މިއަހަރުގެ ޅެންވެރިންގެ ދުވަސް ފާހަގަކުރުމުގެ ގޮތުން ލިޔުންތެރިންގެ ގުޅުމާއި ސެންޓްރ ފޮރ ހަޔަރ ސެކަންޑަރީ އެޑިޔުކޭޝަން، މާލެ އާ ގުޅިގެން ޖަލްސާއެއް ބާއްވައިފިއެވެ. މި ޖަލްސާ އޮތީ ސީއެޗްއެސްއީގެ ޖަލްސާކުރާ މާލަމުގައެވެ. ޝަރަފުވެރި މެހުމާނަކީ ދިވެހި ޅެންވެރިކަމުގައި މަޝްހޫރު ފަރެސް ޢާމިރެވެ. ދިވެހިރާއްޖޭގެ ގައުމީ އަރުޝީފުގެ ޑިރެކްޓަރ ޖެނެރަލް މުޙައްމަދު ޢާމިރެވެ.
ޖަލްސާގައި މަރުހަބާ ދެންނެވުމުގެ ގޮތުން ވާހަކަދެއްކީ ސީއެޗްއެސްއީގެ ދަރިވަރު ޝާޔާން ޢަބްދުﷲ ޢާމިރެވެ.
ޖަލްސާގައި ހުށަހެޅުނު އައިޓަމްތަކުގެ ތެރޭގައި ސީއެޗްއެސްއީގެ ދަރިވަރުންގެ އައިޓަމްތަކާއި ލިޔުންތެރިންގެ ގުޅުމުގެ ފަރާތުން ހުށަހެޅި އައިޓަމްތައް ހިމެނެއެވެ.
ޝަރަފުވެރި މެހުމާނު މި ޖަލްސާގައި ވާހަކަފުޅު ދެއްކެވިއެވެ. އޭނާގެ ވާހަކަފުޅުގައި ޅެންވެރިކަމުގެ މުހިއްމުކަމާއި އަދަބިއްޔާތުގައި ޅެންވެރިކަމަށް ލިބިފައިވާ ދަރަޖަ ހާމަކޮށްދެއްވިއެވެ. މީގެ އިތުރަށް ރެޕް ލަވައަކީ ޅެންތޯ ނުވަތަ ނޫންތޯ ކުރެވޭ ބަހުސުގެ މައްޗަށް ވަރަށް ކުރު ގޮތަކަށް ބައްލަވައިލެއްވިއެވެ.
މި ޖަލްސާ ބޭއްވުމުގެ ކުރިން ލިޔުންތެރިންގެ ގފުޅ:ުމުގެ ފަރާތުން ވަނީ ސީއެޗްއެސްއީގެ ދަރިވަރުންނަށް ޚާއްސަ ޅެން ކުލާހެއް ހިންގައިފައެވެ. މި ކުލާހުގައި އިރުޝާދު ދެއްވީ ފަރެސް ޢާމިރެވެ. ކުލާހަށް ފަހު ދަރިވަރުންނަށް ޅެން ހެދުމުގެ މުބާރާތެއް ހުޅުވައިލެވުނެވެ. މުބާރާތުގައި އެ ސްކޫލްގެ 12 ދަރިވަރަކު ބައިވެރިވިއެވެ. މުބާރާތުގެ 1 ވަނައާއި 2 ވަނައާއި 3 ވަނައަށް ލިޔުންތެރިންގެ ގުޅުމުގެ ފަރާތުން އިނާމާއި ސެޓްފިކެޓު ދިނެވެ. މީގެ އިތުރަށް 1 ވަނަ ޅެންވެރިޔާއަށް ތަށްޓެއްވެސް ވަނީ ދީފައެވެ. ތަށްޓާއި އިނާމު ހަވާލުކޮށް ދެއްވީ ޝަރަފުވެރި މެހުމާނު ފަރެސް ޢާމިރެވެ.
ޅެން ހެދުމުގެ މުބާރާތުން އެއްވަނަ ހޯދީ ސީއެސްއެޗްއީގެ ސްކޫލް ކެޕްޓަން ޙައްވާ ޒާއިން ޒަމީލެވެ. މި ދަރިވަރު ވަނީ ލިޔުންތެރިންގެ ގުޅުމުގެ ފަރާތުން ޢާއްމުކޮށް ހުޅުވާލައިގެން 2024 ވަނަ އަހަރުގެ ޅެންވެރިންގެ ދުވަހުގެ މުނާސަބަތުގައި ބޭއްވި ޅެންހެދުމުގެ މުބާރާތުން 2 ވަނަ ހޯދައިފައެވެ.
މުރާތުން ދެވަނަ ހޯދި ދަރިވަރަކީ އާމިނަތު ޒީކް ޝަމީނެވެ. 3 ވަނަ ހޯދީ އާމިނަތު ޖަންނާއެވެ.
ޖަލްސާގައި ހިމެނުނު މުހިއްމު ކަންތައްތަކުގެ ތެެރޭގައި ލިޔުންތެރިންގެ ގުޅުމުގެ ފަރާތުން ނެރުނު "ޅެންވެރިޔާ -9" ފޮތް ނެރުންވެސް ހިމެނެއެވެ. ފޮތް ނެރެދެއްވީވެސް ޝަރަފުވެރި މެހުމާނެވެ.
ޖަލްސާގައި ދިވެހި ޅެންވެރިންގެ ޅެން ހުށަހެޅުން އޮތެވެ. ޅެން ހުށަހެޅުއްވީ ޢަބްދުﷲ ޢަފީފް (އަފީފްބެ)އާއި ހަތިފުށީ ޢަބްދުﷲ ޝާކިރާއި ކަނީރު ޢަބްދުއްރަޙީމާއި އާދަމް ޙަލީމް ޢަދްނާނާއި އަމްޖަދް ރަޝާދެވެ. މީގެ އިތުރަށް ރޯނުގޭ ޙަސަން މަނިކު ލަވައެއް ހުށަހެޅުއްވިއެވެ. އަދި ޅެންވެރިންގެ ހަވީރުގެ ފަރާތުން ޢަބްދުﷲ ރަޝީދުގެ އެހީތެރިކަމާއެކު ސީއެޗްއެސްއީގެ ދެ ދަރިވަރަކު ވާދަ ރައިވަރުކޮޅެއް ހުށަހެޅިއެވެ.
ޖަލްސާގައި ލިޔުންތެރިންގެ ގުޅުމުގެ ރއީސް ޢައްބާސް އިބްރާހީމާއި ސީއެޗްއެސްއީގެ ޕްރިންސިޕަލް ޢަބްދުﷲ ދީދީ ވާހަކަފުޅު ދެއްކެވިއެވެ.
