ސުޢޫދީ ޢަރަބިއްޔާ : ޣައްޒާގެ މައްސަލައިގައި ފެއިލްވީ ކީއްވެ ؟

އިޒްރޭލުން ޣައްޒާ ސުންނާފަތިކޮށް ، ފަލަސްތީނުގެ ނިކަމެތި ރައްޔިތުން ޝަހީދުކޮށް ، އަވަދިކުރަމުން ގެންދާއިރު ، ޢަރަބި ދުނިޔެ އެއޮތީ ހިމޭނުންނެވެ. އިޒްރޭލާ ދިމާލަށް ވަށްކަޅިޔަކުން ބަލައިލާނެ ބަޔަކުވެސް ، އީރާނާއި ، ދެކުނު އެފްރިކާ އަދި ޔަމަނުކަރައިގެ އުތުރުގައި ، ދިރިއުޅޭ ، ބަނޫ ހަމްދާން ޤަބީލާއަށް ނިސްބަތްވާ ޙޫޘީން ނުވަތަ ހޫތީން ނޫން އެހެންބަޔަކު ނެތެވެ. ޤަތަރުފަދަ ޤައުމުތަކުން ، ސިޔާސީގޮތުން މަސައްކަތްތަކެއް ކުރިޔަސް ، އިސްރޭލާ ދެކޮޅަށް ބަހެއްބުނުމުގެ ހިތްވަރެއް ނެތެވެ. ސުޢޫދީ ޢަރަބިއްޔާއަކީ ، ޢަރަބި ދުނިޔޭގައި ނަގާކިޔަމުން އަންނަ ޤައުމެކެވެ. ހަމައެއާއެކު ، ހުޅަނގާދިމާލަށް ދިއުމަށް އެންމެ ބާރަށް ދަތުރުކުރާ ޤައުމުވެސް މެއެވެ. ޣައްޒާގެ މައްސަލައިގާ ، ސުޢޫދީ ޢަރަބިއްޔާ ހަނުއޮތުމަކީ ޢަޖައިބެއްނޫނެވެ. ބައެއް ކަންކަމުގައި އެޤައުމުގެ މިސްރާބު އަމާޒުވެފައި މިހާރު އޮތީ ، ޒަމާނާ އެއްގޮތަށް ދުނިޔެދައްކާ ގޮތްތަކުން ، އިސްލާމީވަންތަކަމަށް އަސަރުކުރިޔަސް ، އެގޮތަކަށް ދީލައިލާން ބޭނުންވާ ފަދަ މިންގަނޑެއްގައެވެ. ދެޙަރަމުގެ އިސްލާމީ ޝަޚުޞިއްޔަތާއި ، އިސްލާމީ އުއްމަތާމެދު ވިސްނާކަށް ، ފުރުސަތެއް ނެތެވެ. އިސްލާމީ އުއްމަތުގެ އެއްބައެއްވަންތަކަން ދެމެހެއްޓުމުގައި އިސްދައުރެއް އަދާކުރުމަށް ، ސުޢޫދީ ޢަރަބިއްޔާގެ މައްޗަށް ވާޖިބުވެފައި އޮންނާނެކަމަށް މުސްލިމުންބަލާ ، ވާޖިބަކީ ، ސުޢޫދީ ރަސްކަމަށް އެއްވެސް އަގެއްހުރި އެއްޗެއްނޫނެވެ. ދުނިޔޭގެ މާއްދިއްޔަތަށް ހެއްލި ދުނިޔެ ހޯދުމަށް މަސައްކަތްކުރާ ޤައުމުތަކުގެ އިސްސަފަށް ސުޢޫދީ ޢަރަބިއްޔާ އެއޮތީ ވަދެފައެވެ. މުސްލިމަކު ، އާޚިރަތުގެ މަތިން ހަނދާންނައްތައިލާ ، ދުނިޔޭގެ އުފަލާއި އަރާމު ހޯދަން މަސައްކަތްކުރާ ބީދަޔަކުންނެވެ.

ސުޢޫދީ ވަލީޢަހުދު ، މުޙައްމަދު ބިން ސަލްމާން ނުވަތަ ހުޅަނގުގެ ބަހުންނަމަ އެމްބީއެސް އަކީ ، ޒަމާނަށް ފެތޭގޮތަށް ، ސުޢޫދީ ޢަރަބިއްޔާ ބަދަލުކުރެއްވުމަށް މަތިހަށިނަންގަވައިގެން މަސައްކަތް ކުރައްވަމުން ގެންދަވާ ބޭފުޅެކެވެ. ހުޅަނގުގެ ދިރިއުޅުމުގެ ވަށްޓަފާޅިއަށް ލޯބިކުރައްވާ  ބޭފުޅެކެވެ. ހަމައެއާއެކު ، ޢަރަބި ދުނިޔޭގައި ބަސްވިކޭ ބޭފުޅެކެވެ. ސުޢޫދީ ޢަރަބިއްޔާގެ ރަސްކަމުގެ ތަޚުތުގައި ސަލްމާން ރަސްގެފާނު އިންނެވި ނަމަވެސް ، ޤައުމު ހިންގަވަނީ ، ރަސްގެފާނުގެ ދަރިކަލުން މުޙައްމަދު ބިން ސަލްމާން ނުވަތަ އެމްބީއެސް އެވެ.

އިޒްރޭލާއި ހަމާޝްއާ ދެމެދު ހިނގަމުންދާ ހަނގުރާމައިގާ ، އެއްޗެއް ވިދާޅުވެ ކަމެއްކުރެއްވޭވަރަށްވުރެ ، އެމްބީއެސް ގެ މަސައްކަތްޕުޅު ގިނައެވެ. ބަދަލުވަމުންދާ ސުޢޫދީގެ ވެރިކަމުގައި އިސްނަންގަވައިގެން އުޅުއްވިނަމަވެސް ، އަމިއްލަފުޅު ޢާއިލާގެ ތެރޭގައި އަދި ، ސުޢޫދީ ޢަރަބިއްޔާގެ ދާޚިލީ ކަންކަމުގައި އެމްބީއެސް ގެ ދައުރު މިހާރުއޮތީ އެހާ ހިތްގައިމު ގޮތަކަށްނޫނެވެ. ގަނޑުވަރުގެ އެތެރެއިންނާއި ރައްޔިތުންގެ ފަރާތުން ، އެމްބީއެސްގެ ޒަޢާމަތަށް ގޮންޖެހުންތައް ކުރިމަތިވަމުން ގޮސް އެކަންކަމާ ކުރިމަތި ލައްވާފައި އެހެންކަމެއް ކުރައްވާނެ ވަގުތެއް އެމްބީއެސް އަކަށް ލިބިވަޑައެއް ނުގަންނަވައެވެ.

އިޒްރޭލާއި ފަލަސްތީނުގެ މައްސަލަ ޞުލްހަވެރި ވިސްނުމަކުން ނިންމޭތޯ ގަލްފުގެ ޤައުމުތަކުން މަސައްކަތްކުރިނަމަވެސް ، އެ އުއްމީދުވެސް މިހާރުވަނީ ފެނަށް ވެފައެވެ. މިވޭތުވެދިޔަ ނުވަމަހެއްހާ ދުވަހުގެ ތެރޭގައި ، އިސްރޭލުން ޣައްޒާގެ ރައްޔިތުން ޝަހީދުކޮށް ، ހޮސްޕިޓަލްތަކާއި ސްކޫލްތައް ހިމެނޭގޮތަށް ، ބިނާތަކާއި ޢިމާރާތްތައް ބިމާހަމަކުރަމުންދާއިރު ، ސުޢޫދީ ޢަރަބިއްޔާއިން ޗުއްޕުވެސް ބުނެފައި ނެތުމަކީ ، ސުޢޫދީ ޢަރަބިއްޔާއަކީ ، މިހާރު އިސްލާމީ އުއްމަތުގެ ބަސް އިއްވުމަށް ނުކުޅެދޭ ޤައުމެއްކަން އަންގައިދޭ ހެއްކެކެވެ.

އިޒްރޭލަކީ ، އިނގިރޭސީންނާއި އެމެރިކާގެ ހަރާންދަރިއެއްކަމަށް ، އަބަދުވެސް އަޅުގަނޑު މިއަންނަނީ ލިޔަމުންނެވެ. މިއަދުގެ ޙާލަތަށްބަލާއިރު ، ހަރާންނަމަވެސް ، ގެންގުޅެބޮޑުކުރާ ބައްޕަ އާއި މަންމަގެ ބަހެއްވެސް އިޒްރޭލަކުން ނާހައެވެ. މޮޔަކުއްތާވެސް ކާންދޭމީހާގެ އަތުގައި ދަތްނާޅާވާހަކަ ބުނާއަޑު އިވެއެވެ. އިޒްރޭލަކަށް އެވަރުވެސް ނުވެއެވެ. އެވަރުގެ ބަޔަކު ، ސުޢޫދީ ޢަރަބިއްޔާވެސް ހިމެނޭގޮތަށް ، ގަލްފުގެ ޤައުމުތަކުން ބުނާއެއްޗެއްގެ އަޑު އަހާނެކަމަށް ބެލުމަކީ މޮޔަކަމެކެވެ. އެހެންނޫނަސް އެއީ ، ހުޅަނގާއި އިޒްރޭލުން އެމީހުންބުނާ ބަހެއްގެ އަޑު އަހާވަރުގެ އުރުއްޕަތެއް އޮތް ބައެއްނޫނެވެ.

ފަލަސްތީނުގެ މައްސަލަ ޙައްލުކުރުމަށް ، ސުޢޫދީ ޢަރަބިއްޔާއިން ކުރަމުންގެންދިޔަ މަސައްކަތް މިހާރު އެވަނީ ނާކާމިޔާބު ވެފައެވެ. އެކުވެރި ޢަރަބި ޢިމާރާތް ، ނުވަތަ ޔޫއޭއީ އާއި ޤަތަރުން ކޮށްލިވަރުވެސް ސުޢޫދީ ޢަރަބިއްޔާއަކަށް ނުވިއެވެ. ހަމާސް އާއި އިޒްރޭލާ ދެމެދު ، ވާހަކަ ދެއްކޭނެ ރަސްމީ މަގެއް ހޯދޭތޯ ، އެދެޤައުމުން މަސައްކަތް ކުރަމުން ގެންދިޔައިރު ، ސުޢޫދީ ވަލީޢަހުދު އެމްބީއެސް ހުންނެވީ ، ހަތަރު އަނގޮޅިއެއްގައެވެ. ދާނެ ދިމާލެއް ނޭނގި ކުޅިބަލާށެވެ. އެމްބީއެސްއަށް ބޮޑަށް އިސްކަންދެވުނީ ، ސުޢޫދީގެ އަމިއްލަ މަޞްލަޙަތަށެވެ. އެމެރިކާއާ އެކުއޮތް ގުޅުމަށް ހީނަރުކަން އަތުވެދާނެތީ ، ދާނެކޮޅެއް އިޚްތިޔާރެއް ނުކުރެއްވުނެވެ. ސުޢޫދީގެ ސަލާމަތާއި ރައްކާތެރިކަންވެސް އޮތީ އެމެރިކާގެ ބާރުގެ ދަށުގައެވެ. އެކަން ޤުރުބާންކޮށްފައި ފަލަސްތީނުގެ ނިކަމެތި ރައްޔިތުންނާމެދު ވިސްނައިލުމަކީ ، އެމްބީއެސް އަށް ކުރެއްވެން އޮތްކަމެއްނޫނެވެ.  ފަލަސްތީނަށް ވާނެއެއްޗެއްވާން ދޫކޮށްލާފައި ، އިޒްރޭލާއެކު އޮތް ޢާންމުގުޅުން ދެމެހެއްޓުމަކީ ، އެމްބީއެސް އަށް މާމުހިންމު ކަމެކެވެ. އެމެރިކާ އުފާކުރުވޭނީވެސް އެގޮތަށް ޢަމަލުކޮށްގެންނެވެ.

ސުޢޫދީ ޢަރަބިއްޔާގައި " އަޔަން ޑޯމް " ހަރުކުރުމަކީ ، އިޒްރޭލާއެކު ޢާންމުގުޅުމެއް އުފެއްދުން ޝަރުތުކޮށް ، އެމެރިކާއިން ކޮށްދޭން ވަޢުދުވެފައި އޮތް ކަމެކެވެ. " އަޔަން ޑޯމް " އަކީ ، ބޭރުން އަންނަ ކުރުރާސްތާގެ ރޮކެޓާއި މިސައިލް ހުއްޓުވާ ، އެތަކެއްޗަށް ޙަމަލާދީ ނައްތައިލާ ނިޒާމެކެވެ. އިޒްރޭލުގައިވަނީ ، މިނިޒާމް ޤާއިމް ކޮށްފައެވެ. ސުޢޫދީ ޢަރަބިއްޔާވެސް އޮތީ މިނިޒާމަށް ބޭނުންވެގެން ، އެކަން ކޮށްދިނުމަށް އެމެރިކާގެ ކިބައިން އެދިފައެވެ. ސުޢޫދީ ޢަރަބިއްޔާގައި އެނިޒާމް ޤާއިމްކޮށްދޭން އެމެރިކާއިން އެއްބަސްވެފައި އޮތީ ، ސުޢޫދީން އިޒްރޭލާއެކު ޢާންމުގުޅުން އުފައްދައި ރަޙުމަތްތެރިކަން ދެމެހެއްޓުން ޝަރުތު ކޮށްފައެވެ. އެހެންކަމުން ، އެކަމުން މާނަކޮށްދެނީ ، ފަލަސްތީނަށް ވާނެގޮތެއް ވާންވީއެވެ. ސުޢޫދީން އޭގެތެރެޔަކަށް ނުވަންނާނެއެވެ.

ސުޢޫދީ ޢަރަބިއްޔާ މިހާރު އެއޮތީ ، އިޒްރޭލާއެކު ރައްޓެހިކަން ބާއްވާވާހަކަ ދައްކައިލާންވެސް ލަދުގަންނަ ފައްތަރެއްގައެވެ. ފަލަސްތީނުގެ މައްސަލަޔަށް ދާއިމީ ޙައްލެއް ހޯދުމަށް ، ނުވަތަ މިހާރު ހިނގަމުންދާ ހަނގުރާމަ ހުއްޓައިލާ ، ފަލަސްތީނު ރައްޔިތުންގެ ޙައްޤުތައް ކަށަވަރުކުރުމަށް ވެވޭ ޞުލްޙައިގެ އެއްބަސްވުމަކަށް މަގުފަހިވާނެކަމެއް ކުރާކަށް ސުޢޫދީއަކަށް މިހާރަކު ނުކެރޭނެއެވެ. އެއީ ، ޢަޖައިބުވާންވީ ކަމެއްނޫނެވެ. ބައިނަލްއަޤްވާމީ މަޝްރަޙުގައި ނުވަތަ ޢަރަބި ދުނިޔޭގައި ، އިސްބަހެއްކިޔައި ، އިސްނަގައިގެން ، އިސް ދައުރެއް އަދާކުރެވޭވަރަށްވުރެ ، އެމްބީއެސް އަށް އަމިއްލަ ޤައުމުގައި ކުރިމަތިވަމުންދާ ގޮންޖެހުންތައް މާ މުހިންމުވެފައި ގިނައެވެ.

އިޒްރޭލުން ފަލަސްތީނަށް ޙަމަލާތައް ދޭން ފެއްޓީ 7 އޮކްޓޯބަރ 2023 ގައެވެ. އޭގެ އެއްހަފުތާކުރިން ، އެމެރިކާގެ ފޮކްސް ނިއުސްއަށް ، އެމްބީއެސް ބަސްދީގަތުމެއް ދެއްވިއެވެ. އިޒްރޭލާއެކު އާދައިގެ ގުޅުމެއް އުފެއްދުމުގެ ކަންކަން އޭރު ނިމިފައިވާކަން ، އެ ބަސްދީގަތުމުގައި ، ސުޢޫދީ ވަލީޢަހުދު ، މުޙައްމަދު ބިން ސަލްމާންވަނީ ކަށަވަރުކޮށްދެއްވާފައެވެ. އޭގެ ނުވަމަސްފަހުން ، ސުޢޫދީގައި ނެގުނު އެންމެ ޕޯލެއްގައިވެސް ، އިޒްރޭލާއެކު އާދައިގެ ގުޅުމެއް އުފައްދަން ދެކޮޅުހަދާކަމަށް ، 96 އިންސައްތަ ، ސުޢޫދީ ރައްޔިތުން ބުނެފައި ވެއެވެ. އެހިސާބުން ، ސުޢޫދީގެ ޚަބަރުފަތުރާ ރަސްމީ އިދާރާގެ މަސައްކަތަކަށްވީ ، އިޒްރޭލާއެކު ސުޢޫދީން އާދައިގެ ގުޅުމެއް އުފައްދަން އެހާ އަވަހަށް ނޫޅޭކަމުގެ ޚަބަރުތައް ޢާންމުކުރަން ފެއްޓުމެވެ. އެއީ ހަދައިގެން ދައްކާ ވާހަކައެއްކަމުގައި ބުނެ އޮޅުވައިލުމުގެ މަސައްކަތް ، އެއިދާރާއިން ކުރިޔަށް ގެންދިޔައެވެ.

ހަމައެއާއެކު ، 1967 ގެ ސަރަޙައްދީ ރޮނގާހަމަޔަށް އިޒްރޭލުން ފަހަތަށްގޮސް ، ފަލަސްތީނުގެ މިނިވަން ދައުލަތެއް ޤާއިމް ކުރެވި ، އެ ދައުލަތުގެ ވެރިރަށަކީ އިރުމަތީ ޤުދްސްކަމުގައި ނުނިންމާހާ ހިނދެއްގައި ، އަދި އިޒްރޭލުން ޣައްޒާއަށް ދެމުންގެންދާ ޙަމަލާތައް ހުއްޓައިލާ ، ޣައްޒާގައި ހިފާފައިވާ ބިންތަކުގައި ތިބި އިޒްރޭލް ސިފައިން އެއްކޮށް ނުފައިބަނިސް ، އިޒްރޭލާއެކު ޚާރިޖީ އެއްވެސް ގުޅުމެއް ނުއުފައްދާނެކަން ، ސުޢޫދީންވަނީ ދާދިމިދާކަށްދުވަހު ، އެމެރިކާއަށް އަންގާފައެވެ.

ސުޢޫދީ ޢަރަބިއްޔާއިން ، މިކަން އެމެރިކާއަށް އަންގައި ދެފުށްދެގޮތް މަޢުލޫމާތު ފެތުރިނަމަވެސް ، ސުޢޫދީގެ އަމިއްލަ މަޞްލަޙަތު ދޫކޮށް ، ފަލަސްތީނުގެ ޙައްޤުގައި ކަމެއް ކުރުމުގެ ވިސްނުމެއް ، ނުގެންގުޅޭނެއެވެ. އެއީ ގިނަބަޔަކަށް މިހާރުވެސް އެނގޭ ޙަޤީޤަތެކެވެ.

އަނެއްކޮޅުން ، ފަލަސްތީނަށް އިންސާނީ އެހީ ފޯރުކޮށްދިނުމަށްޓަކައި ފައިސާ އެއްކުރުމަށް ، ސުޢޫދީން ކުރިމަސައްކަތަކީވެސް ، ސިޔާސީގޮތުން ފެއިލްވިކަމެއްގެ ގޮތުގައި މިހާރުދަނީ ފަޅާއަރަމުންނެވެ. ފަލަސްތީނުގެ ޙާލުގައިޖެހިފައިވާ ރައްޔިތުންނަށް އެހީވުމަށް ފައިސާހޯދުމަށް ސުޢޫދީގައި ހިންގި ޙަރަކާތުން ، 1.8 މިލިއަން ފަރާތަކުން އެހީލިބިގެން 180 މިލިއަން އެމެރިކާ ޑޮލަރު ހޯދުނުކަމަށް ، ބުނެ ޢާންމުކޮށްފައިވާއިރު ، ފައިސާދިން ފަރާތްތަކުގެ ނަން ހާމަކުރާކަށް ލަދެއް ނުގަތެވެ. އޭގެތެރޭގައި ، ސުޢޫދީގެ ޢާންމު ބައެއް ވިޔަފާރިވެރިންނާއި ، ސަރުކާރުގެ ތެޔޮކުންފުނި އަރަމްކޯގެ ނަން ހިމަނާފައި ވެއެވެ. ކަދުރާއި ބޭހުގެ ބާވަތްތަކާއި ، ކާތަކެތީގެ ބާސްކެޓްތަކުގެ ތަފްޞީލްވެސް އެޙަރަކާތުގެ ވެބްސައިޓްގައި ހާމަކޮށްފައި އޮތެވެ. ފަލަސްތީނަށް ދިން އެހީއަކީވެސް ، ރަސްގެފާނުގެ ދީލަތިއެހީގެ ދަށުން ، ސިޔާސީ ކުރެވިގެން އައި އެއްޗެއްގެ ސިފައޮތީ ވަރަށް ސާފުކޮށް ފެންނާށެވެ. ވިޔަފާރި މުޖުތަމަޢާއި ހެއޮއެދޭ ޚައިރާތްތެރިންގެ ޙިއްޞާއެއް އެއަކުން ފެންނާކަށް ނެތެވެ.

ފަލަސްތީނުގެ ރައްޔިތުންނަށް އިންސާނީ އެހީއަކީ މިވަގުތަށް ވަރަށް މުހިންމު އެއްޗެކެވެ. އެހެނަސް ، ސުޢޫދީ ޢަރަބިއްޔާފަދަ ޤައުމަކުން ، ދިއްކޮށްލާ ކާއެއްޗަކަށްވުރެ ، މުހިންމު ދައުރެއް އަދާކުރެވެން އޮއްވައި ، އެކަމަށް ނުވިސްނައި ހަމައެކަނި އިންސާނީ އެހީތެރިކަން ފޯރުކޮށްދިނުން އެއީ ، ފެއިލްވެފައިވާ ސިޔާސަތެއްގެ އެއްސިފައެވެ. އަސްލު މައްސަލަޔަކީ ، އިސްލާމީ އުއްމަތަށް ކުރިމަތިވެފައިވާ ވަރަށް ނާޒުކު މައްސަލައެކެވެ. އިޒްރޭލުން މިހާރުވަނީ ، ފަލަސްތީނުގެ 35 ހާސް ރައްޔިތުން ޝަހީދުކޮށްލާފައެވެ. ދެމިލިއަން މީހުންގެ ގެދޮރު ސުންނާފަތި ކޮށްލާފައެވެ. ރަނގަޅަށް މަސައްކަތްކުރާ އެންމެ ހޮސްޕިޓަލެއްވެސް އަދި އެންމެ ސްކޫލެއްވެސް އަދި މިސްކިތެއްވެސް ނެތެވެ. އެހުރިހާ ބިނާތަކެއްވަނީ ބިމާ ހަމަކޮށް ، ސުންނާފަތި ކޮށްލާފައެވެ. ޣައްޒާގައި ޙާލުގައި ޖެހިފައިވާ އެތައް މިލިއަންބަޔަކަށް އެހީވުމަށް ތަކެތި ފޮނުވައިގެން ، އިޝްތިހާރުވުމަށް ޢަރަބި ޤައުމުތަކުން ކުރާ މަސައްކަތް ފިޔަވައި ، އެ މައްސަލަޔަށް ދާއިމީ ޙައްލެއް ހޯދުމަށް އެއްވެސް ޤައުމަކުން ވިސްނުމެއް ނުގެންގުޅެއެވެ. އަނެއްބައި ޤައުމުތަކުން ، މި ހަނގުރާމައިގެ ނާޖާއިޒް ފައިދާނަގައި ، އަމިއްލަ މަޞްލަޙަތަށް އިސްކަންދެމުން ގެންދެއެވެ. އޭގެތެރޭގައި ، ސުޢޫދީ ޢަރަބިއްޔާގެ ނަން ލިސްޓްގެ ކުރީގައި ނުލިޔެވިއެއް ނުދާނެއެވެ.

ފަލަސްތީނުގެ ރައްޔިތުންނަކީ ، އަބުރުވެރި އިންސާނުންކަމަށް ބަލައިގެން ، އެބައިމީހުންގެ އިންސާނީ ޙައްޤުތައް ކަށަވަރުކުރުމަށް ، މަސްއޫލުވާން އެންމެ ވާޖިބު ޤައުމަކީ ސުޢޫދީ ޢަރަބިއްޔާއެވެ. ފަލަސްތީނުގެ ރައްޔިތުންގެ ޙައްޤުތައް ކަށަވަރު ކުރެވޭ ޙާލަތެއްގައި ، އެދުވަހަކުން އެކަމުގެ ފަޚުރާއި ޝަރަފް ރައްދުވާ އެއްޤައުމަކަށްވާނީ ސުޢޫދީ ޢަރަބިއްޔާއެވެ. މިހާތަނަށްވެސް ، އިސްލާމީ އުއްމަތަށް ދިމާވާ ބޮޑެތި ކާރިސާތަކުގައި އިސްވެ ބަސްކިޔައި ޢަމަލީ ފިޔަވަޅަށް ތައްޔާރުވެ ، އެންމެ ގިނައިން އިސްނަގަނީ ސުޢޫދީ ޢަރަބިއްޔާއިންނެވެ. ރައްޔިތުންގެ ވިސްނުމާއި ފިކުރުން އެނގި ސާފުވާފޮތުގައި ، ސުޢޫދީ ޢަރަބިއްޔާގެ ޤައުމީ މަޞްލަޙަތު މިހާރުވެސް ގުޅިފައިއޮތީ ، ފަލަސްތީނުގެ މުސްލިމް ރައްޔިތުންގެ ޙައްޤުތައް ކަށަވަރު ކުރުމާއެވެ. އިޒްރޭލާއެކީ ، ޚާރިޖީ ގުޅުންތައް އުފައްދައިގެން އެމެރިކާ ރުއްސައިގެންނެއްނޫނެވެ. އިސްމާލީ އުއްމަތުން ސުޢޫދީ ޢަރަބިއްޔާ ހޯދާފައިވާ ފަޚުރުވެރި މަޤާމަކީ ، ހުޅަނގަށް ހިތްކިޔާ ދިރިއުޅުމަކަށް ޤައުމުބަދަލުކޮށް ، ޤުރުބާންކުރާ ވަރަށްވުރެ މުހިންމު މަޤާމެކެވެ. އެހެނަސް ، އެމްބީއެސްގެ ވިސްނުމާއި ފިކުރުހުރީ އެދިމާލަކަށް ނޫނެވެ.

މިއަދުގެ ޙާލަތު

އިޒްރޭލުން ޣައްޒާގައި ހިންގަމުންގެންދާ އިންސާނިއްޔަތާ ޚިލާފު ހަނގުރާމައިގެ މިއަދުގެ ޙާލަތަށް ބަލާއިރު ، ލުބްނާނުގައި މަރުކަޒުވެގެންތިބޭ ޙިޒްބުﷲ ޖަމާޢަތުން ، މިއަދު ( 8 އޯގަސްޓް 2024 ) ބުނިގޮތުގައި ، އެޖަމާޢަތުން ، މިދިޔަ ހޯމަދުވަހު ، އިޒްރޭލުގެ އުތުރު ސަރަޙައްދަށް ޑްރޯން ޙަމަލާއެއްވަނީ ފޮނުވައިލާފައެވެ. އެ ޙަމަލާގައި އިޒްރޭލް ސިފައިންގެ ދެމީހަކު ޒަޚަމްވިކަމަށް އިސްރޭލުގެ އަސްކަރިއްޔާއިންވެސް ހާމަކޮށްފައި ވެއެވެ. ޙިޒްބުﷲ ގެ މި ޙަމަލާ ފޮނުވައިލާފައިވަނީ ، ޙިޒްބުﷲ ގެ އިސް ކޮމާންޑަރެއްކަމުގައިވާ ފުއާދު ޝުކުރާއި ، ހަމާސްގެ އިސްލީޑަރަކު ، އިސްމާޢީލް ހަނިއްޔާ ، އިޒްރޭލުން މިދިޔަ ހަފުތާގައި އަވަހާރަކޮށްލާފައި ވަނިކޮށެވެ. މި ދެޖަމާޢަތުގެ އިސް ދެލީޑަރުން އަވަހާރަކޮށްލުމާގުޅިގެން ، ބަދަލުހިފުމުގެ ހަނގުރާމައެއްގެ ނިޝާންތައް އެސަރަޙައްދުގައި ވަނީ ޢާންމު ވެފައެވެ. ޙިޒްބުﷲ އިން އިޒްރޭލަށް މިދިން ޑްރޯން ޙަމަލާއަކީ ، އީރާނާއި އީރާނާގުޅިފައިވާ ޖަމާޢަތްތަކުން އެންމެ ހިތްހަމަޖެހޭވަރަށް ދެވުނު ވަރުގަދަ ޙަމަލާއެއް ނޫނެވެ. އީރާނުންވެސް ދެކޭގޮތުގައި ، އިޒްރޭލަށް ދޭންޖެހޭނީ އެއަށްވުރެ ގެއްލުންބޮޑު ، ވަރުގަދަ ޙަމަލާއެކެވެ.

އީރާނުގެ ދީނީ ބައެއް ޒަޢީމުން ގެންދަވަނީ ، ދުނިޔޭގެ ޗާޓުން އިޒްރޭލް ފުހެލާނެކަމުގެ އިންޒާރު ދެއްވަމުންނެވެ. އިޒްރޭލުންވެސް ގެންދަނީ ، އީރާނުން އަތުވެދާނެ ޙަމަލާއަކަށް ތައްޔާރު ވަމުންނެވެ. އެމެރިކާއިންވަނީ ، އިޒްރޭލަށް އެހީވުމަށްޓަކައި  ހަނގުރާމަމަތީ އިތުރު މަތިންދާ ބޯޓެއް އެ ސަރަޙައްދަށް ފޮނުވާފައެވެ. ހަނގުރާމައިގާ ބޭނުންކުރާ ބަރުހަތިޔާރު ، ރަޝިޔާއިން އީރާނަށް ފޮނުވަން ތައްޔާރުވަމުން އެބަގެންދެއެވެ. އީރާނުގެ ޚާރިޖީވަޒީރު ، ސުޢޫދީ ޢަރަބިއްޔާއަށް ވަޑައިގެން ، ސަރަޙައްދީ މައްސަލަތަކާބެހޭގޮތުން ،  މަޝްވަރާތައް ކުރައްވަމުން އެބަގެންދަވައެވެ. ހަމާސް އާއި ޙިޒްބުﷲ އާ ދެޖަމާޢަތުންވެސް ، މިހާރު ގެންދަނީ ހަނގުރާމައެއް ކުރަންޖެހިއްޖެ ޙާލަތެއްގައި ، އެކަން ކުރުމަށް ވާންޖެހޭ ތައްޔާރީތައް ވަމުންނެވެ. އީރާނާއި އުރުދުން އަދި ލުބުނާނުންވަނީ ، އެޤައުމުތަކުގެ ވައިގެ ސަރަޙައްދު ބަންދުކޮށްފައެވެ. ހުއްދަ ނުހޯދައި އެސަރަޙައްދަށް ވަންނަ ކޮންމެ އުޅަނދަކަށް އެ ޤައުމުތަކުން ޙަމަލާދޭނެއެވެ.