( 21 ޖަނަވަރީ 2025 ގައި ޝާއިޢުކުރި ބަޔާގުޅޭ )
( " ދިލްނަޝީނަކީ ، ރަޙުމަތްތެރިއެއްކަމަށް ޙައިދަރު ބަލަމު ނޫންހެއްޔެވެ ؟ އެހެންވީމާ ، މިޒާތުގެ ކަންކަން ޙައިދަރަކަށް ނުފެންނާނެއެވެ. އެކަންކަމުގެ ހިލަމެއްވެސް ނުވާނެއެވެ. އެކަމަކު ، އަހަރެންނަށް ދިލްނަޝީން އެއީ ، އަހަރެންގެ އެންމެ ބޮޑު ދުޝްމަނެވެ. ދިލްނަޝީންގެ ސިއްރުތައް އަހަރެން ހޯދި ސަބަބަކީ އެއީއެވެ. " މެހެމަލް ބުންޏެވެ.)
ދިލްނަޝީނާއި ޙަމްޒާއާ ދެމެދު އޮތް ލޯބީގެ ގުޅުމުގެ ވާހަކައިން އޭނާއާ ސުއާލު ކުރުމުގެ ބަދަލުގައި ، ޚުދު ދިލްނަޝީންގާތު އެކަމާ ސުއާލުކުރުމަށް ، މެހެމަލް ބުންޏެވެ. އެވާހަކަ ، ޙައިދަރުގާތު ނުބުނެއޮތީ ކީއްވެތޯ ޙައިދަރުގެ އަނބިމީހާގާތު އަހާށޭ ބުނެ ، ޙައިދަރު އިތުރަށް ރުޅިއަރުވަމުން ގެންދިޔައެވެ.
" ޙައިދަރަށް އޮޅުވާލައި ، މަކަރުހަދައި ، ޙައިދަރުގެ ޙަޔާތަށް އައީ ކޮން މަޤްޞަދެއް ޙާޞިލްކުރަންތޯ ނުބަލާނަން ހެއްޔެވެ ؟ " މެހެމަލް ބުންޏެވެ.
މެހެމަލްގެ އެންމެފަހުތީރު ޙައިދަރުގެ ހިތަށް އަމާޒު ކުރުމަށްފަހު ، ނުކުމެގެން ދިޔައެވެ. މެހެމަލް އެތަނުން ނުކުތުމާއެކީ ، ޙައިދަރު އޭނާގެ ގޮޑިޔަށް ރީތިކޮށް ފެތުނެވެ. އޭނާގެ ސިކުނޑިއަށް ދުވަހަކުވެސް ނުލިބޭފަދަ ހާސްކަމެއް ލިބިގެންދިޔައެވެ.
ދިލްނަޝީން އޮތީ އެނދުމައްޗަށް ވެއްޓުނުގޮތަށް އަދިވެސް ނުތެދުވެއެވެ. ނޯކަރަކު އައިސް ، ކާންވެގެން ކުލްސޫމް އޭނާއަށް އެބަގޮވާކަމަށް ނޯކަރު ބުނަމުން ގެންދިޔައެވެ. އެތައްފަހަރަކު ގޮވިއިރުވެސް ދިލްނަޝީނަކަށް އަޑެއް ނީވުނެވެ. ނޯކަރު އައިސް ދިލްނަޝީންގެ ކޮނޑުގައި މަޑުމަޑުން ޖަހައިލުމުންވެސް ޚަބަރެއް ނުވިއެވެ. ދިލްނަޝީންއޮތީ ޚަބަރު ހުސްވެފައެވެ.
ކުލްސޫމަށް ގޮވަމުން ، ނޯކަރު ތިރިޔަށް ދަނިކޮށް ، ޙައިދަރު ވަދެގެން އައެވެ. މަންމަޔަށް އެހާވަރަށް އެގޮވަނީ ކީއްވެތޯ ޙައިދަރު ސުއާލު ކުރިއެވެ. ދިލްނަޝީނަށް ގޮވާގޮވާ ޚަބަރެއް ނުވިކަމަށާއި އޮތީ އެނދުމައްޗަށް ވެއްޓިފައިކަމަށް ނޯކަރު ބުންޏެވެ. ޙައިދަރު އޭނާގެ ކޮޓަރިޔާ ދިމާލަށް ދުއްވައިގަތެވެ. ދިޔަގޮތަށްގޮސް ، ދިލްނަޝީނަށް ގޮވާގޮވާ ޚަބަރެއް ނުވިއެވެ. އެވަގުތު ކުލްސޫމްވެސް އެތަނަށް އައިސް ދިލްނަޝީނަށް ގޮވަމުން ގެންދިޔައެވެ. މޫނަށް ފެންޖެހީމަ ، ދިލްނަޝީންގެ ލޯހުޅުވައިލިއެވެ، އެހެނަސް ، ދިލްނަޝީން ، ރަނގަޅަކަށް ހެޔެއް ނާރައެވެ. ޑޮކްޓަރަށް ގުޅުމަށް ކުލްސޫމް ، ޙައިދަރުގާތު ބުންޏެވެ. ދެމައިންވެސް ތިބީ ހާސްވެގެންގޮސް ހަދާނެގޮތް ބޮޑުވެފައެވެ.
އަނީސާއިނީ އޭނާގެ ދަރިފުޅުގެ ޙާލާމެދު ކަންބޮޑުވެފައެވެ. ކާކަށްވެސް ނޫޅެއެވެ. ތަބަކަކަށް ކާއެއްޗެތި އަޅައިގެން ޢާފިޔާ އެތަނަށް އައެވެ. އެހެނަސް ، ބަނޑުހައި ނުވާކަމަށް ބުނެ ، އަނީސާ ކާކަށް ނޫޅުނެވެ.
" ޢާފިޔާއެވެ ! އަހަރެންނަށް ދިލްނަޝީނާމެދު ގޯސްކޮށް ކަމެއް ކުރެވުނު ހެއްޔެވެ ؟ އަހަރެންނަކީ ދިލްނަޝީންގެ މަންމައެވެ. ދިލްނަޝީންގެ ޙާލާމެދު އަހަރެން ވަރަށް ކަންބޮޑުވެއެވެ. އަހަރެންކަހަލަ މަންމައެއް ޢާފިޔާ ދުށިން ހެއްޔެވެ ؟ އަހަރެންނަށް އަހަރެންގެ އަމިއްލަ ދަރިފުޅުގެ ފުރާނަ ދުއްވާލަން މަސައްކަތް ކުރެވުނީ ކޮންގޮތަކުން ހެއްޔެވެ؟ " އަނީސާ ބުންޏެވެ.
މާޒީ ހަނދާން ކޮށްގެން ދިލްނަޝީންގެ މިއަދުގެ އުފާތައް ޤުރުބާންކުރަން އެއުޅެނީ ކީއްވެގެން ހެއްޔެވެ ؟ އަނީސާ އެކުރިކަމެއް ކުރީ ދިލްނަޝީނަށް ރަނގަޅަކަށެވެ. އަބަދު އަބަދު މާޒީއަށް ވިސްނައިގެން ، ކުރިޔަށް ފިޔަވަޅެއް އެޅޭނީ ކިހިނެއް ހެއްޔެވެ ؟ އަނީސާ ކުރަމުން އެގެންދާ މަސައްކަތަކީ ، ދިލްނަޝީންގެ މާޒީގެ ތަކުލީފުތަކުން އޭނާގެ ދަރިފުޅު ސަލާމަތް ކުރުމުގެ މަސައްކަތެވެ. ދަރިންނަށް ހެޔޮނޭދޭނީ ކޮންމަޔެއް ހެއްޔެވެ؟ އަނީސާއަށް ދިލްނަޝީނާމެދު ޢަމަލު ކުރެވެމުންދަނީ ތަންކޮޅެއް ހަރުކަށިކޮށްކަމަށް ، ޚުދު އަނީސާވެސް ޤަބޫލުކުރިއެވެ. އެހެންކަމުން ، ލޯތްބާއެކީ ، ޢާފިޔާ ދިލްނަޝީނާ ވާހަކަ ދެއްކުމަށް އަނީސާ އެދުނެވެ. އަދި ، އެކަމަށް ޢާފިޔާވެސް އެއްބަސް ވިއެވެ.
ދިލްނަޝީންގެ ހެޔަށް ގޮތްވީ ، ފިކުރުބޮޑުވެގެންކަމުގައި ޑޮކްޓަރ ބުންޏެވެ. ދިލްނަޝީނަށް ތަކުލީފު ލިބޭނެ އެންމެހާ ކަންކަމުން ، ދިލްނަޝީން ދުރުކޮށްފައި ބެހެއްޓުމަށްވެސް ، ޑޮކްޓަރ ލަފާދިނެވެ. އެވަގުތު ، މެހެމަލްވެސް އެތަނަށް އައެވެ.
ޑޮކްޓަރާއެކީ ޙައިދަރުވެސް ކޮޓަރިން ބޭރަށް ނުކުތެވެ. ދިލްނަޝީނަށް ކާއެއްޗެއް ގެނެސްދިނުމަށް ، ބަދިގެފަރާތަށް ދާން ކުލްސޫމް ތެދުވުމާއެކީ ، ކުލްސޫމްގެ ގައިގައި ދިލްނަޝީން ބައްދައިލިއެވެ. އޭނާ އެކަނި ދޫކޮށްލާފައި ނުދިއުމަށް އެދުނެވެ. މެހެމަލް އެތާނގައި ބަހައްޓާފައި އެންމެން ހިނގައްޖެނަމަ ، އޭނާއާ މެހެމަލް ދިމާކުރާނެއެވެ. ދިލްނަޝީނަށް ނާސްތާ ގެނެސްދިނުމަށް ނޯކަރުގާތު ބުނުމަށް ، މެހެމަލްވެސް އެކޮޓަރިން ފޮނުވައިލިއެވެ. މެހެމަލް އެތާހުރެގެން ކަމެއް ރަނގަޅުވުމުގެ ބަދަލުގައި ، ހުރިހާކަމެއްވާނީ ގޯސްކަން ، ކުލްސޫމަށްވެސް އެނގެއެވެ.
މެހެމަލްތިރިޔަށް ދަނިކޮށް ޙައިދަރާ ދިމާވިއެވެ.
" ޙައިދަރެވެ. ދިލްނަޝީން އެއުޅެނީ ފިކުރު ބޮޑުވެގެންނެއް ނޫނެވެ. ދިލްނަޝީން މިހާރު އެއުޅެނީ ، ޙައިދަރާ ކުރިމަތިލާން ލަދުންނެވެ. " މެހެމަލް ބުންޏެވެ.
ޙަމްޒާގެ ވާހަކަ ، ޙައިދަރު ގާތުގައި ބުނާނެވާހަކަ ދިލްނަޝީންގާތު ބުނެގެން ، ދިލްނަޝީންގެ ކަންބޮޑުވުން އުފެއްދީ މެހެމަލް ކަމަށް ޙައިދަރު ބުންޏެވެ. އެކަމަށް މެހެމަލް އެއްބަސްވިއެވެ. ފަޚުރުވެރިކަމާ އެކުގައެވެ. ޙައިދަރަށް އެވާހަކަތައް ކިޔައިދިނުމަށް ދިލްނަޝީންގާތު މެހެމަލް ބުންޏެވެ. އަދި ، ދިލްނަޝީން އެވާހަކަތައް އަމިއްލަޔަށް ކިޔައިނުދީފިނަމަ ، ޙައިދަރުގާތު އެވާހަކަ އޭނާކިޔައިދޭނެކަމަށް ، ދިލްނަޝީންގާތު ބުނިކަމަށް މެހެމަލް އިޢުތިރާފް ވިއެވެ. މެހެމަލްގެ ބޭނުމަކީ ، ދިލްނަޝީންގެ ބޭވަފާތެރިކަން ، ޙައިދަރަށް ސިއްރުކޮށްގެން ހުއްޓާ ، އެކަން އެނގުމުން ޙައިދަރަށްލިބޭނެ ތަކުލީފުތަކުން ޙައިދަރު ދުރުކުރުމެވެ. އެކަމަކު ، އެތައް ފަހަރަކު މެހެމަލް ބުނެގެންވެސް ދިލްނަޝީން އެކަމެއްނުކުރިއެވެ. މެހެމަލްއަށް އެކަންކުރަން ޖެހުނު ސަބަބަކީ އެއީއެވެ.
ދިލްނަޝީން އެއުޅެނީ ، ހުރިހާކަމެއް ރަނގަޅުކަމަށް މީހުންނަށް ދައްކައިގެން ، އޮޅުވާލައިގެން ޙައިދަރުގެ ދިރިއުޅުން ބަރުބާދު ކޮށްލާށެވެ. ފިރިންނަށް ޚިޔާނާތްތެރިވާ އަންހެނުންނަށް ، ފިރިމީހާގެ ގެއިން ޖާގައެއް ނޯންނާނެކަން ، ޙައިދަރަށް ، މެހެމަލް ހަނދާން ކޮށްދިނެވެ. ފިރިމީހާގެ ހިތުގައިވެސް އެފަދަ އަންހެނުންނަކަށް ޖާގައެއް ނޯންނާނެއެވެ.
" ޙައިދަރު ،ދެން ހަދާނީ ކިހިނެއް ހެއްޔެވެ ؟ ދިލްނަޝީނަށް ދޭނީ ކޮން އަދަބެއް ހެއްޔެވެ ؟ " މެހެމަލް ބުންޏެވެ.
ދިލްނަޝީންގެ އެއްވެސް ކުށެއް އަދި ސާބިތެއް ނުވެއެވެ. އެހެންވީމާ ، ދިލްނަޝީނަށް ދޭނެ އަދަބަކާމެދު ، ޙައިދަރު އަދި ގޮތެއް ނުނިންމައެވެ. ދިލްނަޝީނާ އެވާހަކަ ދެއްކުމުގެ ކުރިން ، ދިލްނަޝީނަށް ދޭނެ އަދަބަކާމެދު ގޮތެއް ނިންމުމަށް މެހެމަލް ލަފާދިނެވެ. މެހެމަލްގެ ބޭނުމަކީ ، ޙައިދަރު ނިންމާނެ ގޮތަކީ ، ދިލްނަޝީން ދޫކޮށްލުންކަމަށް ޙައިދަރު ނިންމައިގެން ހުރުމެވެ. އަދި ، އެއްވެސް ޙާލެއްގައި ، ޙައިދަރުގެ ނިންމުން ބަދަލު ނުކުރުމެވެ. އެވާހަކަ ޙައިދަރުގެ ދުލުން ބުނޭތޯ ، މެހެމަލްކުރި މަސައްކަތް ކާމިޔާބެއް ނުވިއެވެ.
" މިވަގުތު ، ޙައިދަރު ހުންނަންޖެހޭނީ ދިލްނަޝީންގެ ގާތުގައެވެ. ކުރީގެ ލޯބިވެރިޔާގެ ގާތަކު ނޫނެވެ. ޙައިދަރުގެ މިއަދާމެދު ވިސްނުމަށް އިރުއިރުކޮޅުން ، އަހަރެންނަށް ހަނދާންކޮށްދޭކަށް ނުޖެހެއެވެ. ޙައިދަރުގެ މާޒީއަކީ ތޫފާނެކެވެ. އެ ތޫފާނުން އަހަރެމެންނަށް އަދިވެސް މިއުޅެނީ ސަލާމަތް ނުވެގެންނެވެ. ތޫފާނުގެ އަސަރު މިގެއިން ފިލުވައިލެވޭކަށްވެސް ނެތެވެ. އިރުއިރު ކޮޅުން ، އިރުއިރުކޮޅުން ކޮންމެވެސް ތަކުލީފެއް އެބަ ޖައްސައެވެ. އެކަމުގެ ސަބަބު މިގެއާ ދުރުކޮށް ، ފޮނުވައިލެވޭކަށްވެސް ނެތެވެ. މާޒީގެ ހިތި ހަނދާންތައް ދޫކޮށްލާފައި ، މިއަދުގެ އުފާތަކަށް ޙައިދަރުގެ ވިސްނުން އަމާޒުނުކުރެވިގެން ތިއުޅެނީ ކީއްވެގެން ހެއްޔެވެ ؟ " މެހެމަލްއާއި ޙައިދަރު ވާހަކަ ދައްކަން ތިބިތަން ފެނިފައި ކުލްސޫމްގާތަށް ރުޅިއައެވެ.
މެހެމަލްއާ ދުރުގައި ޙައިދަރުހުރެގެންނޫނީ ، ދިލްނަޝީންގެ ތަކުލީފުތައް ދުރުނުވާނެކަން ، ކުލްސޫމް ހަނދާން ކޮށްދިނެވެ. އެހެން ނޫނީ ، އިރުއިރުކޮޅުން ޑރ. ޝާހިދު ގެންނަން ޖެހޭނެއެވެ. މެހެމަލްއަކީ ، ޙައިދަރުގެ ޙަޔާތަށް ކުރިމަތިވެފައިވާ ބޮޑު މުޞީބާތެކެވެ. ޙައިދަރުގޮސް ، ދިލްނަޝީންގާތު އިނުމަށް ކުލްސޫމް އަމުރު ކުރިއެވެ.
ކޮޓަރިޔަށްވަދެ ، އެނދުމަތީ ހައިދަރު އިށީނދެލިއެވެ. ދިލްނަޝީންގެ ކަންބޮޑުވުމަކީ ކޮބައިތޯ ، ޙައިދަރު ސުއާލު ކުރިއެވެ. މަންމަޔާ ދެމައިންގެ މެދުގައި ދެބަސްވުމެއް އުފެދުނީ ހެއްޔެވެ ؟ ދިލްނަޝީން ގެޔަށް އައީވެސް ބަލައިދާން އަމިއްލަޔަށް ބުނެފައި ، ޙައިދަރަށް އަންގައިވެސް ނުލައެވެ. އެއްވެސްކަމެއް ނުވާކަމަށް ބުނުމަށްޓަކައި ، ދިލްނަޝީން ބޯހޫރައިލިއެވެ. ދިލްނަޝީން އިނީ ޙައިދަރުގެ ލޮލަށް ބަލަހައްޓައިގެންނެވެ.
" އެ ، އެ ޙަމްޒާއަކީ ކާކު ހެއްޔެވެ ؟ " އަޅައަޅައިގަންނަމުން ، ޙައިދަރު ސުއާލު ކުރިއެވެ.
ދިލްނަޝީން އޮށޯވެއޮތް އެނދު ބުމަރެއްހެން އެނބުރިގަތެވެ. އެންމެފަހުން ، ޙައިދަރުގާތު މެހެމަލް އެވާހަކަތައް ދެއްކީއެވެ. މެސެޖާއި ފޮޓޯތައްވެސް އެ ދެއްކީއެވެ. އެހެން ނޫންނަމަ ، އެސުއާލުކުރާކަށް ޙައިދަރަކަށް ނޭނގޭނެއެވެ. މިޖެހުނީ ކިހާބޮޑުކަމެއް ހެއްޔެވެ ؟ ދެން ހަދާނީ ކިހިނެއް ހެއްޔެވެ ؟ ދިލްނަޝީންގެ ސިކުނޑި ސުމަކަށް ދިޔައެވެ. ބުނާނެ އެއްޗެއް ނޭނގި ގަބުވެފައި އެތައް އިރަކު އިނެވެ. ދިލްނަޝީން ކުއްލިޔަކަށް އެނދުން ތެދުވެ އެތަނުން ދުރަށްދާން ހިނގައިގަތެވެ. އެހެނަސް ، ޙައިދަރު ، ދިލްނަޝީންގެ އަތުގައި ހިފާ ހުއްޓުވިއެވެ. އޭނާ ދިލްނަޝީނާ ސުއާލެއްކުރިކަން ޙައިދަރު ހަނދާން ކޮށްދިނެވެ. ދިލްނަޝީންގެ ހިތް ތެޅިގަތެވެ. އެއީ ، އޭނާގެ އަމިއްލަ ނަފްސު ކޮންޓްރޯލް ކުރަންޖެހޭ ވަގުތެއްކަމަށް ދިލްނަޝީން ނިންމިއެވެ. ފުންނޭވާއެއްލައި ހަމަޖެހިލައި ޙައިދަރާ ކުރިމަތިވާގޮތަށް އެނބުރިލިއެވެ.
" ކޮން ޙަމްޒާއެއް ހެއްޔެވެ ؟ " ދިލްނަޝީން ، ޙައިދަރާ ސުއާލު ކުރިއެވެ.
ދިލްނަޝީންގެ އެ ސުއާލުން ޙައިދަރަށް ކުއްލި ޙައިރާންކަމެއް ލިބުނެވެ. އޭނާއަށް ކުއްލިޔަކަށް ކޮޅަށް ތެދުވެވުނެވެ. އަނގަ ހުޅުވިފައި ، ދިލްނަޝީނާ ދިމާލަށް ބަލަހައްޓައިގެން ހުރެވުނެވެ. ދިލްނަޝީން އޭނާއާ ގާތަށް ދަމައިލިއެވެ. އެއްވެސް ޙަމްޒާއެއް އޭނާ ނުދަންނަންތޯ ޙައިދަރު ސުއާލުކުރިއެވެ.
ބޯހޫރަމުން ނޫނެކޭ ، ދިލްނަޝީން ބުންޏެވެ. ދިލްނަޝީނަށް ލިބިފައިވާ ހާސްކަމާއި ކަންބޮޑުވުމުގެ އަސަރު ، ޙައިދަރަށް ވަރަށް ސާފުކޮށް ފެނެއެވެ. މެހެމަލް އެދެއްކި ފޮޓޯތަކުންނާއި ދެއްކި ވާހަކަތަކުން ، ޙައިދަރަށް އެނގިފައި އޮތް އެއްޗެއް އެއީ ހަމަ ދޮގެއްބާވައޭ ، ޙައިދަރުގެ ހިތަށް އެރިއެވެ. މެހެމަލްއަކީ ދޮގާއި މަކަރާ އަދި ޙީލަތަށް ފިސާރި ފަރިތަ އަންހެނެއްކަން ޙައިދަރަށް އެނގެއެވެ. އެހެނަސް ، ދިލްނަޝީންގެ މަޢުޞޫމިއްޔަތުކަމުން އޭނާއަށް ދަސްވެ އެނގިފައި އޮތް އެއްޗަކަށް ބަލާއިރު ، ދިލްނަޝީން ދޮގެއް ނުހަދާނެއެވެ.
" އަހަރެންގެ ޙަޔާތަށް ، ޙައިދަރު ނޫން އެހެން އެއްވެސް ފިރިހެނަކު ނާދެއެވެ. ޙައިދަރުނޫން އެހެން އެއްވެސް ފިރިހެނަކު އަހަރެންނެއް ނުދަންނަމެވެ." އިސްދަށަށް ޖަހައިގެން ، ޙައިދަރުގެ މޭމަތީ އަތްބާއްވާލައިގެން ހުރެ ދިލްނަޝީން ބުންޏެވެ.
ޙައިދަރަށް ހަދާނެގޮތް ބޮޑުވިއެވެ. ލޮލަށް ފެނުނު ފޮޓޯތަކަކީ ، ހެއްކަކަށްފުދޭ އެއްޗެކެވެ. ދިލްނަޝީން އެދައްކަނީ އެހެން ވާހަކަ އެކެވެ. ދިލްނަޝީނާގާތަށް ޙައިދަރު ޖެހިލިއެވެ. ދިލްނަޝީންގެ އަތް ނަގައި އޭނާގެ މޭމަތީ ބާއްވައި ، ދިލްނަޝީން އެބުނާ ވާހަކައެއް ދެން ބުނުމަށް އެދުނެވެ.
" މީހުން ހުވާކޮށް އުޅެނީ ، އެމީހަކު ދައްކާ ވާހަކައެއް އެހެންމީހުން ޤަބޫލުނުކޮށް އިތުބާރުވެސް ނުކުރާ ޙާލަތުގައެވެ. ޙައިދަރަށް އަހަރެންނަށް އިތުބާރު ނުކުރެވެނީ ހެއްޔެވެ ؟ " ދިލްނަޝީން ބުންޏެވެ.
ދިލްނަޝީން އެބުނަނީ ތެދެއްކަމަށްވެސް ވެދާނެއެވެ. އެހެންކަމަށް ވަންޏާ މެހެމަލް އެހަދަނީ ދޮގެވެ. ޤަބޫލުކުރަންވީ ކާކުގެ ބަހެއްކަމެއް ، ވަކިކޮށް ދެނެގަންނާކަށް ޙައިދަރަކަށް ނޭނގުނެވެ. އެހެންކަމަށް ވަންޏާ ، ޙައިދަރަށް ޤަބޫލުކުރެވެނީ ކާކުގެ ބަހެއްތޯ ދިލްނަޝީން ސުއާލު ކުރިއެވެ. މެހެމަލްއަށް ހެއްޔެވެ ؟ ނުވަތަ ދިލްނަޝީނަށް ހެއްޔެވެ ؟
" ވާހަކައެއް ބުނަން ހެއްޔެވެ ؟ އަހަރެން މިކުރިސުއާލުގެ ޖަވާބަކީ ، ޙައިދަރުގެ ޙަޔާތުގައި އަހަރެންނަކީ ކިހާ މުހިންމު މީހެއްކަން ވަޒަންކުރެވޭނެ ޖަވާބަކަށް ވާނެއެވެ. އެހެންކަމާއެކުވެސް ، އަހަރެން ހުވާކުރަން ޙައިދަރު ބޭނުންވާކަމަށް ވަންޏާ ، އަހަރެން މިބުނަނީ ތެދެއްކަން ސާބިތުކުރުމަށް ، އަހަރެން ހުވާކުރާނަމެވެ. " ދިލްނަޝީން ބުންޏެވެ.
ހުވާ ކުރުމަށްޓަކައި ، ދިލްނަޝީން އަތްއުފުލާލައި ، ޙައިދަރުގެ ހިތާދިމާގައި އަތް ބޭއްވިއެވެ. ދިލްނަޝީން ވާހަކަ ދައްކަން ނުފަށަނިސް ، ޙައިދަރު ، ދިލްނަޝީންގެ އަތުގައި ހިފައި ، ދިލްނަޝީންގެ އަތް ދުރުކޮށްލިއެވެ.
ދިލްނަޝީން ހުވާކުރުމުގެ ފުރުޞަތު ، ޙައިދަރެއް ނުދިނެވެ. އިރުކޮޅަކު ، ޙައިދަރުގެ ލޮލަށް ބަލަހައްޓައިގެން ހުރުމަށްފަހު ، ދިލްނަޝީން ދިޔައީ ފާޚާނާއާ ދިމާލަށެވެ. ޙައިދަރު އެހުރިގޮތަށް އެނދުމައްޗަށް ތިރިވިއެވެ. ( ނުނިމޭ )
ދިލްނަޝީންގެ ބޮލެއް ހުރިއްޔާ އަދި ކާމިޔާބު ވާނެ އިންޝާ ﷲ. ކުރިން މީހަކާ ރައްޓެހިވެ ، ގަދަކަމުން ކުރެވުނު ކައިވެނި ދަމަހައްޓަން ޖިހާދު ކުރުމަކީ ، ދިލްނަޝީންގެ ރަނގަޅު ސިފައެއް. މެހެމަލްއަށް ދެރަގޮތެއް ދިމާވެފަ އޮތަސް ، މީހަކާ އިނދެގެން ހުއްޓާ ޙައިދަރު ޙާޞިލްކުރަން މަސައްކަތް ކުރުމަކީ މެހެމަލް ހަދާ ގޯހެއް. ދިލްނަޝީނަށް ހަމަ ސާބަސް.
މެހެމަލް މީ ހާދަ ކުޅަދާނަ މީހެކެވެ. ކީއްވެބާ ޙަމްޒާއެއް ނުދަންނަމޭ ކިޔާފަ ދިލްނަޝީން ދޮގު އެހެދީ. ދޮގެއްގެ މައްޗަށް ބިނާވާ ގުޅުމެއް ދެމިއޮތުމަކީ ނާދިރުކަމެއް. އެކަމަކުވެސް ދިލްނަޝީނަކަށް ދެރަގޮތެއް ނޭދެން.
ވަރަށް ރީތި ޝުކުރަން