ރާއްޖޭގައި ބާއްވާ އެންމެބޮޑު ދެ އިންތިހާބު އެކުއެކީގައި ބޭއްވުމުގެ ވިސްނުންފުޅު އެބަހުރިކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޕީއެންސީގެ ހަރުގެ، ހ. ވެޔޮވިލާގައި މިހާރު ކުރިއަށްދާ ހަރުގެ ޖަލްސާގައި ވާހަކަ ދައްކަވަމުންނެވެ.
ރައީސުލްޖުމްހޫރިއްޔާ ވިދާޅުވީ މި ދެ އިންތިހާބު އެކު އެކީގައި ބާއްވާ ނަމަ ރައްޔިތުންނަށް ވެސް އެތައް ފަސޭހައެއް ލިބިގެން ދާނެ ކަމަށެވެ. އަދި ވެރިކަމަށް ބަޔަކު ހޮވާ އިރާއި މަޖިލީހަށް މެންބަރުން ހޮވާ އިރު ވެސް ރައްޔިތުން ބެނުންވާ ގޮތަށް އެކަން އެކުއެކީގައި ކުރެވޭނެ ކަމަށް ވެސް ރައީސް ވިދާޅުވިއެވެ.
އެހެންކަމުން ހަރަދުގެ ގޮތުން ބެލިނަމަވެސް މި ދެ އިންތިހާބު އެކުއެކީގައި ބޭއްވުމަކީ އެންމެ ރަނގަޅު ގޮތް ކަމުގައި ގަބޫލުފުޅު ކުރައްވާ ކަމަށް ވިދާޅުވިއެވެ.
މި ބަދަލު ގެންނަ ނަމަ ގާނޫނު އަސާސީއަށް އިސްލާހު ގެންނަން ޖެހޭ ކަމަށާއި އެ އިސްލާހު ގެނެވޭނީ ރައްޔިތުންގެ ފެންނަ ނުފެންނަ ވޯޓެއް ނަގައިގެން ކަމަށް ރައީސް ވިދާޅުވިއެވެ. އަދި ރައްޔިތުން އެގޮތަށް ނިންމައިފިއްޔާ ގާނޫނު އަސާސީއަށް އިސްލާހު ގެނެސް 2028 ގައި މި ދެ އިންތިހާބު އެކުއެކީގައި ބޭއްވުމަކީ އެންމެ ރަނގަޅު ގޮތް ކަމަށް އެމަނިކުފާނު ވިދާޅުވިއެވެ.
