ރަޝިއާއިން އެމެރިކާއަށް : " ބޭހާއި ނުކުޅޭތިބަޑި ، ނޭނގިހުއްޓާ އަނދައިދާނޭ ، ގޭމަކޮޔާ ފިހިދާނޭ "
ހުޅަނގުން މަސައްކަތް ކުރަމުންގެންދަނީ ، ހަމަނުޖެހުމެއްގެ ތެރެޔަށް ދުނިޔެ ގެންދިއުމަށްކަމަށް ވިދާޅުވެ ، ތިންވަނަ ބޮޑުހަނގުރާމައެއްގެ އިންޒާރު ، ރަޝިއާގެ ޚާރިޖީ ވަޒީރު ، ސަރްގޭ ލަވްރޯފް ، އެމެރިކާއަށް ދެއްވައިފިއެވެ. ލަވްރޯފް ، އެމެރިކާއަށް އިންޒާރު ދެއްވީ ، ރަޝިއާގެ އެތެރޭގެ ސަރަޙައްދުތަކަށް ޙަމަލާދެވޭވަރުގެ ހަތިޔާރު ދިނުމަށް ، ޔުކްރޭނުން އެމެރިކާގައި އެދިފައިވާ ދަނޑިވަޅެއްގައެވެ. މޮސްކޯގައި ، މިދިޔަ އަންގާރަދުވަހު ވާހަކަ ދައްކަވަމުން ، ލަވްރޯފް ވިދާޅުވީ ، އެމެރިކާއިން އެކުޅެނީ އަލިފާނާ ކަމުގައެވެ.
އއެމެރިކާއިން މިހާރުވެސް ބަނީ ، ދުރުރާސްތާގެ މިސައިލް ، ޔުކްރޭނަށް ދީފައެވެ. އެމެރިކާއިން ދުރުރާސްތާގެ މިސައިލް ، ޔުކްރޭނަށް ދިނީ ، ޔުކްރޭނުގެ ބިމުން ދުރުރާސްތާގެ މިސައިލް ބޭނުންކުރަންވާނީ ، ރަޝިއާގެ ސަރަޙައްދުން ، ޔުކްރޭނަށްދޭ ޙަމަލާތައް ދިފާޢުކުރުމަށް އެކަނިކަމުގައި ޝަރުތު ކޮށްފައެވެ. އެހެންނަމަވެސް ، ޔުކްރޭނުން ގެންދަނީ ، ރަޝިއާގެ އެތެރޭގެ ސަރަޙައްދުތަކަށް ޙަމަލާދިނުމަށް ، ދުރުރާސްތާގެ މިސައިލް ބޭނުންކުރަން ހުއްދަ ދިނުމަށް ، ހުޅަނގުގެ ޤައުމުތަކުގައި ތަކުރާރުކޮށް އެދެމުންނެވެ. ޔުކްރޭނުން މިހާރުވަނީ ، ރަޝިއާއާ ދެކޮޅަށް ބެލިސްޓިކް މިސައިލް ޓެސްޓްކޮށްފައެވެ. ފުރަތަމަ ޓެސްޓް ބުރަކަށް ރަޝިއާއަށް ފޮނުވި ބެލިސްޓިކް މިސައިލް ކާމިޔާބު ކަމަށް ޔުކްރޭނުން ބުނެއެވެ. އެހެނަސް ، ބެލިސްޓިކް މިސައިލުން ރަޝިއާއަށް ޙަމަލާދިނުމުގެ ހުއްދަ ނުދިނުމަށް ، ރަޝިއާއިން އަންނަނީ ހުޅަނގަށް ގޮވައިލަމުންނެވެ. އެމެރިކާގެ ސިޔާސީ މަސްރަޙުގައި މިކަމާބެހޭގޮތުން މަޝްވަރާކުރެވި ، އެކަމަށް ހުއްދަދިނުމަށް ނިންމަމުންދާކަމުގެ މަޢުލޫމާތު ، ރަޝިއާއަށްވަނީ ލިބިފައެވެ. ތިންވަނަ ބޮޑުހަނގުރާމައިގެ އިންޒާރު ، ރަޝިއާއިން އެމެރިކާއަށްދިނީ ، މިކަމަށް އިޝާރާތް ކުރަމުންނެވެ. ރަޝިއާގެ ޚާރިޖީ ވަޒީރު ލަވްރޯފް ވިދާޅުވީ ، އެމެރިކާއިން އެގެންދަނީ އަލިފާނާ ކުޅެމުން ކަމުގައެވެ. އެކަން ކޮށްފިނަމަ ، ނޭނގިހުއްޓާ އަނދައިދާނެކަމަށް ލަވްރޯފް ވިދާޅުވިއެވެ. " ބޭހާއި ނުކުޅޭތިބަޑި ، ނޭނގިހުއްޓާ އަނދައިދާނޭ ، ގޭމަކޮޔާ ފިހިދާނޭ "
ތިންވަނަ ބޮޑުހަނގުރާމައެއް ފެށިއްޖެނަމަ ، އެކަމުގެ ގެއްލުން ލިބޭނީ ހަމައެކަނި ރަޝިއާއަށް ނޫންކަމަށާޢި ޔޫރަޕާއި އެމެރިކާއަށްވެސް އެކަމުގެ ގެއްލުން ލިބޭނެކަމަށް ލަވްރޯފް ވިދާޅުވިއެވެ. ރަޝިއާއަކީ ، ހުޅަނގާ ކުޅެލެވޭވަރަށްވުރެ . އަޝްކަރީގޮތުން ބާރުގަދަ ޤައުމެކެވެ.
ރަޝިއާއިން ތިންވަނަ ބޮޑުހަނގުރާމަ ފަށައިފިނަމަ ....
ރަޝިއާއަކީ ، ދުނިޔޭގެ އެންމެ ބޮޑު ޤައުމެވެ. ދުނިޔޭގެ ބިމުގެ އެގާރަ އިންސައްތައަކީ ރަޝިއާގެ ބިމުގެ ސަރަޙައްދެވެ. ދެވަނަޔަށް އެންމެ ބޮޑު ޤައުމަކީ ކެނެޑާއެވެ. ތިންވަނަޔަށް ޗައިނާއެވެ. ބިމުގެ ސަރަޙައްދުގެ ބޮޑުމިނަށް ބަލާއިރު އެމެރިކާ އަންނަނީ ހަތަރުވަނަޔަށެވެ. ރަޝިއާއިން މިހާރުވެސްވަނީ ، އެޤައުމުގެ ސަރަޙައްދެއްކަމަށް ނިންމައި ، ޔުކްރޭނުގެ ބާރުގެ ދަށުގައި އިރުމަތީގައިއޮތް ކްރަމިއާ ހިފާފައެވެ. އަދި ކްރަމިއާގައި ، ޔުކްރޭނުގެ ސަރުކާރާ ދެކޮޅަށް މަސައްކަތްކުރަމުން އަންނަ ޖަމާޢަތްތަކަށް ރަޝިއާއިން އަންނަނީ ވާގިވެރި ވަމުންނެވެ.
ޔުކްރޭނުން ނޭޓޯއާ ގުޅޭކަށް ރަޝިއާ ބޭނުމެއްނޫނެވެ. އިރުމަތީ ޔޫރަޕަށް ނޭޓޯ ފުޅާވެގެންދާކަށް ރަޝިއާ ބޭނުމެއް ނުވެއެވެ. އެއީ ރަޝިއާގެ ޤައުމީ ސަލާމަތާގުޅޭކަމެއްކަމަށް ނިންމައި ، ރަޝިއާއިން ޔުކްރޭނާ ދެކޮޅަށް ހަނގުރާމަފެށީ ، ނޭޓޯގައި ބައިވެރިވުމުގެ ޝަޢުޤްވެރިކަން ފާޅުކޮށް ޔުކްރޭނުން ، ރަސްމީގޮތުން ، ނޭޓޯގައި އެދުމުންނެވެ. ޔުކްރޭން ނޭޓޯގައި ބައިވެރިކުރުމާމެދު ، ނޭޓޯއިން އަދި ވަކިގޮތެއް ނުނިންމައެވެ. ހުޅަނގާއި އެމެރިކާގެ ކިބައިން ޔުކްރޭން ސަލާމަތްކުރުމަކީ ، މޮސްކޯއަށް ވަރަށް މުހިންމު ކަމެކެވެ. އެއީ ނޭޓޯގެ ބާރު ޔުކްރޭނާހަމަޔަށް އަތުވެއްޖެނަމަ ، ރަޝިއާގެ ސަރަޙައްދާ އިންވެގެން ، ނޭޓޯގެ ޤައުމެއް އޮތުމުން ، ރަޝިއާގެ ސަލާމަތާއި ރައްކާތެރިކަމަށް ނުރައްކާ ވާނެތީއެވެ. ރަޝިއާގެ މައްޗަށް ނުފުޒާއި ބާރު ފޯރުވުމުގެ މަގު ، ނޭޓޯއާއި ހުޅަނގުގެ ޤައުމުތަކަށް ތަނަވަސްވެގެން ދާނެއެވެ.
ނޭޓޯއަކީ ތިރީސް ޤައުމެއްގެ މައްޗަށް ހިމެނޭ ޖަމާޢަތެކެވެ. އެމެރިކާއާއި އިނގިރޭސި ވިލާތް އަދި ކެނެޑާއާއި ނެދަރލޭންޑަކީ ނޭޓޯގެ މުހިންމު ޤައުމުތަކެވެ. އެ ޖަމާޢަތުގެ އެންމެ ބޮޑު މަޤްޞަދަކީ ، އެޖަމާޢަތުގެ އެއްވެސް ޤައުމަކަށް ، ބޭރުގެ ބާރަކުން އަރައި އެ ޤައުމެއް ހިފުމަށް ފުރުޞަތު ނުދިނުމެވެ. ޔުކްރޭނުން ނޭޓޯގައި ބައިވެރިވާން ބޭނުންވުމުގެ އެންމެ ބޮޑު ސިއްރަކީ އެއީއެވެ. ޔުކްރޭނާ އިންވެގެން އޮންނަ ރަޝިއާއިން ، ޔުކްރޭން ހިފުމުގެ ދޮރު ބަންދު ކުރުމެވެ. ޔުކްރޭނާއި ރަޝިއާއަކީ ، އެތައް ޒަމާނަކުއްސުރެ ، ކޯޅެމުން އަންނަ ދެޤައުމެވެ. ރަޝިއާގެ އެއްވެސް ނުފޫޒެއް ، ޔުކްރޭނުގެ މައްޗަށް އޮންނާކަށް ޔުކްރޭނުން ބޭނުމެއް ނުވެއެވެ. އެހެނަސް ، ރަޝިއާގެ ޤައުމީ ސަލާމަތަށްޓަކައި ، ރަޝިއާގެ ނުފޫޒު ޔުކްރޭނުގެ މައްޗަށް އޮތުމަކީ ، ރަޝިއާއިން ބޭނުންވާ ކަމެކެވެ. ހުޅަނގާއި ނޭޓޯގެ ބާރާއި ނުފޫޒު ، ޔުކްރޭނުގެ މައްޗަށް އޮތުމަކީ ނޭޓޯގެވެސް އެދުމެކެވެ. އެއީ ، ރަޝިއާއިން ބޭނުންހައި ގޮތެއް ހަދަން ދޫކޮށްލާކަށް ނޭޓޯވެސް ބޭނުމެއް ނޫނެވެ. އިޒްރޭލަކީ ، އެމެރިކާއާއި އިނގިރޭސިވިލާތުގެ ނަހަލާލު ދަރިއެކެވެ. ޔުކްރޭނަކީ ، ޔަހޫދީ އާބާދީއެއް އޮންނަ ޤައުމެކެވެ. އެހެންކަމުން އެމެރިކާއާއި އިނގިރޭސިވިލާތުން ، ޔުކްރޭނު ދިފާޢުކުރުމަށްޓަކައި ކުރަންޖެހުނު ކޮންމެކަމެއްވެސް ކުރާނެއެވެ.
މިޙާލަތުގައި ، ރަޝިއާއިން އެބައިމީހުންގެ އަމިއްލަގޮތްތަކެއް އިޚްތިޔާރުކުރަން މަޖުބޫރު ވެއެވެ. ނޭޓޯފަދަ އެހެން ޖަމާޢަތެއްގައި ރަޝިއާއިން ބައިވެރިވެ ، އިސްދައުރެއް އަދާކުރެއެވެ. އެއީ ކުރީގެ ރޫސީވިލާތަށް ނިސްބަތްވާ ހަ ޤައުމެއް ބައިވެރިވެ " ކަލެކްޓިވް ސެކިއުރިޓީ ޓްރީޓީ އޮގަނައިޒޭޝަން " ގެ ނަމުގައި އުފައްދާފައި އޮންނަ ނޭޓޯފަދަ ޖަމާޢަތެކެވެ.
ހުޅަނގުގެ މަކަރާއި ޙީލަތްތެރިކަމުން ، ފިނިހަނގުރާމައިގައި ރަޝިއާ ބަލިކޮށްފައި އޮތަސް ، ރަޝިއާއަކީ ، މިހާރުވެސް ދުނިޔޭގެ ބޮޑުބާރެކެވެ. ހުޅަނގުވެސް އަދި ނޭޓޯވެސް ޖެހިލުންވާ ބާރެކެވެ. ތިންވަނަ ބޮޑުހަނގުރާމައެއް ފެށުމުގެ ކުޅަދާނަކަން ރަޝިއާއަށް ލިބިގެން ނުވާކަމަށް ޤަބޫލުކުރުމަކީ ، ހުޅަނގުގެ ޤައުމުތަކުގެ މޮޔަވިސްނުމެކެވެ. ކިއުބާއަކީ ، މިހާރުވެސް ރަޝިއާއާ ގުޅުން އޮތް ، ހުޅަނގާދުރު ޤައުމެކެވެ. ތިންވަނަ ބޮޑުހަނގުރާމައެއްގައި ، ރަޝިއާގެ ހަނގުރާމަމަތީ ބާރުތައް ކިއުބާއަށްގޮސް ، ހުޅަނގާ ދިމާކޮށްލައިފިނަމަ ، އެއީ ، ހުޅަނގަށް މައިތިރި ކުރެވޭވަރަށްވުރެ ، އުނދަގޫ ކަންތައްތަކެއް އުފަންވެދާނެ ޙާލަތެކެވެ.
ރަޝިއާގެ ފުދުންތެރިކަމަށް ބަލާއިރު ، އެ ޤައުމުގެ ދިފާޢީ ބަޖެޓަކީ 2 ބިލިއަން ޑޮލަރެވެ. 3.5 މިލިއަން ސިފައިން އެބަތިއްބެވެ. އެއްލައްކަ ރަޝިއާސިފައިން ، އަބަދުވެސް ހަނގުރާމައިގެ ފުރަތަމަ ސަފުގައި ފައިހަރުކޮށް ކޮޅަށް ތިބެއެވެ. ހަނގުރާމަމަތީ ބޭނުންކުރާ 13 ހާސް ޓޭންކް އެބަހުއްޓެވެ. މިއީ ، ދުނިޔޭގެ އެހެން އެއްވެސް ޤައުމެއްގައި ޓޭންކް ހުރި ޢަދަދެއްނޫނެވެ. ބަރުހަތިޔާރު އުފުލާ 27 ހާސް އުޅަނދު އެބަހުއްޓެވެ. އެއީ އެންމެ ޒަމާނީ ފެންވަރަށް ތައްޔާރު ކުރެވިފައިވާ އުޅަނދު ތަކެކެވެ. ހަހާހަށްވުރެ ގިނައިން ، ނިއުކުލިއަރ ރޮކެޓް އެބަހުއްޓެވެ. އެ ރޮކެޓަކީ ، މަތިން ، މަތިންދާ ބޯޠުންނާއި އަޑިން ، ސަބްމެރިނުންވެސް ފޮނުވައިލެވޭވަރަށް ޒަމާނީ ކުރެވިފައިވާ އެއްޗެކެވެ.
ރަޝިއާއިން ތިންވަނަ ބޮޑުހަނގުރާމަ ފަށާނަމަ ، ފުރަތަމަވެސް ހަނގުރާމަފަށާނީ ވައިގެ މަގުންނެވެ. އިލެކްޓްރިސިޓީ ދުއްވައިލައި ، ބްރިޖްތަކާއި ރޭލްވޭ މަގުތައް ހަލާކު ކޮށްލާނެއެވެ. ޙަމަލާ އަމާޒުވާ ޤައުމެއްގެ އިޤްތިޞާދު އިނދަ ޖައްސައިލާނެއެވެ. އޭރު ، ހަނގުރާމައިގެ ކަނޑު އުޅަނދުފަހަރު އޮންނާނީ ތައްޔާރަށެވެ. ދުނިޔޭގެ އެހެން އެއްވެސް ޤައުމެއްގައި ނެތްފަދަ ކަނޑުގެ ޒަމާނީ އުޅަނދުފަހަރު ، ރަޝިއާގައި އެބަހުއްޓެވެ. ރަޝިއާގެ ނިއުކުލިއަރ ސަބްމެރިންތައް ، އެއްވެސް ޤައުމެއްގެ އައްސޭރިފަށުގައި ރުކުރުވައިލައިފިނަމަ ، އެއީ ބިރުވެރި ކަމެކެވެ. އެހިސާބުން ، އެ ޤައުމެއްގެ ދުވަސް އެދިޔައީއެވެ.
ރަޝިއާއިން ، ތިންވަނަ ބޮޑުހަނގުރާމަ ފަށާއިރު ، ޔުކްރޭނުން އެހަނގުރާމަ ފަށައިފިނަމަ ، ނޭޓޯއިން މަޑެއްކޮށެއް ނޯންނާނެއެވެ. ސީދާ ހަނގުރާމައިގެ ތެރެޔަށް ނުވަތްކަމަށްވިޔަސް ، ރަޝިއާއާ ދެކޮޅަށް އިޤްތިޞާދީ ، ވަރުގަދަ ފިޔަވަޅުތަކެއް އަޅާނެއެވެ. އެހެނަސް ، ރަޝިއާއާއެކީވެސް ، ދުނިޔޭގެ އެހެން ޤައުމުތައް އެބަތިއްބެވެ.
ރަޝިއާއިން އިންޒާރުކުރާގޮތުގައި ، ރަޝިއާ ލައްވައި ދުނިޔޭގެ ތިންވަނަ ބޮޑުހަނގުރާމަ ފެއްޓުމުގެ މަސައްކަތް ، އެމެރިކާއިން އެގެންދަނީ ، ޙީލަތްތެރިކަމާއެކުގައި ރާވަމުންނެވެ. ދުނިޔޭގެ ތިންވަނަ ބޮޑުހަނގުރާމަ ފެށުމަށް ، ރަޝިއާއަށް މަޖުބޫރު ކުރުވާނީ އެމެރިކާއެވެ. ދުނިޔޭގެ ޤައުމުތަކުން ، އެކަން ޤަބޫލުކުރިޔަސް އަދި ނުކުރިޔަސް އެއީ ޙަޤީޤަތެވެ. އިންސާނީ ޙައްޤުތައް ކަށަވަރުކުރުމުގެ މެޑެލް ޖަހަމުންދާ އެމެރިކާއިން އިޒްރޭލަށް ވާގިދީގެން ، ފަލަސްތީނުގެ ނަސްލު ނައްތައިލައި ، ފަލަސްތީނުގެ ބިން ފޭރިގަތުމަށް އިޒްރޭލުން ކުރަމުންގެންދާ އަނިޔާވެރި ހަނގުރާމައިގައިވެސް ، އިޒްރޭލުގެ އެންމެ ބޮޑު މަދަދުގާރަކީ އެމެރިކާއެވެ. އަދ އަށާއި އިންސާނީ ޙައްޤުތައް ޙިމާޔަތްކުރުމަށް މަސައްކަތްކުރާ ހުރިހާ ފަރާތްތަކެއްގެ އަޑުވަނީ ، އެމެރިކާގެ ނުފޫޒުން ކަނޑުވައިލާފައެވެ. އެމެރިކާގެ އެ ޢަމަލަށް ، ދުނިޔޭގެ ބޮޑެތި ޤައުމުތަކުން ޗުއްޕުވެސް ނުބުނެއެވެ. އެމެރިކާގެ މަޤްޞަދަކީ ، ރަޝިއާ ލައްވައި ތިންވަނަ ބޮޑުހަނގުރާމަ ފަށްޓައި ، އެކަމުގެ ޒިންމާއިންރެކި ، ރަޝިއާގެ ބޮލުގައި ހުރިހާ އިލްޒާމެއް އެޅުވުމެވެ. އެފަދަ ޙާލަތެއްގައިވެސް ، ދުނިޔޭގެ ބޮޑެތި ޤައުމުތަކުން ، އެމެރިކާއާ ދެކޮޅަކަށް އެއްޗެއް ނުބުނާނެއެވެ.
ހުޅަނގުންވާގިވެރިވެ ، ރަޝިއާގެ އެތެރެއަށް ، ޔުކްރޭނުން ބެލިސްޓިކް މިސައިލް ބޭނުންކޮށްފިނަމަ ، ރަޝިއާއިންވެސް މަޑެއްކޮށް ނޯންނާނެއެވެ. ތިންވަނަ ބޮޑުހަނގުރާމަ ފެށުނަސް އަދި ނުފެށުނަސް ، ރަޝިއާގެ އިސްތިޤްލާލު ރައްކާތެރިކުރުމަށްޓަކައި އަޅަންޖެހުނު ކޮންމެ ފިޔަވަޅެއްވެސް ރަޝިއާއިން އަޅާނެއެވެ. ނިއުކުލިއަރ ހަތިޔާރުގައި އަތްލަންޖެހުނަސް ، އެފަދަ ޙާލަތެއްގައި ރަޝިއާއިން ފަހަކަށް ނުޖެހޭނެއެވެ.
ރަޝިއާގެ ކާރސްކް ސަރަޙައްދަށް ، މިމަހުގެ ހަވަނަ ދުވަހު ، ޔުކްރޭނުންވަނީ އަރާފަފައެވެ. ގިނަބަޔަކު ، ޤަބޫލުކުރާގޮތުގައި ، ޔުކްރޭނުން ، ރަޝިއާގެ އެ ސަރަޙައްދަށް ޙަމަލާދީ ، އެ ސަރަޙައްދު ހިފުންވެގެންދާނީ ، ތިންވަނަ ބޮޑުހަނގުރާމަ ފެށުމުގެ ސަބަބަށެވެ. ރަޝިއާގެ ސަރަޙައްދަށް އަރައިގަތުމަށް ، ރަޝިއާއިން ޔުކްރޭނަކަށް ފުރުސަތެއް ނުދޭނެއެވެ. ޔުކްރޭނުން ރަޝިއާގެ ކަރސްކް ސަރަޙައްދަށް އަރައިގަތީ ، ޞުލްޙައިގެ ވާހަކަތައް ފެށުމަށް ، ރަޝިއާއަށް މަޖުބޫރު ކުރުވަން ވެގެންނެވެ. ހަނގުރާމައިގެ ބިރުވެރިކަން އުފެދި ، ޕުޓިންދެކެ ރަޝިއާގެ ރައްޔިތުން ރުޅިއައުމުން ، ހަނގުރާމައިގެ ޙާލަތު ބަދަލުކުރުމަށް ، ޕުޓިންއަށް މަޖުބޫރުވާނެކަމަށް ، ޔުކްރޭނުން ދެކެއެވެ. އެހެނަސް ، އެއީ ، ހެއްވާ އަދި މަޖާ ބައިކުޅޭމީހެއްގެ މޮޔަވިސްނުމުގައި އޮތް މޮޔަކަމެއްކަމުގައި ރަޝިއާއިން އަންނަނީ ބުނަމުންނެވެ. އަދި ކަރސްކުން ޔުކްރޭން ސިފައިން ބޭލުމަކީ ، ރަޝިއާއަށް އެހާ އުނދަގޫ ކަމަކަށް ނުވާނެއެވެ.
ދުނިޔޭގެ ތިންވަނަ ބޮޑުހަނގުރާމަ ފަށަން މަޖުބޫރުވެއްޖެ ޙާލަތެއްގައި ، އެ ހަނގރުރާމަ ފެށުމުގެ ޤާބިލްކަން ރަޝިއާގެ ކިބާގައި އެބަހުށްޓެވެ. އަދި މަޖުބޫރީ ޙާލަތެއް ކުރިމަތިވެއްޖެނަމަ ، ރަޝިއާއިން އެ ހަނގުރާމަ ފަށާނެއެވެ. އަދި ޔޫރަޕާއެކު ނިއުކުލިއަރ ހަނގުރާމައެއް ފަށަން ޖެހިއްޖެނަމަ ، ރަޝިއާއިން އެކަންކުރުމަކަށްވެސް ފަހަކަށް ނުޖެހޭނެއެވެ. ކޮންމެއަކަސް ، ތިންވަނަ ބޮޑުހަނގުރާމައެއް ފެށިދާނެކަމުގެ އިންޒާރު ، ރަޝިއާއިން އެއޮތީ އެމެރިކާއަށް ދީފައެވެ.
