ވިހަ ތީރު (61)

( 26 ޖަނަވަރީ 2025 ގައި ޝާއިޢުކުރި ބަޔާގުޅޭ )

( ދިލްނަޝީން ހުވާކުރުމުގެ ފުރުޞަތު ، ޙައިދަރެއް ނުދިނެވެ. އިރުކޮޅަކު ، ޙައިދަރުގެ ލޮލަށް ބަލަހައްޓައިގެން ހުރުމަށްފަހު ، ދިލްނަޝީން ދިޔައީ ފާޚާނާއާ ދިމާލަށެވެ. ޙައިދަރު އެހުރިގޮތަށް އެނދުމައްޗަށް ތިރިވިއެވެ.)

އިރުކޮޅެއްކޮށްލާފައި ، މެހެމަލްގެ ކޮޓަރިޔަށް ޙައިދަރު ދިޔައެވެ. މެހެމަލްއާ ކުރަންހުރި އެތައް ސުއާލުތަކެއް އެބަހުއްޓެވެ. މެހެމަލްއާ ކުރި ސުއާލުތަކުން ، ޙައިދަރުގެ ހިތަށް ތަސައްލީއެއް ލިބޭނެ މަޢުލޫމާތެއް ނުލިބުނެވެ. އެއަށްވުރެ ، މެހެމަލް ޗާލާކީވެފައި މަކަރުވެރިއެވެ.

" ޢުމުރުގެ ގޮތުން ދިލްނަޝީނަކީ ޙައިދަރަށްވުރެ މާ ހަގު އަންހެނެކެވެ. އެކަމަކު ، ޙައިދަރުގެ ވިސްނުން ބަދަލުކޮށްލާފަދަ ، ހިޔަޅު ބުއްދިއެއް ދިލްނަޝީންގެ އެބަހުއްޓެވެ. ޙައިދަރުކަހަލަ ވިސްނުންތެރި ފިރިހެނެއްގެ ސިކުނޑިޔާ ކުޅެލެވޭނީ ވަރަށް ޙީލަތްތެރި މީހަކަށެވެ. " މެހެމަލް ބުނަމުން ގެންދިޔައެވެ.

މެހެމަލް އެދައްކާ އެއްވެސް ވާހަކައެއް ޤަބޫލުކުރާކަށް ޙައިދަރު ބޭނުމެއްނުވިއެވެ. މެހެމަލް އެދައްކާ ވާހަކައިގެ ހެއްކެއްނެތި ، ދިލްނަޝީނާބެހޭގޮތުން އެކަހަލަވާހަކަ ނުދެއްކުމަށް ޙައިދަރު އެދުނެވެ. މެހެމަލްގެ ފޯނުނަގައި ، އޭނާ އެއްކޮށްފައިވާ ފޮޓޯތައް ޙައިދަރުގެ ފޯނަށް ފޮނުވައިލިއެވެ. ފޯނު ބަލައިލާފައި އޭނާއާ އެސުއާލުކުރުމަށް މެހެމަލް ބުންޏެވެ. ދިލްނަޝީނަށް އެފޮޓޯތަކާއި މެސެޖްތައް ދައްކާށެވެ. އެއަށްފަހު ޙަމްޒާއާބެހޭގޮތުން ސުއާލުކުރާށެވެ. މެހެމަލް އޭނާގެ އަތުގައިވާ އެންމެ ފަހު ހަތިޔާރުގެ ބޭނުން ހިފިއެވެ. އެގުޅުމަކީ ، ޙަޤީޤަތެއްކަމަށް ޤަބޫލުކުރުން ފިޔަވައި އެހެން އެއްވެސް ގޮތެއް ، ދިލްނަޝީނަށް ނޯންނާނެކަމަށް މެހެމަލް ބުންޏެވެ. އެ ފޮޓޯތައް ފެނިފައި ޙައިދަރުގެ ބޮލަށް އެނބުރުން އެރިއެވެ. އަދި ، ކަކުލުހުޅުން ވާގިދޫވެ ، ދެކަކޫމައްޗަށް ތިރިވިއެވެ. އެހާވަރުގެ ޙަޤީޤަތެއް އޮތްކަމެއްގައި ، ދިލްނަޝީން އެހުރީ އެއީ ދޮގެއްކަމަށް ހުވާކުރަންވެސް ތައްޔާރުގައެވެ. ދިލްނަޝީންލައްވައި ހުވާކުރުވަން ، ޙައިދަރުގެ ހިތަށް ކެތްނުވެގެން ، ދިލްނަޝީން ހުވާކުރިޔަ ނުދިނީއެވެ. އެހުރިހާކަމަކާ ގުޅިގެން ޙައިދަރުގެ ބޮލަށް އަރާފައިހުރި އެނބުރުން އިތުރު ވެގެން ދިޔައެވެ.

" އަހަރެންނާދޭތެރޭ މެހެމަލް ކަންތައްތިކުރީ ވަރަށް ބޭއިންސާފުންނެވެ. ގާތްތިމާގެ މީހަކަށްވެސް ނުބެލީމުއެވެ. މިވަރުގެ ކަމެއް އެނގުމުން އެކަން ސިއްރުނުކޮށް ، އަހަރެންގެ ޙަޔާތް ބަރުބާދުކުރަން ތިވިސްނީ ކޮން މަޤްޞަދެއްގައި ހެއްޔެވެ ؟ އެންމެ ދެރަވެގެން ، ދިލްނަޝީންގެ ޙަޔާތަށް އައި އެންމެ ފުރަތަމަ މީހަކީ އަހަރެންކަމަށް ދެކެމުން އަހަރެންގެ ހިތަށް ލިބުނު ހަމަޖެހުން ގެއްލިގެންނެއް ނުދިޔައީސް ނޫންހެއްޔެވެ ؟ ޙައިދަރަށް އިނީ ރޮވިފައެވެ.

މެހެމަލްގެ މަޤްޞަދަކީ ، ދިލްނަޝީންގެ ބޭވަފާތެރިކަމުން ، ޙައިދަރު ސަލާމަތް ކުރުމެވެ. ވާނުވާ ނޭނގޭ އަނދިރިގަނޑެއްގައި ،  ދިލްނަޝީނާއެކީ ޙައިދަރުގެ ދިރިއުޅުން އާބާދުވެގެންދާތަން ދެކެން މެހެމަލް ބޭނުންނުވާކަމުގައި ބުންޏެވެ. މެހެމަލް އެކުރިކަމަކީ ، ޙައިދަރުގެ ލޯ ހުޅުވައިލަދިނުމެވެ. ބޭވަފާތެރިކަމުގައި ދިރިހުރުމަށްވުރެ މަރުވުންވެސް މާ އަވްލާކަން ބޮޑެވެ. ދިލްނަޝީންގެ އެގުޅުމަކީ ، ކޮންމެވެސް ދުވަހަކުން ފަޅާއަރާނެ ގުޅުމެކެވެ. ޙައިދަރުފަދަ ، އޭނާ ލޯބިވާ އިންސާނަކު ، އެފަދަ ތަކުލީފަކުން ސަލާމަތްކުރުން އެއީ މެހެމަލްގެ ވާޖިބެއްކަމުގައި މެހެމަލް ބުންޏެވެ.

މެހެމަލްގެ އެ ހަމްދަރުދީގެ ބަސްތަކުން ، ޙައިދަރަށް ލިބުނު ތަސައްލީއެއް ނެތެވެ. މެހެމަލް އެއަދާކުރީ ، ރަޙުމަތްތެރިއެއްގެ ޒިންމާއާއި މަސްއޫލިއްޔަތުނޫންކަމުގައި ޙައިދަރު ބުންޏެވެ. ދިލްނަޝީނަކީވެސް ، މެހެމަލްފަދަ ބޭވަފާތެރި އަންހެނަކަށް ، މެހެމަލްގެ މަސައްކަތުން އެއޮތީ ހަދާފައެވެ. ޙައިދަރު ހީކުރީ ދިލްނަޝީނަކީ ތަފާތު އަންހެނެއްކަމަށެވެ. ނޫނެކެވެ. ހުރިހާ އަންހެނުންނަކީވެސް އެއްޒާތަކަށް އުޅޭ ބަޔެކެވެ. އެންމެންވެސް އުޅެނީ ހަމަ އެއްގޮތަކަށެވެ. މެހެމަލްއާ ދިމާއަށް ބަލަހައްޓައިގެން އިނދެ ޙައިދަރު ބުންޏެވެ. އެހެންމީހަކަށްޓަކައި ކޮންމެ މީހަކަށްވެސް ލަނޑުދީފާނެއެވެ. އެއީ އެމީހުންގެ އާދައެކެވެ.

ޙައިދަރުގެ އަތުގައި މެހެމަލް ހިފައިލުމާއެކީ މެހެމަލްގެ އަތްފޮޅުވައިލިއެވެ. މެހެމަލްގެ ފަރާތުން އެއްވެސް ތަސައްލީއެއް ބޭނުންނުވާކަމަށްބުނެ ޙައިދަރު ، ހަޅޭއްލަވައިގަތެވެ. މެހެމަލްގެ ފަރާތުންވެސް އެއްވެސް އުއްމީދެއްވެސް ޙައިދަރު ބޭނުމެއްނޫނެވެ. އެކޮޓަރިން ނުކުތްއިރު ޙައިދަރު ހުރީ ރުޅިއައިސް ރަތްވެފައެވެ. ނުކުތްގޮތަށް ، ޙައިދަރު ނުކުތީ ކާރުގައި ގެއިން ބޭރަށެވެ. ދިޔަތަނެއް އެއްވެސް މީހެއްގާތަކު ނުބުނެއެވެ. ޙައިދަރު ނުކުމެގެން ދިޔަތަން ފެނިފައި ކުލްސޫމްވެސް ގޭތެރެޔަށް ނުކުތެވެ. އެހާ ގަދަ ރުޅިއެއް އައިސްހުރެ ، ޙައިދަރު ނުކުމެގެން އެދިޔައީ ، މެހެމަލް ކީކޭކިޔައިގެންތޯ ، ކުލްސޫމް ސުއާލު ކުރިއެވެ.

މެހެމަލްއަށް ލިބުނު އެ ފުރުޞަތުގެ ބޭނުން ނިކަން ރަނގަޅަށް ހިފައިލިއެވެ. ފޯނުނަގައި ، ދިލްނަޝީނާއި ޙައިދަރުގެ ފޮޓޯތައް ކުލްސޫމަށް ދެއްކިއެވެ. ޙައިދަރު ރުޅިއައިސްގެން އެއުޅެނީ އޭނާދެކެ ނޫންކަމަށާއި ، އެކަމުގެ ސަބަބަކީ ދިލްނަޝީންކަމުގައި މެހެމަލް ބުންޏެވެ. ދިލްނަޝީނާއި ޙަމްޒާގެ ލޯބީގެ ގުޅުން ، ޙައިދަރަށް ފަޅާއެރީއެވެ. އެ މަޢުލޫމާތު މެހެމަލްއަށް ލިބުނީ ކިހިނެއްތޯ ކުލްސޫމް ސުއާލު ކުރިއެވެ.

" ޙަމްޒާގެ ކޮއްކޮއަކީ އަހަރެންގެ ވަރަށް ގާތް ރައްޓެއްސެކެވެ. ދިލްނަޝީންގެ ފޮޓޯ އޭނާއަށް ދެއްކީމަ ، ހުރިހާ ވާހަކައެއް އަހަރެންނަށް ކިޔައިދިނީއެވެ. ޙަމްޒާއާއި ދިލްނަޝީނަކީ ރައްޓެހިވެގެން އުޅުނު ދެމީހުންނެވެ. ދެމީހުން ދެމީހުންނަށް އިންތިހާއަށް ލޯބިވެގެން މަރުދަންޖެހޭވަރުވެފަ ތިބި ދެމީހުންނެވެ. ދެމީހުންގެ ކައިވެނީގެ ވާހަކަވެސް  ދެފަރާތުގެ ޢާއިލާއާ ދެމެދު އޮތީ ދެކެވިފައެވެ. ދިލްނަޝީން ބޭނުންވާ ކަންތައްތަކެއް ޙަމްޒާގެ ފަރާތުން ފުރިހަމަވީމަ ، ޙަމްޒާ ދޫކޮށްލާފައި އައިސް ، ޙައިދަރާ ކައިވެނިކުރީއެވެ. " މެހެމަލް ކިޔައިދެމުން ގެންދިޔައެވެ.

އަނދަ އަނދާހުރި އަލިފާންގަނޑަށް ، އަލިފާން އަޅަމުން ގެންދިޔައިރު ، މެހެމަލްގެ ހިތަށް އައިހާ ދޮގެއްވެސް އޭގެތެރެޔަށް ލަމުން ގެންދިޔައެވެ. އެވާހަކަތައް އެއީ ކުލްސޫމަށް ޤަބޫލުކުރެވޭ ކަހަލަ ވާހަކަތަކެއް ނޫނެވެ. އެގެޔަށް އޭނާ ދިލްނަޝީން ގެނައީ ، ޅީދަރިއެއްގެ ގޮތުގައެއްނޫނެވެ. އަމިއްލަ ދަރިއެއްގެ ގޮތުގައެވެ. ސާރާއަށް ފުރިހަމަކޮށްނުދޭ އެތައްކަމެއް ގެންދިޔައީ ، ދިލްނަޝީނަށް ފުރިހަމަކޮށްދެމުންނެވެ. ސާރާއަށް ނުދޭ ލޯބިދެމުން ގެންދިޔައެވެ. އެވަރުގެ ޙީލަތްތެރިކަމެއް ދިލްނަޝީންގައި ހުންނާނެކަމަކަށް ކުލްސޫމަށް ހީކުރެވިފައެއް ނެތެވެ. އެވަރުގެ މަޢުޞޫމިއްޔަތުކަމެއްގެ ފުރަގަހުގައި ދިލްނަޝީންގެ ޚަޞީލަތުގައި މަކަރާއި އޮޅުވައިލުން އޮވެދާނެކަމަކަށް ، ކުލްސޫމަކަށް ޤަބޫލެއް ނުކުރެވުނެވެ.

ދިލްނަޝީންމެންގެ ކޮޓަރިޔަށް ކުލްސޫމަށް ދެވުނުއިރު ، ދިލްނަޝީން އިނީ ނަމާދުކޮށްނިމިގެން ރޮއެރޮއެފައި ދުޢާކުރާށެވެ.

" އަހަރެންގެ ދަރިފުޅު ، ސަލާމަތުން ގެޔަށް އާދޭތޯ ދުޢާކުރާށެވެ ! މަޔެއްގެ ޒުވާން ދަރިޔަކު ދުނިޔެއިން ބޭކާރުކޮށްލާފައި ، މިހާރު ދިމާކޮށްފައި ތިހުރީ އަހަރެންގެ ދަރިފުޅުގެވެސް ދުވަސް ދުއްވާލަން ހެއްޔެވެ ؟ " ކުލްސޫމް ވަތްގޮތަށް ވަދެ ، ދިލްނަޝީނާ ދިމާލަށް ހަޅޭއްލަވައިގަތެވެ.

ދިލްނަޝީން ކޮޅަށް ތެދުވިއެވެ. އަދި ، އޭނާ އެފަދަކަމެއް ނުކުރާކަމަށް ބުންޏެވެ. އެވަގުތު ، ކުލްސޫމް އަތުގައި އޮތް މެހެމަލްގެ ފޯނުގައިހުރި ފޮޓޯތައް ދިލްނަޝީނަށް ދައްކައި އެއީ ކޮންކަމެއްތޯ ކުލްސޫމް ސުއާލު ކުރިއެވެ. މެހެމަލް އާ ދިމާލަށް ދިލްނަޝީން ބަލައިލިއެވެ. އަދި އެއީ ، ހުސްދޮގުކަމުގައި ދިލްނަޝީން ބުންޏެވެ. އެހުރިހާވެސް ކަމަކީ މެހެމަލްގެ ރޭވުމެވެ. މެހެމަލް ބޭނުންވެގެން އެއުޅެނީ ދިލްނަޝީން އެގެއިން ބޭރުކޮށްލާށެވެ. ފޮޓޯއިން އެފެންނަ ފިރިހެންކުއްޖާއާއެކީ އިށީނުމަށް ބުނީ މެހެމަލްތޯ ކުލްސޫމް ސުއާލު ކުރިއެވެ.

" އެފޮޓޯގައި އަހަރެން އެ ފިރިހެނާޔާއެކީގައެއް ނުއިށީންނަމެވެ. އެކަމަކު ، އެތަނުގައި އަހަރެން އިންކަމަށް ދައްކާފައި އެއޮތީ މެހެމަލްއެވެ. " ދިލްނަޝީން ބުންޏެވެ.

މެހެމަލްއަށް ލިބުނު ޙައިރާންކަން ބޮޑުވެގެންގޮސް ތަންމިނަށް އަނގަހުޅުވުނެވެ. ދިލްނަޝީނަކީ ހާދަ މަކަރުވެރި މީހެކެވެ. މެހެމަލްގެ ހިތަށް އެރިއެވެ. ކުލްސޫމްވެސް ހުރީ ، ދިލްނަޝީން އެދައްކާ ވާހަކަޔަކުން އާގަމަ ވެފައެވެ. އެފޮޓޯގައި އެއިނީ އޭނާކަމަށާއި އެކަމަކު ، އެފޮޓޯގައިހުރި ފިރިހެންކުއްޖާއަކީ އޭނާ ދަންނަ ކުއްޖެއްނޫންކަމަށް ދިލްނަޝީން ބުންޏެވެ. ނަމާދުން ފޭބިގޮތަށް އޭނާޔަށް އެހެދެނީ ބުހުތާން ދޮހުކަން ދިލްނަޝީނަށް އެނގެއެވެ. އެހެނަސް ، އޭނާއަށް އިތުރުގޮތެއް ނެތެވެ. މަޞަލަޙަތަށްޓަކައި އެކަމުގައި ދޮގުހަދަން އޭނާއަށް އޮތީ މަޖުބޫރުވެފައެވެ. އޭނާގެ ކައިވެންޏާއި ދިރިއުޅުން ސަލާމަތް ކުރުމަށް ، އެނޫން އެހެންގޮތެއް ނެތެވެ.

" އެހާ ބޮޑު ތެދު ޙަޤީޤަތެއް ، ދިލްނަޝީން ތިދޮގުކުރަނީ ކީއްވެ ހެއްޔެވެ ؟ " މެހެމަލްއަށް ނުހުރެވިގެން ސުއާލު ކުރިއެވެ.

އެއީ ޙަޤީޤަތެއްނޫންކަމަށްވާތީ ، އެކަން އޭނާއަށް ދޮގުކުރެވިދާނެކަމަށް ދިލްނަޝީން ބުންޏެވެ. މިހާރަކީ ޓެކްނޮލޮޖީގެ ބޭނުންކޮށްގެން ފޭކް ފޮޓޯތައް ހަދައި މީހުންގެ އަބުރުކަތިލަމުންދާ ދުވަސްވަރެއްކަން ، މެހެމަލްއަށާއި ކުލްސޫމަށް ، ދިލްނަޝީން ހަނދާން ކޮށްދިނެވެ.

" މެހެމަލް ބުނާގޮތަކަށް ބުނާމީހަކާއެކީ ފޮޓޯއެއްހަދައި ބޭނުންގޮތަކަށް ދައްކައިލުމަކީ ، ޓެކްނޮލޮޖީގެ އެހީގައި އަހަރެންނަށްވެސް  އުނދަގޫކަމެއްނޫނެވެ. އަހަރެން މިގޭގައި ދިރިއުޅުމަކީ ، މެހެމަލް ބޭނުންވާކަމެއް ނޫނެވެ. އެންމެ ފުރަތަމަ ދުވަހުއްސުރެ ފެށިގެން މެހެމަލް ކުރަމުން އަންނަ މަސައްކަތަކީ އެއީއެވެ. ޙައިދަރުގެ ހިތުގައި އަހަރެންގެ މައްޗަށް ނަފުރަތު އުފެދޭނެ ، އެއްވެސްކަމެއް ދޫކޮށެއް ނުލަމުއެވެ. އަހަރެން ، މެހެމަލްއަށް ދިނީ ކޮން ގެއްލުމެއް ހެއްޔެވެ ؟ އަހަރެން މިގެޔަށް އައީ އަހަރެންގެ ކައިވެންޏަށް ޙައިދަރު އެދިގެން ކައިވެނިކޮށްގެންނެވެ. މިގެޔަށް އަހަރެން އައީ އަމިއްލަޔަކަށް ނޫނެވެ. މިގެޔަށް އަހަރެން ގެނެސް ވެއްދީ މިހިރަ ފެންނަ އަހަރެންގެ މަންމައެވެ. މެހެމަލްއަށް ވެގެން ތިއުޅެނީ ކިހިނެއް ހެއްޔެވެ ؟ " ރޮމުންރޮމުން ދިލްނަޝީން ބުނަމުން ގެންދިޔައެވެ.

" މަންމާއެވެ ! އެއްވެސް އެހެންގޮތެއް ނުފެނުނީމަ ، މެހެމަލް މިހާރު ދިމާކޮށްފައި އެހުރީ ޓެކްނޮލޮޖީގެ ބޭނުންކޮށްގެން އަހަރެންނަށް ދެވެން އޮތް ގެއްލުމެއް ދޭށެވެ. މެހެމަލްގެ ބޭނުމަކީ އެއީކަން ، މަންމަޔަށްވެސް ސާފުކޮށް އެނގޭނެއެވެ. " ދިލްނަޝީންގެ ވާހަކަ ކުރިޔަށް ގެންދިޔައެވެ.

މެހެމަލް ހުރީ ތަންމިނަށް އަނގަ ހުޅުވި ، ދެލޯ ބޮޑުވެފައެވެ. ދިލްނަޝީން އެ ވާހަކަ ދައްކަނީ ، އޭނާގެ ވިސްނުމާ އެކަށީގެންވާވަރަށްވުރެ މަތިންނެވެ. ކުރިން އެކަހަލަ ކަމެއް އެނގިފައި އޮތްނަމަ އޭނާ މިހާރު އޮންނާނީ އެކަންވެސް ކޮށްފައެވެ. މިކަމުގައި ދިލްނަޝީން އެހުރީ މެހެމަލްއަށްވުރެ އެއްދަރަޖަ ކުރީގައެވެ. އެހުރިހާ ފޮޓޯއަކީ ފޮޓޯޝޮޕް ބޭނުންކޮށްގެން ހަދާފައިހުރި ދޮގު ފޮޓޯތަކެއްކަމަށް ދިލްނަޝީން ބުނަމުން ގެންދިޔައެވެ.

" ބޮޑުދައިތާއެވެ ! މިއަންހެނާ އެހަދަނީ ހުސް ބުހުތާން ދޮގެވެ. އެފޮޓޯތަކަކީ ޙަޤީޤީ ފޮޓޯތަކެކެވެ. އެއީ ހަދާފަހުރި އެއްޗެއްނޫނެވެ. ބޮޑުދައިތަ ބޭނުންކަމަށް ވަންޏާ ، ޙަމްޒާގެ ކޮއްކޮ ރިދާއާވެސް ވާހަކަ ދައްކުވަފާނަމެވެ. " މެހެމަލް ހަޅޭއްލަވައިގަތެވެ.

ޙަމްޒާގެ ކޮއްކޮގެ ވާހަކަ ތަކަކީވެސް ، އެ ޙަމްޒާގެ ވާހަކަތަކާއި ، އެފޮޓޯތަކާ އެއްގޮތަށް ހުސް ފޭކު ތަކެއްޗެވެ. އެއީ ދޮގު ތުހުމަތު ތަކެކެވެ. މެހެމަލް މިގެޔަށް އައި ފުރަތަމަ ދުވަހުން ފެށިގެން މެހެމަލްގެ މަސައްކަތަކީ ، އޭނާ އެގެއިން ބޭރުކޮށްލުންކަމަށް ދިލްނަޝީން ބުންޏެވެ. ދިލްނަޝީންވެސް ހަދަމުން އެދަނީ ހުސްދޮގުކަމަށް މެހެމަލްވެސް ބުނަމުން ގެންދިޔައެވެ. ދޮގުހަދާމީހުން އެމީހުންގެ ދޮގު ، ތެދަށް ހެދުމަށްޓަކައި އަޑުގަދަކުރާނެކަމަށް ދިލްނަޝީން ބުންޏެވެ. އެތަން އޭނާއަށް އޮތީ ފެނިފައެވެ. މެހެމަލް އެގެޔަށް އައީއްސުރެ ދިލްނަޝީން ތަޙައްމަލް ކުރަމުން އެގެންދަނީ އެތަކުލީފު ތަކެވެ. މޮޅު ރޭވުމެއް ރާވައިގެން ، ދޮގުވާހަކަތަކެއް ހިފައިގެން ނާންނަ ދުވަހަކަށް އިރެއް ނާރައެވެ.

" އެވަރުގެ ކަމެއް މެހެމަލް ކޮށްފާނެކަމަކަށް އަހަރެން ހިތަކަށް ނާރައެވެ. މެހެމަލް ތިއުޅެނީ ކީކޭހިތާ ހެއްޔެވެ ؟ މި ގޭގައި ހުރެލަން ދިން ފުރުޞަތަށް ޝުކުރުނުކޮށް ، ތިހެން އުޅެންޏާ ، ކުރިންވެސް ހެދިގޮތަށް އަދިވެސް އަހަރެންނަށް ، މިގެއިން މެހެމަލް ނެރެލެވިދާނެއެވެ. " ލޯއަޅައިގެންފައި ، މެހެމަލްއާ ދިމާލަށް ކުލްސޫމް ބުންޏެވެ.

މެހެމަލްއާ ދިމާލަށް އެތިވަރު ގޮވައިގެންފައި ކުލްސޫމް އެކޮޓަރިން ނުކުތެވެ. އޭރު ، މެހެމަލްގެ އަޑުގެ ނެތްތަނަށް ކުލްސޫމަށް ގޮވަމުން ގެންދިޔައެވެ. މެހެމަލް އެތަނުން ނުކުތުމާއެކީ ، ދިލްނަޝީނަށް އަޑުން އަޑުނަގައި ރޮވެން ފެށިއެވެ. އޭނާގެ ޒުވާން ޢުމުރުގައި އެ ކުރިމަތިވަނީ ކޮންފަދަ މުޞީބާތެއް ހެއްޔެވެ ؟ އޭނާއަށް ކުރެވުނު ކުށަކީ ކޮބައި ހެއްޔެވެ ؟ ކުށެއްކުރެވިފައި އޮތްކަމަށް ވަންޏާ ، އެކަމުން ސަލާމަތްވުމަށްޓަކައި ، އެތައް ތަކުލީފެއް އުފުއްލަން އެބަ ޖެހެއެވެ. އެތައް ދޮގެއް ހަދަން އެބަ ޖެހެއެވެ.

އަނީސާގެ ކަންބޮވުންވެސް އިންތިހާއެވެ. ސިޓިންގރޫމުގައި އެކަނި އިންދާ އައި ފޯނުގެ އަޑަށް ސިއްސައިގެންގޮސް ފޯނުނެގިއެވެ.

" މަންމާއެވެ ! މިވަގުތު ، އަހަރެން އެއްވެސް ހެއްކެއް އަދި ޙުއްޖަތެއް ނުދައްކާނަމެވެ. އަހަރެންގެ ކައިވެންޏާއި އަހަރެންގެ ގެ  ސަލާމަތްކުރުމަށްޓަކައި ދޮގުހެއްކެއް ދޭން ޖެހިއްޖިއްޔާ އަހަރެން ހަދާނީ ކިހިނެއްކަން ބުނެދޭށެވެ. އެހެން ވާހަކައެއް ނުފަށާށެވެ. އަހަރެންނާ ޚިލާފަށް މެހެމަލް އަތުގައި ހެކިއެބަހުއްޓެވެ. އަހަރެންނާއި ޙަމްޒާއާއެކީ ނަގާފައިހުރި ފޮޓޯތައްވެސް މެހެމަލް އެ ހުރީ ހޯދައިގެންނެވެ. " ދިލްނަޝީން ބުންޏެވެ. ( ނުނިމޭ )