( 23 ޖުލައި 2024 ގައި ޝާއިޢުކުރި ބަޔާގުޅޭ )
( ޙަމްޒާ ދިއުމުން ، ގެޔަށްވަދެ ، ރިދާވެސް މަންމަޔަށް އެތައް އާދޭހެއް ކުރިއެވެ. ކޮންމެފަދަ ކަމެއްވެސް ، ޙަމްޒާ ކޮށްފާނެއެވެ. އެހެންނަމަވެސް ، ބުޝްރާ އޭނާގެ ގޮތެއް ދުލެއް ނުކުރުއެވެ. ޙަމްޒާގެ ކައިވެންޏަށް ، އެޢާއިލާއިން އެއްބަސްވާނެ އެއްވެސް ގޮތެއް ނޯންނާނެކަމަށް ، ބުޝްރާ ނިންމިއެވެ. )
ހެނދުނު ތެދުވެގެން ، ދިލްނަޝީން އައިސް ސިޓިންގރޫމުގައި މަޑުކޮށްލިއިރު ، ހެނދުނުގެ ނާސްތާކުރަން މަންމަ އިނެވެ. ދިލްނަޝީން އިނީ ހާސްވެފައެވެ. އިރުއިރުކޮޅުން ، ފޯނާކުޅެ ، މެސެޖެއް ކުރެއެވެ. މަންމަ ބުނީމަވެސް ، ބޭނުމެއްނެތޭ ބުނެ ނާސްތާކުރާކަށް ނައެވެ. ވާހަކައެއް ދައްކަން ބޭނުމޭ ބުނެ ، އަނީސާ އެތައް ވަރަކަށް ކިޔައިގެން ، ގަދަކަމުން ، ކާމޭޒުދޮށަށް ދިލްނަޝީން ގެނައެވެ. ކައިވެންޏާމެދު ، ދިލްނަޝީން ނިންމީ ކޮންގޮތަކަށްތޯ އަނީސާ ސުއާލު ކުރިއެވެ. އޭނާގެ ކައިވެންޏަށް އެ އައި ހުށަހެޅުމަކީ ، ދިލްނަޝީން އިތުރަށް ވިސްނަން ބޭނުންވާ ކަމެއްނޫނެވެ. އޭނާގެ ފަރާތުން އެކަމަށް އެއޮތީ އިންކާރު ކޮށްފައެވެ. އޭނާ އެކައިވެންޏެއް ނުކުރާނެއެވެ.
ދިލްނަޝީން ، އެއްބަސް ނުވިޔަސް ، އެކައިވެންޏަށް އާނއެކޭ ބުނުމަށް ، އަނީސާ ނިންމިކަން ހާމަކުރިއެވެ. އެ ކުރިމަތިވި މުޞީބާތަކީ ، ދިލްނަޝީންގެ ކޮންކުށެއް އޮވެގެން އައި މުޞީބާތެއް ހެއްޔެވެ ؟ އެއީ މުޞީބާތެއް ނޫނެވެ. ﷲ ގެ ރަޙުމަތް ފުޅެވެ. އެހެންކަމަށް ވަންޏާ ، ދިލްނަޝީން ކައިވެނި ކުރާނީ ކާކާތޯ އަނީސާ ސުއާލު ކުރިއެވެ.
އެއްވެސް މީހަކާ އިންނާކަށް ، ދިލްނަޝީން ބޭނުމެއް ނޫނެވެ. އެހެންނަމަވެސް ، އެކައިވެނި ކުރުވަން ، އަނީސާ ބޭނުމެވެ. އިތުރު ބަހަނާ ނުދައްކާ ، އެކަމަށް އެއްބަސްވުމަށް ، ދިލްނަޝީނަށް އަނީސާ އަމުރު ކުރިއެވެ.
ކުއްލިޔަކަށް ، ދިލްނަޝީން އިންތިޒާރުކޮށްގެން އިންފޯނު އައެވެ. ފޯނު ނެގުމާއެކު ، ޙަމްޒާ ބުނީ ، ކޮންމެވެސް ތާކަށްގޮސް އެމީހުން ވާހަކަ ދައްކައިލަން ބޭނުންވާ ކަމުގައެވެ. ފަރީއޭ ގޮވަމުން ، އަޑު ނުލިބޭކަމަށް ހަދައިގެން ހަލޯއޭ ކިޔަމުން ، ދިލްނަޝީން އެތަނުން ދުރަށް ޖެހިލިއެވެ. ފޯނުން ވާހަކަ ދައްކަމުން ، އަޑުނީވޭކަމަށް ހަމަދުން ، ދިލްނަޝީން ގޮސްވަނީ އޭނާގެ ކޮޓަރިއަށެވެ. ކޮޓަރިޔަށް ވަނުމާއެކު ، ޙަމްޒާއަށް ގޮވައިލާ ، ކަންކަންދަނީ ކިހިނެއްތޯ ސުއާލު ކުރިއެވެ.
ޙަމްޒާގެ މައިންބަފައިން ، އެމީހުންގެ ކައިވެންޏަށް އިންކާރު ކުރިވާހަކަ ބުނުމުން ، ދިލްނަޝީންގެ ބަސް ހުއްޓުނެވެ. އެކަމަކު ، އެކަމާ ދިލްނަޝީން ކަންބޮޑުވާނެކަމެއް ނެތެވެ. އެކައިވެންޏަށް އެއްބަސް ކުރުވައި ، ދިލްނަޝީންގެ ގެޔަށް ، އޭނާގެ މައިންބަފައިން ދާން ، މަޖުބޫރު ކުރުވުމަކީ ޙަމްޒާގެ ކަމެކެވެ. އެކަން އޭނާ ކުރާނެއެވެ. އެކަމާ ، ދިލްނަޝީން ހާސްވާނެ ކަމެއް ނެތެވެ.
" ޙަމްޒާއެވެ ! އެއްވެސް ކަމެއް ރަނގަޅުވާނީ ކިހިނެއް ހެއްޔެވެ ؟ ޙަމްޒާގެ މައިންބަފައިން ، އަހަރެމެންގެ ކައިވެންޏަށް އިންކާރު ކުރިއިރު ، އަހަރެންގެ މަންމަ އަނެއް ކައިވެންޏަށް އެއްބަސްވުމަށް ، އެބަ މަޖުބޫރު ކުރުވައެވެ. އަހަރެންނަށް މަންމަޔަށް ޖަވާބެއްނުދީ ، މާ ގިނައިރު ހުރެވޭނެ ހެއްނެއް ހިއެއްނުވެއެވެ. " ދިލްނަޝީން ބުނަމުން ގެންދިޔައެވެ.
އެކަން ޙައްލުކުރަން ކުޑަ ވަގުތުކޮޅެއް ނަގާނެއެވެ. އެކަމަކު ، ހުރިހާކަމެއް ރަނގަޅުވާނެއެވެ. އެކަމުގައި ޙަމްޒާ ، އޭނާގެ ގޮތެއް ދުލެއް ނުކުރާނެއެވެ. ދިލްނަޝީން ދެކެ އިންތިހާއަށް ލޯބިވާކަމަށާއި ޙަމްޒާއަށް އިތުބާރު ކުރުމަށް އޭނާ ދިލްނަޝީންގެ ކިބައިން އެދުނެވެ. ދިލްނަޝީނަށް ރޮވެމުން ދިޔައެވެ. އޭނާވެސް ޙަމްޒާދެކެ ލޯބިވާކަމަށް ބުނެ ، ފަހަތަށް އެނބުރިލިއިރު ، އޭނާގެ ކުރިމަތީ އެހުރީ އަނީސާ އެވެ. ދިލްނަޝީންގެ ވާހަކަ އެހިސާބުން ހުއްޓުނެވެ. އަދި ، ވަގުތުން ފޯނު ކަނޑައިލިއެވެ.
ދިލްނަޝީން ހުރީ ހަދާނެގޮތް ބޮޑުވެފައެވެ. ދެލޯބޮޑުވެ ، ތަންމިނަށް އަނގަހުޅުވިފައެވެ. އޭނާގެ ކަކުލުން ވާގިދޫވާހެން ހީވިއެވެ. މަންމަގެ ފަރާތުން ، ދެން އޭނާއަށް ކުރިމަތިވާނީ ކޮންފަދަ އަދަބެއްކަމެއްވެސް ނޭނގެއެވެ. އަނީސާ ، ހަށަންބަނދެގެންހުރެ ، ދިލްނަޝީނާ ގާތަށް ޖެހިލިއެވެ.
" ދަރިންނަށް ، މައިންބަފައިންނަށް އޮޅުވައިލުމަށްޓަކައި ، މަކަރުހަދައި ، ޑްރާމާ ކުޅެވޭނީ ތިހާވަރަށެވެ. ތި ވާހަކަ ދެއްކީ ކާކާ ހެއްޔެވެ ؟ " އަނީސާ ސުއާލު ކުރިއެވެ.
އޭނާ ވާހަކަ އެ ދެއްކީ ، ރިދާގެ ބޭބެ ޙަމްޒާ އާ ކަމުގައި މަންމަގާތު ބުނާކަށް ، ދިލްނަޝީން އެއްވެސް ޖެހިލުމެއް ނުވިއެވެ.
އަނީސާ އިތުރު ވާހަކައެއް ނުދައްކައެވެ. ފޯނުދޭށޭ ބުނެ ، ދިލްނަޝީންގެ އަތުން ފޯނު އަތުލިއެވެ. އިތުރަށް ބުނިހާވެސް ވާހަކަޔަކީ ، ދިލްނަޝީންގެ ބޭބެ ގެޔަށް އައިހާ އަވަހަކަށް ، ހައިދަރާއި ދިލްނަޝީންގެ ކައިވެންޏަށް ، އެމީހުން ރުހިގެންތިބިކަން ، ހައިދަރުގެ މަންމަޔަށް އަންގާނެ ކަމުގައެވެ.
އެކަން އެގޮތަށް ނުކުރުމަށް ދިންނަޝީން ކުރަމުންގެންދިޔަ އާދޭހުގެ އަޑެއް އަނީސާއެއް ނާހައެވެ. ޙަމްޒާމެންފަދަ ، މުއްސަނދިން އެގެޔަކަށް ނާންނާނެއެވެ. އެމީހުންނާ އެއްފެންވަރަކުން ދައްކަން ، އެގޭގައި އޮތީ ކޮން އެއްޗެއް ހެއްޔެވެ ؟ އެންމެ ދެރަވެގެން ، ދިލްނަޝީން ލައިގެން މިހާރު އެހުރީވެސް ، އެމީހުންދިން ހެދުމެކެވެ.
ހައިދަރުގެ ފެރާތުން އޭނާގެ ކައިވެންޏަށް އެދުނުގޮތަށް ، ޙަމްޒާގެ ފަރާތުންވެސް ، އޭނާގެ ކައިވެންޏަށް އެދި އެމީހުންނަށް ނާދެވެންވީ ކީއްވެތޯ ، މަންމަޔާ ، ދިލްނަޝީން ސުއާލު ކުރިއެވެ. އަދި އޭނާއަށް އިތުރަށް ވަގުތުކޮޅެއް ދިނުމަށް އެދުނެވެ. އެކަހަލަ މުއްސަނދި ފިރިހެންކުދިންގެ ގޮތަކީ ، ރީތި އަންހެންކުދިން ހައްލައިލައިގެން ، އިންނާނަމޭ ކިޔައިގެން އެމީހުންގެ ބޭނުންތައް ފުއްދުމަށް ބޭތިއްބުންކަން ވިސްނައިދެވޭތޯ އަނީސާ ވަރަށް މަސައްކަތް ކުރިއެވެ. އަދި ، އެންމެފަހުން އެފަދަ ކުދިން ކައިވެނިކުރާނީ ، އެކުދިންގެ މައިނންބަފައިން ބޭނުންވާ އަންހެންކުއްޖަކާއެވެ. އެފަދަ ހުރިހާ ކަމަކުން ، ހުރިހާ ގެއްލުމެއް ލިބޭނީ ހަމައެކަނި އަންހެންކުދިންނަށެވެ. އެއީ ދިލްނަޝީން މެންނަށް ވިސްނައިގަންނަން އުނދަގޫވާނެ ކަންކަމެވެ.
" މަންމާއެވެ ! ޙަމްޒާގެ ޢާއިލާގެ މީހުން އެގެޔަށް ފޮނުވާނެކަމަށް ، ޙަމްޒާ ވަނީ އަހަރެންނަށް ވަޢުދު ވެފައެވެ. އެމީހުން މިގެޔަށް އައިސް ، އަހަރެންގެ ކައިވެންޏަށް މަންމަގާތު އެދޭނެއެވެ. ކުޑަ ވަގުތުކޮޅެއް އަހަރެންނަށް ދޭށެވެ. އާދޭސް ކޮށްފައި ބުނަމެވެ. " ދިލްނަޝީން އޭނާގެ މަންމަގާތު ރޮމުންރޮމުން އާދޭސް ކުރަމުން ގެންދިޔައެވެ.
އަނީސާގެ ޖަވާބަކަށްވީ ނޫނެކޭއެވެ. ހައިދަރުގެ މަންމަ ، އަނީސާގެ ޖަވާބަކަށް އެދި ފޯނުކުރިހާ އަވަހަކަށް ، އެކައިވެންޏަށް އެޢާއިލާއިން ރުހިތިބި ވާހަކަ ބުނަން އަނީސާ ނިންމިއެވެ. އޭގެ ކުރިން ، ޙަމްޒާމެންގެ ޢާއިލާއިން އައިއްސިއްޔާ ، އެކަމާމެދު އަނީސާމެން އިތުރަށް ވިސްނާނެއެވެ. ޙަމްޒާގެ ޢާއިލާގެ މީހުން ނައިސް އޮއްވައި ، ޙައިދަރުގެ މަންމަ ފޯނުކޮށްފިއްޔާ ، ހައިދަރާއި ދިލްނަޝީންގެ ކައިވެންޏަށް އެމީހުން އާނއެކޭ ބުނަން ، އަނީސާ ނިންމިއެވެ.
ދިލްނަޝީންގެ ފޯނު އަތުލައިގެން ގޮސް ، އަނީސާގެ އަލަމާރިޔަށް ލައި ތަޅުލިއެވެ. އެހެން ނުހެދުމަށް ދިލްނަޝީން އެދެމުން ގެންދިޔައެވެ. ޙަމްޒާ ގުޅިޔަސް ، ދިލްނަޝީނަކަށް ޖަވާބެއް ނުދެވޭނެއެވެ. ދެމީހުންކުރެ މީހަކަށް ވާނުވާވެސް އަންގައެއް ނުލެވޭނެއެވެ. އެހެނަސް ، އަނީސާ އޭނާގެ ގޮތެއް ދުލެއް ނުކުރިއެވެ. އެމީހުން ގުޅަންޖެހޭނީ އަނީސާއަށް ކަމަށާއި ، ދިލްނަޝީނަށް ނޫންކަމަށް ބުނެ ، އަލަމާރި ތަޅުލާފައި ކޮޓަރިން ބޭރަށް ނުކުތެވެ.
ދިލްނަޝީންގެ ހިތަށް ލިބުނު ތަދާއި ތަކުލީފަށް ކެތް ނުވެގެން ، އެނދުމައްޗަށް ތިރިވިއެވެ. އެހާ ވޭނާއި ހިތްދަތިކަން ލިބޭ ހިތެއް އޭނާގެ ހަށިތެރޭ ނުއޮވެ ، ނުކުމެގެން ދިއުންވެސް މާރަނގަޅުވާނެއެވެ. މިހާރު ރޭވެ ، އަނދިރިވެސް ވެއްޖެއެވެ. ކަމެއް ކުރާކަށް އެރެޔަކު މިހާރަކު ވަގުތެއް ނެތެވެ. ދިލްނަޝީނަށް ޙަމްޒާއާ ގުޅައިލެވޭނެ އެއްވެސް ގޮތެއް ނެތެވެ.
އެރޭގެ އިރާކޮޅު ، ޙަމްޒާމެންގެ ގޭގައި އޮތީ ހާސްކަމާއި ބިރުވެރިކަމެވެ. ހެނދުނުއްސުރެ ފެށިގެން ޙަމްޒާގެ ޚަބަރެއް ނުވެއެވެ. ބުޝްރާވެސް ދެރަވެގެން ރޮމުން ގެންދިޔައިރު ، އަމީން ޞާދިޤް އަދިވެސް އޮފީހަކުން ނާދެއެވެ. ރިދާގެ ރުއިމަކަށްވެސް ހުއްޓުމެއް ނާދެއެވެ. ރިދާއަކަށް ދިލްނަޝީނަކާވެސް އަދި ޙަމްޒާއަކާވެސް ނުގުޅެއެވެ. އެދެމީހުންގެ ފޯނުވެސް އޮތީ ނިއްވައިލާފައެވެ. އެދެމައިން ތިބީ ، ހާސްވެގެންގޮސް ، ހަދާނެގޮތް ބޮޑުވެފައެވެ.
އެންމެފަހުން ، ބުޝްރާ އޭނާގެ ފިރިމީހާ އަމީން ޞާދިޤާ ގުޅާފައި ، ހެނދުނު އެގެއިން ނިކުމެގެން ޙަމްޒާ ދިޔަފަހުން އަދިވެސް އެއްވެސް ޚަބަރެއްނުވާކަން އަންގައިފިއެވެ. އެތައް މަސައްކަތެއް ކޮށްގެންވެސް ، ޙަމްޒާ ދިޔަތަނެއް ނޭނގުނެވެ. ޙަމްޒާގެ ރައްޓެހިންނަކަށްވެސް ، އޭނާވީތަނެއް ނޭނގެއެވެ.
ޞާދިޤް ހީކޮށްގެންހުރީ ، ޙަމްޒާ ރުޅިއައިސް ، ގެއިން ނުކުމެގެން ހެނދުނު ދިޔަޔަސް ، ރުޅިމަޑުވީމާ ހަވީރު އެނބުރި ގެޔަށް އަންނާނެ ކަމަށެވެ. އެހިސާބުން ، ޞާދިޤްވެސް ކަންބޮޑުވިއެވެ. އޭނާގެ ދަރިފުޅު ، އޭނާއަކަށް ދަހެއް ނުވިއެވެ. ޑްރައިވަރުގާތު ބުނެގެން ރަށުގެ އެތަންމިތަން ހޯދުމުގެ މަސައއްކަތް ޞާދިޤްވެސް ފެއްޓިއެވެ. އެމަސައްކަތުގައި އެތައް އިރެއް ހޭދަވިފަހުން ، އަތިރިމަތީގެ އެއްފަރާތުގައި ޙަމްޒާގެ ކާރުބާއްވާފައި އޮތްތަން ފެނިއްޖެއެވެ. ކާރުގެ ޑްރައިވަރު ޝީޓާދިމާލަށްހުރި ދޮރު ހުރީ ތަންމިނަށް ހުޅުވާފައެވެ. އެވާނީ ، ދޮރު ހުޅުވިގޮތަށް ލައްޕާނުލައި ، ޙަމްޒާ އެދިޔަތާކަށް ދިޔައީ ކަމަށެވެ. ޞާދިޤްވެސް އެތައްފަހަރަކު ، ޙަމްޒާއާ ގުޅިއެވެ. ފޯނު އޮތީ ނިއްވައިލާފައެވެ.
ޞާދިޤް ، ގެޔަށް އައިސްވަތްއިރު ، ބުޝްރާއާއި ރިދާތިބީ ރޯށެވެ. ޙަމްޒާގެ ޚަބަރެއް ނުވިވާހަކަ ބުނިތަނުން ، އެދެމައިންގެ ރުއިމުގެ އަޑު ބާރުވިއެވެ.
ދިލްނަޝީންގެ ގެ ހުންނަތަން ރިދާއަށް އެނގޭތޯ ، ޞާދިޤް ސުއާލުކުރިއެވެ. އެއީ ، ދިލްނަޝީން ގެޔަށް ލުމަށްޓަކައި ، ޢާންމުކޮށް ރިދާ ގޮސްއުޅޭ ގެޔެކެވެ. އެގޭ ޑްރައިވަރުންނަށްވެސް އެގެ ހުންނަތަން އެނގޭނެއެވެ. ދިލްނަޝީންގެ ގެޔަށް ދިއުމަށް ޞާދިޤް ނިންމިއެވެ.
ދިލްނަޝީންގެ ބޭބެ އައްވަލް ހުރީ ، ގޭގައި ހުންނަ ފޮތްއަލަމާރިއެއްގެ ކައިރީ ހުއްޓިލައިގެން ، ކިޔައިލާނެ ފޮތެއް ހޯދާށެވެ. ކުއްލިޔަކަށް ، ވަރަށް އަވަސް އަވަހަށް ، ގޭގެ ރަނގަބީލު ޖެހެން ފެށުނެވެ. ރޭގަނޑު އެހާ ލަސްގަޑިއެއްގައި ، ކެތްމަދުވެގެން އުޅެނީ ކާކުހޭ ކިޔަމުން ، އައްވަލް ގޮސް ދޮރު ހުޅުވައިލިއެވެ. ކުރިމަތީ ތިބީ ކޮންބަޔެއްކަމެއް އައްވަލަކަށް ނޭނގެއެވެ. އެކަމަކު ، އެތަނުން އެކަކު އައްވަލަށް އެނގެއެވެ. އެއީ ރިދާއެވެ. ދިލްނަޝީންގެ ބެސްޓް ފްރެންޑެވެ.
އައްވަލް ބޭބޭއޭ ބުނެ ސަލާމް ގޮވައިލުމަށްފަހު ، ވާހަކަ ދެއްކީ ރިދާއެވެ. އަދި ، އޭނާގެ ބައްޕައާއި މަންމަ ، އައްވަލަށް ތަޢާރުފް ކޮށްދިނެވެ. އެމީހުން އެއައީ ދިލްނަޝީނާ ބައްދަލު ކުރާށެވެ. ދިލްނަޝީން ގޭގައި އުޅޭތޯ ، ރިދާ ސުއާލު ކުރިއެވެ.
ދިލްނަޝީން ގޭގައި އުޅޭކަމަށްބުނެ ، ގޭތެރެޔަށް އެމީހުން ވައްދައި އިށީނދެލުމަށް އެދުނެވެ. އަދި ، އެމީހުން އެއައީ ދިލްނަޝީނާ ބައްދަލު ކޮށްލުމަށް ކަމަށާއި ، އެއީ ރިދާގެ މަންމައާއި ބައްޕަކަމަށް ބުނެ ، މަންމަޔަށް އެމީހުން ތަޢާރުފް ކޮށްދިނެވެ.
ރިދާ އައިވާހަކަ ބުނެ ، ދިލްނަޝީނަށް ގޮވައިލީ އައްވަލެވެ. އަނީސާހުރީ ހާސްވެފައެވެ. ދިލްނަޝީނަށް ރިދާއައިވާހަކަ އިވުމާއެކު ، މޫނުމަތި އަލިވެގެންދިޔައެވެ. އޭރުވެސް ، ފަހަރިޔަށް ދިލްނަޝީން ސާފުކޮށްދެމުން ގެންދިޔައީ ، އޭނާ ޙައިދަރުގެ ހުށަހެޅުމަށް އިންކާރު ކުރި ސަބަބުތަކެވެ. އެންމެ މުހިންމު ސަބަބު އެނގޭނީ ، ތިރިޔަށްދިޔައިމާކަމަށް ބުނެ ، ފަހަރި ގޮވައިގެން ދިލްނަޝީން ތިރިޔަށް ފޭބިއެވެ. އޭނާގެ ޙަރަކާތްތައް ހުރީ އަވަސް ވެފައެވެ. އަވަހަށް ފައިބަން އުޅެންހަދައިގެން ސިޑިމަތިން ނުވެއްޓުނީ ކިރިޔާއެވެ.
އެމީހުން ބޭނުންވަނީ ކޮން އެއްޗެއްތޯ އައްވަލް ސުއާލު ކުރިއެވެ. އެގޭގައި އެހާމޮޅު އެއްޗެއް ނެތަސް ، ސައިތަށްޓެއް ނުވަތަ ކޮފީތަށްޓެއްނަމަވެސް އެމީހުންނަށް ދެވިދާނެއެވެ.
" އަހަރެންގެ ފިރިހެން ދަރިފުޅެވެ. " ޞާދިޤް އެބުނި އެއްޗަކުން ، އައްވަލަށްވެސް އަދި އަނީސާއަށްވެސް ޙައިރާންކަން ލިބުނެވެ.
ރިދާ ތިރިޔަށް އައީ ، ފަތިހަށް ފޮޅޭ ފިނިފެންމަލެއްހެން ފޮޅެމުން އުފަލުން ގޮސް ، ހިނިތުންވަމުންނެވެ. އެމީހުންނަށް ސަލާމްކޮށްލައި ، ފަހަރަކު މީހަކާ ދިމާލަށް ބަލައިލިއެވެ. ކޮލުދަތަށް ދަންދެން ފެންނަވަރަށް ، ރިދާ ހިނިތުންވެފައިހުރެ ، އެންމެންނަށް ވަކިވަކިން ބަލައިލިނަމަވެސް ، އެތާތިބި އެކަކުވެސް ޖަވާބުގައި ، ރިދާއާ ދިމާލަށް ހިނިތުންވެލިތަނެއް ނުފެނުނެވެ. އެންމެންގެ މޫނުމަތިންވެސް ދިލްނަޝީނަށް ފެނުނީ ހާސްކަމާއި ކަންބޮޑުވުމެވެ. އެކަމަކުވެސް ، ރިދާއާ އޭނާގެ މޫނުމަތީހުރި އުފާވެރިކަން އެހުރިގޮތަށް ހުށްޓެވެ. އެއީ ، ޙަމްޒާ އޭނާގެ ވަޢުދު ފުއްދުމުން ދިލްނަޝީނަށް ލިބުނު އުފާވެރި ކަމެކެވެ. ޙަމްޒާ ވަޢުދުވިގޮތަށް ، އޭނާގެ މައިންބަފައިން އެތިބީ ، ދިލްނަޝީންގެ ގެޔަށް އައިއްސައެވެ. ދިލްނަޝީންގެ ބެސްޓް ފްރެންޑް ، ރިދާވެސް ޙަމްޒާގެ މައިންބަފައިންނާއެކީ އައިމަ ވަކިން ބޮޑަށް އޭނާހުރީ އުފާވެފައެވެ. އަލްޙަމްދު ލިﷲ އޭ ބުނެ ދިލްނަޝީން ، އޭނާގެ ދެއަތް މައްޗަށް އުފުލައިލިއެވެ. (ނުނިމޭ)
ވަރަށް ރީތި ޝުކުަރަން