ރައީސުލްޖުމްހޫރިއްޔާގެ އޮފީހުގެ ކުރީގެ ޗީފް ޓެކްނޮލޮޖީ އޮފިސަރ (ސީޓީއޯ) ހާމިދު ޝަފީޢު ނިޔާވެއްޖެއެވެ.
މައުލޫމާތު ލޮބިފައިވާގޮތުގައި އޭނާ ނިޔާވީ، ބޮޑު ބައްޔަކަށް އިންޑިއާގެ ބެންގަލޫރުގައި ކުރި އޮޕަރޭޝަނަކަށް ފަހުގައެވެ.
އޭނާ ނިޔާވުމުގެ ހިތާމައާއި ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ތައުޒިޔާ ވިދާޅުވެފައެވެ. އެ މެސެޖުގައި ވިދާޅުވީ ހާމިދު ޝަފީޢުއަކީ ރައީސުލްޖުމްހޫރިއްޔާގެ އޮފީހުގައި ދެ ފަހަރެއްގެ މަތީން ވަޒީފާ އަދާކުރައްވާފައިވާ ޚިދުމަތްތެރި ބޭފުޅެއް ކަމަށެވެ. އަދި ހާމިދު ނިޔާވުމުގެ ހިތާމައިގައި ބައިވެރިވެވަޑައިގެން، އެ މަރުޙޫމްގެ ޢާއިލާއަށް ތަޢުޒިޔާ ވިދާޅުވެ، ވަނީ ކެތްތެރިކަން މިންވަރުކޮށްދެއްވުން އެދި ދުޢާކުރައްވާފައެވެ.
ހާމިދު ނިޔާވުމާއި ގުޅިގެން ކުރީގެ ރައީސް އިބްރާހިމް މުޙައްމަދު ޞާލިޙުވެސް ވަނީ ތައުޒިޔާ ވިދާޅުވެފައެވެ. ރައީސް ސާލިޙު ވިދާޅުވީ ހާމިދަކީ ރާއްޖޭގައި އިންފޮމޭޝަން ޓެކްނޮލޮޖީގެ ދާއިރާއިން ނަންފަވާލެވޭ ބޭފުޅެއްކަމަށެވެ. އަދި އެދާއިރާއިން ޤައުމަށާއި ދައުލަތަށް ގިނަގުނަ އަގުހުރި ޚިދުމަތްތަކެއް ކޮށްދެއްވާފައިވާ ބޭފުޅެއް ކަމަށެވެ. އެމަނިކުފާނުވެސް ވަނީ ހާމިދަށް ހެޔޮ ދުޢާ ކޮށްދެއްވާފައެވެ.
ހާމިދު ފާހަގަވެގެން ގޮސްފައިވަނީ ނިމިދިޔަ ސަރުކާރުގައި ގިނަ ޚިދުމަތްތަކެއް ކޮށްދެއްވި ބޭފުޅެއްގެ ގޮތުގައެވެ. އެގޮތުން ކޯވިޑް-19 ތެރޭގައި ފާހަގަކޮށްލެވޭ ގިނަ ޚިދުމަތްތަކެއް ވަނީ ކޮށްދެއްވާފައެވެ. އެޗްޕީއޭއިން އޭރު ބޭނުންކުރި ޕޯޓަލް ތައްޔާރުކުރުމުގައި އެންމެ އިސް ދައުރެއް އަދާކުރެއްވި އެއް ބޭފުޅަކީ ހާމިދު ޝަފީއުއެވެ.
ހާމިދު ޝަފީއުއަކީ ކުރީގެ ފިޝަރީޒް މިނިސްޓަރު އަދި މިހާރު ހަޔަރ އެޑިޔުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަހުމަދު ޝަފީއުއާއި އެންޓި ކޮރަޕްޝަން ކޮމިޝަން، އޭސީސީގެ ކުރީގެ ރައީސް މުހައްމަދު ޝަފީއު އަދި އެޗްޕީއޭގެ ޑިރެކްޓަރ ޖެނެރަލް މައިމޫނާ އަބޫބަކުރުގެ ކޮއްކޮ ވެސް މެއެވެ.
انا لله وانااليه راجعون
اللهم اغفرله وارحمه وعافه واعف عنه