( 27 އޯގަސްޓް 2024 ގައި ޝާއިޢުކުރި ބަޔާގުޅޭ )
(މެހެމަލްގެ އަތުގައި އަމިއްލަ ކާރެއް މިއަދު އެބަ އޮތެވެ. ޑްރައިވަރެއް އެބަހުށްޓެވެ. ބޭނުން އިރަކު ، ބޭނުން ކޮންމެ ތާކަށް ދާންވީއެވެ. އެކަމަކުވެސް ، އެއީ ދިރުމެއް އޮތް ޙަޔާތެއް ހެއްޔެވެ ؟ އޭނާދެކެ ލޯބިވާ މީހަކު ، މެހެމަލްއާ އެކީ ، މިއަދަކު ނެތެވެ. ޙައިދަރުގެމަތިން ހަނދާންކުރަން އޭނާގެ ހިތް މަޖުބޫރުކުރުވަނީ ، އެސަބަބުތަކަށްޓަކައެވެ.)
މެހެމަލްއަށް ޙައިދަރުގެ ގެޔަށް ދެވުނުއިރު ، ބޭރަށް ދިއުމަށްޓަކައި ކާރާދިމާލަށް ހިނގައިލާފައި އައި ޙައިދަރު އޭނާގެ ސަމާލުކަމަށް އައެވެ. އަވަސް ހިނގުމެއްގައި ، ޙައިދަރުގާތަށްގޮސް ، ވަރަށް ރަނގަޅު ނިންމުމެއްކަމުގައިބުނެ ، ޙައިދަރަށް މަރުޙަބާ ކިޔެވެ.
" މާޒީގެ ހަނދާންތަކުގައި ހައްޔަރުވެފައި ، ޙައިދަރަށް ހުރެވޭނީ ކިހާދުވަހެއް ވަންދެން ހެއްޔެވެ ؟ " ޙައިދަރާ މުޚާތަބުކޮށް މެހެމަލް ބުންޏެވެ.
މީހަކާ އިންނަން ޙައިދަރު ނިންމީ ، އެއްވެސް މީހެއްގެ ހަނދާނުގައި އޭނާ ހައްޔަރުވެފައި ހުރެގެން ނޫންކަމުގައި ޙައިދަރު ބުންޏެވެ. މީހަކާ ނީނދެ އެހާގިނަދުވަހު ، ޙައިދަރަށް ހުންނަންޖެހުނީ ، އޭނާގެ ވިޔަފާރީގެ ކަންކަމުގައި އަވަދިނެތި އުޅެން ހަދައިގެން ، ކައިވެންޏަކާމެދު ވިސްނަން ވަގުތު ނުލިބިގެންނެވެ.
މެހެމަލްއަށް އެއްޗެކޭ ނުބުނެވިގެން އުޅެނިކޮށް ، ޙައިދަރަށް ފޯނެއް އައެވެ. ފޯނުނެގުމަށްފަހު ނަންބަރަށް ބަލައިލައި ، އެއީ ފަހަރެއްގައި ދިލްނަޝީންގެ ފޯނެއްކަމަށް ވެދާނޭ ބުނެ ، ފޯނުނަގައި ދިލްނަޝީނަށް ގޮވައިލަމުން ، މެހެމަލްއާ ދުރަށް ޖެހިލިއެވެ. އަދި ، ގޭތެރޭގައި ވަރަށް ކަންތައް އެބަހުރިކަމަށް ބުނެ ، މެހެމަލްވެސް ގޭތެރެޔަށް ދިއުމަށް އިޝާރާތް ކުރިއެވެ. ފޯނުން ވާހަކަ ދެއްކީ ފިރިހެނެކެވެ. އެމީހަކު އެގުޅީ ، އޯޑަރުކުރި ތަކެތި ތައްޔާރުވެފައިހުރިކަން ޙައިދަރަށް އަންގައިލުމަށެވެ. އެކަމާ ކަންބޮޑުނުވާށޭ ބުނެ ، ބައިގަޑިއެއްހައި އިރުތެރޭ އޭނާ ދާނެކަމަށް ބުނަމުން މެހެމަލްއާ ދުރަށް ޙައިދަރު ޖެހިލިއެވެ. އެހެންނަމަވެސް ، މެހެމަލް ދުރަށް ދިއުމާއެކު ، އެތަކެތިބަލައި ، މީހަކު އެބަދާކަމަށް ބުނަމުން ޙައިދަރު ، އޭނާގެ ފޯނު ބޭއްވިއެވެ.
މާމެލާމެލިން ފުރާފުރިހަމަވެފައިއޮތް ބަގީޗާއެއްފަދައިން ، މުޅިތަން ނަލަކޮށް ، ޒީނަތްތެރިކުރެވިފައިވާ ރީތި ކޮޓަރިއެއްގައި ، ދިލްނަޝީން އެކަނި އިށީނދެލައިގެން އިނެވެ. އެއްވެސްމީހަކު ފެންނަންނެތި ، ލިބިފައިވާ މިނިވަންކަމުގެ ބޭނުން ހިފުމަށް ، ދިލްނަޝީން ނިންމިއެވެ. ދަބަހަށްލައި ފޮރުވާފައިއޮތް ފޯނުނަގައި ޙަމްޒާއާ ގުޅިއެވެ. ޙަމްޒާ އޮތީ ، އެނދުހުރަހަށް އެނދުމައްޗަށް ވެއްޓިފައެވެ. ފޯނެއް އައުމާއެކު ، ޗޮކެއްކަނޑައި ބަލައިލިއިރު އެއީ ދިލްނަޝީނެވެ. އެހިސާބުން ޙަމްޒާގެ ލޯ ހުޅުވުނެވެ. އަދި ، ފޯނުނަގައި ދިލްނަޝީނަށް ގޮވައިލިއެވެ.
ދިލްނަޝީން މާނޭވާއެއްލިއެވެ. އަދި ، މަޑުއަޑަކުން ބުނެލިއެވެ. " ޙަމްޒާވެސް އަހަރެންގެ ބޭނުންހިފާފައި ، އެހެންމީހުން ހަދާހެން ދޫކޮށްލީ ދޯއެވެ. "
އާދޭސް ކޮށްކޮށްފައި ޙަމްޒާ ދެއްކި އެއްވެސް ވާހަކައެއްގެ އަޑު ، އެއްވެސްމީހަކު ނޭހިކަމަށް ޙަމްޒާ ބުންޏެވެ. ދިލްނަޝީނަށް ވީ ވަޢުދު ، ޙަމްޒާއަކަށް ނުފުއްދުނެވެ. އެކަމާ ކަންބޮޑުވެގެން ، ދިލްނަޝީނަށް ކުރެވޭނީ ކޮންކަމެއް ހެއްޔެވެ ؟ އެއީ ، ދިލްނަޝީނަށް މައްސަލައެއްނޫނެވެ. ވާންނެތްކަމެއް ނުވާނެއެވެ. ވާންހުރިކަމެއްވިއްޔާ ، އެކަމެއް ވާނެއެވެ.
" އަހަރެން މިފޮނުވަނީ ، ޙައިދަރުގެ އަނބިމީހާގެ ފޮޓޯއެވެ. އެކުއްޖާ ހެނދުންއަޅުވައި ، ތައްޔާރުކުރެވިފައިވަނީ ، ޙަމްޒާވެސް ޙަމްޒާގެ އަނބިމީހާ ތައްޔާރުކުރަން ބޭނުންވާނެ ގޮތަށެވެ. އެފޮޓޯތަކަށް ބަލައިލާފައި އޭނާ ރީތިއްޔާ ރީތިވާހަކަ އަދި ހުތުރިއްޔާ ހުތުރު ވާހަކަ ، ޙަމްޒާއަށް ފެންނަގޮތަކަށް ބުނެލަދޭށެވެ ! " ހިނިތުންވެލަމުން ، ދިލްނަޝީން ބުންޏެވެ.
އެއިން އެއްވެސް ފޮޓޯއެއް އޭނާއަށް ނުފޮނުވުމަށް ، ޙަމްޒާ އެދުނެވެ. އެހެނަސް ، ދިލްނަޝީން އޭނާގެގޮތް ދުލެއް ނުކުރިއެވެ. އޭނާއަށް އެފޮޓޯތައް ނުފޮނުވަން އާދޭސް ކޮށްކޮށް އޮއްވައި ، އެފޮޓޯތައް ދިލްނަޝީން ، ޙަމްޒާއަށް ފޮނުވިއެވެ. ގާތްމީހަކު ނިޔާވެއްޖެ ނަމަ ނިޔާވިމީހާގެ ޖަނާޒާގައި ބައިވެރިވެ ، ވަޅުލުމާ ހަމަޔަށް ، އެމީހަކާއެކީ ވުމަކީ ، ކުރަންޖެހޭނެކަމެއްކަމަށް މީހުން ބުނެއުޅޭ ނޫންހޭ ބުނަމުން ، ދިލްނަޝީން ޙަމްޒާއާ ވާހަކަ ދައްކަމުން ގެންދިޔައެވެ.
އެ ފޮޓޯތަކުން ފެންނާނީ ، ދިލްނަޝީންގެ ޖަނާޒާއެވެ. އެއީ ، ޙަމްޒާވެސް ކޮންމެހެން ބައިވެރިވާންޖެހޭނެ ކަމެކެވެ. އެއީ ، ދުނިޔެމަތިން ޙަމްޒާއާ ، ދިލްނަޝީން ވަކިވާ ހިނދުކޮޅެވެ. ހިނިތުންވެލައިގެންއިނދެ ، ދިލްނަޝީން ނަގާފައިވާ ފޮޓޯތައް ލިބުނުލިބުނުހެން ، ނުބަލަން ހުރެފައިވެސް ، ޙަމްޒާއަށް ބަލަމުން ގެންދެވުނެވެ. ހިތަށް ތަދުވެ ، ލިބެމުންދާ ތަކުލީފުތަކުން ލޮލުން ފައިބަމުންދިޔަ ކަރުނަތައް އޮހެމުންދިޔައިރުވެސް ، އެފޮޓޯތައް ބެލުން ، ޙަމްޒާއަކަށް ހުއްޓައެއް ނުލެވުނެވެ.
ފޮޓޯތައް ފޮނުވައިލުމަށްފަހު ، ކައިރީގައިހުރި ޑަސްބިންއަށް ، ދިލްނަޝީންގެ އަތުގައިއޮތް ފޯނު ވައްޓައިލިއެވެ. އެއީ ، ދިލްނަޝީނަށް ޙަމްޒާދިން ފޯނެވެ. އެފޯނުގެ ޖަނާޒާވެސް ނިމި ވަޅުލެވުނީއެވެ. އެފޯނުގެ ބޭނުން ، ދުނިޔެއަށް ކެނޑުނީއެވެ. އެފޯނަކުން ދެން ، ދިލްނަޝީނަކަށް ފޯނެއް ނުކުރެވޭނެއެވެ. ޑަސްބިންއަށް ފޯނުވައްޓައިލުމަށްފަހު ، ކައިރީހުރި ގޮނޑިޔަށް ދިލްނަޝީން ފެތުނެވެ. ލޮލުން ފައިބަމުންދިޔަ ކަރުނަތަކެއް އޭނާއަކަށް މައިތިރިއެއް ނުކުރެވުނެވެ.
އެއްވެފައި އޮތް މެހެމާނުންގެ ތެރެއިންލާފައި ، އެންގޭޖްވާ ދެމީހުންނަށް ޚާއްޞަކުރެވިފައިވާ ތަނަށް ، ދިލްނަޝީން ގެންދެވުނެވެ. އެއްފަރާތުގައިހުރީ ސާރާއެވެ. އަނެއްފަރާތުގައިހުރީ ޢާފިޔާއެވެ. އެންމެންގެ ކަޅި ، ދިލްނަޝީންގެ މޫނަށް ހުއްޓިގެންދިޔައެވެ. އެއްބަޔަކު ، ދިލްނަޝީންގެ ރީތިކަމާއި ނަލަކަމުން އާގަމަވެފައި ތިބިއިރު ، އަނެއްބަޔެއްގެ އަނގަ ތަންމިނަށް ހުޅުވި ، ޙައިރާންވެފައި ތިއްބެވެ. އެއްބަޔަކު ، ވައިއަޑުން ވާހަކަ ދައްކައެވެ. އެއީ ، ސާރާމެންގޭގައި އޮތްޕާޓީގައި ، ތަޅު ނުހުޅުވިގެން ކޮޓަރިއެއްގެ ތެރޭގައި ތާށިވެފައި ތިއްބާ ، ޙައިދަރާއެކު ނެރުނު ކުއްޖާކަމަށްވެސް ބައެއްމީހުން ބުނެއުޅުނެވެ. ސާރާގެ މައިދައިތައަށްވެސް ، އެތަން ފެނުނުކަމަށް ބުނިއަޑުވެސް އިވުނެވެ. ކޮންމެ ސަބަބެއް ދިމާވެގެން ނަމަވެސް ، ބަންދު ކޮޓަރިއެއްގައި ފިރިހެނަކާއި އަންހެނަކު ތިބޭއިރު ، ހީވެސް ނުކުރާކަހަލަ ކަންކަން ވާނެއެވެ. މިއަދު އެފެންނަނީ އޭގެ ނަތީޖާކަމަށްވެސް ވެދާނެއެވެ. އެއްވެސް މީހަކަށް އަންގައިނުލާ ، އެދެމީހުން އެކަން އެ ނިންމައިލީއެވެ. އެކަން އެއްވެސްމީހަކަށް ފާހަގަ ނުކުރެވުނީކަމަށްވެސް ވެދާނެއެވެ. އެހެނަސް ، އެދެމީހުން ، އެއޮތީ އެ ލިބުނު ފުރުސަތުގެ ބޭނުން ، އެންމެ ފުރިހަމަޔަށް ހިފާފައެވެ. އަނީސާމެންގެވެސް ބޯ ބޮޑީއެވެ. އެކުއްޖާ އެތަނުން ނެރުނުއިރު ، އަނީސާވެސް އެތާ ހުށްޓެވެ. އެއަޑުތައް އިވޭހިސާބުގައި ، މެހެމަލް ހުއްޓިލައިގެން ހުރިއިރު ، އެވާހަކަތަކަށް އޭނާއަށް ސަމާލުކަން ދެވުނެވެ. މެހެމަލްގެ އަތްދަށުން ، ޙައިދަރު ދޫވެގެން ދިޔަތާ ދުވަސްކޮޅެއްވެއްޖެކަމުގެ އިޙްސާސް ، މެހެމަލްއަށް ކުރެވުނެވެ. އެއިންކަމެއްގެ ހިލަމެއްވެސް އޭނާއަކަށް ނުވެއެވެ. ޙައިދަރަށް އެއްވެސް ބަދަލެއް އައިކަމުގެ އިޙްސާސެއްވެސް ، މެހެމަލްއަކަށް ނުކުރެވެއެވެ.
އެހުރިހާ ވާހަކަތަކަކާއެކުވެސް ، އެންމެންވެސް ޤަބޫލުކުރާ ޙަޤީޤަތެއްގެ އަޑުތައްވެސް އެތަނުގައި ގުގުމާފައި އޮތެވެ. ދިލްނަޝީންގެ ރީތިކަމުގެ ވާހަކައެވެ. އެންމެފަހުން ، ކުލްސޫމް އޭނާގެ ޅީދަރިޔަކަށް އެހޯދީ ، އެސަހަރުން ނުފެންނާނެފަދަ ، ނަލަ ޕަރީއެއްކަމުގެ ވާހަކައެވެ. ދިލްނަޝީންގެ ލޫޅާފަތިކަމާއި ، ހެދިހުރި ހަށިގަނޑުގެ ފުރިހަމަކަމާ އަދި އެހެން އަންހެންކުއްޖަކާ އަޅުވައި ނުކިޔޭނެ ރީތީގެ ރާނީއެއްކަމުގެ ވާހަކަތަކެވެ. އެވާހަކަތަކުގެއަޑު އިވުނުއިވުނުހެން ، މެހެމަލްގެ ހިތުގެ ތެޅުން ގަދަވަމުން ދިޔައެވެ.
ދިލްނަޝީންގެ އިނގިލީގައި ، ޙައިދަރުގެ އަތުގައި އޮތް އަނގޮޓި އަޅުވައިދިނެވެ. އަގުބޮޑު ، ކުދިބޮޑު ޑައިމަންޑްތަކާއި ޖަވާހިރުން އަތްކަންކުރެވިފައިވާ ، ރަނުގެ އަގުހުރި އަނގޮޓިއެކެވެ.
" ޔާރައްބީއެވެ ! މިއަޅާގެ ހިތް އެމީހަކާ ބައްދަލުނުވާ މީހަކާ ބައްދަލުވުމަށް ، މިއަޅާގެ އިނގިލިތަކުގެ ނާރުތައް އެތުރުއްވެވީ ކޮންފަދަޔަކުން ތޯއެވެ ؟ " ދިލްނަޝީންގެ ހިތަށް އެރިއެވެ.
ގަދަކަމުން ހިނިތުންވެލައިގެން އިނދެ ، ދިލްނަޝީންވެސް ، އޭނާގެ އަތަށް ޢާފިޔާ ދިއްކޮށްލި އަނގޮޓި ، ޙައިދަރުގެ އިނގިލީގައި އެޅުވިއެވެ. އެއީ ވަރަށް އާދައިގެ ، އެހެނަސް ރަން އަނގޮޓިއެކެވެ. އެއްވެސް އެހެއްޖަހާފައި ނެތް ، ރީތި ނަލަ ބޭންޑެކެވެ.
އަނގޮޓި އެޅުވިގެންދިޔައިރު ، އެތަނަށް އެއްވެފައިތިބި އެންމެންގެ މޫނުމަތިންވެސް ފެންނަމުންދިޔައީ ، ހިނިތުންވުމާއި އުފާވެރިކަމެވެ. އެހެންނަމަވެސް ، ދިލްނަޝީނާއި ޙައިދަރުގެ މޫނުމަތިން ، އެންމެ ފަހަރަކުވެސް ، އެވަގުތަށް އެމީހުންނަށް އިޙްސާސް ކުރެވެންޖެހޭނެ ހިތަގައިމުކަމުގެ އެއްވެސް ނިޝާނެއް ފާޅެއް ނުވެއެވެ. ދެމީހުންގެ މޫނުމަތިންވެސް ހިނިތުންވުމެއް ނުފެނެއެވެ. ފޮރުވިފައި އޮތް ކަންބޮޑުވުމާއި ، ނަފުސަށް ލިބިފައިވާ ތަކުލީފުތަކުގެ ވިހަ ތީރުތައް ދެމީހުންގެ ހިތަށްވެސް ހެރެމުން ދާކަން ، އިޙްސާސް ކުރެވޭނީ ، ހަމައެކަނި އެދެމީހުންނަށެވެ. ޙައިދަރުގެ ލޮލަށް ކަޅިޖަހައިނުލާ ބަލަހައްޓައިގެންހުރި މެހެމަލް އަށް ، ޙައިދަރުގެ ލޮލުން އެކަންކަން ފާޅުވާކަން އެނގުނެވެ. ދިލްނަޝީންގެ މޫނުމަތީގައިވެސް އުފާވެރިކަމުގެ ކަންފުޅެއްވެސް ނެތްކަން ، މެހެމަލްއަށް އެނގެއެވެ. ނޭނގޭ ކޮންމެވެސް ސިއްރުތަކެއް ، އެދެމީހުން ، ދުނިޔެއަށް އެބަ ސިއްރު ކުރެއެވެ. އެ ސިއްރުތައް ، މެހެމަލް އަދި ހޯދާނެއެވެ. ޙައިދަރާ ކުރަންވެފައިހުރި އެތައް ސުއާލެއް ، މެހެމަލް މިހާރުވެސް އެގެންދަނީ އޭނާގެ ހިތުގައި ލިޔަމުންނެވެ. އެހާ ފަސޭހައިން ، މެހެމަލްގެ ލޯބި ޙައިދަރުގެ ހިތުން ފުހެވިގެންނެއް ނުދާނެއެވެ. އެއަށްވުރެ ބޮޑަށް ޙައިދަރުހުރީ ، މެހެމަލްއަށްޓަކައި ދީވާނާ ވެފައެވެ. ޙައިދަރު އެއްބަސް ނުވިނަމަވެސް ، އެހާ ގިނަދުވަސްވަންދެން ، މީހަކާ ނުއިނދެ ޙައިދަރު އެހުރީ ، އޭނާގެ ހިތުގައި މެހެމަލްގެ މައްޗަށް އުފެދިފައި އޮތް ލޯބީގެ ފުންކަމުންނެވެ. އެހުރިހާ ކަމެއްވެ ނިމިދާއިރު ، އިރުއިރުކޮޅުން ، މެހެމަލްއާ ދިމާލަށް ޙައިދަރަށް ބަލައިލެވޭކަން ، މެހެމަލް ފާހަގަ ކުރިއެވެ. ޙައިދަރުގެ ހިތުން މެހެމަލްގެ ލޯބި ، ފުހެވިގެންދިޔަނަމަ ، އިރުއިރުކޮޅުން ، މެހެމަލްއާ ދިމާލަށް ބަލައިލުމަށް ޙައިދަރުގެ ހިތް އޭނާއަކަށް މަޖުބޫރެއް ނުކުރީހެވެ.
މެހެމަލްގެ އުއްމީދުތަކަށް އަދި ، ނިމުމެއް ނާދެއެވެ. އެ އުއްމީދުތަކުގައި މާބޮޑު ދިރުމެއް ނެތަސް ، އޭނާއަތުން ޙައިދަރު ޖަހައިގަނެގެން ، އެއްވެސް މީހަކަށް ނުގެންދެވޭނެއެވެ. އޭނާގެ ލޯބީގައި ކަސްތަޅުއަޅުވައިގެން އަދިވެސް ، ޙައިދަރު ގެންގުޅެވިދާނެއެވެ. އެކަމަކު ، މިއަދު އެކަމަށް އެއެޅުނީ ވަރަށްބޮޑު ހުރަހެކެވެ. އެ ހުރަސް އެއީ އޭނާއަށް އެއްވެސް ހިލަމެއްވެސް ނެތި އައި ހުރަހެކެވެ. އެގެޔަށް އައުމަށް ގެއިން ނުކުތުމުގެ ކުރިން ، ޙައިދަރުގެ އެންގޭޖްމަންޓްގެ ޚަބަރު ، އެއްވެސްމީހެއްގެ ފަރާތުން މެހެމަލްއަށް ލިބިފައެއް ނެތެވެ. އެތަނުގައި ހުންނަން މެހެމަލްއަށް އުނދަގޫވާން ފެށުމާއެކު ، އެތަނުން ނުކުމެގެން ދާން މެހެމަލް ނިންމިއެވެ. ޙައިދަރާދިމާލަށް ، ފުންނަޒަރަކުން ބަލައިލުމަށްފަހު ، ބޭރަށް ނުކުންނަންހުރި ދޮރާދިމާލަށް މެހެމަލް ހިނގައިގަތެވެ. މެހެމަލް ނުކުމެގެންދިޔަތަން ބަލަން ކަޅިޖަހައިނުލާ ، ޙައިދަރަށް އެހުރެވުނީ ކީއްވެގެން ކަމެއް ނޭނގެއެވެ.
މެހެމަލްއަކީ މީހެއްގެ އަނތްބެކެވެ. އެތައް އާދޭހެއް ކޮށްކޮށް އޮއްވައި ، ޙައިދަރާ ވަކިވިތާ އެތައްދުވަހެއް ވެއްޖެއެވެ. މިއަދު ، ޙައިދަރަކީ ، ކައިވެންޏަކަށް އެންގޭޖްވެފައިހުރި މީހެކެވެ. އެ އެންގޭޖްމަންޓާއެކީ ، މެހެމަލްއާމެދު ޙައިދަރުގެ ހިތުގައި އޮތް އެއްޗެއް ކަފުންވެގެން އެދިޔައީއެވެ. މެހެމަލްއަކީ ، އޭނާގެ ޙަޔާތުންނާއި ހިތުން ބޭރުކުރެވިފައިހުރި މީހެކެވެ. އެހެނަސް ، ނޭނގޭ އަަދި އޭނާގެ ކޮންޓްރޯލްގައި ނެތް އިޙްސާސްތަކެއް ، ޙައިދަރުގެ ހިތުގައި އަދިވެސް އެބަ ހުށްޓެވެ. އެކަން އެއްވެސް މީހަކަށް އަންގާކަށް ޙައިދަރު ބޭނުމެއްނޫނެވެ. އެހެނަސް ، އެ އިޙްސާސްތައް ނުފިލާ ، އޭނާގެ ހިތުގައި ހުރެއްޖެނަމަ ، އެއީ ކޮންމެވެސް އެއްދުވަހަކުން ، ބޭރުވާނެ އެއްޗެކެވެ.
އެނދުމަތީ އެތައްއިރަކު ރޯން އޮތުމަށްފަހު ، ޙަމްޒާ ގޭތެރެޔަށް ނުކުތެވެ. ޞާދިޤް އަމީނާއި ބުޝްރާ ، ސިޓީންގރޫމުގައި އިށީނދެލައިގެން ތިއްބެވެ. ޙަމްޒާ ފެނުމާއެކު ، އޭނާއަށް ގޮވާލައި ، އެމީހުންގާތަށް އައުމަށް ބުންޏެވެ. ޙަމްޒާ އައިސް އޭނާގެ ބައްޕަގާތު ، އުޑުފައިން އިށީނެވެ. ޙަމްޒާގެ ލޮލުން ފައިބާފައިހުރި ކަރުނައިގެ އަސަރު އޭރުވެސް ނުފިލާ ހުށްޓެވެ.
" ބައްޕާއެވެ ! އާދޭސްކޮށްފައި ބުނަމެވެ. ދިލްނަޝީންގެ އެންގޭޖްމަންޓް މިއަދު ނިމިއްޖެއެވެ. އަދިވެސް ވަގުތު އެބައޮތެވެ. އެ ކައިވެނި ހުއްޓުވޭނެ ކޮންމެވެސް ގޮތެއް ހޯދައިދޭށެވެ ! ދިލްނަޝީނާ ނުލައި އަހަރެންގެ ފުރާނައެއް މިހަށިގަނޑުގައި ނުހިނގާނެއެވެ. އަހަރެންނަށް ދިރިދުނިޔޭގައި އުޅެވޭނެމަގެއް ދެއްކުމަކީ ، ބައްޕަމެންގެ ވާޖިބެކެވެ. " ޙަމްޒާ ބުންޏެވެ.
ހުރިހާކަމެއްވެސް ރަނގަޅުވާނެކަމަށް ބުނެ ، ކެތްތެރިވުމަށް ، ޙަމްޒާއަށް ބުޝްރާ ނަސޭޙަތްތެރި ވިއެވެ. އެކަންކަން ހަމަޔަކަށް އެޅެން ކުޑަވަގުތުކޮޅެއް ނަގާނެއެވެ. ޙަމްޒާއަށްވެސް އެކަންތައްގަނޑުން ، މާލަހެއްނުވެ ނުކުމެވޭނެއެވެ. ( ނުނިމޭ )
ވަރަށް ރީތި ޝުކުރަން