ވިހަ ތީރު (14)

( 13  އޯގަސްޓް 2024 ގައި ޝާއިޢުކުރި ބަޔާގުޅޭ )

( ހެޔޮ ހިތަކައިގެން ، އެގޭތެރެއިން ، އޭނާއާ ވާހަކަދައްކައިލަނީ ހަމައެކަނި ފަހަރި ، ޢާފިޔާއެވެ. ބޭބެއާއި މަންމަ އެތިބެނީ އޭނާދެކެ ރުޅިއައިސް ރަތްވެފައެވެ. ދިލްނަޝީނަށް ހަދާނެގޮތް ބޮޑުވިއެވެ. އެއިންގޮތަށް ގަބުވެފައި އިނދެ ، އަނެއްކާވެސް އެނދުމައްޗަށް ވެއްޓިގަތެވެ.)

" ޙަމްޒާ އަދިވެސް ނެތެދުވަނީ ހެއްޔެވެ ؟ " ހެނދުނުގެ ނާސްތާކުރަމުން ، ކާމޭޒުދޮށުގައި އިނދެ ، ޞާދިޤް އަމީން ސުއާލު ކުރިއެވެ.

ހެވިފައި އިނދެ ، އާނއެކޭ ބުނެ ، ޞާދިޤްގެ ސުއާލަށް ޖަވާބުދިނީ ، ބުޝްރާ އެވެ. އެ ކައިވެންޏަކީ ނުކުރެވޭނެ ކައިވެންޏެއްކަން ، ޙަމްޒާއަށް ވިސްނައިދީފިންތޯ ޞާދިޤް ސުއާލު ކުރިއެވެ.

" އަހަރެންވެސް ވަރަށް ވިސްނައިދީފީމެވެ. ޙަމްޒާ ބޭނުންވީ ދިލްނަޝީނާ ގުޅައި ފޯނުން ވާހަކަ ދެއްކުމަށެވެ. ދިލްނަޝީންގެ ފޯނު އޮތީ ނިއްވައިލާފައެވެ. އެހެންވީމާ ، ދިލްނަޝީނަކާ ޙަމްޒާއަކަށް ވާހަކައެއް ނުދެއްކުނެވެ. " ރިދާ ބުންޏެވެ.

ރިދާގެ ވާހަކަ ނުނިމެނިސް ، ބުޝްރާގެ ޝަކުވާ ރިދާއަށް އަމާޒުވިއެވެ. ރިދާއަށް ވިސްނައިދެވޭނީ ކޮންކަމެއް ހެއްޔެވެ. ހުރިހާވެސް ގޯހެއް ހެދީ ، ރިދާއެވެ. ރިދާއަށް އެހުރިހާކަމެއް އެނގޭއިރު ، އެކަން ބުޝްރާމެންނަށް ސިއްރުކޮށްގެން އެހާ ގިނަދުވަހު ހުރީތީ ، ބުޝްރާ އިނީ ، ރިދާދެކެ ހިތްހަމަ ނުޖެހިފައެވެ. އެހެނަސް ، އެކަމުގައި ރިދާގެ އޮތީ ކޮން ކުށެއް ހެއްޔެވެ. ދިލްނަޝީންދެކެ ޙަމްޒާ ލޯބިވެއެވެ. ޙަމްޒާގެ ޙަޔާތުގެ ބައިވެރިޔެއްގެ ގޮތުގައި ، ދިލްނަޝީން އިޚްތިޔާރުކުރީ ، ޙަމްޒާ އަމިއްލަޔަށެވެ. ދިލްނަޝީންގެވެސް އަދި ، ރިދާގެވެސް އެއްވެސް ކުށެއް އެކަމުގައި ނެތްކަން ރިދާ ސާފުކޮށްދިނެވެ. އެކަމަށް އިސްނެގީވެސް ޙަމްޒާއެވެ. ރިދާގެ ބެސްޓް ފްރެންޑް ކަމަށްވާތީ ، އެގުޅުން ކުރިޔަށް ނުގެންދަން ، ދިލްނަޝީން އެތައް މަސައްކަތެއް ކުރިއެވެ. ޙަމްޒާ ގޮތްދޫނުކޮށް ، ދިލްނަޝީނަށް އެކަމަށް މަޖުބޫރު ކުރުވީއެވެ. އެކަމަކު ، އެއީ ރިދާގެ މަންމަމެންނަށް ޤަބޫލު ކުރެވޭނެ ވާހަކައެއްނޫނެވެ.  އެ ޢުމުރުގައި ފެންނަ ، ރީތި ކޮންމެ އަންހެންކުއްޖަކަށް ހިތްކިޔުމަކީ ، މިޒަމާނުގެ ޒުވާންކުދިންގެ އާދައެކެވެ.

ޙަމްޒާއަކީ އެކަހަލަ މީހެއްނޫންކަން މަންމަމެންނަށް ސާފުކޮށްދެވޭތޯ ، ރިދާ ކުރިމަސައްކަތްވީ ބޭކާރެވެ. ދިލްނަޝީންދެކެ ޙަމްޒާ ލޯބިވެދާނެކަމަކަށް ، ބުޝްރާއަކަށް ޤަބޫލެއް ނުކުރެވުނެވެ. އެހެންކަމުން ، އެކައިވެންޏާ ދުރަށް ޙަމްޒާ ގެންދެވޭތޯ ބަލަންޖެހޭކަމަށް ބުޝްރާއަށް ފެނުނެވެ.

" ދުރުތާކަށް އެހެން ޤައުމަކަށް ، ދުވަސްކޮޅަކަށް ޙަމްޒާ ފޮނުވައިލަންވީ ނޫންހެއްޔެވެ ؟ ރަށުން ބޭރަށް ދެވުނީމަ ، ޙަމްޒާގެ ހިތަށް ހަމަޖެހުން ލިބި ، ދިލްނަޝީންމަތިންވެސް ހަނދާން ނެތިދާނެއެވެ. މިއަދު އޮފީހަށްގޮސް އަހަރެން ، ޙަމްޒާގެ ޓިކެޓް ނަގަން ބުނާނަމެވެ. ބޭނުންކަމަށްވަންޏާ ، ބުޝްރާވެސް ޙަމްޒާއާއެކީ ދިޔަސް އެންމެ ރަނގަޅެވެ. " ޞާދިޤް އޭނާގެ އަންހެނުންނާ މުޚާތަބުކޮށް ބުންޏެވެ.

ޙަމްޒާ ފާޚާނާއިން ނުކުތްއިރު ، ބުޝްރާ އުޅެނީ ، ޙަމްޒާގެ ހެދުންތައް ފައްޖަހައި ، ފޮށްޓަށް އެޅުމުގެ މަސައްކަތުގައެވެ. މަންމަ އެކުރަނީ ކީއްތޯ ، ޙަމްޒާ ސުއާލު ކުރިއެވެ. އެކަމާ ، ޙަމްޒާ ޙައިރާންވާނެކަމަށް ބުނެ ، ޙަމްޒާ އާއި ބުޝްރާއާ ދެމައިން ، ބޭރު ޤައުމަކަށްދާން ދަތުރު ތައްޔާރު ކުރަނީކަމަށް ބުޝްރާ ބުނުމާއެކު ، ޙަމްޒާ ނެއްޓިއެވެ. މަންމަގެ މަޤްޞަދު ޙަމްޒާއަށް ވަގުތުން ވިސްނުނެވެ. އަދި އޭނާ ޤައުމުން ބޭރަށްދާން އިންކާރު ކުރިއެވެ. ބޭރު ޤައުމަކަށް ދެވޭތީ އުފާކުރަން ޙަމްޒާއަކީ ، ކުޑަކުއްޖެއްނޫނެވެ.

ކުޑަކުއްޖެއް ނޫންކަމަށް ވަންޏާ ، ބޮޑުމީހެއްގެ ގޮތް އިޚްތިޔާރުކުރުމަށް ބުޝްރާ ބުންޏެވެ. ބޮޑުވެ ، ތަސައްރުފު ފުދި ، ހަމަވިސްނުން ލިބިފައި ހުރިމީހަކު ، އިއްޔެ އެހެދިގޮތަށް ، ގެ ދޫކޮށްލާފައި ދާނެހެއްޔޭ އަހައި ޙަމްޒާއަށް މަލާމާތް ކޮށްލިއެވެ.

މަންމަމެން އެހެންމަގެއް ނުދެއްކީމަ ، ގެއިން ނުކުމެގެންދާން އޭނާއަށް މަޖުބޫރުވީކަމަށް ޙަމްޒާ ބުންޏެވެ. އެކަމާ ގުޅިގެން ، ޙަމްޒާ ބޭނުންވީ އެކަނި ހުރެލުމަށެވެ. ގެއިން ނުކުމެގެންދާން ޖެހުނު ސަބަބަކީ އެއީއެވެ.

އެކަނި ހުންނަން ބޭނުންކަމަށް ވަންޏާ ، ޙަމްޒާ އެކަނި އެދަތުރު ދާންވީއެވެ. އޭނާއާއެކީ ، އެހެން އެއްވެސް މީހަކު ނުދާނެއެވެ. ބުޝްރާ ދާން ނިންމީވެސް ، ޞާދިޤް އެކަމަށް އެދުނީމައެވެ. ބުޝްރާ ، އޭނާގެ ޓިކެޓް ކެންސަލްކޮށް ، ޙަމްޒާ އެކަނި ފޮނުވުމަށް ނިންމިއެވެ. އެކަނި ނަމަވެސް އެދަތުރު ނުގޮސް ޙަމްޒާއަށް ފަރަކު ނުޖެހޭނެއެވެ. އެއީ ބައްޕަގެ ނިންމުމެކެވެ.

" މަންމަޔަކީ މޮޔައެއް ހެއްޔެވެ ؟ އަހަރެން އެހެންތާކަށް ފޮނުވައިލީމަ ، ދާގޮތަށްގޮސް ، ދިލްނަޝީންމަތިން އަހަރެން ހަނދާން ނައްތައިލާނެކަމަށް ހީކުރާކަމަށް ވަންޏާ ، ތިކުރަނީ ވަރަށް މޮޔަ ކަމެކެވެ. ކޮންމެ ގޮތެއް އަހަރެންނަށް ހެދިޔަސް ، ދިލްނަޝީންގެ ހަނދާންތައް އަހަރެންގެ ހިތަކުން ފިލުވައެއް ނުލާނަމެވެ. " ޙަމްޒާ ބުންޏެވެ.

ޙަމްޒާ އެތާހުއްޓަސް ، އެހެންތާކު ހުއްޓަސް ދިލްނަޝީން މަތިން ހަނދާން ނައްތައިލާން ޖެހޭނެކަމަށް ބުނެ ، ބުޝްރާ ހަޅޭއްލަވައިގަތެވެ. އެހެންކަމަށް ވަންޏާ ، މަންމަމެންވެސް ، މަންމަމެންގެ ފިރިހެންދަރިއެއް ހުރިކަން ހަނދާން ނައްތައިލާށޭ ބުނެ ، ބުޝްރާއާ ދިމާލަށް ޙަމްޒާވެސް ހަޅޭއްލަވައިގަތެވެ. އަދި ، އެނދު ކައިރިޔަށް ޖެހިލައި ، ފައްޖަހާފައި ބުޝްރާ ފޮށްޓަށް އަލާފައިހުރި އޭނާގެ ހެދުންތައް ނަގައި ، ތަޅުންމައްޗަށް ހޫރައިލިއެވެ.

ޙަމްޒާ މީހަކާ ދެވަން ، މަންމަމެން ބޭނުން ނޫންކަމަށް ވަންޏާ ، ކައިވެނި ކުރާކަށް ޙަމްޒާވެސް ބޭނުމެއް ނޫނެވެ. ޙަމްޒާ ބޭނުންވަނީ ، އޭނާއާ ދިލްނަޝީންގެ ކައިވެންޏަށް މަންމަމެން ރުހި ، އޭނާ ދިލްނަޝީނާ އެންގޭޖް ވުމުގެ ހުއްދައަށެވެ. އެވަރުވެސް އޭނާއަށް މިވަގުތަށް އެންމެ ރަނގަޅެވެ. އެހެން ކައިވެންޏަކުން ދިލްނަޝީން ސަލާމަތްކުރެވެން ، އޮތްހަމައެކަނި ގޮތަކީ އެއީއެވެ. ކައިވެންޏަކީ ފަހުންވެސް ކުރެވިދާނެ ކަމެކެވެ. އޭނާވެސް އަދި ދިލްނަޝީންވެސް ކިޔަވައި ނިމުމުން ކައިވެނި ކުރެވުނަސް ، ޙަމްޒާއަށް އެންމެ ރަނގަޅެވެ. އެވަރުވެސް ، ޙަމްޒާއަށް ފުދެއެވެ. އެގޮތް އެންމެ ރަނގަޅުތޯ ، ޙަމްޒާ އޭނާގެ މަންމަޔާ ސުއާލު ކުރިއެވެ.

ބުޝްރާގެ ޖަވާބަކަށްވީ ނޫނެކޭ އެވެ. ދިލްނަޝީނާ ޙަމްޒާއާ ދެމީހުންގެ ކައިވެންޏަކީ ، އެއްވެސް ޙާލެއްގައި ވާނެކަމެއް ނޫނެވެ. ޙަމްޒާ އުޑުގަ ޖެހިފައި ބިމުގަ ޖެހުނަސް ، އެކަމަކަށް އެމީހުން އެއްބަހެއް ނުވާނެއެވެ.

އައްވަލާއި ރާފިޢާ އަދި އަނީސާއާ ތިންމައިން ، ހެނދުނުގެ ނާސްތާކުރަން ކާމޭޒުދޮށުގައި ތިއްބެވެ. ދިލްނަޝީން އޭނާގެ ތަށިހިފައިގެން ކާމާޒުދޮށަށް އައުމާއެކު ، އައްވަލްގެ ކާތަކެތި ކޮޓަރިޔަށް ގެންގޮސް ދޭން ޢާފިޔާގާތު ބުނެ އެތަނުން ދާން ތެދުވިއެވެ. ބޭބެގެ ވާހަކައިންނާއި ޢަމަލުން ، ދިލްނަޝީނަށް އަސަރުކޮށް ފެންކަޅި ވިއެވެ. އަދި ، އޭނާކާނީ ފަހުންކަމަށް ބުނެ ، އެތަނުން ، ދިލްނަޝީން ދިޔައެވެ.

" ކައިވެންޏަށް ހޭދަކުރަންޖެހޭ ފައިސާއަށް ލޯނެއްނަގަން ، އައްވަލް މާދަމާ ބޭންކަށް ދާށެވެ. ދެން ، މިގޭގައި އިތުރަށް އެންމެ ދުވަހަކުވެސް އަހަރެންނަކަށް ދިލްނަޝީނެއް ނުބެހެއްޓޭނެއެވެ. ވީ އެންމެ އަވަހަކަށް ، ދިލްނަޝީން މިގެއިން ފޮނުވައިލެވޭނެގޮތެއް ހަދައިދޭށެވެ ! ދިލްނަޝީނު މިގޭގައި ބަހައްޓައިގެން ، އަހަރެންނަކަށް އެންމެ ދުވަހަކުވެސް ކެތެއް ނުކުރެވޭނެއެވެ. " އަނީސާ ، އޭނާގެ ދަރިފުޅު އައްވަލްގާތު ބުންޏެވެ.

އަނީސާ އެބުނި ވާހަކަ ، ދިލްނަޝީނަށް އިވުނެވެ. ލޯނެއް ނަގާކަށް ، އައްވަލް ބޭނުމެއްނޫނެވެ. ލޯނެއް ނުނެގިޔަސް ، ކައިވެނީގެ ޚަރަދުތައް އެނާއަށް ހަމަޖއްސައި ލެވޭނެއެވެ. މާބޮޑު އެއްޗެއް ޚަރަދު ކުރާކަށް ނުޖެހޭނެއެވެ. އެކަމާ ރާފިޢާ ކަންބޮޑުވިއެވެ. ކައިވެނީގެ ކަންކަމުގައި އެމީހުން ކުރާކަމެއްކުރަންވާނީ ، ޙައިދަރުމެންގެ ފެންވަރުގައެވެ. އެ ފެންވަރުގައި ކައިވެންޏެއް ކުރާއިރު  ، ފުދޭވަރެއްގެ ޚަރަދެއް ހިނގާނެއެވެ. ލޯނެއް ނުނަގާ އެކަން ހަމަޖެއްސޭނެކަމަކަށް ރާފިޢާއަކަށް ނުފެނެއެވެ. ޢާފިޔާއަށް ގޮވައިލުމަށްފަހު ، އެއީ ވަރަށް އާދައިގެ ކައިވެންޏެއްގެ ގޮތުގައި ބެލުމަށް އައްވަލް އެދުނެވެ. ޙައިދަރުމެންގެ ފެންވަރުން ، ފަސްތަރީގެ ހޮޓަލެއްގައި އައްވަލްމެންނަކަށް އެކައިވެނީގެ ރަސްމިއްޔާތެއް ނުބޭއްވޭނެއެވެ. އެކައިވެނި ކުރާނީ އަނީސާމެންގެ ފެންވަރުންކަމުގައި ބުނެ  ، އައްވަލް އެބުނާ އެއްޗަކަށް އަނީސާވެސް އެއްބަސް ވިއެވެ. އަނީސާ ބޭނުންވަނީ ، މީހަކާ އިނދެގެން ، ސަލާމަތުން ، އިޙްތިރާމާއެކީ ، ދިލްނަޝީން އޭނާގެ ފިރިމީހާގެ ގެޔަށް ދިއުމެވެ. ވީއެންމެ އަވަހަކަށް ، އެ ޙަމްޒާގެ ޢާއިލާގެ ކިބައިން ދިލްނަޝީން ސަލާމަތް ކުރުމެވެ. އެމީހުންގެ އަބުރު އިތުރަށް ކަތިލެވިގެން ، އަވަށްޓެރިންގެ މެދުގައި އިތުރަށް އެމީހުން ބޭޒާރުވެ ޢާއިލާގެ ނަންހުތުރުވާކަށް ، އަނީސާ ބޭނުމެއްނޫނެވެ.

މަންމަގެ ބަސްމަގު ހުރިގޮތުން ، ހިތަށް އުނދަގޫވެގެން ، ދިލްނަޝީންގޮސް ކޮޓަރިޔަށް ވަތްގޮތަކަށް ނުނިކުމެއެވެ. ހެނދުނު ސަޔެއްވެސް ނުބޮޔެވެ. އެނދުމަތީ ، އޮށޯވެ ރޯން އޮތް އިރު ، އެގެ ފެންނަހިސާބުގައި ، ދުރުގައި ކާރު ހުއްޓާލައިގެން ، ޙަމްޒާ އިންކަން ، ދިލްނަޝީނަށް އެނގޭނީ ކިހިނެއް ހެއްޔެވެ ؟ އެގޭގެ ކިޑިކީދޮރާދިމާލަށް ، ޙަމްޒާއަށް އިރުއިރުކޮޅުން ބަލައިލެވެއެވެ. އެތައް އިރެއްވީއިރުވެސް ، އެއްވެސްމީހެއްގެ ހިލަމެއް ނުވެއެވެ. ދިލްނަޝީން ނޫނަސް ރާފިޢާ ފެނިލިނަމަވެސް ، ޢިޝާރާތް ކޮށްލައިގެން ، އޭނާއަށް ފެންނަހިސާބަށް ދިލްނަޝީން ގެނެވުނީހެވެ. ރާފިޢާއަކީ ، ޙަމްޒާގެ އިޙްސާސްތައް ދެނެގަނެވޭވަރުގެ ގާތް މީހެކެވެ. ރަނގަޅަށްވިއްޔާ ދިލްނަޝީން މިހާރު އޮންނާނީ ، ރާފިޢާގާތު ، އެމީހުންގެ ގުޅުމުގެ ވާހަކަ ކިޔައިދީފައެވެ.

އެތައް އިރެއްކޮށްފައި ، ދިލްނަޝީން ބޭރަށް ނުކުތްއިރު ، ހެދުން އިސްތިރިކުރަން ، ރާފިޢާ ހުއްޓާ ފެނުމުން ، އެމީހުން ތަނަކަށްދަނީތޯ ، ދިލްނަޝީން ސުއާލު ކުރިއެވެ. ރާފިޢާ ބުނިގޮތުގައި ، އެމީހުން އެތައްޔާރުވަނީ ، ޙައިދަރުމެންގެޔަށް ، މެންދުރުގެ ކެއުމަށް ދާށެވެ. ކައިވެނީގެ ހުރިހާކަމެއްގެ އިންތިޒާމާބެހޭގޮތުން ، އެދުވަހު ހުރިހާކަމެއް ނިންމާނެއެވެ.

މިއީ ، ދިލްނަޝީންގެ ކޮލެޖްގެ އެންމެ ފަހު އަހަރެވެ. އެންމެދެރަވެގެން ، އޭނާ އިމްތިޙާނުގައި އިށީންނަންދެން އެކައިވެނި ފަސްކޮށްލެވޭކަށް ނެތްތޯ ދިލްނަޝީން ސުއާލު ކުރިއެވެ. މަންމަޔާ ރާފިޢާ ވާހަކަ ދައްކާލަނިކޮށް ، މަންމަ އެކަމަށް ފަހަރެއްގައި އެއްބަސް ވެދާނެއެވެ. އެކަމަކު ، އައްވަލެއް އެކަމަކަށް އެއްބަހެއް ނުވާނެއެވެ. އެކަމަކުވެސް ، ބޭބެއާ ވާހަކަ ދައްކައިގެން އެކަމަށް ބޭބެ އެއްބަސް ކުރުވުމަށް ، ރާފިޢާގެ ކިބައިން ދިލްނަޝީން އެދުނެވެ. ރާފިޢާވެސް ހުރީ އެކަމާބެހޭގޮތުން އައްވަލާ އެއްވެސް ވާހަކައެއް ދައްކާ ގޮތަކަށްނޫނެވެ. ރާފިޢާއަށްވެސް ފެނުނުގޮތުގައި ، ދިލްނަޝީނަށް އެންމެ ރަނގަޅުވާނީ ، ވިސްނުމާއި ފިކުރު ބަދަލުކޮށްގެން ، ދިލްނަޝީންވެސް އެކަމަށް ، ނަފުސާނީގޮތުންވެސް ތައްޔާރު ވުމެވެ. އެގޭގެ އެންމެންގެވެސް އެދުމަކީ އެއީއެވެ. ރާފިޢާ ކިތަންމެވަރަކަށް އާދޭސްކުރިޔަސް ، އައްވަލެއް އެކަމަކަށް އެއްބަހެއް ނުވާނެއެވެ.

އައްވަލް ވީ އޮފީހަށްގޮހެވެ. އައްވަލް އޮފީހަށް ދިޔައީ ރާފިޢާއާއި މަންމަ ބަލައި ، ގެޔަށް އަންނާނެކަމަށް ބުނެފައެވެ. އެކަމަކު ، މިހާރު މެންދުރުން އަނބުރައިވެސް ލައިފިއެވެ. ޙައިދަރުމެންގެޔަށްދާން ލަސްވެސްވަނީއެވެ. ނަސީބަކުން އިރުކޮޅެއްވީތަނާ އައްވަލްވެސް އައިއްސިއެވެ. ދިލްނަޝީން އެކަނި ގޭގައި ބަހައްޓާފައިދާކަށް އަނީސާ ބޭނުމެއްނޫނެވެ. އެހެންކަމުން އަނީސާ ނިންމީ ، ސާރާމެންގެޔަށް ދިލްނަޝީން ލާފައި ، އެ ތިންމައިން ޙައިދަރުމެންގެޔަށް ދާށެވެ. އޭނާ ގޭގައި ބަހައްޓާފައި ދިއުމަށް ދިލްނަޝީނު އެތައް ވަރަކަށް އާދޭސްކުރުމުން ، އަނީސާ އެކަމަށް އެއްބަސްވިއެވެ. ރާފިޢާވެސް އެކަމަށް ބާރުއަޅައިގެންނެވެ. ބޭރަށް ނުދިއުން ޝަރުތުކޮށް ، ގޭގެ ހުރިހާ ދޮރުތަކެއް ބަންދުކޮށްގެން އިނުމަށް ، ދިލްނަޝީނަށް އަނީސާ އަމުރު ކުރިއެވެ. އަދި ، އެއްވެސްމީހަކު އަޔަސް ދޮރުހުޅުވައިގެން ނުވާނެކަމަށް އެންގިއެވެ. އަނީސާމެން އެނބުރި އަންނަންވީމާ ، ފޯނުކޮށްފައި ބުނާނެއެވެ.

ޙަމްޒާއިނީ ، ތަންކޮޅެއް ދުރުގައި ކާރު ޕާކްކޮށްލައިގެން ، ދިލްނަޝީންމެންގެޔާ ދިމާލަށް ކަޅިޖަހައިނުލާ ބަލަހައްޓައިގެންނެވެ. އައްވަލާއި ރާފިޢާއާ އަދި އަނީސާއާ ތިންމައިން ، ގެއިން ނުކުމެގެން ކާރަށް އަރައިގެން ދިޔަތަން ، ޙަމްޒާއަށް ފެނުނެވެ. އެމީހުން ދިއުމާއެކު ، ކާރުން ފައިބައި ، ފަސްފަހަތްބަލަމުން ، ދިލްނަޝީންމެންގެ ގެޔާދިމާލަށް ، ޙަމްޒާ ހިނގައިގަތެވެ. އަދި އަވަސް އަރުވާލައިފާ ސިޑިން އަރައިގެންގޮސް ، ދިލްނަޝީނަށް ގޮވަމުން ގޭގެދޮރުގައި ތަޅައިގަތެވެ.

އަނީސާމެން ތަންކޮޅަކަށް ދުއްވައިލިތަނާ ، ޢާފިޔާ ކުއްލިޔަކަށް ސިހިފައި ކާރުހުއްޓައިލުމަށް އެދުނެވެ. އަދި ، އެނބުރި ގެޔަށް ދާން ޖެހޭވާހަކަ ބުންޏެވެ. ޢާފިޔާ އެއައީ އެގެޔަށް ގެންދަން ހޯދި މެޓާތައް ހަނދާންނެތި ، ގޭގައި ބަހައްޓާފައެވެ.

ދޮރުގައި ތެޅުން ހުއްޓައިނުލީމަ ، ބޮލަށް އުނދަގޫވެގެން ، ދޮރުނުހުޅުވަން މަންމަބުނި ހަނދާން ދިލްނަޝީންގެ ހިތުންފިލައިގެން ދިޔައެވެ. މަޑުމަޑުން އައިސް ދޮރުހުޅުވައިލިއެވެ. ކުރިމަތީގައި އެހުރީ ، ޙަމްޒާއެވެ. ދިލްނަޝީންހުރީ އަނގައިންވެސް ބުނަން ނޭނގިފައެވެ. ޙަމްޒާ ބުނިގޮތުގައި އޭނާ އެއައީ ، ދިލްނަޝީން ދެކިލަންވެގެންނެވެ. ވާހަކަ ދައްކައިލަން ވެގެންނެވެ. ޙަމްޒާއާ އެއްވެސް ވާހަކައެއް ދައްކަން ބޭނުންނޫންކަމަށް ބުނެ ، ދޮރުލައްޕަން ދިލްނަޝީން މަސައްކަތް ކުރިއެވެ. އެހެންނަމަވެސް ، ޙަމްޒާ ދޮރުގައި ހިފައި ލެއްޕިޔަކަ ނުދިނެވެ. އަދި މަޑުމަޑުން ގޭތެރެޔަށް ވަނެވެ. ޙަމްޒާ އެގެޔަށް އައިތަން މީހަކަށް ފެނިދާނެތީ ދިލްނަޝީންހުރީ ކަންބޮޑުވެފައެވެ. އަދި ، ޙަމްޒާ އެގެއިން ނުކުމެގެން ދިއުމަށް ދިލްނަޝީން އެދެމުން ގެންދިޔައެވެ. ގޭގެ ހުރިހާ މީހުން ގެއިން ނުކުމެގެން ދިޔައީ ޙަމްޒާ ކާރުގައި އިންދާ އޭނާގެ ކުރިމަތިން ލާފައެވެ. އެހެންވީމާ ، އެއްވެސް މީހަކު ، އެވަގުތު އެގެޔަކަށް ނާންނާނެއެވެ.

މެޓާބަލައި ، އަނބުރާ ގެޔަށް އައިސް ، ގެޔަށްވަނީ އައްވަލެވެ. ދިލްނަޝީނަށް ގޮވަމުން ، އައްވަލް ދޮރުގައި ތަޅަމުން ގެންދިޔައެވެ. އޭރު ، ގޭތެރޭގައި ތިބި ، ދިލްނަޝީނާއި ޙަމްޒާއަށް ދުނިޔެ އޮޅިގެންދިޔައެވެ. ދިލްނަޝީންގެ ބޮލަށް އެނބުރުން އެރިއެވެ. ފައިދަށުން ބިންގަނޑު ދެމިގެންދިޔަ ކަހަލައެވެ. ޙަމްޒާ އެގޭތެރޭގައި ހުއްޓާ އައްވަލަށް ފެނިއްޖިއްޔާ އެދެމީހުންގެ ދުވަސް ، އެހިސާބުން އެދިޔައީއެވެ. ( ނުނިމޭ )