( 20 އޯގަސްޓް 2024 ގައި ޝާއިޢުކުރި ބަޔާގުޅޭ )
( އަނީސާގެ ވާހަކަޔަށް ކުލްސޫމް ތާއީދުކުރިއެވެ. އެއީ ، އޭނާގެ ހިތުގައިވެސް އެކަމުގައި އޮތްގޮތެވެ. ބުނަން ނުކެރިފައި އިނީއެވެ. އެންގޭޖްމަންޓާއި ކައިވެނީގެ ތާރީޚު ކަނޑައެޅި އެ ނިމުނީއެވެ. އެކަމަށް ދެޢާއިލާއިންވެސް އެއްބަސް ވިއެވެ.)
ބޭރަށް ނުކުމެ ، ރެސްޓޯރެންޓަކަށްދިޔަނަމަވެސް ، ދިލްނަޝީންގެ ކަންބޮޑުވުމަކަށް ބަދަލެއް ނާދެއެވެ. ދައްކާނެވާހަކައެއް އޭނާއަކަށް ނޭނގެއެވެ. ދިލްނަޝީން ، ގަދަކަމުން ގެއިން ނެރެގެން އެހާބޮޑު ، ނުރައްކާތެރި ފިޔަވަޅެއް ޙަމްޒާ އެއެޅީ ދިލްނަޝީނާ ވާހަކަ ދައްކައިލައިގެން އޭނާ ހަމަޖައްސައިލެވޭތޯ ބެލުމަށެވެ. އެއީ ، ޙާލަތުގެ ގޮތުން ކުރަން ހެޔޮވާވަރުގެ ކަމެއްވެސް ނޫނެވެ. ހަމަޖެހިލައިގެން ދިލްނަޝީން ވާހަކަ ދެއްކުމަށް ޙަމްޒާ އެދެމުން ގެންދިޔައެވެ. އެހެނަސް ، ދިލްނަޝީން އެއިނީ ވާހަކަ ދެއްކޭފަދަ ޙާލަތެއްގައެއްނޫނެވެ. ދިމާވެގެން އެއުޅެނީ ، ދިލްނަޝީންގެ ޙަޔާތާގުޅޭ ކަމެކެވެ. ދިލްނަޝީންގެ ހިތުގައިވާ އުދާސްތައް ޙަމްޒާއަކަށް ނުވިސްނެއެވެ. ޙަމްޒާ ބޭނުންވަނީ ދިލްނަޝީނަކީ އޭނާގެ މިލްކަކަށް ވުމެވެ. އޭރަށް ، ދިލްނަޝީންގެ ހިތުގެ ހުރިހާ އުދާސްތަކެއް ، އޭނާ ބޭރުކޮޢްލަދޭނެއެވެ. ދިރިއުޅުމުގެ ހުރިހާ އުފަލަކާއި ހަމަޖެހުމެއް ، ދިލްނަޝީނަށް ހޯދައިދޭނެއެވެ. ދިލްނަޝީންގެ ލޮލުން އެންމެ ކަރުނަތިއްކެއްވެސް އަޔަކަ ނުދޭނެއެވެ.
ލަސްވަމުން ދިޔަވަރަކަށް ، ދިލްނަޝީންގެ ހިތުގެ ވިންދު އަވަސްވަމުން ދިޔައެވެ. އޭނާ ގެޔަށް ލައިދިނުމަށް ޙަމްޒާގެ ކިބައިން އެދުނެވެ. ލަސްކުރަން ހަދައިގެން ދެން ކުރިމަތިވާނީ ކޮންފަދަ މުޞީބާތަކާކަމެއްވެސް ނޭނގެއެވެ. މަންމަމެން ގެޔަށް އައުމުގެ ކުރިން އޭނާއަށް ގެޔަށް ނުދެވިއްޖެނަމަ ، ދެންވާނެގޮތެއް ޚިޔާލުކޮށްލަންވެސް ނޭނގެއެވެ.
ޙަމްޒާއަށް ޤަބޫލުކުރެވުނު ގޮތުގައި ، މަންމަމެން އެގެޔަށްގޮސް ވާހަކަ ދައްކައި ، ކައިބޮއިހަދައިގެންނޫނީ އެނބުރި ގެޔަކަށް ނާންނާނެއެވެ. ޙަމްޒާމެން ވާހަކަ ދައްކާލަން ފުދޭވަރަކަށް ވަގުތު އެބައޮތެވެ. ޙަމްޒާގެ ބައްޕަމެން ، ދިލްނަޝީންމެންގެ ގެޔަށް އައިސް ، ދިލްނަޝީންގެ މަންމައާއި ބޭބެގެ ކިބައިން މަޢާފަށް އެދޭނެކަން ، ޙަމްޒާ ކަށަވަރު ކޮށްދިނެވެ. ޙަމްޒާ އެދައްކާ އެއްވެސް ވާހަކައެއް އަޑުއަހާކަށް ދިލްނަޝީނަކަށް ވަގުތެއް ނެތެވެ. ދިލްނަޝީން ބޭނުންވީ ހަމަ އެވަގުތު ، އޭނާ އެނބުރި ގެޔަށް ދާށެވެ.
މަންމަމެންނާ ދިލްނަޝީނުމެންނާ ދިމާވެއްޖެނަމަ ، އެކަމަށް ކުރިމަތިލައި ، އެމީހުންނާ ވާހަކަ ދެއްކުމަށްވެސް ޙަމްޒާހުރީ ތައްޔާރަށެވެ. އެކަމަކު ، ޙަމްޒާގެ ވާހަކަ އެމީހުން އަޑުއަހަންޖެހޭ ސަބަބެއް ދިލްނަޝީނަކަށް ނުވިސްނުނެވެ. މިދިޔަ ދެތިންދުވަހެއްގެ ތެރޭގައި އެ ހިނގައިދިޔަ ކަންތައްތަކުން އެމީހުންގެ ހިތަށް ލިބިފައިވާ ތަކުލީފާއި ވޭން ، އަދި ފިލަގެންނެއް ނުދާނެއެވެ. ޙަމްޒާގެ އެއްވެސް ވާހަކަޔަކުން ، އެމީހުންނަކަށް އެއްވެސް އަސަރެއް ނުކުރާނެއެވެ. ޙަމްޒާ ދައްކާ އެއްވެސް ވާހަކައެއް އަޑުއަހާކަށްވެސް އެމީހުން ބޭނުމެއް ނުވާނެއެވެ. އެކަމަކު ، ޙަމްޒާގެ ބައްޕަމެން އެގެޔަށް އައިސް ވާހަކަ ދައްކައިފިއްޔާ ، ފަހަރެއްގައި އެމީހުން އެވާހަކައެއް އަޑުއަހައިފާނެކަމަށް ، ދިލްނަޝީނަށް ފެނުނެވެ. ޙަމްޒާއަށްވެސް ، އެކަންކުރަން އޮތް އެންމެ ރަނގަޅުގޮތަކީ އެއީކަމަށް ފެނުނެވެ.
އަނީސާއާއި އައްވަލް ، ޙައިދަރުގެ ގެއިން ނުކުތުމުގެ ވަގުތު ޖެހިއްޖެއެވެ. ޙައިދަރާއި އައްވަލާ ދެމައިން ވާހަކަ ދައްކަމުން ގެއިން ނުކުންނަން ހިނގައިގަތެވެ. ދިލްނަޝީނަށް ދިނުމަށް ، ކުލްސޫމްހުރީ ވަރަށްބޮޑު ތަށިބަރިއެއް ތައްޔާރު ކޮށްފައެވެ. އޭގައިހުރި ކާތަކެތި ، ދިލްނަޝީނަށް ކާންދިނުމަށް އަނީސާގެ ކިބައިން ކުލްސޫމް އެދުނެވެ. އަދި ، ދިލްނަޝީނަށް ހަދިޔާއަކަށް ތައްޔާރުކޮށްފައިހުރި ތަކެތި އަނީސާއާ ޙަވާލުކުރިއެވެ. އެއީ ޖަވާހިރާއި ގަހަނާ ކަމަށްވާތީ ، އެތަކެތި ޤަބޫލުކުރުމަށް އަނީސާ އިންކާރު ކުރިއެވެ. އަދި އެއުޅެނީ ، ދިލްނަޝީންމެން އެންގޭޖްވެސް ނުވެއެވެ. އެކަން އެހެން އޮތްއިރު ، އެފަދަ އަގުބޮޑު ޖަވާހިރާއި ގަހަނާ ބަލައިގަތުމަކީ އެޢާއިލާގެ އުސޫލުތަކާ ޚިލާފުކަމެއްކަމުގައި ، އަނީސާ ބުނަމުން ގެންދިޔައެވެ. އެތަކެއްޗާ ޙަވާލު ނުވުމަށް އަނީސާ މަސައްކަތްކުރި ނަމަވެސް ، ކުލްސޫމްގެ ވާހަކަތަކުން އަނީސާއަކަށް އެކަމުން ސަލާމަތެއް ނުވިއެވެ.
ދިލްނަޝީންމެން ގެޔަށް އައިއިރު ، މަންމަމެންނަކަށް އަދި ގެޔަކަށް ނާދެވެއެވެ. އޭރުވެސް ، ދިލްނަޝީންހުރީ ކަންބޮޑުވެގެންގޮސް ހާސްވެފައެވެ. ޙަމްޒާހުރީ ހަމަޖެހިލައިގެންނެވެ. މަންމަމެންނަށް ގެޔަށް ނާދެވޭނެކަން ޙަމްޒާއަށް ޔަޤީންވިއެވެ. އެކަމަކު ، ޙަމްޒާގެ ހިތުގައި އޮންނަ އެ ޔަޤީންކަން އެއީ ، އެދެމީހުންނަށް ، މިއަދު ތަޙައްމަލް ކުރެވެމުންދާ ތަކުލީފުގެ އަސްލެވެ. އެކަން ދިލްނަޝީން ، ޙަމްޒާއަށް ހަނދާން ކޮށްދިނެވެ. ދިލްނަޝީނަކީ ، އޭނާގެ މިލްކަކަށްވާނެކަމާއި ، ދިލްނަޝީންގެ ކައިވެނި ކުރެވޭނީ އޭނާއާއެކީ ކަމުގައި ، ޙަމްޒާއަށް ޔަޤީން ކުރެވެއެވެ. އެކަމަކު ، ދިލްނަޝީނަށް ޤަބޫލުކުރެވޭގޮތުގައި ، ޙަމްޒާގެ އެޔަޤީންކަން ، މިއަދު ތޮޅިޔަށް ދާނެއެވެ. މަންމަމެން އެނބުރި ގެޔަށް އަންނާނީ ، ޙައިދަރާއި ދިލްނަޝީންގެ ކައިވެނީގެ ކަންކަމުގެ ފުރަތަމަ މަރުޙަލާ ފުރިހަމަ ކޮށް ، އެކަމަށް ބިންގާ އަޅާފައެވެ.
މަންމަމެން ، ގެޔަށް އައުމުގެ ކުރިން ޙަމްޒާ އެގެއިން ނުކުމެގެން ދިއުމަށް ދިލްނަޝީން އެދުނެވެ. ދިލްނަޝީން ދޫކޮށްލާފައި ، އެގެއިން ނުކުމެގެން ދާކަށް ޙަމްޒާ ބޭނުމެއްނޫނެވެ. ޙަމްޒާއަކަށް ދިލްނަޝީނަކާ ފޯނަކުންވެސް ވާހަކައެއް ނުދެއްކޭނެއެވެ. ދިލްނަޝީންގެ އަޑު އިވުމަކީ ، ޙަމްޒާގެ ހިތަށް ހަމަޖެހުންލިބި ، އުއްމީދު އާގެންދާ ކަމެކެވެ. އޭނާގެ ފުރާނަޔަށް ދިރުންލިބިގެންދާ ކަމެކެވެ. ޙަމްޒާގެ ފޯނު ނަގާ ، ދިލްނަޝީންގެ އަތަށް ދިނެވެ. އަދި އެފޯނުން އޭނާއާ ވާހަކަ ދެއްކުމަށް އެދުނެވެ. އެހެންނަމަވެސް ، ޙަމްޒާގެ ފޯނު އޭނާގެ އަތުގައި ބާއްވާކަށް ދިލްނަޝީން ބޭނުމެއްނޫނެވެ. އެކަމުގައި އިތުރަށް ކަމެއްކުރަން އޮތްނަމަ އެކަމަކީ ، ޙަމްޒާގެ ބައްޕަމެން އެގެޔަށް އައިސް ، އޭނާގެ މަންމައާއި ބޭބެގެ ކިބައިން މަޢާފަށް އެދުންކަމަށް ، ދިލްނަޝީން ބުންޏެވެ.
ދިލްނަޝީން އެފޯނު ނުބާއްވައިފިނަމަ ، އޭނާ އެނބުރި ނާންނާނެކަމަށް ޙަމްޒާ ބުނެ ، ދިލްނަޝީންގެ އަތަށް ފޯނުލައިދިނެވެ. އަދި ބައްޕަމެން އެގެޔަށް ފޮނުވާނެކަމަށް ބުނަމުން ، އެގެއިން ނުކުމެގެން ޙަމްޒާ ދިޔައެވެ.
ގެޔާ ހަމަޔަށް އަނީސާމެންނަށް ނާދެވެނިސް ، ޕެޓްރޯލް ހުސްވެގެން ، ގެޔާ ސަތޭކަވަރަކަށް ފޫޓާ ދުރަށް ކާރު ހުއްޓުނެވެ. އެއީ ޙަމްޒާވެސް އެގެއިން ނުކުތް ވަގުތެވެ. އަނީސާމެން ހިނގާފައި ގެޔާ ދިމާލަށް އައިއިރު ، ޙަމްޒާ އޭނާގެ މޫނު ފޮރުވަމުން ، އޭނާގެ ކާރާ ދިމާލަށް ދިޔައެވެ. ނަސީބަކުން ، އެމީހުންނަށް ފާހަގަ ނުކުރެވެނިސް ، ޙަމްޒާގޮސް ކާރަށް އެރިއެވެ. އަދި ، އެމީހުންނަށް ކާރާހަމަޔަށް ނާދެވެނިސް ، ޙަމްޒާއަށް އޭނާގެ ކާރު ދުއްވައިލެވުނެވެ.
ދިލްނަޝީންހުރީ ، ޙަމްޒާގެ ފޯނު އޭނާގެ އަތަށްލައިގެން ، ފޯނަށް ހަދާނެގޮތެއް ނޭނގި ، ދެކޮޅަށްދެކޮޅަށް ހިނގާލަ ހިނގާލައެވެ. އައްވަލް އައިސް ދޮރުގައި ޖަހައިލުމުން ، ދިލްނަޝީން ސިއްސައިގެން ދިޔައެވެ. ދޮރުހުޅުވައިދިނުމަށް ، ދިލްނަޝީނަށް އައްވަލް ގޮވަމުން ގެންދިޔައެވެ. އެހެންނަމަވެސް ، އެފޯނު ހިފައިގެންގޮސް ދޮރުހުޅުވައިފިނަމަ ، އަނެއް ހަކަންތައް ލައިގަންނާނެއެވެ. ފޯނު ފޮރުވުމަށްޓަކައި ދިލްނަޝީން ދުއްވައިގަތީ އޭނާގެ ކޮޓަރިޔަށެވެ. ފޯނު ފޮރުވަން އެއްތާކަށް ލައި އެތަނުން ނަގައި އަނެއްތަނަކަށް ލަމުންގޮސް ، އެންމެ ފަހުން ، އޭނާއަށް ފެނުނު އެންމެ ރަނގަޅުތަނެއްގައި ފޯނު ފޮރުވިއެވެ.
ދިލްނަޝީން ތިރިޔަށް އައިއިރު ، މަންމަމެންތިބީ ، އައްވަލް އަތުގައި އޮތް ތަޅުދަނޑިން ދޮރުހުޅުވައިގެން ގޭތެރެޔަށް ވަދެއެވެ. އޭރުވެސް ، އަނީސާގެ އަޑުގެ ނެތްތަނަށް ދިލްނަޝީނަށް ގޮވަމުން ގެންދިޔައެވެ. ފޯނު ފޮރުވުމަށްފަހު ، ތެޅެމުން ފޮޅެމުން ، ދިލްނަޝީން ތިރިޔަށް އައެވެ. އޭރު ، އެމީހުން ވާހަކަ ދައްކަމުން ގެންދިޔައީ ، ޙައިދަރުމެންގެ ޢާއިލާގެ ސާދާކަމާއި ރަނގަޅުކަމުގެ ވާހަކައެވެ. އަޑުއަހަން ބޭނުންނުވިނަމަވެސް ، ދިލްނަޝީނަށް އެއަޑުއަހަން އެވަގުތުއޮތީ މަޖުބޫރުވެފައެވެ.
އެދުވަހު ވަރަށް ރީތިކޮށް ، މޫސުން އޮވެފައި ކުއްލިޔަކަށް ވައިގަދަވެ ، ވިއްސާރަވެއްޖެއެވެ. ޙައިދަރު އިނީ ، އޭނާގެ މާޒީގެ ތެރެޔަށް ގެއްލިފައެވެ. އޭނާއަށް ކުރެވެން އެއުޅެނީ އޭނާގެ ހިތްއެދޭކަމެއްކަމެއް ނޭނގެއެވެ. ނޫނީ ، އޭނާގެ ހިތް ނޭދުނަސް ، މަންމަޔަށްޓަކައި ، އެހިތް އެކަމަށް މަޖުބޫރު ކުރުވަނީނޫންކަމެއްވެސް ޔަޤީނެއްނޫނެވެ. އޭނާއަށް އެނގޭހާވެސް ކަމަކީ ، ދިލްނަޝީނަކީ ރީތި އަދި ސާދާ މިޒާޖެއްގެ ކުއްޖެއްކަމެވެ. މެހެމަލްއާ ހާސްބައި ތަފާތުކަމެވެ. މެހެމަލްއަކީ އޭނާގެ ފުރަތަމަ ލޯތްބެވެ. ހިތުގައި އުފެދޭ ފުރަތަމަ ލޯބި ، ހިތުން ފިލުވައިލުމަކީ ، އެއްވެސް އިންސާނަކަށް ފަސޭހަކަމަކަށް ނުވާނެއެވެ. އެއްވެސް ސަބަބަކާހުރެ ، އެ ލޯތްބާ ދުރަށްދާންޖެހުނަސް ، އެންމެ ގާތުގައި އެލޯބި އޮންނާނެއެވެ. އެކި ސަބަބު މެދުވެރިވާހިނދު ، އެލޯބިއައިސް ހިތުގައި ޓަކި ޖަހާނެއެވެ. ޙައިދަރުގެ ވިސްނުމާއި ފިކުރު އޭނާގެ މާޒީގެތެރެޔަށް ގެންދިޔައެވެ.
އޭނާއާ ވަކިނުވުމަށް ، މެހެމަލްއަށް އޭނާކުރި އާދޭސްތަކުގެ ހަނދާންތަކުން ހިތަށް ތަދުވިއެވެ.
" އަހަރެންނާ ވަކި ނުވާށެވެ ! ދުނިޔޭގެ ހުރިހާ އުފަލެއް މެހެމަލްގެ ކުރިމައްޗަށް އަހަރެން ގެނެސްދޭނަމެވެ. މިއަދު ، އަހަރެން ކިތަންމެ ނިކަމެއްޗަސް ، އެއްދުވަހަކުން ، އަހަރެންނަކީ މި ސަހަރުގައި ނެތްވަރުގެ މަހުޖަނަކަށް ވާނަމެވެ. އަހަރެންގެ ވިޔަފާރިޔަކީ ފަޚުރުވެރި ކާމިޔާބު ވިޔަފާރިޔަކަށް ، އިރާދަކުރެއްވިއްޔާ ހަދާނަމެވެ. ﷲ ގެ އިރާދަފުޅާއެކު ، އަހަރެންނަކީ ، މި ޤައުމުގައި ނެތްފަދަ ، އާރކިޓެކްޓަކަށް ވާނަމެވެ. ބޮޑެތި ޢިމާރާތްތައް ހަދާނަމެވެ. މެހެމަލް އާރކޭޑް އަދި މެހެމަލް ކޮލޮނީފަދަ ނަންނަމުން ، އެ ޢިމާރާތްތަކަށް މެހެމަލްގެ ނަމާގުޅުވާފައި ނަންދޭނަމެވެ. " މެހެމަލްއާ މުޚާތަބުކޮށް ، ޙައިދަރު ބުނެފައިވާ ބަސްތައް ޚިޔާލަށް އައެވެ.
އެދުވަހުވެސް އޭނާ އެ ދެއްކި އެއްވެސް ވާހަކައެއް ، މެހެމަލްއަކަށް ޤަބޫލެއް ނުކުރެވުނެވެ. އޭނާއަށް ހިތްވަރުދޭކަށްވެސް ނުވިސްނިއެވެ. މެހެމަލްއަށް އެވަގުތު ބޭނުންވެފައި އޮތީ ، ބަނޑުހައިވެފައި ހުރީމާ ކާއެއްޗެކެވެ. ކާންބޭނުންވަނީ ކޮންއެއްޗެއްތޯއާއި ، ދާންވީ ކޮންތާކަށްތޯ ޙައިދަރުކުރި ސުއާލަށް ރައްދުވީ މެހެމަލްގެ މަލާމާތެވެ. ޙައިދަރަކީ ، ފަސްތަރީގެ ހޮޓަލަކަށް އޭނާ ގެންދެވޭ ފެންވަރުގެ މީހެއްނޫންކަމަށާއި ، އާދައިގެ ރެސްޓޯރެންޓަކަށް ގެންގޮސް ދޭށޭ ބުނެ ޙައިދަރަށް މަލާމާތްކުރަމުން ، ޙައިދަރު ދުއްވަން އިން ބާ ސައިކަލްގެ ފަހަތުގައި މެހެމަލް އިށީނެވެ.
މެހެމަލްގެ ލޯބި ، އޭނާގެ ހިތުން ފިލުވައިލުމަކީ ، ޙައިދަރަށް ކުރެވޭވަރުގެ ކަމެއްނޫނެވެ. އެހެންކަމަށްވަންޏާ ، ޒުވާން އަންހެންކުއްޖެއްގެ ޙަޔާތް ބަރުބާދުކޮށްލުމަށް ، އޭނާ އެ ކުރިމަތިލަނީ ކީއްވެ ހެއްޔެވެ ؟ އެކުއްޖާގެ ފަރާތުން އޭނާގެ ހިތަށް ލިބޭނެ އުފަލަކީ ކޮބައި ހެއްޔެވެ ؟ ހައިދަރުގެ ބޯހާސްވެގެންގޮސް ކޮޅަށް ތެދުވެ ، ދެކޮޅަށްދެކޮޅަށް ހިނގަން ފެށްޓިއެވެ.
މެހެމަލްއާ އޭނާއާ ދިމާވާންވީ ކީއްވެގެން ހެއްޔެވެ ؟ މެހެމަލްގެ ހިތުގައި އޭނާގެ މައްޗަށް ، އެއްވެސް މިންވަރެއްގެ ކުލުނެއް ނެތްއިރު ، އޭނާގެ ހިތުގައި މެހެމަލްގެ މައްޗަށް ، އެ ލޯތްބެއް އެ އުފެދުނީ ކީއްވެ ހެއްޔެވެ ؟ އެ ލޯބީގައި އޭނާގެ ޙަޔާތް ބަރުބާދުވާން އިރާދަފުޅުގައި އެއޮތީ ކީއްވެ ހެއްޔެވެ ؟ އެ އަނިޔާ އޭނާއަށް ލިބެންވީ ، އޭނާގެ ކޮންކުށެއް އޮވެގެން ހެއްޔެވެ ؟
ހެނދުނު ތެދުވެގެން ، ކާމޭޒުދޮށަށް މެހެމަލް އައިއިރު ، މޭޒުމަތީ ފޮނިކާ އެއްޗެއް ހުރިތަން ފެނުމުން އެކަމާ ނޯކަރާ ސުއާލު ކުރިއެވެ. އެއީ ، މެހެމަލްގެ ދެބެންގެ ދެދަރި ޙައިދަރުގެ ގެއިން ފޮނުވި އެއްޗެއްކަމަށް ނޯކަރު ބުންޏެވެ. ޙައިދަރުގެ ކައިވެނީގެ ތާރީޚު ކަނޑައެޅި ، ޙައިދަރު މީހަކާ އިންނަނީއެވެ. އެއީ ، އެކަމުގެ އުފަލުގައި އެގެއިން ފޮނުވި އެއްޗެކެވެ. ނޯކަރު އެބުނި ވާހަކައެއް ޤަބޫލުކުރާކަށް މެހެމަލް ބޭނުމެއްނުވިއެވެ. އެގޭގެ އެއްވެސް މީހަކު ފޮނިއެއްޗެތި ނުކާނެ ކަމަށާއި އެ ހުރިހާ އެއްޗެއް އުކައިލާށޭ ބުނެ ، ނޯކަރާ ދިމާލަށް މެހެމަލް ހަޅޭއްލަވައިގަތެވެ.
ޙައިދަރުގެ ކައިވެންޏަށް ، މެހެމަލްގެ ރުޅިގަނޑު ބާލައިލިތަން ފެނިފައި ނޯކަރުގާތަށްވެސް ހިނިއައެވެ. އެތަން ފެނިފައި ، މެހެމަލްގާތަށް އައިސްފައިހުރި ރުޅި ، އިތުރަށް ގަދަވެ ، ހުރިހާ އެއްޗެއް މޭޒުމަތިންނަގައި ހޫރައިލިއެވެ. ސައިވެސް ނުބޮއެ ، ސިޓިންރޫމަށްގޮސް ، ސޯފާމައްޗަށް ވެއްޓިގަތެވެ. ޙައިދަރުގެ ކައިވެންޏަކީ ، މެހެމަލްއަށް މަސްއަލަޔަކަށް ވާންވީ ސަބަބެއް ، ޚުދު އޭނާއަކަށްވެސް ނުވިސްނެއެވެ. މެހެމަލް އެއުޅެނީ ، މުއްސަނދި މަހުޖަނަކާ އިނދެގެންނެވެ. އެކައިވެންޏަށް ދަރިޔަކުވެސް ލިބިފައި އެބަހުއްޓެވެ. އެކަމަކުވެސް ، ދަތްކުނޑި ވިކިފައި ދެބުމަ ގޮށްޖަހައިގެން އެތައް އިރަކު މެހެމަލްއަށް އިނދެވުނެވެ. އޭގެ ސަބަބަކީ ، ޙައިދަރު އޭނާއަށް ހަނދާންކޮށްދެމުން އައިސްފައިވާ ގޮތަށް ، އެކައިވެނީގައި ހަމަޖެހުން ނެތީމާ ކަމަށް ވެދާނެއެވެ. މެހެމަލް ، އުފަލުގައި ބެހެއްޓޭނީ ހަމައެކަނި ، ޙައިދަރަށްކަމުގައި ، ޙައިދަރު ބުނަމުންއައި ބަސް ، މެހެމަލްގެ އަނގަޔަށް އެވަނީ ވަދެފައެވެ. މެހެމަލްގެ އަމިއްލަ ނަފްސުދެކެ އެކަމާ ކިތަންމެ ރުޅިއެއް އަޔަސް ، މިހާރަކު ކުރެވޭނެ ކަމެއްނެތެވެ. މިހާރު އެއޮތީ ވަގުތު ފާއިތުވެފައެވެ. ބޮޑުބޭބެ ދެއްކި މަހުޖަނަކާ ކައިވެނިކޮށްގެން ، މެހެމަލްއަށް ލިބޭ އެއްވެސް އުފަލެއް ނެތެވެ. އަމިއްލަ ނަފްސު ދެކެ އައިސްހުންނަ ރުޅިން ، އޭނާގެ އަމިއްލަ ދަރިފުޅާވެސް އަޅައިލެވެނީކީ ނޫނެވެ. މެހެމަލްގެ ޙަޔާތްއެވަނީ ބަރުބާދު ވެފައެވެ. (ނުނިމޭ)
ވަރަށްވެސް ރީތި