އިންޤިލާބީ ޢާލަމް

އިންޤިލާބީ ޢާލަމް ނުވަތަ ވާޗުއަލް ވޯލްޑަކީ ، ކުރިއަރާފައިވާ ޓެކްނޮލޮޖީގެ ވަޞީލަތްތައް ބޭނުންކޮށްގެން އުފެއްދުމަށް އަމާޒު ހިފައި ، އަލަށް ތަޢާރުފްކުރާ ވާޗުއަލް ނޭޝަންސް ނުވަތަ އިންޤިލާބީ ޤައުމުތަކަށް ނިސްބަތްވާ ދުނިޔެއެކެވެ. އެއީ ވާޗުއަލް ނުވަތަ ސިންތެޓިކް  ނުވަތަ މަސްނޫއީ ނުވަތަ ޤުދުރަތީ ވަސީލަތް ފިޔަވައި ، އިންސާނާ އަމިއްލަޔަށް އުފައްދައި ، ދިރިއުޅުން ބިނާކުރުމަށް ތައްޔާރުވާ ދުނިޔެއެކެވެ. ސިންތެޓިކް އެއްޗެއްގެ މިސާލަކަށް ބަލާއިރު ، ފުޓްބޯޅަ ކުޅޭ ބައެއް ދަނޑުދަނޑުގައި ސިންތެޓިކް ގްރާސް އަޅާފައި ހުރެއެވެ. ޤުދުރަތީ އެއްޗެއްގެ ބަދަލުގައި ، އިންސާނާ އަމިއްލަޔަށް އުފައްދާ އެއްޗެއްގެ ގޮތުގައެވެ. އެހެންކަމުން ، އިންސާނާ މިހާރު ، މަސައްކަތްކުރަމުން އެގެންދަނީ ، ޤުދްރަތީގޮތުން އުފެދިފައިވާ ޤައުމުތަކާއި ، ޤުދްރަތީ އެ ނިޒާމުން ބޭރުވެ ، އަމިއްލަ ވާޗުއަލް ޤައުމާއި ، އެޤައުމުތަކުގެ ރައްޔިތުންނަށް ވެގެން ދުނިޔޭގައި ދިރިއުޅުމުގެ އިންޤިލާބީ ބަދަލާ ދިމާލަށެވެ.

ޢާލަމީއަކީ ، ކޯވިޑްގެ ތެރޭގައި 2020 ވަނަ އަހަރު އަޑުއިވެން ފެށި ބަހެކެވެ. މިބަހަކީ ، ދިވެހިރަދީފުގައި ހިމެނިފައިވާ ބަހެއްނޫނެވެ. އެހެނަސް ، ކޯވިޑްގެ ބަލިމަޑުކަމަށް ނިސްބަތްކޮށް ،  ކޯވިޑްގެ " ޢާލަމީ ވަބާ " ބޭނުން  ކުރެވެމުން ދިޔައެވެ އަދި ، މިހާރުވެސް ބޭނުންކުރެވެމުން ދެއެވެ. ޢާލަމީ ، މިބަސް އުފެދިގެންދިޔައީ ، " މުޅި ދުނިޔެ " އަށް . ނިސްބަތްކުރެވޭ މާނައެއްގައެވެ. ޢާލަމީ ވަބާ މާނަކުރެވިގެން ދިޔައީ ، " މުޅިދުނިޔެ " އަށް ނިސްބަތްކޮށް ، ދުނިޔެއަށް ކުރިމަތިވި ވަބާއެއްގެ ގޮތުގައެވެ.

ދިވެހިބަހުގައި ޢާލަމް އެއީ ، " ދުނިޔެ " މާނަކޮށްދޭ ބަހެކެވެ. އެއްމާނަޔަކީ ، އެއީ ، ހައްދަވާފައިވާހާ އެއްޗެއް ކަމުގެ މާނައެވެ. އަނެއް މާނަޔަކީ ، ދުނިޔެއެވެ. ދީނީ ނަޒަރަކުން ވިސްނާއިރު ، ﷲ ސުބްޙާނަހޫ ވަތަޢާލާ ވަނީ ، އެތައް ޢާލަމްތަކެއް ، ނުވަތަ އިންސާނާ ދިރިއުޅެމުން މިގެންދާ ދުނިޔެ ފިޔަވައި ، އެތައް ދުނިޔެތަކެއް ހައްދަވާފައެވެ. އޭގެ ތެރެއިން ، އިންސާނާ ދިރިމިއުޅޭ ދުނިޔެއަކީ ، އެއްދުނިޔެއެވެ. މިދުނިޔެ ދޫކޮށް ދެންދާނީ ޢާޚިރަތަށެވެ. އެއީ އަނެއް ދުނިޔެއެވެ. ދެދުނިޔޭގެ ސަވާބާއި ދަރުމަ މިންވަރުކޮށްދެއްވުން އެދި ، ﷲ ސުބްޙާނަހޫ ވަތަޢާލާގެ ކަށަކުޅަދުންވަންތަ މަތިވެރި ޙަޟުރަތަށް ، އިންސާނާ ދުޢާ ދަންނަވާ ސަބަބަކީ އެއީއެވެ. އެއީ އިންސާނާއަށް ޚާއްޞަކުރެވިގެންވާ ދެދުނިޔެއެކެވެ. އޭގެ އިތުރު ދުނިޔެތަކެއްވެސް ، ﷲ ސުބްޙާނަހޫ ވަތަޢާލާވަނީ ހައްދަވާފައެވެ. މިސާލަކަށް ، މަލަކޫތީ ޢާލަމަކީ ، މަލާއިކަތްބޭކަލުންގެ ދުނިޔެއެވެ. ﷲ ސުބްޙާާނަހޫ ވަތަޢާލާ އުފައްދަވާފައިވާ އެއްވެސް އެއްޗަކާ އެއްފަދަ އެހެން އެއްޗެއް އުފެއްދުމުގެ ކުޅަދާނަކަމެއް އިންސާނުންނަކަށް ލިބިގެންނެއް ނުވެއެވެ. އިންސާނުންނަށް އުފެއްދޭނީ ، އެކަލާނގެ މިންވަރުކުރައްވައި ، އިންސާނުންނަށް ދެއްވާފައިވާ ޢިލްމާއި ޙިލްމުން އުފެއްދެންހުރި އެއްޗެކެވެ. އެވެސް ، އެކަލާނގެ މިންވަރު ކުރައްވައި އިރާދަކުރައްވާ ގޮތެއްގެ މަތިންނެވެ.  ހުވަފެނީ ދުނިޔެއަކީ އަދި އެހެން ޢާލަމެކެވެ. އެއީ ނިދާފައި އޮއްވާ ފެންނަ ޚިޔާލީ ދުނިޔެއެކެވެ.

މި ލިޔުމުގައި އަލިއަޅުވައިލެވޭތޯ ބަލާނީ ، އެތައް ބައްރެއްގެ ، އެތައް ޖަމާޢަތަކަށް ނިސްބަތްވާ ، އެތައް ޤައުމެއް ހިމެނޭ މި ދުނިޔެ ފިޔަވައި ، ހަމަ މިދުނިޔޭގައި ޤާއިމްކުރުމަށް ، އިންސާނާ މަސައްކަތް ކުރަމުން ގެންދާ ، ( ނުއުފަން އަދި ނުފެންނަ ) އިންޤިލާބީ ޢާލަމް ، ނުވަތަ ވާޗުއަލް ވޯލްޑް ، އަދި ( ނުއުފަން އަދި ނުފެންނަ ) އިންޤިލާބީ ޤައުމު ، ނުވަތަ ވާޗުއަލް ނޭޝަން ، އަދި ( ނުއުފަން އަދި ނުފެންނަ ) އިންޤިލާބީ ރައްޔިތުކަން ، ނުވަތަ ވާޗުއަލް ސިޓިޒެންޝިޕް ގެ މައްޗަށެވެ.

ވާޗުއަލް ވޯލްޑް އާއި ވާޗުއަލް ކޮމިޔުނިޓީތައް ، މިހާރުވެސް  މިދުނިޔޭގައި ޤާއިމްކުރެވި ޙަރަކާތްތެރިވަމުން އެބަދެއެވެ. ވާޗުއަލް ގޭމްސް އާއި މުނިފޫހި ފިލުވުން ، އާކިޓެކްޗަރ ، މެޑިސިން އަދި މިލިޓަރީ ތަމްރީންތައް ، އޮންލައިން ކްލާސްތައް ، ވާޗުއަލް ޓުއަރސް މެދުވެރިކޮށް ، ތަންތަން ބަލައި އެތަންތަނަށް ޒިޔާރަތް ކުރުން ، އޮންލައިން ވިޔަފާރި ، ވާޗުއަލް އޮކްޝަން ، އަދި އޮންލައިން ޑޮކްޓަރީ ފަރުވާ ، އޮންލައިން ވިސާ ފަދަ އެތައްކަމެއް އިންސާނާގެ ޙަޔާތުގައި ކޮންމެ ދުވަހަކުވެސް ބޭނުންކުރަމުން އެބަގެންދެއެވެ. އިންތިޚާބުތަކުގައި އޮންލައިންކޮށް ވޯޓު ލެވެއެވެ.  ވީއާރ ، ނުވަތަ ވާޗުއަލް ރިއަލިޓީއަކީ ، އިންސާނާ ދުނިޔޭގައި އުޅުމަށްބޭނުންވާ ގިނަ ކަންތައްތަކަކަށް ބޭނުންކުރެވެމުންދާ އިންޤިލާބީ ވަޞީލަތެވެ. އެހެންނަމަވެސް ، ވާޗުއަލް ނޭޝަން އަކާއި ވާޗުއަލް ސިޓިޒެންޝިޕެއްގެ އަޑު އިވެން މިފެށީ ދާދި މިދާކަށް ދުވަހުއެވެ.

ވާޗުއަލް ނޭޝަން އާއި ވާޗުއަލް ސިޓިޒންޝިޕަކީ ، 2040 ވަނައަހަރު ޤާއިމް ކުރުމަށް މަސައްކަތް ކުރެވެމުންދާ ޙަރަކާތެވެ. އެ މަޝްރޫޢު މިހާރުވަނީ ހިންގަން ފައްޓާފައެވެ. ވާޗުއަލް ނޭޝަން އުފެދޭއިރު ، އެ ޤައުމު ހިންގަން ވެރިޔަކު ހުންނާނެއެވެ. ރައީސެއް ނުވަތަ ބޮޑުވަޒީރެކެވެ. ކެބިނެޓެއް އޮންނާނެއެވެ. ކެބިނެޓް މިނިސްޓަރުން ތިބޭނެއެވެ. މާލީ އިދާރާތައް ހުންނާނެއެވެ. ޓެކްސްގެ ނިޒާމްވެސް މަސައްކަތް ކުރާނެއެވެ. މުދާ އުފައްދާ ކާރުޚާނާތަކާއި ، ޞިނާޢަތްތައް އުފެދިފައި އޮންނާނެއެވެ. އެއީ ޚިޔާލީ ދުނިޔެއެއް ނޫނެވެ. އަދި ޚިޔާލީ ޤައުމެއްވެސް ނޫނެވެ. ޓެކްނޮލޮޖީގެ ދާއިރާއިން އިންސާނާ ހޯދާފައިވާ ކުރިއެރުމާ އަދި ސައިންސާއި ޢިލްމީ ހުނަރުތަކުން ، އުފައްދާފައި އޮންނަ ޤައުމެކެވެ. ދުނިޔޭގެ ކޮންމެ ޤައުމެއްގެ ރައްޔިތަކަށްވެސް ، ވާޗުއަލް ނޭޝަންގެ ރައްޔިތަކަށް ވެވިދާނެއެވެ. ނުވަތަ ޑުއަލް ސިޓިޒެންޝިޕް ހޯދިދާނެއެވެ. ވާޗުއަލް ނޭޝަންގެ ، ޤާނޫނުތަކާއި ޤަވާޢިދުތަކާ އެއްގޮތްވާ ގޮތުގެ މަތިންނެވެ.

2040 ވަނައަހަރު އުފައްދަން އަމާޒުހިފާފައިވާ ، ވާޗުއަލް ނޭޝަން އަކީ ، މި ދުނިޔޭގެ އެކި ޤައުމުތަކުގައި މިހާރު ކުރިމަތިވެފައިވާ ދިރިއުޅުމުގެ ދަތިތަކާއި ، ޢާމްދަނީ ހޯދުމުގައި ހުރި ހުރަސްތަކާއި ، އިޤްތިޞާދާއި ސަލާމަތީ އަދި މާލީ ކަންކަމަށް ކުރިމަތިވެފައިވާ ގޮންޖެހުންތަކާއި ، ޤައުމީ މައްސަލަތަކުން ސަލާމަތްވުމަށްޓަކައި އުފައްދަން މަސައްކަތް ކުރެވެމުންދާ ޤައުމީ އާ ނިޒާމެކެވެ. ވާޗުއަލް ނޭޝަންގެ ރައްޔިތަކަށް ވުމުން ، ދުނިޔެ އުޅުމުގައި މިހާރު ކުރިމަތިވެފައިވާ ހުރިހާ ތަކުލީފަކާއި ނުރައްކަލަކާ އަދި އުނދގޫތަކުން ސަލާމަތް ވާނެއެވެ. އެއީ އެހެން ދުނިޔެއެކެވެ. އެއީ ދުނިޔެއިން ނުފެންނަ ، އެހެނަސް ފަސޭހަ އަދި އަމާން ނިޒާމުތަކެއް ޤާއިމްކުރެވިފައި އޮންނަ ، ޤައުމެކެވެ. ދުނިޔޭގެ ކޮންމެ ޤައުމެއްގައި އަދި ކޮންމެ ތާކު ހުރިކަމުގައިވިޔަސް ، ވާޗުއަލް ނޭޝަންގެ ރައްޔިތަކަށް ވުމުން ، އެ ޤައުމުގެ ރައްޔިތަކަށް ލިބޭ ހުރިހާ ޙައްޤުތަކެއް ކަށަވަރުވެގެންދާނެއެވެ.

ޢިލްމަކީ ، ﷲ ސުބްޙާނަހޫ ވަތަޢާލާ އިންސާނާއަށް ދެއްވާފައިވާ އަގުބޮޑު ނިޢުމަތެކެވެ. ޢިލްމު އުނގެނެން ބޭނުންވާމީހާއަށް އެކަމުގެ ދޮރުތައް ހުޅުއްވައި ދެއްވަތެވެ. އެއީ ، ﷲ ގެ ޙަޟުރަތުގައި ހުސްވުމެއްނެތް އެއްޗެކެވެ.

ސޫރަތުލް ޢަލަޤްގެ 5 ވަނަ އާޔަތުގައި ، ﷲ ސުބްޙާނަހޫ ވަތަޢާލާ ވަޙީކުރައްވައި އަންގަވައިފައި ވެއެވެ.

عَلَّمَ ٱلإِنسَانَ مَا لَمْ يَعْلَمْ

މި އާޔަތުގެ މާނަޔަކީ ، " އިންސާނާ ނުދަންނަ ކަންތައް ، އޭނާއަށް އެކަލާނގެ އުނގަންނަވައި ދެއްވިއެވެ. "

ހަމަމިއާއެކު ، އެ ސޫރަތުގެ 6 ، 7 އަދި 8 ވަނަ އާޔަތުގައި އިންޒާރުގެ ބަސްފުޅެއްވެސް ވަނީ ވަޙީ ކުރައްވާފައެވެ.

كَلاَّ إِنَّ ٱلإِنسَانَ لَيَطْغَىٰ (6) أَن رَّآهُ ٱسْتَغْنَىٰ (7) إِنَّ إِلَىٰ رَبِّكَ ٱلرُّجْعَىٰ (8)

މިތިން އާޔަތުގެ މާނަޔަކީ ، " އެހެންނެއް ނޫނެވެ. ( ހަމަ ޙަޤީޤަތެވެ ) ހަމަކަށަވަރުން ، އިންސާނާ އަނިޔާވެރިކަމުގައި ހައްދު ފަހަނަޅައިދާކަން ކަށަވަރެވެ. (6) އޭނާ އަމިއްލަޔަށް ފުދިގެންފިކަމަށް އޭނާއަށް ފެނުމުންނެވެ. (7) ހަމަކަށަވަރުން ، އެނބުރި ދިއުންވަނީ ، ކަލޭގެފާނުގެ ވެރި ރަސްކަލާނގެ ޙަޟުރަތަށެވެ. "

ﷲ ސުބްޙާނަހޫ ވަތަޢާލާގެ ކަށަކުޅަދުންވަންތަކަމުން ، އިންސާނާގެ ދުނިޔެ ތަރައްޤީކުރުމަށް ބޭނުންވާ އެތައް އީޖާދަކާއި އެތައް ޢަޖައިބެއް ، އަދި ކުރިން އެނގިފައިނުވާ އެތައްކަމެއް ، އިންސާނާގެ ސިކުނޑިޔަށް ވައްދަވައި ، އެ ސިކުނޑިވަނީ ، ޢިލްމުން ތަނަވަސްކޮށްދެއްވާފައެވެ. ޢިލްމާއި ޙިލްމުން ، އިންސާނާވަނީ ، އެ ޢަޖައިބުތައް ދުނިޔެއަށް ގެނެސްފައެވެ. ހަމައެއާއެކު ، އާ އުފެއްދުންތަކާއި އީޖާދުތަކުން ، އިންސާނިއްޔަތަށް ގެއްލުންހުރި އެތައްކަމެއް އިންސާނާގެ ޢަމަލުތަކުގައި އެބަހުއްޓެވެ. ﷲ ސުންޙާނަހޫ ވަތަޢާލާ ، އިންސާނާއަށް މިންވަރު ކުރެއްވި އެ ޢިލްމާއި ޙިލްމުން ، އިންސާނީ ޙައްޤުތައް ގެއްލުވައިލައި ، އެތައްބަޔެއްގެ ފުރާނަ ގެއްލުވައިލަމުން އެބަދެއެވެ. އެއީ ، އަނިޔާވެރިކަމުގައި ހައްދުފަހަނަޅައި ދިއުންނޫން އެހެންކަމެއްނޫނެވެ. އިންސާނާއަކީ ، އެބައިމީހުން ހޯދައިގަތް ކަމެއްގައި ފުދިގެންތިބި ބަޔަކުކަމުގައި ، އެބައިމީހުންނަށް ފެނެއެވެ. އެއީ އަނިޔާވެރިވެ ، މީހުން މެރުންކަމަށްވިޔަސް މެއެވެ. މީހުންގެ ޙައްޤުތަކަށް އަރައިގަތުންކަމަށްވިޔަސް މެއެވެ. ޢަލަޤް ސޫރަތުގެ 7 ވަނަ އާޔަތް ނިމިގެންދަނީ ، އެފަދަމީހުންނަށް ، އެކަލާނގެ ދެއްވަވާ އިންޒާރުގެ ބަސްފުޅަކުންނެވެ. އަދި އިންސާނާގެ ޢަމަލުތައް ހަނދާންވެސް ކޮށްދެއްވަމުންނެވެ. އެނބުރި ދިއުންވަނީ ، އެކަލާނގެ ޙަޟުރަތަށްކަން އިންސާނާއަށް ހަނދާން ކޮށްދެއްވަމުންނެވެ.

އިންސާނާ ، އޭނާގެ ދުނިޔެ ބިނާކުރަންވީއެވެ. މިބިންމަތީ ލައްވާފައިވާ ހުރިހާ އެއްޗެއް ލައްވާފައިވަނީ އިންސާނުންނަށްޓަކައެވެ. އިންސާނުންގެ ބޭނުންތަކަށްޓަކައެވެ. އެހެނަސް ، ދުނިޔެ ހޯދަންޖެހޭނީ އަދި ބޭނުންކުރަން ޖެހޭނީހެޔޮގޮތުގައެވެ. އިންސާނިއްޔަތަށްހުރި ހެޔޮކަމެއްގެ ގޮތުގައެވެ. އިންސާނާ ދިރި ދުނިޔޭގައި އުޅުމަށް މަގުފަހިކޮށްދޭ ވަޞީލަތެއްގެ ގޮތުގައެވެ. ޢާޚިރަތުގެ ގޮވައްޗަށް ދަތުރުކުރުމަށް އިޚްތިޔާރު ކުރެވޭ ވަޞީލަތެއްގެ ގޮތުގައެވެ.

ވާޗުއަލް ވޯލްޑް ، އަދި ވާޗުއަލް ނޭޝަން އަކީ ، ދުނިޔެ މިހާރު ދަތުރުކޮށްފައި އޮތް ހިސާބުން ، އިންސާނާއަށް ދުނިޔޭގައި ދިރިއުޅުމަށް ކުރިމަތިވާ ގޮންޖެހުންތަކަށް ، ޙައްލެއް ހޯދުމަށް ، ޢިލްމީގޮތުންނާއި ޓެކްނޮލޮޖީގެ ދާއިރާއިން ، އިންސާނާއަށް ލިބިހުރި ޢިލްމަކާއި ޙިލްމަކާ އަދި މުއްސަނދި ވަޞީލަތްތަކާއި ހުނަރެއް ބޭނުންކޮށްގެން ، އުފައްދައި ބިނާ ކުރާ ، ސިންތެޓިކް ޤައުމެއް ނުވަތަ ދުނިޔެއެކެވެ.

ވާޗުއަލް ރިއަލިޓީ ، ނުވަތަ ވީއާރ އަކީ ، މަސްނޫޢީ ނިޒާމެއްގެ ޙަޤީޤަވެ. އެ ޙަޤީޤަތަކީ ، އެ ނިޒާމް ބޭނުންކުރާ މީހާ ، ޙަޤީޤީ ދުނިޔެއިން ބޭރަށް ފޮނުވައިލުމެވެ. އެހިނދު ، މުއްސަނދި މާޙައުލެއްގައި އަމިއްލަ ބާރު ލިބިއޮވެ ، ހިތްއެދޭގޮތަކަށް ، އެހެންފަރާތެއް މެދުވެރިނުކޮށް ، އެ މާޙައުލު ތަޖުރިބާކުރުމުގެ ފުރުޞަތު ސީދާސީދާ އެމީހާއަށް ލިބެއެވެ.

ވާޗުއަލް ވޯލްޑް ނުވަތަ ސިންތެޓިކް ، މަސްނޫޢީ ، އަދި ލޮލަށް ނުފެންނަ ދުނިޔެއަކީ ، އުޅުމާއި ގުޅުމާ އަދި ޝަޢުޤާއި އުފަލުން ފުރިގެންވާ ، މިންގަނޑުތަކެއް ހިފެހެއްޓިފައި އޮންނަ އިންޤިލާބީ ދުނިޔެއެކެވެ. 2040 ގައި ، ދުނިޔެއަށް އުފަންކުރަން މަސައްކަތް ކުރެވެމުން އެދަނީ ، އެފަދަ ދުނިޔެއެއްގައި އޮންނަ އެފަދަ ޤައުމު ތަކެކެވެ.

ގިނަބަޔެއްގެ އުއްމީދަކީ ، 2040 އަންނައިރު ، މިފަދަ ވާޗުއަލް ޤައުމުތައް އުފެދުމެވެ. ވާޗުއަލް ޤައުމެއްގެ ރައްޔިތަކަށް ވުމުގެ ޝަޢުޤުވެރިކަން ، އެތައްބަޔެއްގެ ހިތުގައި މިހާރުވެސްވަނީ އުފެދިފައެވެ. ވާޗުއަލް ނޭޝަންސްގެ ރައްޔިތަކަށްވުމުގެ ނިޒާމް ، ސައިބަރ ކޮމިޔުނިޓީތަކާއި ވާޗުއަލް ނޭޝަންސް ގެ ޕްލެޓްފޯމްތަކުގައި މިހާރުވެސް ދަނީ ރަސްކަން ކުރަމުންނެވެ. އެކަމަށް ، އެތައްބަޔެއްގެ ސަމާލުކަން ދަމައިގަނެ ، އެނިޒާމު އެދަނީ ބާރުވެރިވަމުންނެވެ. ވާޗުއަލް ޤައުމެއްގެ ރައްޔިތަކަށްވުމަކީ ، އެމީހަކަށް ލިބިގެންވާ ނުފޫޒާއި ބާރާ އަދި ތަނަވަސްކަމާއި މިލްކިއްޔާތަށް ރިޢާޔަތްކޮށް އިޚްތިޔާރުކުރަން ފުރުޞަތު އޮންނަ ނިޒާމެކެވެ. މިނިޒާމުގެ ސަބަބުން ، ދުނިޔެ މިހާރު ތަކުރިބާކުރަމުން މިގެންދާ ސިޔާސީ ޙަރަކާތްތަކާއި ، މާލީ ނިޒާމު ، ބައިބައިވެގެން ދާނެއެވެ. އަދި ޑުއަލް ސިޓިޒެންޝިޕް ލިބުމުގެ ފުރުޞަތު އެތައްބަޔަކަށް ތަނަވަސްވެގެން ދާނެއެވެ. އޭގެ މާނަޔަކީ ، ދުނިޔޭގައި މިހާރު މިއޮތް ، މާލީ ނިޒާމާއި ސިޔާސީ ނިޒާމާއި އިޖްތިމާޢީ ޢަދާލަތާއި ފަރުދީ މިނިވަންކަން ބައިބަޔަށް ބެހިގެން ދިއުމެވެ.

ވާޗުއަލް ނޭޝަންސްއާ ނުވަތަ ވާޗުއަލް ޖަމާޢަތްތަކާ ގުޅޭމީހުންގެ ވިސްނުން ވަރަށް އަވަހަށް ބަދަލު ވެއެވެ. ވަކިކަހަލަ ފުރުޞަތުތަކެއް ހޯދުމުގެ ނިޔަތުގައި އެއްޤައުމުން އަނެއްޤައުމަށް ، މީހުން ހިޖުރަކުރާ ބީދައިންނެވެ. އެއްޤައުމަށްވުރެ އަނެއް ޤައުމު އެމީހަކަށް ރަނގަޅުވެއްޖެނަމަ ، އެ ރަނގަޅުވި ޤައުމަކަށް އެމީހަކު ، ވާޗުއަލީ ހިޖުރަކުރާނެއެވެ. ބޭނުންކުރަމުން ގެންދާ ވާޗުއަލް ކަރަންސީވެސް ، އެއްޤައުމުން އަނެއްޤައުމަށް ޓްރާންސްފަރ ކުރާނެއެވެ.

މިހާރުވެސް ، ވާޗުއަލް 11 ޤައުމެއް ދުނިޔޭގައި އެބައޮތެވެ. އެ 11 ޤައުމުގައި 200 ބިލިއަންމީހުންގެ އާބާދީއެއް އެބައޮތެވެ. އެ ޤައުމުތަކުގެ އުފެއްދުންތެރިކަމުގެ ނިސްބަތުން ބޮލަކަށްޖެހޭ މިންވަރު 100 ބިލިއަން އެމެރިކާ ޑޮލަރަށްވުރެ މައްޗެވެ. އެ ޤައުމުތަކުގެ ރައްޔިތުންގެ އާމްދަނީ އިންތިހާއަށް މައްޗެވެ. ދިރިއުޅެނީ ، ރައްކާތެރިކަމާއެކު ބެލެހެއްޓޭ އަމާން މާޙައުލު ތަކުގައެވެ. އަމިއްލަ މިނިވަންކަމާއި ސަލާމަތާ އަދި ރައްކާތެރިކަން ކަށަވަރުވެފައި އޮވެއެވެ.

އެ ޤައުމުތަކުގެ ރައްޔިތުންނަށް ލިބޭ ފައިދާ ތަކުގެ ތެރޭގައި ، ޞިއްޙީ ދުޅަހެޔޮކަމުގައި ހުރުމަށް ބޭނުންވާ ޚަރަދާއި ، ވަޒީފާގެ ރައްކާތެރިކަން އޮވެއެވެ. ލިބޭ ކޮންމެ ފައިދާއަކާއި ޚިދުމަތަކީ ، މިހާރު ދުނިޔެއިން މިފެންނަ އެއްވެސް ޤައުމަކުން ލިބޭ ފަދަ ފައިދާއާއި އަގުބޮޑު ޚިދުމަތަށްވުރެ ، އެތައްހާސް ގުނައެއް އިތުރު އެއްޗެކެވެ. އެބައިމީހުން ޓެކްސްވެސް ދައްކައެވެ. ދިރިއުޅުމުގެ ޙާލަތާއި މިލްކިއްޔާތާ އަދި މާލީ ފައިދާތަކުން މުއްސަނދި ވާޗުއަލް ޤައުމަކާއި ، އެމީހަކު އަސްލު ދިރިއުޅޭ ޤައުމެއްގެ ތަފާތުން ، މިދުނިޔެއާއި ވާޗުއަލް ނުވަތަ ސިންތެޓިކް ދުނިޔެ ތަފާތުކޮށްދެއެވެ. ދެދުނިޔެ ބައިބައި ކޮށްލައެވެ. ކަންމިހެން އޮތުމާއެކު ، ދުނިޔޭގެ ބައެއްޤައުމުތަކުން ، ވާޗުއަލް ނޭޝަންސްގެ ނިޒާމު މަނާކުރުމަށްވެސް ވިސްނަމުން އެބަގެންދެއެވެ.

ވާޗުއަލް ވޯލްޑް ، ނުވަތަ ސިންތެޓިކް ދުނިޔެއަށް ހިތްކިޔައި ހޭލުންތެރިވަމުން އައި ބައެއް ޒުވާނުން ނުވަތަ މީހުންނަށް ، އެއީ ކަމުދާ ކަމަކަށްވީ ، އެމީހުންނަށް އަޞްލު ލިބެންޖެހޭ އެތައް ޙައްޤުތަކެއް އެކި ސަބަބާހުރެ ، މިދުނިޔެއިން ނުލިބުމެވެ. ވާޗުއަލް ވޯލްޑްގެ ނަޞީބު ގަދަވެފައި ، ކުރިއަރައިދާނެ ފުރުޞަތު ތަނަވަސް ވެފައި އޮތުމެވެ. ވާޗުއަލް ވޯލްޑާއި ވާޗުއަލް ޤައުމުތައް އުފެދެން ދިމާވީ އެތައް ސަބަބުތަކަކާ ހުރެއެވެ.

އެއްސަބަބަކީ ، 2010 އާއި 2020 އާ ދެމެދުގައި ، ވީއާރ ނުވަތަ ވާޗުއަލް ރިއަލިޓީއާ ގުޅިފައިހުރި ، އަދި ގުޅެމުންދިޔަ ނިޒާމްތަކަށް ، އަވަސް އަދި ކުއްލި އިންޤިލާބީ ބަދަލުތަކެއް އައުމެވެ. ކޯވިޑްގެ ޢާލަމީ ވަބާއާ ގުޅިގެން ، ދުނިޔެއަށް އައި އިންޤިލާބީ ބަދަލުތަކުގައި ، މީހުންގެ ވިސްނުމާއި ފިކުރަށް ބަދަލުއައިސް ، ގޭގައި ނުވަތަ ގޭބަންދުގައި ތިބެގެން މަސައްކަތް ކުރުމުން ލިބުނު ހިތްހަމަ ޖެހުމާއި ފަސޭހައިން ، ވާޗުއަލް ޕްލެޓްފޯމްތަކަށް ޝަޢުޤުވެރިކަން އިތުރު ވެގެން ދިއުންވެސް އޭގެތެރޭގައި ފާހަގަ ކުރެވެއެވެ. ކޯވިޑްގެ ޢާލަމީ ވަބާގައި ދުނިޔެ ކުރި ތަޖުރިބާއިން ، ޑިޖިޓަލް އަދި އޮންލައިން ވިޔަފާއިއާއި " ވޯކް ފްރޮމް ހޯމް " ގެ ތަޖުރިބާގައި ، ވަޒީފާއާއި މަސައްކަތަށް އޮތް ޔަޤީންކަން އިތުރުވެ ، ވާޗުއަލް ވޯލްޑް އަށް ހިތްޖެހުން ވެގެން ދިއުން އެއީ އެންމެ ފާހަގަ ކޮށްލެވޭ އެއްކަމެވެ.

2020 ވަނައަހަރަކީ ، މުޅިދުނިޔެއަށްވެސް ހަމަނުޖެހުމާއި ބިރުވެރިކަމާ އަދި އިޤްތިޞާދީ ދަތިކަމާއި މާލީ ދަތިތަކެއް ތަޙައްމަލްކުރަން ޖެހުނު އަހަރެކެވެ. ދިރިއުޅުމަށް ދަތިވާފަދަ ، އިޤްތިޞާދީ ، ސިޔާސީ އަދި އިޖްތިމާޢީ އެތައް އުނދަގުލަކާއި މުޞީބާތެއް ދުނިޔެއާ ކުރިމަތިވިއެވެ. ދޭދޭ ޤައުމުތަކުގެ މެދުގައި ދެކޮޅުވެރިކަން އުފެދި ، ހަނގުރާމަތައް ފެށުނެވެ. ކަނޑިއާއި ބަޑިން ނޫނަސް ފިނި ހަނގުރާމަތައް އުފެދުނެވެ. މިކަމާގުޅިގެން ، ދެންހެވޭ ބުނެ ، ޢިލްމާއި ހުނަރާ އަދި ވަޞީލަތްތައް ލިބިފައިވާ ފަރާތްތަކުން ، އެ މުޞީބާތްތަކުން ސަލާމަތްވުމަށް ނިންމައި ، ޑިޖިޓަލް ، ސައިބަރ އަދި ވާޗުއަލް ދުނިޔެއެއް ޤާއިމް ކުރިއެވެ.

އެތައް ޤަރުނެއްވަންދެން ، ދުނިޔޭގެ ކޮންމެ ޤައުމެއްގައިވެސް ހިނގަމުން އައި ، މިނިވަންކަމާއި ، ސަލާމަތާއި ރައްކާތެރިކަން އަދި ގެދޮރުގެ ދަތިކަމާއި އާމްދަނީ ހޯދުމާއި ދިރިއުޅުމުގެ އަސާސީ ބޭނުންތައް ނުފުދުމުގެ ގޮންޖެހުންތައް ، އެތައް ޖީލަކަށް ވާރުތަވަމުން އައިސްފައިވަނީ ހިތި ތަޖުރިބާއެއްގެ ގޮތުގައެވެ. މިހުރިހާ ބޭނުންތަކެއް ، ވާޗުއަލް ދުނިޔޭގައި ފުރިހަމަވެ ، އެތައް ބިލިއަން ޑޮލަރެއްގެ އާމްދަނީން ، މީސްމީހުން މުއްސަނދިވެގެންދާތަން އެބަ ފެނެއެވެ. އެ ޚިދުމަތާއި އާމްދަނީ ލިބޭނެގޮތެއްނެތި ދިރިއުޅުމާ ހަނގުރާމަ ކުރަމުންދާ މި ދުނިޔެއަކު ނޫނެވެ. ވާޗުއަލް ދުނިޔޭގައެވެ. ކުރިއެރުމުގެ ވާދަވެރިކަން ފިޔަވައި ، ހަނގުރާމައާއި ހަމަނުޖެހުމަކީ ، ވާޗުއަލް ވޯލްޑްގެ ރަދީފުގައި ނެތް ކަންކަމެވެ. އެހެނަސް ، ދުނިޔޭގެ ކުރިއަރާފައިވާ ޤައުމުތަކުން ދެކޭގޮތުގައި ، ދުނިޔޭގައި ހަމަނުޖެހުން އުފައްދައިގެން ، ވާޗުއަލް ވޯލްޑްގެ މައްޗަށް ނުފޫޒު ފޯރުވުމުގެ ބާރު ، ހަމައެކަނި ލިބިގެންވަނީ އެ ޤައުމުތަކަށެވެ. އެހެންކަމުން ، ކުރިއަރާފައިވާ ޤައުމުތަކުން ، ވާޗުއަލް ވޯލްޑަށް އަމާޒުކޮށް ސައިބަރވޯރ ނުވަތަ ވާޗުއަލް ހަނގުރާމަ މިހާރުވެސްވަނީ އިޢުލާންކޮށް ، އަދި ޙަމަލާދޭންވެސް ފަށާފައެވެ. އޭގެ ބަދަލެއްގެ ގޮތުގައި އެ ޙަމަލާތަކުން ދިފާޢުވުމަށްޓަކައި ، ވާޗުއަލް ޤައުމުތަކަށްވެސް މަޖުބޫރުވެގެން ،  ސައިބަރ ޓެރަރިޒަމްގެ ޢަމަލުތައް ހިންގަން މިހާރުވަނީ ފައްޓާފައެވެ.  އެބައިމީހުންގެ ޙަމަލާތަކުގެ ބާރުވެސް މާ ގަދައެވެ. ބައެއް ޤައުމުތަކުގެ މާލީ ނިޒާމާ ކުޅެލައެވެ. މަތިންދާ ބޯޓުފަހަރުގެ ދަތުރުތަކަށް ދަތިކުރެއެވެ. އެއަރޕޯޓްތައް ހުއްޓުމަކަށް ގެނުވައެވެ. ބޭންކް އެކައުންޓްތައް ހުސްކުރުވައި ، އޮޅުވައިލައެވެ.

ވާޗުއަލް ޤައުމުތަކާއި ، ދުނިޔޭގެ ޤައުމުތަކުގައި ހިނގަމުންދާ ، ކުރިއެރުމާއި އުފެއްދުންތެރިކަމުގެ ވިސްނުމާއި ފިކުރާއި ޚިޔާލާތުގެ ތަފާތު ، މިހާރުވެސް އަންނަނީ ފެންނަމުންނެވެ. ދެބައިމީހުންގެ މެދުގައި އުފެދިފައި އޮތް ބައިބައިވުން ، ފެށިގެން އައީ 2010 ވަނަ އަހަރުއެވެ. އެކަމަށް މެދުވެރިވި އެއްސަބަބަކީ ، ދުނިޔޭގެ ގިނަ ޤައުމުތަކުން އިންޓަނެޓްގެ ނިޒާމަށް ހުރަސްއަޅައި ، ވާޗުއަލް ބޯޑަރުތައް ބަންދުކޮށް ، އޭގެތެރެއިން ނުނުކުމެވޭނެ ، ނުވަތަ އެ ނިޒާމަށް ނުވަދެވޭނެ ފިޔަވަޅުތައް ފެށުމެވެ. ބައެއް ޤައުމުތަކުން ، ވައިބަރ އަދި ވަޓްސްއެޕަށް ނުވަދެވޭނެ ގޮތް ހެދިއެވެ. ގޫގްލް ބޭނުން ނުކުރެވޭގޮތަށް ހަމަޖެއްސިއެވެ. މިހާރުވެސް ބައެއް ޤައުމުތަކުގައި އެފަދަ ޚިދުމަތް މަނާކުރެވިފައި އެބަހުއްޓެވެ. އެހެނަސް ، ޚާއްޞަ ވީޕީއެން އެއް ބޭނުންކޮށްގެން ، ހަމަ އެޤައުމުތަކުގައި އެ ޚިދުމަތްތައް ބޭނުންކުރެވޭނެމަގު ، ވާޗުއަލް ވޯލްޑުން ވަނީ ހަމަޖައްސާފައެވެ. ދުނިޔޭގެ ކުރިއަރާފައިވާ ޤައުމުތަކަކަށް އެކަމެއް ނުހުއްޓެވުނެވެ. މުއާޞަލާތުގެ ނިޒާމަށް ހުރަހެއް ނޭޅުވުނެވެ. އެހެނަސް ، އިންސާނުންކަމަށްވާތީ ، އެހުރަސްތަކަށް ކިޔަމަން ނުވުމާއި ، ހުރަސްތަކުން ހިތްހަމަނުޖެހި ، ރުޅިވެރިކަމާއި ދެކޮޅުވެރިކަމުގެ ވިސްނުން އޮތީ އުފެދިފައެވެ.

މިހުރިހާކަމަކާ އެކު ، އުފެދޭ ސުއާލަކީ ، ވާޗުއަލް ޤައުމުތަކުން ލިބޭ ފައިދާއަކީ މަޖުބޫރު ކަމަކަށްވެ ، މީސްތަކުން އެކަމަށް ހިތްކިޔައި ، އެމީހުން ނިސްބަތްވާ ، ދުނިޔޭގެ ޤައުމުތައް ދޫކޮށްލަފާނެތޯ އުފެދޭ ސުއާލެވެ. އެ ސުއާލުގެ ޖަވާބަކީ އާނއެކޭއެވެ. މިހާރުވެސް ، މީސްތަކުން އެތިބެނީ ، ދުނިޔޭގެ ޤައުމުތަކުން ވާޗުއަލް ވޯލްޑަށް އަޅަމުންދާ ހުރަސްތަކަށް ރުޅިއައިހެވެ. އެންމެ އާދައިގެ ކަމަކަށް ބަލާއިރު ، ވަޓްސްއެޕް ބޭނުންކުރުން މަނާ ޤައުމަކަށް ދެވިއްޖެނަމަ ، އެމީހަކު އެންމެ ފުރަތަމަވެސް ކުރާނެ ކަމަކީ ، ވީޕީއެން އެއް ހޯދައި އިންޓަނެޓަށް ވަދެވޭނެ މަގުފަހިކޮށް ، ވަޓްސްއެޕްވެސް ބޭނުންކުރެވޭނެ ގޮތް ހޯދުމެވެ. އެޤައުމުތަކުން ، އެމީހުންގެ މުއާޞަލާތީ ޙައްޤުތަކަށް އަރައިގެންފައިވާތީ ، ޗޮކެއް ކަނޑާފައި އެކަމަށް ގޮން ޖަހާނެއެވެ.

ދުނިޔޭގެ ޤައުމުތަކަށް ކިޔަމަން ނުކުރެވޭ އެތައްކަމެއް ، ވާޗުއަލްވޯލްޑުން މިހާރުވަނީ ކިޔަމަންކޮށް ، 200 ބިލިއަންގެ އާބާދީއަކަށް ނިސްބަތްވާ އެހެން ދުނިޔެއެއް އުފައްދާފައެވެ. ވާޗުއަލް ވޯލްޑްގައި އެންމެ ނަންއަރާފައިވާ ނަންނަމަކީ ، ޑިސެންޓްރަލޭންޑް ، ސެކަންޑް ލައިފް ، ވޯލްޑް އޮފް ވޯރކްރާފްޓް ، މައިންކްރާފްޓް ، ހައިފިޑެލިޓީ ، ދަ ސިމްސް ، ރޮބްލޮކްސް ، ވީއާރޗެޓް ފަދަ ނަންނަމެވެ. މިއިން ކޮންމެ ނަމަކީ ، ވާޗުއަލް ދުނިޔެއެކެވެ. އެތައް ޚިދުމަތަކާއެކީ ފުރިހަމަކުރެވިފައި އޮންނަ މަސްނޫޢީ ޙަޤީޤަތް ތަކެކެވެ. އަދި އެތައް މިލިއަން ބަޔަކު އެ ޚިދުމަތެއް ހޯދައި ، މަންފާ ލިބިގަންނަމުންގެންދާ ތަންތަނެވެ.

ދުނިޔޭގެ ކުރިއަރާފައިވާ އިޤްތިޞާދުތަކުން ، ވީއާރ އަށް އިންވެސްޓްކޮށް ތަރައްޤީކުރަމުން އެބަގެންދެއެވެ. ވީއާރ އަކީ މިހާރު ، ބައެއް ޤައުމުތަކުގެ ، ތަޢުލީމީ ނިޒާމުގައި ، ސްކޫލްތަކުގެ ރަސްމީ ކަރިކިއުލަމްގައިވެސް ހިމަނާފައިވާ މާއްދާއެކެވެ. ވީއާރ އަށް އެންމެ ބޮޑަށް އިންވެސްޓްކުރަމުން ގެންދާ ޤައުމުތަކުގެ ތެރޭގައި ، ޗައިނާއާއި އެމެރިކާ އަދި ފަރަންސޭސި ވިލާތާއި ، ޢަރަބި ޤައުމުތަކުގެ ތެރެއިން ، ޔުނައިޓެޑް ޢަރަބި އެމިރޭޓްސް ހިމެނެއެވެ.

އިންސާނުންނަކީ ، ފަސޭހައާއި ފައިދާއަށް ހިތްކިޔާ މަޚުލޫޤެކެވެ. ވާޗުއަލް ރިއަލިޓީ ނުވަތަ ވީއާރ ގެ ޓެކްނޮލޮޖީގެ ދުނިޔެއަކީ ، އިންސާނުންގެ ހިތްކިޔާގޮތަށް އުފައްދަމުންގެންދާ ޚިދުމަތެކެވެ. ދިރިއުޅުމުގެ ފަސޭހަތަކާއި ، ވިޔަފާރީގެ އާ އުކުޅުތަކާއި ، ރައްކާތެރި މާޙައުލެއްގެ ޔަޤީންކަން ، އެނިޒާމުތަކުން އިންސާނާއަށް ހޯދައި ދެއެވެ.

ދުނިޔޭގެ ޤައުމުތަކުން ވާޗުއަލް ޤައުމުތަކާ އެއްބައިވެ ، ރައްޔިތުންނަށް ދެވޭ ޚިދުމަތްތައް ، ފުރިހަމަކޮށް ފަސޭހަކޮށް ނުދެވިއްޖެނަމަ ، އެންމެންވެސް ދާނީ ވާޗުއަލް ޤައުމުތަކާ ދިމާލަށެވެ. އެއީ ، އިންސާނާގެ ތަބީޢަތެވެ. މިހާރުވެސް ، ވާޗުއަލް 11 ޤައުމެއްގައި 200 ބިލިއަންމީހުންގެ އާބާދީއެއް އެބައޮތެވެ. އެ ޤައުމުތަކުގެ އުފެއްދުންތެރިކަމުގެ ނިސްބަތުން ބޮލަކަށްޖެހޭ މިންވަރު 100 ބިލިއަން އެމެރިކާ ޑޮލަރަށްވުރެ މައްޗެވެ. އަތުގައި ފައިސާ ފޮއްޗެއް އޮތްމީހަކު ވިއްޔާ ، ވާޗުއަލް ނޭޝަންސް އާ ދިމާލަށް ނުގޮހެއް ނުހުންނާނެއެވެ. އެއީ ، ފަސޭހައާއި އަރާމާ އަދި މަންފާ އާއި ފައިދާއިން ބަށްޓަންކުރެވިފައިވާ ، ވާޗުއަލް ޤައުމު ތަކެކެވެ. ވާޗުއަލް ޤައުމެއްގެ ރައްޔިތަކަށް ވުމަކީ ، ނުވަތަ ޑުއަލް ސިޓިޒެންޝިޕް ހޯދުމަކީ ، މިއަދުގެ ޖީލުގެ ގިނަ ޒުވާނުންނާއި މުއްސަނދިންގެ ފަޚުރެއްކަމަށް ބަލާނެދުވަސް މާ ދުރެއްނޫނެވެ.