( 6 އޯގަސްޓް 2024 ގައި ޝާއިޢުކުރި ބަޔާގުޅޭ )
( ސާރާއާއި ޢާފިޔާއަކީ ދެފަހަރިންނަށް ވެފައި ، ޢާފިޔާގާތަށް އެގެޔަށް ދޭތެރެދޭތެރެއިން އަންނާތީ ، ސާރާދަންނަ އެތައްބަޔަކު އެހިސާބުގައި އުޅޭނެއެވެ. އަވަށްޓެރިއެއްގެ ފަރާތުން އެއިންކަމެއް ސާރާއަށް ނޭނގި އެމީހުން ސަލާމަތްވިއްޔާ ކިތަންމެހާވެސް ރަނގަޅެވެ. )
އައްވަލަށް ނުހުރެވިގެން ، އަނެއްކާވެސް ގޮސް ، ދިލްނަޝީންގެ ކަރުގައި ދެއަތުން ހިފައި ، ދިލްނަޝީނަކީ އެ ޢާއިލާއަށް ކުރިމަތިވި މުޞީބާތެއްކަމަށް ބުނެ ، ހަޅޭއްލަވައިގަތެވެ. ކުއްލިޔަކަށް ޢާފިޔާ ދިލްނަޝީނާ ގާތަށް ޖެހި ، އައްވަލް ކޮއްޕާލައި ، ދިލްނަޝީން ސަލާމަތްކުރިއެވެ. ދިލްނަޝީނަށް ނޭވާލެވުނީ ހަމަކިރިޔާއެވެ. އޭނާގެ މަންމަ ، ދިލްނަޝީން ވިހޭކަމަށްޓަކައި ، އައްވަލް ހިތާމަކުރިއެވެ. އަނީސާގާތަށް ޖެހިލައި ، މިއަންހެންކުއްޖާގެ ފޯނުގައިހުރި މެސެޖްތައް ކިޔަން މަންމަ ލަދުގަންނާނެކަމަށް ބުނެ ، އަނެއްކާވެސް ދިލްނަޝީނާ ދިމާއަށް ފުންމައިގަތެވެ. މިފަހަރު ، އައްވަލާއި ދިލްނަޝީނާ ދެމެދަށް ވަނީ އަނީސާއެވެ. އޭރުވެސް އައްވަލް ހަޅޭއްލަވަމުން ގެންދިޔައެވެ. އޭނާ ދުވަހަކުވެސް ކަމަކާ ލަދުނުގަންނަވަރަށް ، ސިފައިން އޭނާ ލަދުގަންނުވައިލައިފިއެވެ. އޭނާއާ ދިމާލަށް އެމީހުން ހީ މަލާމާތް ކުރިއެވެ. ހުރިތަނުން ވަޅުކޮނެ ބިމަށްވަދެ ފޮރުވިގެންދާނެނަމައޭ އައްވަލްގެ ހިތަށް އެރިއެވެ.
ދިލްނަޝީން ، ރޮމުންރޮމުން އޭނާގެ ބޭބެޔަށް އާދޭސް ކުރަމުން ގެންދިޔައެވެ. ބޭބެމެން ލަދުގަންނަން ޖެހޭނެ އެއްވެސްކަމެއް އޭނާ ނުކުރާކަމުގައި ބުނެ ، މަޢާފަށް އެދި ދެއަތް އުފުލައި ބޭބެއާ ކުރިމަތިލިއެވެ. އައްވަލްގެ އަތުގައި އަނީސާ ހިފިއެވެ. އަދި ގަދަކަމުން އައްވަލް ގެންގޮސް ކޮޓަރިޔަށް ވެއްދިއެވެ. ދިލްނަޝީން ، ޢާފިޢާގެ ގައިގާ ބައްދާލައިގެން އޮވެ ގިސްލަމުން ރޮމުން ގެންދިޔައެވެ.
" ޙަމްޒާއެވެ ! ތިކުރީ ވަރަށް ދެރަކަމެކެވެ. ތިކަން ތިގޮތަށް ކުރާކަށް ނުވާނެއެވެ. އެނގޭހެއްޔެވެ ؟ ބައްޕައާއި މަންމަ ، ދިލްނަޝީންގެ ގެޔަށްގޮސް ، އެމީހުން ލަދުގަންނުވާލައި ، އެއްޗެތި ގޮވިއެވެ. އަހަރެންވެސް އެކަމާހުރީ ލަދުންނެވެ. ސިފައިންގެޔަށް އަންގައިގެން ، ދިލްނަޝީނާއި އައްވަލްބޭބެ ، ސިފައިންގެޔަށް ގެންގޮސް ، ބައްޕަ ، އެމީހުންގެ އަބުރާއި ޢިއްޒަތް ދުއްވާލައިފިއެވެ. އެއީ ، ދިލްނަޝީންމެންނަށް ދެވުނު ވަރަށްބޮޑު ދެރައެކެވެ. " ސާރާ އޭނާގެ ބޭބެއާ ވާހަކަ ދައްކަމުން ގެންދިޔައެވެ.
އެވަގުތު ، ބުޝްރާ އެކޮޓަރިޔަށް ވަނެވެ. އަދި ، ދިލްނަޝީންގެ ގެޔަށް އެމީހުން ދިޔަކަމަށް އެއްބަސްވިއެވެ. ބުޝްރާގެ ވާހަކަތަކުގައިހުރީ ބޮޑާކަމާއި ކިބުރުވެރިކަމެވެ. ބުޝްރާމެން އެގެޔަށް ދިޔައީ ، ދިލްނަޝީންމެންގެ ފެންވަރު ، އެމީހުންނަށް ހަނދާން ކޮށްދޭން ވެގެންނެވެ. އަދި ، އެމީހުންގެ ފިރިހެންދަރި ހޯދަން ވެގެންނެވެ. އެންމެފަހުން ، ޙަމްޒާ އެހޯދުނީ ، އެއަންހެންކުއްޖާއަށް ޙަމްޒާކުރި ފޯނުކޯލެއްގެ ވަޞީލަތުންނެވެ.
" މަންމާއެވެ ! އަހަރެން މިދައްކާ ވާހަކައެއް މަންމަމެންނަކަށް ނުވިސްނެއެވެ. އަހަރެން މިހުރީ ، ދިލްނަޝީންދެކެ އިންތިހާއަށް ލޯބިވެގެންނެވެ. " ޙަމްޒާ އޭނާގެ މަންމައާ ދިމާލަށް ހަޅޭއްލަވައިގަތެވެ.
ޙަމްޒާ ހަމަޖެހިލުމަށް ބުޝްރާ އަމުރުކުރިއެވެ. ޙަމްޒާގެ ބައްޕަ ހުރީ ރުޅިއައިސް ރަތްވެފައެވެ. މީގެފަހުން ، ޙަމްޒާ އެކަހަލަ ކަމެއް ނުކުރާނެކަމަށް ޞާދިޤްގާތު ، ބުޝްރާވަނީ ބުނެފައެވެ. އަދި ، އޭނާގެ ފިރިމީހާއަށް އެކަން ޔަޤީން ކޮށްދީފައެވެ. އެހެންވީމާ ، އެކަމާބެހޭގޮތުން ، ދެން އިތުރު އެއްވެސްކަމެއް ނުކުރުމަށް ޙަމްޒާއަށް ބުޝްރާ އެންގިއެވެ. މަންމަގެ ވާހަކަތަކުން ރުޅިއައިސް ، އެތަނުން ނުކުމެގެންދާށޭ ބުނެ ، ޙަމްޒާ އޭނާގެ މަންމަޔާދިމާލަށް ހަޅޭއްލަވައިގަތެވެ.
ރިދާ ، އޭނާގެ މަންމައާއި ބައްޕަޔަށް ވިސްނައިނުދިނީތީ ، ޙަމްޒާހުރި ، ރިދާދެކެވެސް ރުޅިއައިއްސައެވެ. އެކަމާ ބުނާނީ ކީކޭކަމެއް ރިދާއަކަށްވެސް ނޭނގުނެވެ. އޭނާހުރީ ، ދިލްނަޝީނަށް އެދިމާވި ދެރަޙާލަތާމެދު ކަންބޮޑުވެފައެވެ.
ކޮޓަރިތެރޭ އިރުކޮޅަކު އެނބުރިލުމަށްފަހު ، އައްވަލް އޭނާގެ މަންމަގެ ކޮޓަރިޔަށް ދިޔައެވެ. އަނީސާއިނީ ، ރޯށެވެ. އޭގޭގެ މާޙައުލަކީ އެމީހުންނަށް އެހާ ކަމުދާ މާޙައުލެއްނޫންކަން ، އައްވަލަށް އިޙްސާސް ކުރެވުނެވެ. ގޭތެރެޔަށް ވެރިވެފައި އޮތް ނާމާންކަމާއި ބިރުވެރިކަމަކީ ، މީހަކު މަރުވެގެން އުފެދޭނެފަދަ ހިތާމަވެރި ޙާލަތެކެވެ. އަނީސާއަށްވެސް ކުރެވެނީ ، މީހަކު މަރުވެގެން ، އޭނާގެ ޖަނާޒާ އެގޭގައި ބޭއްވޭކަހަލަ އިޙްސާސެކެވެ. އެއާއެކީ ، އެމީހުންގެ ޢިއްޒަތުއްނަފްސުވެސް ކަފުން ކުރެވިއްޖެއެވެ. ﷲ ގެ އިރާދަފުޅާއި މިންވަރުފުޅުގައި ، ވާންހުރިކަމެއްވިއްޔާ ވާނެއެވެ. ދެންއޮތީ ، ދިލްނަޝީންގެ ކައިވެންޏެވެ. އެކައިވެނި ، ވީ އެންމެ އަވަހަކަށް ކުރުވުމަކީ ، އައްވަލްވެސް އަދި އަނީސާވެސް އެދޭ ގޮތެވެ. އެކަން އަވަސްކޮށްދިނުމަށް ، އަނީސާގެ ކިބައިން އައްވަލް އެދުނެވެ. އެކަމާބެހޭ ނިންމުން ނިންމަން ، އަންނަ އާދީއްތަ ދުވަހު ، އެމީހުން ، ޙައިދަރުގެ ގެޔަށްދާނެއެވެ. އެހެން ނޫނަސް ، ކުލްސޫމުމެންވެސް އެތިބީ އަނީސާމެންނަށްވުރެ ބޮޑަށް ، އެކައިވެނި އަވަސްކުރުމަށް އެދިގެންނެވެ.
ދިލްނަޝީން ކޮލެޖަށް ދިއުމަކީ ، އައްވަލް އެދޭކަމެއް ނޫނެވެ. އެކަން ދިލްނަޝީނަށް މަނާކުރުމަށް މަންމަގާތު ، އައްވަލް އެދުނެވެ. އަނީސާ އެހުރީ ، ދިލްނަޝީން އެގެއިން ބޭރަށް އެންމެ ފިޔަވަޅެއްއަޅަންވެސް ހުއްދަދޭ ގޮތަކަށްނޫނެވެ. އެވެދިޔަކަމެއް ވެގެން އެދިޔައީ އަނީސާއަށް އެއްވެސް ހިލަމެއް ނުވެއެވެ. ދިލްނަޝީންގެ އުޅުމުން ، އެފަދަ އެއްވެސްކަމެއް އަނީސާއަކަށް ފާހަގަ ކުރެވިފައެއް ނުވެއެވެ. އަނީސާމެންނަށްވެސް ، ދިލްނަޝީނަށް މާބޮޑަށް މިނިވަންކަންދީ ، އުޅޭނެ ގޮތަކަށް އުޅެން ދޫކޮށްލެވުނީއެވެ. ދެދުވަހުން އެއްދުވަހު ކަހަލަ ގޮތަކަށް ، އެތައް ބަހަނާއެއް ދައްކައިގެން ރިދާގެ ގެޔަށް ނުގޮހެއް ނުހުރެވެއެވެ. އެކަހަލަ ސަކަރާތެއް ދިލްނަޝީން ޖަހާނެކަމަކަށް ، އަނީސާއަށް ވިސްނައިލެވިފައެއް ނެތެވެ. އަނީސާ މިހާރު ނިންމައިގެން އެހުރީ ، ކޮލެޖަށް ދާން ނުކުމެއްޖިއްޔާ ، ދިލްނަޝީންގެ ދެފައި ބިންދައިލާ ގޮތަށެވެ.
ޙައިދަރު ކުއްލިގޮތަކަށް ގެޔަށް އައިސް ، ސާރާއާއި މަންމަޔަށް ގޮވަމުން ވަނެވެ. ސާރާއާއި ކުލްސޫމްމެން އޭރުތިބީ ، ތައްޔާރުވެގެންނެވެ. ޙައިދަރު އައިސް ގޭތެރެޔަށް ވަނުމާއެކު ، ސާރާ ދުވެފައި ދިޔައެވެ. އަދި ޙައިދަރުގެ އަނގަޔަށް ފޮނިކާއެއްޗެއް ލަވަން މަސައްކަތް ކުރިއެވެ. އެކަން މަނާކޮށް ޙައިދަރު އޭނާގެ މަންމަގާތަށް ޖެހިލިއެވެ. އޭނާއެހާ އަވަހަށް ، ކުއްލިގޮތަކަށް ގެޔަށް އެއައީ ، މަންމަޔަށް ކަމެއް ދިމާވެއްޖެކަމަށް ބުނެ ، އޭނާއަށް އެކަން އެންގުމުންނެވެ. އެކަމަކު މަންމަޔަކަށް އެއްވެސްކަމެއް ނުވެއެވެ. ޙައިދަރު އެއައީ ، ވަރަށް މުހިންމު ، ވިޔަފާރީގެ ބައްދަލުވުމެއްވެސް ކެންސަލް ކޮށްލާފައެވެ.
" ޙައިދަރަށް އަހަރެމެން ދޭންއޮތް މެސެޖަކީވެސް ، އެހާ މުހިންމު މެސެޖެކެވެ. އެވާހަކަ އިހަށް އަޑުއަހައިލަ ބަލާށެވެ. ޙައިދަރުގެ ކައިވެނި ކަށަވަރު ވެއްޖެއެވެ. ދިލްނަޝީނާއި އެ ޢާއިލާއިން އެކައިވެންޏަށް ރުހި އެއްބަސް ވެއްޖެއެވެ. " ސާރާގެ ފިރިމީހާ ، ޢާޞިމް ބުންޏެވެ.
އެގޭގެ އެންމެން އެކަމުގެ އުފަލުގައި މިހާރު އެތިބީ ފޮނިކާ އެއްޗެތި ކައިގެންނެވެ. ޙައިދަރަށް އެކެވެނީ އެންމެ ފަހުންނެވެ. ޙައިދަރަށް ލިބުނު ޙައިރާންކަން ފޮރުވުމަށް މަސައްކަތް ކުރިއެވެ. އެހާ އަވަހަށް ، އެކަން ހަމަޖެހުމުން އޭނާހުރީ އަޖައިބުވެފައެވެ. ނަސީބަކުން ، ކައިވެނިކޮށްދޭ މީހަކާބެހޭ މަޢުލޫމާތެއް މަންމަޔަކަށް ނޭނގެއޭ ބުނެ ، ޢާޞިމް ، ޙާއިދަރާ ސަމާސާ ކޮށްލިއެވެ. މަންމަޔަށް މައުޛޫނަކު އެނގޭނަމަ ، ޙައިދަރު ގެޔަށް އަންނަންވާއިރަށް ، ކައިވެނީގެ ހުރިހާ ރަސްމިއްޔާތެއް އޮންނާނީ ފުރިހަމަ ކޮށްފައެވެ. ޙައިދަރަށް އޮންނާނީ އިށީނދެލާފައި ހަމައެކަނި ، އަނބި ބަލައިގެންފީމޭ ބުނުން އެކަންޏެވެ. ޢާޞިމްގެ ސަމާސާއަށް ޢިޝާރާތްކޮށް ، އޭނާއަށް ލިބިފައިވާ އުފާވެރިކަމުގެ ނާޖާއިޒް ފައިދާ ނުނެގުމަށް ، ކުލްސޫމް އެދުނެވެ. ކުލްސޫމް އިނީ ހިނިއައިސް ، އުފަލުންގޮސް މަލެއްހެން ފޮޅިފައެވެ. ކުލްސޫމަށް ލިބުނު އުފަލުގައި ، ޙައިދަރުގެ އޮފީސް ހުރިހާ މުއައްޒަފުންނަށް ވާވަރަށް ފޮނިކާތަކެތިގަނެ ، އެތަކެތި މިހާރުވަނީ އެ އޮފީހަށް ފޮނުވާފައެވެ.
އާދީއްތަ ދުވަސް އައުންވެސް ކުލްސޫމަށް އޮތީ ލަސްވެފައެވެ. އާދީއްތަ ދުވަހު މެންދުރުގެ ކެއުމުގެ ބަދަލުގައި ، އެންގޭޖްމަންޓްގެ ކަންތައް އެދުވަހު ނިންމުމަށް ، ކުލްސޫމް ބޭނުންވިއެވެ. ސާރާވެސް ބޭނުންވީ އެދުވަހުން އެދުވަހަށް އެކަން ނިންމުމަށެވެ. ދިލްނަޝީނަކީ ، ސާރާއަށްވެސް ވަރަށް ކަމުދާ ކުއްޖެކެވެ.
އަނީސާއާއި އައްވަލާ ދެމައިން ކޮޓަރިތެރޭ ވާހަކަ ދައްކަން ތިއްބާ ، ގޭގެ ރަނގަބީލުގެ އަޑަށް ދެމައިންވެސް ސިހި ، އެއްލިގެން ދިޔައެވެ. އެއީ އަނެއްކާ ކާކުބާވައޭ ، އަނީސާއަށް ބުނެލެވުނެވެ. ދެމައިންވެސް ތިބީ ބިރުގެންފައެވެ. އައްވަލް އެތަނުން ދާކަށް އަނީސާވެސް ދުލެއްނުކުރިއެވެ. އިރުކޮޅަކުން ޢާފިޔާ އައިސް ، ގޭގެ އަވައްޓެރި އަންހެނަކު އެގެޔަށް އައިސްއިން ވާހަކަ ބުންޏެވެ.
އެއީ ކީއްކުރަން އައި މީހެއްތޯ އަނީސާ ސުއާލުކުރިއެވެ. އޭނާ އެއައީ ކީއްކުރަންކަމެއް ޢާފިޢާއަކަށް ނޭނގެއެވެ. އެމީހަކު ބޭނުންވީ އަނީސާއާ ބައްދަލު ކުރާށެވެ. އޭނާ ގޭތެރެޔަށް ވަދެ ، މިހާރު އެއިނީ ސިޓިންގރޫމުގައި އިށީނދެގެންނެވެ. އޭނާ ގޭތެރެޔަށް ނުވައްދައި ފޮނުވައިނުލީ ކީއްވެގެންތޯ އަނީސާ ސުއާލު ކުރިއެވެ. އެހެންގޮތެއް ނެތިގެން ،މޫނާއެކު ދެލޯ ފުހެލައި ހަމަޖެހިލުމަށްފަހު ، އަނީސާ ތިރިޔަށް ދިޔައެވެ.
ޙައިދަރުގެ ޙަޔާތަށް އެއައި ކުއްލި ބަދަލާއެކު ، އޭނާގެ މާޒީގެ ހިތިހަނދާންތައްވެސް އޭނާގެފަހަތުން އައެވެ. އެބިޔަ ގޭގެ ތަނަވަސް ގޯތިތެރޭ ތައްޔާރުކޮށްފައިވާ ފުރިހަމަ ، ފަތާފެންގަނޑުކައިރިންލާފައި ، ޙައިދަރު ހިންގަމުން އައިއިރު ، އޭނާގެ ފަހަތުން އޭނާގެ މާޒީ ދުވަމުން އަންނަ ކަހަލައެވެ.
" ޙައިދަރެވެ ! އަހަރެމެންގެ ގާތް ރަޙުމަތްތެރިކަމުގެ ނާޖާއިޒް ފައިދާ ނުނަގައްޗެވެ. ޙައިދަރަށް ރަނގަޅަށް އެނގޭނެއެވެ. ޙައިދަރުގެ ޖަޒުބާތުތައް އިތުރުކުރާކަށް އަހަރެން އެއްވެސް މަސައްކަތެއް ނުކުރަމެވެ. " އެއީ އޭނާއާ ދިމާލަށް ، މެހެމަލް ބުނެފައިވާ އެންމެ ފަހުގެ ބަސްތަކުން ޖުމްލައެކެވެ.
މެހެމަލްގެ ހަމަހިމޭންކަމާއި ހިނިތުންވުމުގައި ފޮރުވިފައި އޮތް އެއްޗެއްވެސް ، ޙައިދަރުގެ ޖަޒުބާތުތައް ހުއްޓުވައެއް ނުލައެވެ. އެއީ ، ޙައިދަރަށް ކުރެވުނު ކުށްހީއެކެވެ. ހިތުގައި އުފެދުނު ޖަޒުބާތަކުން ، އެހިތް އޭނާއަށް އޮޅުވައިލީއެވެ. އޮޅުމަކުން ނަމަވެސް ، ޙައިދަރަށް އެކުރެވުނު ކަމެއްގެ ދެރަޔާއި ހިތާމަ ، ޙައިދަރަށް ފެންނާނެކަމަށް މެހެމަލް އޮތީ އޭނާގާތު ބުނެފައެވެ. މެހެމަލް އެހެންބުނާ ކޮންމެ ފަހަރަކުވެސް ، އޭނާނޫނީ މެހެމަލް އުފަލުގައި ބެހެއްޓޭނެމީހަކު މިދުނިޔެމަތީ ނުހުންނާނެ ކަމަށް ، ޙައިދަރު އަންނަނީ ބުނަމުންނެވެ. ޙައިދަރު ދޫކޮށްލައިފިނަމަ ، މެހެމަލްގެ ޙަޔާތައްވެސް ، އެއްވެސް އުފާވެރިކަމެއް ނުއަންނާނެކަމަށް ، ޙައިދަރު އޮތީ މެހެމަލްގާތު ބުނެފައެވެ.
މެހެމަލް އެކުރަންއުޅޭ ކައިވެންޏަކީ ، އެފިރިހެނާގެ ހިޔަނިން މެހެމަލްއަށް ފެންނަ ދަޅައެއްކަމަށާއި ، އެ ދަޅައިގާ ނުޖެހުމަށް ، މެހެމަލް އަށް ، ޙައިދަރު އާދޭސްކުރިއެވެ. އޭނާގެ އަތުގައިހުރީ ހަމައެކަނި ފައިސާއެވެ. ލޯބީގެ ކަންފުޅެއްވެސް އޭނާގެފަރާތުން ، މެހެމަލްއަކަށް ނުލިބޭނެއެވެ. މެހެމަލްގެ މައިންބަފައިން ނިޔާވުމަށްފަހު ، މެހެމަލްގެ ބަލަދުވެރިޔާ ، އޭނާގެ ބޮޑުބޭބެ ، އެންމެ ފަހަރަކުވެސް ، މެހެމަލްގެ ޙާލުބަލައިލާފައެއް ނުވެއެވެ. އެވަރުމީހެއްގެ ބަހަށް ހެއްލި ، ގޮތްނޭނގޭ މީހަކާ ކައިވެނި ނުކުރުމަށް ، އެތައްވަރަކަށް ، މެހެމަލްއަށް ޙައިދަރު ނަސޭޙަތް ދިނެވެ. އޭނާއަށް އެފަދަ އަނިޔާއެއް ނުދިނުމަށް އެދި ، ރޮއެރޮއެފައި މެހެމަލްގެ ދެފައިގާ ހިފާ ، ޙައިދަރު ކުރި އާދޭސް ، މެހެމަލްއަށް އެއްވެސް އެއްޗަކަށް ނުވިއެވެ.
މާޒީގެ ޚިޔާލުތަކުން ، ޙައިދަރުގެ ލޮލަށް ޖަމާވަމުންދިޔަ ކަރުނަތައް އޭނާއަކަށް ނުހިފެހެއްޓުނެވެ. ހިތުގައި އެޅި ވޭނާއި ރިހުމުން ، އެކަރުނަތައް އޮހިގެން އެބަދާކަން ، ޙައިދަރަށްވެސް އިޙްސާސް ކުރެވުނެވެ. އެހެނަސް ، އެއީ އެއްދުވަހެކެވެ. މިއަދަކީ އެހެން ދުވަހެކެވެ. މިއަދު ، އޭނާ އެކައިވެނިކުރަނީ ، މަންމަގެ ފުރާނަޔަށްޓަކައެވެ. ހަމަ ، ގޮތް ނޭނގޭ އަންހެންކުއްޖަކާއެވެ. އެއޮޑިޔެއްގެ ވަރު އެނގޭނީ ، އެއޮޑިޔަކަށް އަރައި ދުއްވައިލީމައެވެ. ކޮންމެ ރުކަކީ ، ވަކަރަށްޖަހައި ، ވަކަރުލާކަން ކަށަވަރުކޮށްފައި ކެނޑޭނެ ރުކެއްނޫނެވެ. ދިރިއުޅުމަކީ އިމްތިޙާނެކެވެ. އެއް އިމްތިޙާނަށްފަހު ، އަނެއް އިމްތިޙާނު އަންނާނެއެވެ. ޙައިދަރު ، އޭނާގެ ލޮލުން ފައިބަމުންދިޔަ ކަރުނަތައް ފުހެލިއެވެ. އަމިއްލަޔަށް ހިނިތުންވެލުމަށްފަހު ، އިސް އުފުލައިލައި ، ކުރިޔަށް ހިނގައިގަތެވެ.
ގެޔަށް އައި އަންހެންމީހާއާ އަނީސާ ބައްދަލުކުރިއެވެ. އޭނާއައީ ، އަނީސާގެ ދިފާޢުގައި ވާހަކަ ދައްކާށެވެ. އޭނާގެ ފިރިމީހާއަކީ ސިފައިންގެ އާދައިގެ އޮފިސަރެކެވެ. އައްވަލްމެން ސިފައިންގެޔަށް ގެންދިޔަ ވަގުތު އަނީސާމެންވެސް ، ސިފައިންގެޔަށް ދާން ޖެހޭނެކަމަށް ، އޭނާގެ ފިރިމީހާ ބުނިކަމަށް ، އެއަންހެނާ އަނީސާއަށް ކިޔައިދިނެވެ. މިހާރު ދެން އެކަމާ ވާހަކަ ދެއްކުމުގެ ބޭނުމެއް ނެތެވެ. އެކަން އެއޮތީ ނިމިފައެވެ. އެއީ ސިފައިންނަށްވެސް އޮޅުމަކުން ކުރެވުނު ކަމެކެވެ. އެކަމަށް ސިފައިންވަނީ ، އެމީހުންގެ ކިބައިން މަޢާފަށްވެސް އެދިފައެވެ. ދިލްނަޝީން ސިފައިންގެޔަށް ގެންދިޔައީ ބަޔަކު ވައްކަން ކުރަން އުޅެނިކޮށް ފެނިގެން އެކަން ރިޕޯޓްކުރުމަށްކަމަށް ބުނެ ، އަނީސާ ދޮގެއް ހަދައިލިއެވެ. އެމީހުން އައީ ދިލްނަޝީންގެ ބަޔާން ރިކޯޑް ކުރުމަށެވެ. އެކަމަކު ، ދިލްނަޝީން ބޭނުންވީ ، ބޭބެޔާއެކީ ސިފައިބްގެޔަށްގޮސް ، އެތަނުގައި ބަޔާން ދޭށެވެ. ސިފައިންނާއެކީ ، ދިލްނަޝީނާއި އައްވަލަށް ދާންޖެހުނީ އެހެންވެގެންނެވެ. އަނީސާގެ ދޮގަށް ، އެގެޔަށް އެއައި އަންހެނާ ޝައްކުކުރިނަމަވެސް ، އިތުރު އެއްޗެކޭ ބުނެއެވެ. ޢާފިޔާއަށް ގޮވައިގެން ގެނެސް ، ސައިދީފައި އެއަންހެންމީހާ ފޮނުވައިލަން އަނީސާ މަސައްކަތް ކުރިއެވެ. ( ނުނިމޭ )
ވަރަށްވެސް ރީތި