ވިހަ ތީރު (21)

( 8 ސެޕްޓެމްބަރ 2024 ގައި ޝާއިޢުކުރި ބަޔާގުޅޭ )

( ދިލްނަޝީންމެންގެ ގެޔަށްގޮސް ، ހެދުންތައް ދައްކާފައި ، ދިލްނަޝީން ބޭނުންވާ ހެދުމެއް ވަގުތުން އޯޑަރުކުރުމަށް ، ޙައިދަރަށް ކުލްސޫމް އެންގިއެވެ. ވަކި ހެދުމެއް ޙައިދަރަށް ރީތިވިޔަސް ، އެވާހަކަ ނުބުނެ ، ދިލްނަޝީން ބޭނުންވާ ހެދުމަކަށް އިސްކަން ދިނުމަށް ، ޙައިދަރުގެ ކިބައިން ކުލްސޫމް އެދުނެވެ.)

" އެ އަންހެންކުއްޖާ ، ޙައިދަރާއެކީ ބޭރަށްދާން އެމީހުން ހުއްދޭނެހެން ، ޙައިދަރުގެ މަންމަޔަށް ފެނޭހެއްޔެވެ ؟ އަހަރެންނަށް ފެނުނުގޮތުގައި އެއީ ފިކުރު ހަރުކަށި ބަޔެކެވެ. ފިރިހެނުންނާއެކީ ، އެމީހުންގެ އަންހެންކުދިން ތަންތަނަށް ފޮނުވާކަށް އެހާ ހިތްހަމައެއް ނުޖެހޭނެއެވެ. " މެހެމަލް އަނގަބާނައިގަތެވެ.

ކުލްސޫމަށް ފެންނަގޮތުގައި އެއީ ، އެއްވެސް ވަރަކަށް ހަރުކަށި ބައެއްނޫނެވެ. ދިލްނަޝީންގެ މަންމަ ، އަނީސާއަކީ ، ވަރަށް ޚުލްޤު ހެޔޮ އަންހެނެކެވެ. ފައިސާއާއި މުދަލަށްވުރެ ، އެމީހުންގެ އަބުރާއި ޢިއްޒަތަށް އިސްކަން ދެއެވެ. އެމީހުންގެ އަތުގައި އޮތް އެއްޗަކުން ފުއްދައިލައި ، މިންވަރަށް އީމާންވުމުގެ ރީތިސިފަ އެމީހުންގެ ކިބައިން ، ކުލްސޫމަށް އޮތީ ފެނިފައެވެ. އެއީ ، ވަރަށް ސާދާ ސީދާ ބަޔެކެވެ. އަނީސާމެން ، ދިލްނަޝީން ތަރުބިއްޔަތު ކޮށްފައިވަނީ ވަރަށް ޚުލްޤުހެޔޮ މަޑުމައިތިރި ސިފަތަކަކުންނެވެ. ޙައިދަރަށް އެންމެ އެކަށީގެންވާ އަންހެންކުއްޖަކަށްވާނީ ، ދިލްނަޝީނެވެ. އެއީ ، އެމީހުންނަށް ލިބުނު ޖަވާހިރެއްފަދަ އަގޮބޮޑު ކުއްޖެކެވެ.

ދިލްނަޝީނަށް ، ކުލްސޫމް ކުރަމުންގެންދިޔަ ތަޢުރީފަށް ، ހުރަސްއަޅަން ދައްކާނެ ޙުއްޖަތެއް މެހެމަލްއަކަށް ނުފެނުނެވެ. އަދި ތަންކޮޅެއް އަވަހެވެ. ފުރުޞަތު ލިބުމުން ، ކުލްސޫމްގެ ހިތުގައި ދިލްނަޝީންގެ މައްޗަށް އުފެދިފައިއޮތް ޚާއްޞަކަން ދުއްވައިލުމަކީ ، މެހެމަލްއަށް އުނދަގޫ ކަމަކަށް ނުވާނެއެވެ.

ދިލްނަޝީނަށް ދެއްކުމުގެ ކުރިން ، އެހެދުންތައް މެހެމަލްއަށް ދައްކައިލުމަށް އޭނާ އެދުނެވެ. ކުލްސޫމަކީ ޒަމާނީ ޑިޒައިންތަކަށް އެހާފަރިތަ މީހަކަށް ނުވާނެކަމަށް ބުނެ ، މެހެމަލްއަށް އެހުނަރު ލިބިފައިވާކަމަށް މެހެމަލް ބުންޏެވެ. އެއީ ، ކުލްސޫމު ބޭނުންވާކަމެއްނޫނެވެ. މެހެމަލްގެ ގޮތް ، ކުލްސޫމަށް އެނގެއެވެ. އެ ޑިޒައިންތައް މެހެމަލްއަށް ދައްކައިލުމަށް ޙައިދަރުވެސް އެދުނެވެ. ޙައިދަރު ބުންޏަސް އެއީ ، އެހާ ފަސޭހައިން ، ކުލްސޫމު ކުރާނެކަމެއްނޫނެވެ. ޙައިދަރު އެތާހުރެގެން ، މެހެމަލްއަށް ހަދަން ، ކުލްސޫމް ބޭނުންވާގޮތެއް ނުހެދޭނެކަން ، އަނީސާއަށް ވިސްނުނެވެ. އެހެންކަމުން ، ދިލްނަޝީން ގޮވައިގެން ބާޒާރަށްދާން އަވަހަށް ގެއިން ނުކުންނާށޭ ބުނެ ، ޙައިދަރު އެތަނުން ފޮނުވައިލިއެވެ. ޙައިދަރު އެތަނުން ދިއުމާއެކު ، މެހެމަލްވެސް އެ ޑިޒައިންތައް ބަލާކަށް އިތުރަކަށް ބޭނުމެއް ނުވިއެވެ. ޙައިދަރުގެ މަންމައަށް ފެންނާނީ ރަނގަޅު އެއްޗެކޭ ބުނެ ، އެކަމުން ދުރުވެގަތެވެ. މެހެމަލް އިނީ ، ކަޅިޖަހައިނުލައި ޙައިދަރާދިމާއަށް ބަލަހައްޓައިގެންނެވެ. ޙައިދަރުގެ ލޯވެސް އަމާޒުވެފައިހުރީ މެހެމަލްގެ ލޮލަށެވެ. މީހަކާ އިންނަން ނިންމިނަމަވެސް ، ޙައިދަރުގެހިތާ އަދިވެސް ކުޅެލެވިދާނެކަން މެހެމަލްއަށް އެނގެއެވެ.

***************************

" ދިލްނަޝީން އަވަހަށް ތައްޔާރުވެލާށެވެ ! ކައިވެނީގެ ބައެއްތަކެތި ގަންނަން ، ދިލްނަޝީނާއެކީ ބާޒާރަށްދާން ޙައިދަރު އެބަ އާދެއެވެ. " ޢާފިޔާ ބަދިގެތެރެޔަށް އައިސް ބުންޏެވެ.

ދިލްނަޝީންހުރީ އެދުވަހު އެހިނގި ކަންކަމުގެ މައްޗަށް ފިކުރު ދޫކޮށްލައިގެން ، ސިންކު ކައިރީ ކޮޅަށެވެ. ދިލްނަޝީން ކުއްލިޔަކަށް ސިއްސައިގެން ދިޔައެވެ. އަދި ، އެކަމަށް މަންމަ ހުއްދަ ދިނީތޯ ޢާފިޔާއާ ސުއާލު ކުރިއެވެ.

އަނީސާގާތު ، ކުލްސޫމް އެވާހަކަ ބުނުމުން ، ޙައިދަރާއެކީ ދިލްނަޝީން ފޮނުވަން ވަގުތުން ނިންމީއެވެ. އެއީ ދިލްނަޝީން ނޭދުނަސް އޭނާއަށް ކުރަންޖެހިފައިވާކަމެއްކަމަށް ދިލްނަޝީން ނިންމިއެވެ. ޙައިދަރާއެކީ ވަގުތުކޮޅެއް ހޭދަކޮށްލީމަ ، އެއީ ކިހާ ރަނގަޅުމީހެއްކަން ދިލްނަޝީނަށް އިޙްސާސް ކުރެވޭނެކަމަށް ބުނެ ޢާފިޔާވެސް ، ޙައިދަރަށް ތަޢުރީފް ކުރިއެވެ. ދިލްނަޝީންގެ ލޮލުން ކަރުނަ ފާއްދައިލިއެވެ. ޙައިދަރާއެކީ ބޭރަށްދާކަށް ، ދިލްނަޝީން ބޭނުމެއް ނުވެއެވެ. ކައިވެނި ކުރެވުނީމަ ، ޙައިދަރާ ބައްދަލުވެ ވަގުތު ހޭދަ ކުރެވޭނެއެވެ. އޭގެކުރިން ، ޙައިދަރާއެކީ ، އެއްތަނެއްގައި ވަގުތު ހޭދަކުރުމަކީ ، ދިލްނަޝީންގެ ހިތަށް ކުޅަދާނަކަމެއްނޫނެވެ. އެކަމަށް މަންމަ ހުއްދަ ދިނީތީވެސް ، ދިލްނަޝީންހުރީ ހިތްހަމަ ނުޖެހިފައެވެ.

ދިލްނަޝީން އެކަމަށް އެއްބަސް ކުރުވޭތޯ ޢާފިޔާ މަސައްކަތް ކުރަމުން ގެންދިޔައެވެ. ޙައިދަރު ، އެގެޔަށް މިހާރު އެބަ އާދެއެވެ. ޙައިދަރާއެކީ ދިލްނަޝީން ނުގޮއްސިއްޔާ ، ޙައިދަރުގެ ހިތުގައި ދިލްނަޝީނާމެދު ޝައްކު އުފެދޭނެއެވެ. ފިރިހެނުންނަކީ ވަރަށް ވިސްނުންތޫނު ބަޔެކެވެ. ދިލްނަޝީންގެ މޫނުމަތިން އެފެންނަ ހިތްދަތި އަސަރުތަކުން ، ޙައިދަރަށް އެތައް ކަމެއް ވިސްނޭނެއެވެ. އަނެއްކޮޅުން ، މިދެދުވަހެއްގެ ތެރޭގައި ، ޙަމްޒާގެ ޚަބަރެއް ނުވެއެވެ. ދިލްނަޝީންގެ ޚަބަރުވެސް ބަލައިލީކީ ނޫނެވެ. އެވަރުގެ މީހަކަށް އިންތިޒާރުކޮށް ، ހިތާމަކޮށް ކަންބޮޑުވުމަކީ ބޭކާރުކަމެއްކަމުގައި ޢާފިޔާ ، ދިލްނަޝީނަށް ވިސްނައިދެމުން ގެންދިޔައެވެ.

ކުޑައިރުކޮޅަކުން ، ޙައިދަރުވެސް އައިސް އެގެޔަށް ވަނެވެ. ކޮޓަރިތެރޭގައި އިނދެ ، ކުރިމަތިވެފައި އޮތް ޙާލަތު ދިލަންޝީނަށް ވިސްނައިދެވޭތޯ ، އަނީސާ މަސައްކަތްކުރަމުން ގެންދިޔައެވެ. އެވަގުތަށް އޮތް އެންމެ ރަނގަޅުގޮތަކީ ، ހުރިހާ ކަމެއް ދޫކޮށްލާފައި ، ދިލްނަޝީންގެ ހުރިހާކަމެއް ކައިވެންޏަށް ހުސްކޮށްލުންކަމަށް އަނީސާއަށް ފެނުނެވެ. ދިލްނަޝީން ބޭނުންވިޔަސް އަދި ނުވިޔަސް ، ހިތާދެކޮޅަށް ، އެކައިވެންޏަށް އާނއެކޭ ބުނުމަށް އޭނާއަށް މަޖުބޫރު ކުރުވީ ދިލްނަޝީނެވެ. ޙަމްޒާގެ ޢާއިލާއިން އަނީސާމެންގެ އަބުރާއި ޢިއްޒަތަށް އަރައިގަނެ ، އެކަމުން ސަލާމަތްވުމަށް ، ﷲ މިންވަރުކުރެއްވި މަގަކީ އެއީކަން ، ދިލްނަޝީނަށް ވިސްނައިދެވޭތޯ އަނީސާ މަސައްކަތް ކުރިއެވެ. ޙައިދަރުގެ ގާތުގައި ދިލްނަޝީންގެ މާޒީގެ އެއްވެސް ވާހަކައެއް ނުދެއްކުން އެދި ދިލްނަޝީނަށް އާދޭސް ކުރިއެވެ. އެފަދަ ކަމަކުން ، ދިލްނަޝީންގެ ދިރިއުޅުމަށް ކޮށްފާނެ ނޭދެވޭ އަސަރު ، ދިލްނަޝީނަށް ކިޔައިދެމުން ގެންދިޔައެވެ. އެތައް ނަސޭޙަތެއް ދިނުމަށްފަހު ، އިރުކޮޅަކުން ތިރިޔަށް އަންނާށޭ ބުނެ ، ޙައިދަރަށް މަރުޙަބާ ކިޔުމަށް އަނީސާ ތިރިޔަށް ދިޔައެވެ. އޭރުވެސް ދިލްނަޝީން އިނީ ފެންކަޅިވެފައެވެ. ޙަމްޒާ އޭނާއާ ނުގުޅާތާ ދެތިންދުވަސް ވެއްޖެއެވެ. ޙަމްޒާދިން  ފޯނުވެސް ، ދިލްނަޝީންވަނީ ، ޙައިދަރުމެންގޭގެ ކުނިވަށިގަނޑަކަށް ވައްޓައިލާފައެވެ. ޙަމްޒާއާ ގުޅޭނެ އެއްވެސް ގޮތެއް ދިލްނަޝީނަކަށް ، އެވަގުތަކު ނެތެވެ.

ހިނިތުންވެލައިގެންހުރެ ، ތިރިޔަށްގޮސް ، ޙައިދަރަށް މަރުޙަބާ ކިޔައި ، ޖެހިގެންހުރި ގޮނޑީގައި އަނީސާ އިށީނދެލިއެވެ. އެހާ ބުރަކޮށް އުޅެމުން ، ދިލްނަޝީން ބާޒާރަށް ގެންދާން ޙައިދަރު އައުން ، އެއީ އެހާ ބޭނުންހުރިކަމެއްކަމަކަށް އަނީސާއަކަށް ނުފެނުނެވެ. ޙައިދަރު ބޭނުންވާ އެއްޗެއް ގަތީމަ ، އެއެއްޗެއް ހިތުން ރުހުމުން ، ދިލްނަޝީން ޤަބޫލުކުރާނެއެވެ. އެހެންނަމަވެސް ، ޙައިދަރު ބޭނުންވީ ، އެކަމުގައި ދިލްނަޝީންވެސް ބައިވެރިކޮށް ، ދިލްނަޝީން ހިތްހަމަޖެހޭ އެއްޗެއް ގަތުމަށެވެ. އެއީ ، ދިލްނަޝީންގެ ހިތަށް ހަމަޖެހުން ލިބޭނެކަމަކަށްވާތީއެވެ. އަދި ، އެގަންނަ އެއްޗެތި ލާންހުންނާނީވެސް ދިލްނަޝީންކަމަށް ވާތީއެވެ.

އެގެއިން ސައިތަށްޓެއް ބޮއިލުމަށްފަހު ، ބާޒާރަށް ދިއުމަށްޓަކައި ، ޙައިދަރާއި ދިލްނަޝީން ނައްޓައިލިއެވެ. އެއީ ، އެހާ ބޮޑު އަދި އަގުބޮޑު ކާރަކަށް ދިލްނަޝީން އެރި ފުރަތަމަ ފަހަރެވެ. ޙަމްޒާގެ ކާރަށްވުރެ ޙައިދަރުގެ ކާރު ބޮޑެވެ.

މައިމަގަށް ނުކުތުމަށްޓަކައި ، ޙައިދަރު އޭނާގެ ކާރު ފަހަތަށް ދުއްވައިލިއެވެ. އޭގެ ތަންކޮޅެއް ފަހަތުގައި ، ޙަމްޒާ އޭނާގެ ކާރުގައި އިނެވެ. ޙައިދަރުގެ ކާރުގެ ފަހަތުން ، ޙަމްޒާވެސް އޭނާގެ ކާރު ދުއްވައިލިއެވެ. އެމީހުން އެދާތާކަށް އޭނާވެސް ދިއުމަށްޓަކައެވެ.

ޙައިދަރުވެސް އަދި ދިލްނަޝީންވެސް އެއްވެސް ވާހަކައެއް ނުދައްކައެވެ. އެންމެފަހުން ، ޙައިދަރަށް ނީނދެވިގެން ، ކޮންމެވެސް އެއްޗެކޭ ބުނުމަށް ، ދިލްނަޝީންގެ ކިބައިން ޙައިދަރު އެދުނެވެ. ދިލްނަޝީން ދައްކާނީ ކޮންވާހަކައެއް ހެއްޔެވެ ؟ އޭނާއަށް އެއިނދެވުނީ ، އެކާރަށް އެރުނީތީވެސް ހިތްނުތަނަވަސް ވެފައެވެ. ދިލްނަޝީނާ ބެހޭގޮތުން ، ކޮންމެވެސް އެއްޗެކޭ ބުނެ ، އޭނާއާ ވާހަކަ ދެއްކުމަށް ، އަނެއްކާވެސް ޙައިދަރު އެދުނެވެ.

އޭނާއަކީ ، ދިލްނަޝީން ކަމުގައި ދިލްނަޝީން ބުންޏެވެ. އެކަމަށް ، ޙައިދަރުވެސް އެއްބަސްވިއެވެ. ދިލްނަޝީންގެ މާނަޔަކީ ، ލޯބިކަމެވެ. އެހެންކަމުން ، އޭނާއަކީ ލޯބި އިންސާނެއްކަމަށް ޙައިދަރުވެސް ޤަބޫލުކުރިއެވެ.

" އަހަރެން މިބުނީ އަހަރެންގެ ނަމަކީ ، ދިލްނަޝީން ކަމުގައެވެ. " ދިލްނަޝީނަށް އޭނާގެ ނަން ބުނެވުނުގޮތް ރަނގަޅުކޮށްލިއެވެ.

ޙައިދަރު ބޭނުންވީ ، އެކައިވެންޏަށް ދިލްނަޝީން ހިތްހަމަޖެހޭތޯ އާއި އެއީ ކުރަން ބޭނުންވާ ކަމެއްކަން ދެނެގަތުމަށެވެ. އެކައިވެންޏަށް ދިލްނަޝީން ވަރަށް އުފާކުރާކަމުގައި ބުނެ ، އޭނާގެ ހިތުގައިވާ އިޙްސާސްތައް ދިލްނަޝީން ފޮރުވިއެވެ.

" އަހަރެންގެ ފަރާތުން ދިލްނަޝީންކުރާ އުއްމީދެއްވެސް އޮންނާނެއެވެ. އަދި ، އަހަރެން ދިލްނަޝީނަށް ކޮށްދޭން ދިލްނަޝީން ބޭނުންވާ ކަމެއްވެސް އޮވެދާނެއެވެ. އެކަންކަން ، ސާފުކޮށްލަން އަހަރެން ބޭނުމެވެ. އަހަރެންނަށް ދިލްނަޝީންގެ ބޭނުންތައް ފުއްދައިދޭން ރަނގަޅަށް އެނގޭނީ އޭރުންނެވެ. " ޙައިދަރު ބުންޏެވެ.

ކައިވެންޏާ ގުޅިގެން ، ދިލްނަޝީން ކުރާ އެއްވެސް އުއްމީދެއް ނެތެވެ. އަދި ބޭނުންވާ އެއްޗެއްވެސް ނެތެވެ. ދިލްނަޝީން ބޭނުންވަނީ ، އޭނާގެ ޢާއިލާގެ ހިތްހަމަ ޖެހުމާއި އުފާވެރިކަމެވެ. ކައިވެނިވާ ފިރިހެނާގެ ފަރާތުން ، ދިލްނަޝީންކުރާ އެއްވެސް އުއްމީދެއް ހަމަނެތީތޯ ، ޙައިދަރު ސުއާލު ކުރިއެވެ.

ޙައިދަރަކީ ވަރަށް މާތް އިންސާނެކެވެ. ޙައިދަރާ ކައިވެނިކުރެވޭތީ ، ދިލްނަޝީން ވަރަށް އުފާވެއެވެ. އެއަށްވުރެ އިތުރަށް ، އެކަމާބެހޭގޮތުން ބުނާނެ ވަކި އެއްޗެއް ، ދިލްނަޝީނަކަށް މިވަގުތަކު ނުވިސްނެއެވެ. މީހަކާ އިންނަން ނިންމާ ހިސާބުން ، އަންހެންކުއްޖާގެ ހިތުގައި އުއްމީދުތަކެއް އުފެދޭނެއެވެ. އެއީ އިންސާނީ ތަބީޢަތެވެ. އެހެނަސް ، ދިލްނަޝީންގެ ހިތުގައި އެފަދަ އިޙްސާސެއް ނެތުން އެއީ ޙައިދަރު ވިސްނައިލަން ބޭނުންވި ކަމެކެވެ.

ހިތުގައި އުއްމީދެއް ބާއްވައިގެން ކަމަކާ ކުރިމަތިލައި ، އެކަން ޙާޞިލް ނުވެއްޖެ ޙާލަތެއްގައި ހިތަށް ލިބޭނެ ތަކުލީފުގެ މަތިން ، ދިލްނަޝީން ، ޙައިދަރަށް ހަނދާން ކޮށްލަދިނެވެ. އެއަށްވުރެ ، ހިތުގައި އެއްވެސް އުއްމީދެއް ނެތުންވެސް މާ ހިތަށް ފަސޭހަވާނެއެވެ. އޭރަކަށް ހިތް ހަލާކެއް ނުވާނެއެވެ.

ޙައިދަރުގެ ފަރާތުން ދިލްނަޝީނަށް އެއްވެސްކަމެއްގައި މާޔޫސްކަމެއް ކުރިމަތިވިޔަ ނުދޭނެކަމަށް ޙައިދަރު ވަޢުދުވިއެވެ. ދިލްނަޝީންގެ ހިތުގައި އެއްވެސް އެދުމެއް ނެތްކަމުގައިވިޔަސް ، ދިރިއުޅުމުގައި ކުރިމަތިވާ އެއްވެސްކަމެއްގައި ، ދިލްނަޝީންގެ ހިތަށް ތަކުލީފެއްލިބޭނެ އެއްވެސްކަމެއް ޙައިދަރެއް ނުކުރާނެއެވެ.

ދިލްނަޝީންގެ ވާހަކަ މަދުކަމުން ޙައިދަރު އިނީ ކަންބޮޑުވެފައެވެ. އެންމެ ފުރަތަމަ އެދެމީހުން ބައްދަލުވީ ، ބަންދު ކޮޓަރިއެއްގައެވެ. އެދުވަހު ، ދިލްނަޝީން ވަރަށް ވާހަކަ ދެއްކިއެވެ. މިއަދު ، ދިލްނަޝީން އެވާހަކަ ދައްކަނީ ، ޙައިދަރު އެއްޗެކޭ ބުނުމުން ޖަވާބެއްދޭން މަޖުބޫރުވެގެންނެވެ. އެއީ ، އެދުވަހު ، ޙައިދަރާ ދިމާވި ދިލްނަޝީނެއް ނޫނެވެ. ދިލްނަޝީން ، މިއަދު އެއިނީ ވަރަށްބޮޑަށް ބަދަލު ވެފައެވެ. އެކަމުގައި ސަބަބުތަކެއް އޮވެދާނެކަން ، ޙައިދަރަށް ޤަބޫލު ކުރެވުނެވެ. އެހެންނަމަވެސް ، އެކަމާބެހޭގޮތުން މާގިނަ ވާހަކަ ދައްކައި ، އެ ސަބަބެއް ހޯދުމަށް އުޅުން އެއީ މިވަގުތަށް އެހާ މުނާސަބުކަމެއްނޫނެވެ.

" އަހަރެންގެ ކައިވެންޏަށް ، ދިލްނަޝީން އިޚްތިޔާރު ކުރިގޮތަކާމެދުވެސް ސުއާލެއް ނުކުރާނަން ހެއްޔެވެ ؟ އެކުއްޖެއްގެ އަމިއްލަ ނަފްސަށް އިޙްތިރާމްކުރާ ، ޚުލްޤު ހެޔޮ ކުދިން އަހަރެންނަށް ވަރަށް ކަމުދެއެވެ. ދިލްނަޝީނަކީ އޭގެތެރެއިން ކުއްޖެކެވެ. ދިލްނަޝީން ދާން އޮތްގޭގައި ދިރއުޅޭނީ ، އަހަރެންނާއި އަހަރެންގެ މަންމައެވެ. އަހަރެންގެ ކޮއްކޮ ، ސާރާ ދޭތެރެޔަކުން ގެޔަށް ވަދެލާނެއެވެ. މަންމަ އެހުރީ މިކައިވެންޏަށް ލަސްވެފައެވެ. މަންމަޔަށް ވެގެންވާނެނަމަ ، މިއަދުވެސް އަހަރެމެންގެ ކައިވެނި ކުރުވީހެވެ. " ޙައިދަރު ބުންޏެވެ.

ދިލްނަޝީންގެ ފަރާތުން ، ޙައިދަރުއެދެނީ ހަމައެކަނި އެންމެ އެދުމެކެވެ. އެއީ އޭނާގެ މަންމަޔަށް އިޙްތިރާމް ކުރުމެވެ. އަނީސާގެ ފަރާތުން ، ދިލްނަޝީނަށް އެއްވެސް ޝަކުވާއެއް ކުރިމައްޗެއް ނުވާނެއެވެ. ދިލްނަޝީންދެކެ ، މިހާރުވެސް އަނީސާ އެހާ ލޯބިވެއެވެ.  ދިލްނަޝީންގެ ފަރާތުންވެސް ، މަންމަޔަށް އެއްވެސްކަމެއްގެ ތަކުލީފެއް ނުޖެއްސުމަކީ ، ޙައިދަރުގެ ވަރަށްބޮޑު އެދުމެކެވެ. މަންމަގެ އެއްވެސްކަމަކުން ، ދިލްނަޝީނަށް ޝަކުވާއެއްކުރަން ޖެހިއްޖެ ޙާލަތެއްގައި ، ދެމީހުން ހަމަޖެހިލައިގެންތިބެ ، ވާހަކަ ދައްކައިގެން އެކަން ހަމަޖައްސާލާނީއެވެ. އެ ދެމީހުންގެ ދިރިއުޅުމުގައި ، މައްސަލައެއް އުފެދޭނެ އެއްވެސްކަމެއް ، އުފެދިގެން ދިއުމަކީ ޙައިދަރު އެދޭކަމެއްނޫނެވެ.

ޙައިދަރު ގޮސް ޝޮޕިންގމޯލެއްގެ ބޭރުގައި ކާރުޕާކް ކޮށްލިއެވެ. ޙަމްޒާވެސް އެހިސާބުގައި ޙައިދަރުގެ ކާރާޖެހިގެން އޭނާގެ ކާރު ޕާކްކޮށްލިއެވެ. ކާރުން ފޭބުމަށްޓަކައި ދިލްނަޝީނަށް ދޮރު ހުޅުވައިދިނުމާއެކު އޭނާފޭބިތަނުން ، ކުރިމަތީގައި އޮތް ކާރުގައި ޙަމްޒާއިންތަން ފެނުނެވެ. ޙަމްޒާ ފެނުނުކަމަކަށް ދިލްނަޝީނެއް ނުހަދައެވެ. ޙައިދަރާއެކީ ، ސޮޕިންގމޯލަށް ދިއުމަށްޓަކައި ދިލްނަޝީން ހިނގައިގަތެވެ. ދޮރުން ވަންނަމުން ، ދިލްނަޝީން ފަހަތް ބަލައިލިއިރު ، ޙަމްޒާއިނީ ކަޅިޖަހައިނުލާ ދިލްނަޝީނާ ދިމާލަށް ބަލަހައްޓައިގެންނެވެ. ދެންވެދާނެ ގޮތަކާމެދު ، ދިލްނަޝީންގެ ހިތުގައި އިތުރު ބިރުވެރިކަމެއް އުފެދިގެން ދިޔައެވެ. ޙަމްޒާއަކީ ފާޑެއްގެ މީހެއްކަމަށް ވާތީއެވެ. ( ނުނިމޭ )