( 30 ޖުލައި 2024 ގައި ޝާއިޢުކުރި ބަޔާގުޅޭ )
(އެހެނޭ ކިޔާފައި ، އެމީހުންގެ ދަރިފުޅު ، ބޭނުންގޮތަކަށް އުޅެން ދޫކޮށްލާކަށްވެސް ޞާދިޤްވެސް ބޭނުމެއް ނޫނެވެ. އެހެންކަމުން ، އެކަމުގައި ، އިންސްޕެކްޓަރ ޖެނެރަލްގެ އެހީތެރިކަން ހޯދުމަށް ، ޞާދިޤް ނިންމިއެވެ. އިންސްޕެކްޓަރ ޖެނެރަލްއަކީ ، ޞާދިޤްގެ ކުޑައިރުގެ ރަޙުމަތްތެރިޔެކެވެ. )
ހިނަވަން ބާއްވާފައި އޮތް މައްޔިތެއްހެން ، އެނދުގައި އޮށޯވެލައިގެން އަނީސާ އޮތެވެ. ފިކުރު ބޮޑުވެ ހާސްވެގެން ގޮސް ކުރާނެކަމެއް ނޭނގިފައެވެ. ދިލްނަޝީން ، މަޑުމަޑުން ހިނގަމުން އައިސް ، މަންމާއޭ ގޮވަމުން ކޮޓަރިޔަށް ވަނެވެ. އަދި ، އޭނާއަށް މާފުކުރުމަށް އެދުނެވެ. ދިލްނަޝީނަށް އަދިވެސް ހުރީ ރޮވިފައެވެ. ރިދާގެ މައިންބަފައިންނަކީ އެކަހަލަ ބައެއްނޫނެވެ. އެއީ ވަރަށް ހެޔޮލަފާ ބަޔެކެވެ. ޙަމްޒާ ބުނެފައި އޮތްގޮތުގައި ، އޭނާގެ މައިންބަފައިން ، ޙަމްޒާދެކެ ވަރަށް ލޯބިވާނެއެވެ.
ދިލްނަޝީންގެ ވާހަކަ އަނީސާ ހުށްޓުވިއެވެ. ޙަމްޒާގެ ނަންގަންނަން ލަދެއް ނުގަނޭތޯ އަހައި ، އޭނާގެ ދަރިފުޅާ ، އަނީސާ ސުއާލު ކުރިއެވެ. ދިލްނަޝީން އެބުނި އެއްޗެއްގެ މާނަޔަކީ ، އެކަމުގައި އޭނާގެ އެއްވެސް ކުށެއް ނެތްކަން ހާމަ ކުރުމެވެ. ޙަމްޒާ އެކުރި އެއްވެސްކަމެއް ދިލްނަޝީނަކަށް ނޭނގެއެވެ. ޙަމްޒާގެ ބައްޕަމެން އެގެޔަށް އައިސް އެދެއްކި ވާހަކަތަކުން ދިލްނަޝީންގެ ހިތް ނުހުއްޓުނީ ކިރިޔާއެވެ. އެކަން އެހެންވާނެކަމަކަށް ދިލްނަޝީނަށް ހީކުރެވިފައެއް ނެތެވެ.
" އެކަމަކު ، އެކަންވާނީ އެހެންކަން އަހަރެންނަށް އެނގެއެވެ. ދިލްނަޝީން ވިހި ވަގުތު ، އަހަރެންގެ ގައިގެ އެތަންމިތާ އެޅި ވޭނުގެމަތިން ، އަހަރެން އަދިވެސް ހަނދާން އެބަހުށްޓެވެ. ހަށިގަނޑުގެ ކޮންމެ ގުނަވަނަކަށް އެހާ ތަދުވިއެވެ. އަހަރެންނަށް ދިލްނަޝީން މި ދުނިޔެއަށް ގެނެވުނީ ، މަރާ ހަނގުރާމަ ކޮށްގެން އެހާ ވޭނާއި ތަކުލީފާ އެކީގައެވެ. ދިލްނަޝީން ނިންދެވުމަށްޓަކައި އެރޭގެ ހަތަރުދަމު ، އަހަރެންގެ އަތްދަނޑިމައްޗަށް ދިލްނަޝީން ލައިގެން ހިނގީމެވެ. އެކަމަކުވެސް އެރޭގެ ހަތަރުދަމު ، ދިލްނަޝީން އޮތީ ، ހުއްޓައި ނުލައި ރޯށެވެ. އަހަރެން އެންމެ ހިނދުކޮޅަކަށްވެސް ތަނެއްގައި އިށީނދެލިޔަކަ ނުދެއެވެ. އެރޭ ، އަހަރެންނަށް ދިލްނަޝީން ދިން ހުރިހާ ތަކުލީފަކާއި ވޭނެއްގެ މަތިން މިރޭ އެބަ ހަނދާން ވެއެވެ. އެކަމަކު ، މިރޭ މިލިބުނު ވޭނާއި ތަކުލީފު ، އެރޭ ، ދިލްނަޝީން ވިހަން އަހަރެންގެ ހަށިގަނޑުގައި އެޅި ވޭނަށްވުރެ ބޮޑެވެ. ދަރިންގެ ފަރާތުން މައިންބަފައިންނަށް ލިބޭ ތަކުލީފަށްވުރެ ބޮޑު އަނިޔާއެއް އެބައިމީހުންނަކަށް ނުލިބޭނެއެވެ. އެއީ އެކުދިންގެ ފަރާތުން ، މައިންބަފައިންނަށް ޙައްޤު އެއްޗެއްނޫނެވެ. " ކަޅިޖަހައިނުލާ މައްޗަށް ބަލަހައްޓައިގެން އޮވެ ، އަނީސާ ވާހަކަ ދައްކަމުން ގެންދިޔައެވެ.
އަނީސާގެ ވާހަކަތަކަށް ކެތްކުރަން ދިލްނަޝީނަށްވެސް އުނދަގޫ ވިއެވެ. މަންމަޔާ ގާތަށް ޖެހިލުމަށް ދިލްނަޝީން މަސައްކަތް ކުރިއެވެ. އެކަމަކު ، އެކަން އަނީސާ ހުށްޓުވިއެވެ. ދިލްނަޝީން އަނީސާއާ ގާތަށް ޖެހުނުވަރަކަށް އޭނާގެ ނޭވާ ކުރުވަމުންދާހެން ހީވެއެވެ. ދިލްނަޝީން ވިހެއުމަކީ ، މިދުނިޔެމަތީ ، އަނީސާއަށް ކުރެވުނު އެންމެ މޮޔަކަންތަކެވެ. ދިލްނަޝީން ބަލައި ތަރުބިއްޔަތުކޮށް ބޮޑުކުރުމުގައި ، އަނީސާ އެވަނީ ނާކާމިޔާބު ވެފައެވެ. ދިލްނަޝީން އޭނާއާ ގާތަށް ނައުމަށް ، އަނީސާ އެދުނެވެ. އެރޭ އެ އިޙްސާސްކުރަން ޖެހުނުފަދަ ، ލަދުވެތިކަމެއް ، މުޅި ޢުމުރުގައިވެސް ، އެހެން މީހެއްގެ ފަރާތުންވެސް އަނީސާއަށް ފެނިފައެއް ނެތެވެ. އެވަރުގެ ބޭއަދަބީ ބަސްތަކަކުން ، އަބުރުކަތިލެވިގެން ދިޔަ އެއްވެސް މީހަކު އެޢާއިލާގައި އަދިއެއް ނެތެވެ. ދިލްނަޝީނަށް ދުވަހަކުވެސް ، އަނީސާ މަޢާފެއް ނުކުރާނެއެވެ. ކައިވެނިކޮށްގެން އެގެއިން ދިލްނަޝީން ނުކުމެގެން ދާއިރުވެސް އަދި އޭގެފަހުންވެސް ، ދިލްނަޝީނަކަށް އޭނާ މާފެއް ނުކުރާނެއެވެ. އޭނާގެ މޫނުދެކެން ނައިސް ، ދިލްނަޝީން ހުއްޓަސް ވަރިހަމައެވެ.
އެގެޔަށް އެ ޢާއިލާއަށް އުފަންވެ ، އެފަދަ އަންހެންދަރިޔަކު އޭނާއަށް އެލިބުނީ ކީއްވެގެން ހެއްޔެވެ؟ އަނީސާގެ ކޮންކުށެއް އޮވެގެން ހެއްޔެވެ ؟ ވިހެއުމުގެ ތެރޭގައި އަނީސާގެ ފުރާނަ ދިޔަނަމަވެސް މާރަނގަޅުވީސްކަމުގައި ، އަނީސާއަށް ބުނެވުނެވެ.
އަނީސާ ވާހަކަ ދެއްކިދެއްކިހެން ، ދިލްނަޝީންގެ ރުއިން ގަދަވަމުން ދިޔައެވެ. އޭނާގެ ކުށަކީ ކޮބައި ހެއްޔެވެ ؟ އޭނާއަށް ހިތްގައިމުވި ހިތްއެދުނު އިންސާނަކު ދެކެ ލޯބިވުން ހެއްޔެވެ ؟ އެހެންކަމަށް ވަންޏާ މިދުނިޔެއަކީ ހާދަ އަނިޔާވެރި ، ކެހިވެރި ތަނެކެވެ. ހިތުގައި އުފެދޭ ޖަޒުބާތުތައް ، ހުއްދަ ހޯދައިގެން އުފައްދާނީ ކިހިނެއް ހެއްޔެވެ ؟ އިންސާނަކަށް އޭނާގެ ހިތް ، އެވަރަށް ކޮންޓްރޯލް ކުރެވޭނީ ކޮންގޮތަކުން ހެއްޔެވެ ؟ ޙަމްޒާ ދެކެ އޭނާއަށް ލޯބިވެވުނީ ބޭ އިޚްތިޔާރުގައެވެ. އެކަމަށް ނަގަންޖެހޭ ހުއްދައެއް އޮންނާނެކަމަށް ހީކުރެވިފައި އޮތްނަމަ ، އެކަންވެސް ދިލްނަޝީން ކުރީހެވެ.
ދިލްނަޝީނަށް ކެތްނުވެގެން މަންމަގެ ދެފައިގައި ހިފައިލިއެވެ. އެވަގުތު ، އަނީސާގެ ދެފައި ފޮޅުވާލައި ، އޭނާއާ ދުރަށް ދިލްނަޝީން ދާށޭބުނެ ހަޅޭއްލަވައިގަތެވެ. ދިލްނަޝީން ، މަޑުމަޑުން ފަހަތަށްދަމުންދަމުންގޮސް އޭނާގެ އެނދުގައި ލައިގަތެވެ.
ދިލްނަޝީން އަނެއްކާވެސް ، މަންމަގެ ކިބައިން މާފަށް އެދުނެވެ. އޭނާއަށް އެކުރެވުނުކަމެއް ، އެހާ ވޭންދެނިވި ޙާލަތަކަށް ބަދަލުވެގެން ހިނގައިދާނެކަމަކަށް ، ފަހަރެއްގައިވެސް ، ޚިޔާލަށްވެސް ގެނެވިފައެއް ނެތެވެ. އޭނާއަށް އެ ކުރެވުނީ ވަރަށްބޮޑު ކުށެއްކަމަށް ދިލްނަޝީން އިޢުތިރާފް ވިއެވެ. އޭނާއަކީ ވަރަށް ވިޔާނުދާ އަދި އެހާމެ ބަދުނަސީބު އިންސާނެކެވެ.
އަނީސާ މޫނުމަތީ ފޮތިގަނޑު އަޅައިގެން އޮށޯތެވެ. ދިލްނަޝީން ، ރޮއެރޮއެފައި ، އާދޭސްކުރަމުން ދައްކަމުން ގެންދިޔަ އެއްވެސް ވާހަކައެއް އަޑުއަހާކަށް ، އަނީސާ ބޭނުމެއް ނޫނެވެ. އެނދުކައިރީ ބިތްވެފައި އިނދެ ، ދިލްނަޝީން ރޮމުން ގެންދިޔައެވެ.
ހެނދުނުގެ ނާސްތާގެ ވަގުތު ، މޭޒުދޮށުގައިތިބީ ހަމައެކަނި އައްވަލާއި އަނީސާއާ ދެމައިންނެވެ. އެކަކަށްވެސް ސައި ބޮވެނީކީ ނޫނެވެ. އަނގަޔަކުންވެސް ނުބުނެއެވެ. ޙައިދަރުގެ މަންމަޔާ ގުޅާފައި ، އެކައިވެނި އަވަސްކޮށްދޭން އެދުމަށް އައްވަލް ، އޭނާގެ މަންމަގެ ކިބައިން އެދުނެވެ. އަނީސާއަކީ ، ދިލްނަޝީންގެ މަންމަކަމަށްވާތީ ، ކައިވެނީގެ ވާހަކަ އިސްވެ ދައްކަން އަނީސާއަށް އުނދަގޫވިއެވެ. އެވާހަކަ ދައްކަން އެންމެ ރަނގަޅުވާނީ ، ޢާފިޔާކަމަށް އަނީސާއަށް ފެނުނެވެ. ޙައިދަރުގެ ކޮއްކޮ ސާރާއަކީ ، ޢާފިޔާގެ ފަހަރިއެވެ. އެކަން ކޮށްދިނުމަކީ ، ޢާފިޔާއަށް އުނދަގޫކަމެއްނޫނެވެ. ދިހައެއްޖެހީމާ ، ޢާފިޔާ ސާރާއަށް ފޯނުކޮށްފައި އެވާހަކަ ބުނާނެއެވެ.
އެވަގުތު ، ގޭގެ ބޭރުދޮރުގެ ރަނގަބީލު ވިއެވެ. ދޮރުހުޅުވަން ދިޔައީ އައްވަލެވެ. އައްވަލް ގޮސް ދޮރު ހުޅުވައިލިތަނުން ދިޔައީ ސިއްސައިގެންނެވެ. ގޭގެ ދޮރުމަތީ އެތިބީ ސިފައިންނެވެ. އައްވަލު އަޙްމަދަކީ އެއީތޯ ، ސިފައިންގެ ބޮޑަކަށް ހުރިމީހާ ސުއާލު ކުރިއެވެ. އޭގެ އިތުރަށް ، ދިލްނަޝީން އަޙްމަދުވެސް ގޭގައި އުޅޭތޯ ސުއާލު ކުރިއެވެ.
އައްވަލާއި ދިލްނަޝީން ، އެމީހުންނާއެކީ ސިފައިންގެޔަށް ދިއުމަށް އެންގުނެވެ. ދިލްނަޝީން އަންނައިރު ، ސިމްއާއެކީ އޭނާގެ ފޯނު ހިފައިގެން އައުމަށްވެސް ސިފައިން އެންގިއެވެ. އޭރަށް ، ތަޙުޤީޤަށް ފަސޭހަ ވާނެއެވެ. އަނީސާ ދުވަމުން އައިސް ، އެމީހުންނާ އެމައްސަލަޔާ އެއްވެސް ގުޅުމެއް ނެތްކަމަށްބުނެ ، އޭނާގެ ދެކުދިން ސިފައިންގެޔަށް ނުގެންދިއުމަށް ، ސިފައިންގެ ކިބައިން އެދުނެވެ.
" އެމީހުންގެ ދަރިފުޅު ފެނޭތޯ ދުޢާ ކުރާށެވެ ! އެހެންނޫނީ ، އެމައްސަލަ އެހާ ސަހަލުގޮތަކަށް ނުދާނެއެވެ. " ސިފައިންގެ އޮފިސަރު ބުންޏެވެ.
އަނީސާއާއި ޢާފިޔާ ގޮސް ، ދިލްނަޝީން ގޮވައިގެން އައުމުން ، ސިފައިން އެދެބެން ގޮވައިގެން ނައްޓައިލިއެވެ. އެދެބެން ، ސިފައިން ގެނދިޔައީ ، ބަޑިހިފައިގެންތިބި ސިފައިންގެ ޖިޕެއްގައެވެ. މުޅި އެހިސާބުގެ އެންމެން މަގުމައްޗަށް ނުކުމެ ކުޅިބަލަން ތިއްބެވެ. އެއީ ، އިންސާނީ ކަރާމާތުގެ ނަޒަރުން ބަލާއިރު ، އެ ޢާއިލާއަށް ލިބުނު ވަރަށްބޮޑު ނިކަމެތި އަދި ، ލަދުގަންނަންޖެހޭފަދަ ޙާލަތެކެވެ. އެއީ ، މުޅި އެއަވަށުގެ އެންމެންވެސް ދަންނަ ، އަބުރުވެރި ޢާއިލާއެކެވެ. ދިލްނަޝީނު އިނީ ކަންބޮޑުވެފައެވެ. އޭނާގެ ސަބަބުން ، އޭނާގެ ލޯބިވާ ބޭބެޔަށް އެލިބޭ ތަކުލީފަކީ ، އޭނާއަށް ކެތްކުރެވޭވަރުގެ ކަމެއްނޫނެވެ. އޮފީހަށް ދާން ޓައީއަޅައިގެން ބޭބެ ނުކުތްތަނުން އެޖެހުނީ ބަޑިހިފައިގެންތިބި ، ސިފައިންނާއެކީ ސިފައިންގެޔަށް ދާށެވެ.
" މަންމާއެވެ ! ބައްޕާއެވެ ! ހެޔޮ ނުވާނެއެވެ. ދިލްނަޝީންމެންނަށް ތިޔަހެން ނުހަދާށެވެ ! " ރިދާ ، އޭނާގެ މަންމައާއި ބައްޕަޔަށް އާދޭސް ކުރަމުން ގެންދިޔައެވެ.
ދިލްނަޝީނަކީ އެކަހަލަ ވިޔާނުދާ ކުއްޖެއްނޫންކަން ، އޭނާގެ މައިންބަފައިންނަށް ވިސްނައިދެވޭތޯ ، ރިދާ މަސައްކަތްކުރަމުން ގެންދިޔައެވެ. އެހެނަސް ، އެކަމުގެ އެއްވެސް ފައިދާއެއް ނުކުރިއެވެ. އެ މުޞީބާތް އެމީހުންނަށް އެކުރިމަތިވީ ، ރިދާގެ ސަބަބުންނެވެ. އެދެމީހުންގެ ގުޅުން އެހާ މައްޗަށް ނުދަނިސް ، މަންމަގާތު ބުނެލިނަމަ ، މިދުވަސް ދެކޭކަށް ނުޖެހޭނެއެވެ. ބުޝްރާ ، އެކަމުގެ ހުރިހާ އިލްޒާމެއް އަޅުވަމުން ގެންދިޔައީ ، ރިދާގެ ބޮލުގައެވެ. ބުޝްރާއަށް ބެލެވިފައި އޮތީ ، ދިލްނަޝީން އެގެޔަށް އެއަންނަނީ ހަމައެކަނި ރިދާގެ ރައްޓެހިކަމުގައި ކަމަށެވެ. ރިދާގެ ހެދުން ބޭނުންވެގެން ކަމަށެވެ. އެގޭގެ ވެރިކަން ބޭނުންވެގެން ހުވަފެން ދެކެން އައިކަމަކަށް ބުޝްރާއަށް ހީކުރެވިފައެއް ނެތެވެ.
ދިލްނަޝީންމެންގެޔަށް ސިފައިން ފޮނުވައިގެން އައްވަލްބޭބެއާއި ދިލްނަޝީން ، ސިފައިންގެޔަށް ގެންގޮސް ، އެމީހުންގެ އިންސާނީ ކަރާމާތަށާއި އަބުރަށް އެލިބުނު ، ގެއްލުމަކީ ، ރިދާއަށް ވަރަށްބޮޑު ކަމަކަށް ވިއެވެ. އެދެބެންނަށް އަނިޔާކޮށްގެން ވިޔަސް ، ޙަމްޒާގެ ޚަބަރެއް ހޯދުމަށް ، އިންސްޕެކްޓަރ ޖެނެރަލަށް ޞާދިޤްއޮތީ އަންގާފައެވެ.
ސިފައިންގެޔަށް ގެންގޮސް ، އެންމެ ފުރަތަމަވެސް ، އެމީހުން ބޭނުންވީ ، ދިލްނަޝީންގެ ފޯނު ޗެކްކުރާށެވެ. އޭނާ އަތަށް ފޯނުދިނީމަ ޕާސްވޯޑް ޖަހައިދޭނެކަމަށް ދިލްނަޝީން ބުނުމާއެކު ، އޭނާއަށް އަމުރުކުރެވޭކަމެއް ކުރުމަށް ބުނެ ، އޮފިސަރ ހަޅޭއްލަވައިގަތެވެ. ދިލްނަޝީން ، އޭނާގެ ފޯނުގެ ޕާސްވޯޑް ކިޔަމުން ގެންދިޔައެވެ. އެޗް އޭ އެމް އާހިސާބަށް ދިލްނަޝީނަށް ބުނެވުނުތަނާ ، ޒެޑް އޭ އޭބުނެ ، ޕާސްވޯޑް ފުރިހަމަކުރީ ސިފައިންގެ އޮފިސަރެވެ. ދިލްނަޝީން ލަދުން އިނދެ ޕާސްވޯޑް ކިޔަމުން ގެންދިޔައިރު ، އައްވަލް އިނީ އެއަށްވުރެ ބޮޑަށް ލަދުގެންފައެވެ.
ދިލްނަޝީނާއި ޙަމްޒާއާ ދެމެދު ބަދަލުކުރެވިފައިހުރި ، ލޯބީގެ މެސެޖްތައް ، އޮފިސަރ ކިޔަމުން ގެންދިޔައީ އަޑުގެ ނެތްތަނަށެވެ. އޭނާގެ ބޭނުމަކީ ، ދިލްނަޝީން ރޮއްވާލައި ، އައްވަލް ލަދުގަންނުވައިލުމެވެ. އެ މެސެޖްތައް ، އޮފިސަރ ކިޔަމުން ގެންދިޔަވަރަކަށް އައްވަލްގެ މުށް ކެވެމުންދިޔައެވެ. އޭނާއަށް ކެތްނުކުރެވިގެން ، މޭޒުމަތީ ބާރަށް ޖެހުމަށްފަހު ، އެހެން ނުހެދުމަށް ބުނެ އޮފިސަރާ ދިމާލަށް ހަޅޭއްލަވައިގަތެވެ.
އެމީހުންނަށް ނަފްސާނީގޮތުން އަނިޔާނުކޮށް ، ޖަލަށްލާން ބޭނުންކަމަށް ވަންޏާ ، އޭނާ ޖަލަށްލުމަށް އެދުނެވެ. އެހެންނަމަވެސް ، އެދެބެންގެ ޙާޟިރުގައި އެކިޔާ ލަދުވެތިބަސްތަކުން ، ދިލްނަޝީންގެ ހިތަށް އަނިޔާ ނުދިނުމަށް އެދި އޮފިސަރަށް އާދޭސް ކުރިއެވެ.
އެމީހުންގެ ޢިއްޒަތް ދާންވީވަރަށް އަދި ، ޚަރާބުވެގެން ނުދާކަމަށް ބުނެ އޮފިސަރ ، އައްވަލާދިމާލަށް ހަޅޭއްލަވައިގަތެވެ. ޞާދިޤްމެން އެދިގެން ، ސިފައިން އެ މައްސަލަ ބަލަމުން އެގެންދަނީ ވަރަށް ސިއްރުންނެވެ. އެހެން ނޫންނަމަ ، އެކަމުގެ މަޢުލޫމާތު މިހާރު އޮންނާނީ ނޫސްތަކުގެ ފަލަ ޝުރުޚީއަށްވެސް އަރާފައެވެ. ޝުރުޚީއަކަށް އޮންނާނީ ، " ކަރާޗީގެ މުއްސަނދި މަހުޖަނެއްގެ ފިރިހެންދަރިޔަކު ، ދިލްނަޝީންއެވެ ކިޔާ އާދައިގެ އަންހެން ކުއްޖެއްގެ ލޯބީގައިޖެހި ޤުރުބާން ވެއްޖެ " އޭކަމަށް ބުނެ ، އައްވަލް އިތުރަށް ލަދުގަންނުވަމުން ގެންދިޔައެވެ.
އިންސްޕެކްޓަރ ގާތަށް ރުޅިއައިސް ، މޭޒުމަތީ ޖެހުމަށްފަހު ، ދިލްނަޝީނާއި ޙަމްޒާގެ އެންމެ ފަހުގެ ވޮއިސްމެސެޖްތައް މުޅިތަނަށް އިއްވައިލިއެވެ. އެއީ ، ދިލްނަޝީންގެ މައްޗަށް ދަޢުވާ އުފުލޭވަރުގެ ހެއްކެއްކަމަށް ބުނެ ، އައްވަލް މައިތިރި ކުރިއެވެ. ޙަމްޒާ މަރުނުވެ ސަލާމަތުން ހުއްޓައި ފެނޭތޯ އެދެމީހުން ދުޢާކުރުމަށާއި ، ޙަމްޒާއަށް ދެރަގޮތެއް މެދުވެރި ވެއްޖެނަމަ ، ދިލްނަޝީން ޖަލުން ނުކުތުމުގެ ފުރުޞަތު ، ޞާދިޤް އަމީން ނުދޭނެކަމަށް ބުނެ ، ދިލްނަޝީން ބިރުގަންނުވައިލިއެވެ.
ކުލްސޫމް އިންތިޒާރުކުރަމުން އެގެންދަނީ ، ދިލްނަޝީންގެ މަންމަ ، އަނީސާގެ ފަރާތުން ހައިދަރުގެ ކައިވެނީގެ އާނބަސް އަންނާނެ ވަގުތަކަށެވެ. ގޭގައި ގެންގުޅޭ ނޯކަރު ގެނެސް ، އޭނާއަތަށް ލާރިކޮޅެއްލައިދީ ، އެކަން ހިންމަވައިދެއްވުން އެދި ، އޭނާވެސް ﷲ އަށް ދުޢާކޮށްދިނުމަށް ކުލްސޫމް އެދުނެވެ. ޙައިދަރުގެ ކައިވެނި ކުރެވުމުން ، ރަމްޝާއާއި އަޔާން ގޭތެރެ ހަޑިކުރީމާ ، އެތަންތަން ސާފުކޮށްދޭންޖެހޭނީ އެ ނޯކަރަށެވެ. ގޭގެ މަސައްކަތް ހައްތާ ގިނަވާނެއެވެ. ރަމްޝާއާއި އަޔާން އެއީ ކޮންބައެއްތޯ ނޯކަރު ސުއާލު ކުރިއެވެ.
އެއީ ޙައިދަރަށް ލިބޭ ، އޭނާގެ މާމަ ދެދަރިންކަމަށް ބުނެ ، ކުލްސޫމްގެ ހިތުގައި ، އޭނާގެ ދަރިފުޅަށްޓަކައި ކުރެވޭ ފޮނި އުއްމީދުތައް ހާމަ ކުރިއެވެ. ގޭތެރެޔަށް ވަންނަމުން އައި ޙައިދަރަށް ، މަންމަގެ ވާހަކަތައް ސާފުކޮށް އިވުނެވެ. އޭނާއަށްޓަކައި މަންމަ ކުރަމުން ގެންދާ އުއްމީދުތަކުގެ ފޮނިކަން ، ޙައިދަރަށް އިޙްސާސް ކުރެވުނެވެ. ( ނުނިމޭ )
Vv.reethi