجَعَلْنَا السَّمَاءَ سَقْفًا مَّحْفُوظًا ۖ وَهُمْ عَنْ آيَاتِهَا مُعْرِضُونَ
މިއާޔަތުގެ މާނައީ ،
" އަދި ރައްކާތެރިކުރައްވާފައިވާ ފުރާޅެއްކަމުގައި ، ތިމަންރަސްކަލާނގެ އުޑު ލެއްވީމެވެ. އަދި އެއުރެންނަކީ އެތާނގެ ( އިރުހަނދާއި ، ތަރިތައްފަދަ ) ހެކިތަކަށް ފުރަގަސްދޭ ބަޔެކެވެ. "
އަދި ހަމަ އެފަދައިން ، އެއާޖެހިގެން އޮތް ، ތެއްތިރީސްވަނަ އާޔަތުގައި ވަޙީކުރައްވާފައި ވެއެވެ.
وَهُوَ الَّذِي خَلَقَ اللَّيْلَ وَالنَّهَارَ وَالشَّمْسَ وَالْقَمَرَ ۖ كُلٌّ فِي فَلَكٍ يَسْبَحُونَ
މިއާޔަތުގެ މާނައީ ؛
" އެކަލާނގެއީ ، ރޭގަނޑާއި ދުވާލު ، އަދި އިރާއި ހަނދު ހެއްދެވި ރަސްކަލާނގެއެވެ. އެއިން ކޮންމެ އެއްޗެއްމެ ، ފަލަކެއްގައި ހިނގަހިނގާ ހުރެތެވެ. "
އިރުހަނދާއި ތަރިތަކުގެ ޢިލްމަކީ ޚާއްޞަވެގެންވާ ޢިލްމެކެވެ. އެ ޢިލްމުގެ ތެރެޔަށް ފީނައި ހޯދަމުންދިޔަވަރަކަށް ، އެތަކެތި ހެއްދެވި ފަރާތެއްވާކަން ، އެ ޢިލްމު އުނގެނޭ މީސްތަކުންނަށް އެނގި ދޭހަވެއެވެ. މިކަމުގެ ހެއްކަކީ ، އެ ޢިލްމުގެ އަހުލުވެރިންކުރެ އެތައްބަޔަކު ، އިސްލާމްދީން އިޚްތިޔާރުކޮށް ، ﷲ ގެ މަގަށް ރުޖޫޢަވުމެވެ.
އަލްމާއިދަތު ސޫރަތުގެ ސޯޅަވަނަ އާޔަތުގައި ﷲ ތަޢާލާ ވަޙީކުރައްވައި އަންގަވާފައި ވެއެވެ.
يَهْدِي بِهِ اللَّهُ مَنِ اتَّبَعَ رِضْوَانَهُ سُبُلَ السَّلَامِ وَيُخْرِجُهُم مِّنَ الظُّلُمَاتِ إِلَى النُّورِ بِإِذْنِهِ وَيَهْدِيهِمْ إِلَىٰ صِرَاطٍ مُّسْتَقِيمٍ
މިއާޔަތުގެ މާނައަކީ ؛
" ﷲ، އެކަލާނގެ ރުއްސަވާ މަގަށް ތަބަޢަ ވީ މީހަކަށް ސަލާމަތުގެ މަގަށް އެފޮތުން މަގުދައްކަވަތެވެ. އަދި އެކަލާނގެ އިޛުނަފުޅުން އަނދިރިކަމުގެ ތެރެއިން އަލިކަމުގެ ތެރެޔަށް އެއުރެން ނެރުއްވަތެވެ. އަދި ސީދާވެގެންވާ ތެދުމަގަކަށް އެއުރެންނަށް މަގުދައްކަވަތެވެ. "
މިއާޔަތުގެ މަފްހޫމަކީ ، ކާއިނާތުގެ ޢިލްމުންދަސްވެ އުނގެނޭ އެއްޗަކުން ، އެޢިލްމު އުނގެނޭ ބަޔަކަށް ﷲ މަގުދައްކަތެވެ. އަނދިރިކަމުގެ ތެރެއިން އަލިކަމުގެ ތެރެޔަށް އެއުރެން ނެރުއްވަތެވެ. ހަމައެއާއެކު ، ސީދާވެގެންވާ ތެދުމަގަށް އެއުރެންނަށް މަގު ދައްކަވަތެވެ. އެއީ ﷲ ގެ މަގެވެ. އެކަލާނގެ ވޮޑިގެންވާކަމުގެ ހެއްކާއި ދަލީލުން އެބައިމީހުންގެ އިޢުތިޤާދު ހަރދަނާވެގެން ދިއުމަށް މަގުފަހިކޮށް ދެއްވުމެވެ.
އަލްމާއިދަތު ސޫރަތުގެ ސަތޭކަވިހިވަނަ އާޔަތަށް ބަލައިލަމާތޯއެވެ ؟ ﷲ ތަޢާލާ ވަޙީ ކުރެއްވިއެވެ.
لِلَّهِ مُلْكُ السَّمَاوَاتِ وَالْأَرْضِ وَمَا فِيهِنَّ ۚ وَهُوَ عَلَىٰ كُلِّ شَيْءٍ قَدِيرٌ
މިއާޔަތުގެ މާނައަކީ ؛
" އުޑުތަކާއި ، ބިމާއި ، އެތަންތާނގައި ވާހާ ތަކެއްޗެއްގެ މިލްކުވެރިކަންވަނީ ، ﷲއަށެވެ. އަދި އެކަލާނގެއީ ، ކޮންމެކަމެއްގެ މައްޗަށް ކުޅަދުންވަންތަ ރަސްކަލާނގެއެވެ. "
ވިހިވަނަ ޤަރުނުގެ އެސްޓްރޮނޮމިސްޓުން ، ޤަބޫލުކުރާ އެތައް ހެކިތަކެއް ، މީގެ ސާދަސަތޭކަ އަހަރުކުރިން ﷲ ތަޢާލާވަނީ ، ކީރިތި ޤުރުއާނުގައި ބަޔާންކުރައްވައި މީސްތަކުންނަށް އަންގަވާފައެވެ. ކަލަކު ވޮޑިގެންވާކަމުގެ ހެކިތަކަށް ބާރުލިބޭ ، ކާއިނާތުގެ އެތައް ސިއްރުތަކެއް ، މިޒަމާނުގައިވަނީ ސައިންސުން ހޯދާފައެވެ. ( ނުނިމޭ )
