ފަލްސަފާ (99)

( 20  ޖޫން 2024 ގައި ޝާއިޢުކުރި ބަޔާގުޅޭ )

ބައްޕަޔާ ބައްދަލުކޮށްލުމަށް ނޫރުއައުމުން ، އޭނާގެ ބައްޕަ ވަޞީމް ހުރީ ވަރަށް އުފާވެފައެވެ. ނޫރު ފެނުމާއެކު ، ވަޞީމަށް ދެއްކުނީ ނޫރުއެހާ ހިތްހަމަ ޖެހޭކަހަލަ ވާހަކަތަކެއްނޫނެވެ. ނޫރު ލޮލަށް ނުފެނި މަރުވެދާނެތީ ވަޞީމް ހުންނަނީ ކަންބޮޑުވެފައެވެ. އެކަހަލަ ވާހަކަ ނުދެއްކުމަށް ނޫރު ބުންޏެވެ. ރައިދާ ބުނިގޮތުގައި މިފަހަކަށް އައިސް ބައްޕަ ހުންނަނީ ވަރަށް ޖަޒުބާތީ ވެފައެވެ. ޚާއްޞަކޮށް ، ނޫރުގެ ވާހަކަ ދެކެވޭ އިރެއްގައި ބައްޕަ ވަރަށް ދެރަ ވެއެވެ. ކައިރީގައި ނޫރު ފެންނަން ނެތީމާ ކަމަށް ވެދާނެއެވެ. ބައްޕަ އެހާބޮޑަށް ނޫރުއަށް ބޭނުންވާއިރު ، އެރޭ ގޭގައި މަޑުކޮށްލުމަށް ރައިދާ ، ނޫރުގެ ކިބައިން އެދުނެވެ.

ނޫރުއަކީ މިހާރު ވަރަށް ޒިންމާދާރު މީހެކެވެ. ބަލަހައްޓަންޖެހޭ ގެޔެއް އެބަހުށްޓެވެ. އޮފީހެއް އެބަ ހިންގައެވެ. ފިރިމީހާއަށް ޚިދުމަތްކުރަން ޖެހެއެވެ. އެކަހަލަ ވާހަކައެއް ދެއްކުމުގެ ކުރިން ، ނޫރުއަށް ހުސްވަގުތުކޮޅެއް އެބައޮތްތޯ އަހައިލަން ޖެހޭނެކަމަށް ވަޞީމު ބުންޏެވެ. ވަޞީމް އެހެން ބުނުމާއެކު ، ނޫރުގެ ކުރިމަތީ ނިއުޅިގެން އެދިޔައީ ، އޭނާގެ މުއްސަނދި ފިރިމީހާ ، އޭނާއާ ދިމާއަށް ގޮވި އެއްޗިއްސާއި އޭނާ ވައްޓާލާފައިވާ ދަރަޖައެވެ. އެކަން ހަނދާން ނައްތާލާފައި ، އެރޭ އެގޭގައި މަޑުކޮށްލައި ބައްޕަމެންނާއެކީ ހުންނާނެކަމަށް ނޫރު ބުންޏެވެ. ވަޞީމަށް އެއީ އެހާ ފަސޭހައިން ޤަބޫލުކުރެވުނު ކަމެއްނޫނެވެ. އޭނާގެ ހިތުގައިވާ ޖަޒުބާތުތައް ނޫރުއަށް ކިޔައިދިނެވެ.

" ދަރިފުޅާއެވެ ! ދިރިއުޅުމުގެ ކާމިޔާބީއަކީ ، ވަރަށް އުނދަގުލުން ޙާޞިލްވާ އެއްޗެކެވެ. ދިރިއުޅުން ބާއްޖަވެރި ކުރުމަށް ކުރާ މަސައްކަތުގައި ، ލޯބިވާމީހުންނާ ވަކިވެ ، ދުރުގައި ހުންނަން ޖެހިދާނެއެވެ. ބައްދަލުނުވެ ގިނަދުވަސް ވެދާނެއެވެ. އެމީހުންގެ ޚަބަރެއް ދަބަރެއް ނުވިޔަސް ، އެންމެ ރަނގަޅުވެސް ވެދާނެއެވެ. ދަރިފުޅަކީ ވަރަށް ކެތްތެރި ، ހިތްވަރުގަދަ އިންސާނަކަށް ވާން ޖެހޭނެއެވެ. " ވަޞީމު ބުންޏެވެ.

ނޫރުގެ ދެބަފައިން ވަރަށްގިނައިރުވަންދެން ވާހަކަ ދައްކަން ތިއްބެވެ. އެމީހުން ތިބިތަނުން ތެދުވީ ، ރޭގަނޑު ކާންހަދާފައި ރައިދާ ގޮވީމައެވެ.

ހެނދުނު އޮފީހަށްދިޔަތަނުން ، އަމީން އިޙްސާން ބުނެގެން ، މުރުތަޟާ ، އިޙްސާންގެ ކެބިންއަށް ދިޔައެވެ. މުރުތަޟާ ވަދެ ސަލާމް ގޮވައިލިއެވެ. ސަލާމް ބަލައިގަތުމަށްފަހު ، އެދުވަހުގެ ހެނދުނަށް ތައްޔާރުކުރުމަށް ، މުރުތަޟާއަށް އަންގާފައިވާ ރިޕޯޓާ ބެހޭގޮތުން އިޙްސާން ސުއާލު ކުރިއެވެ.  ރިޕޯޓް މިހާރު ހަމަ ނިމެނީކަމަށް ބުނެ ، ކުރިމަތީގައިހުރި ގޮނޑީގައި އިށީނުމަށް މުރުތަޟާ ގުދުވެލިއެވެ. އެހެނަސް ، މުރުތަޟާ އިށީންނަން ނުބުނާކަމަށް ބުނެ ، އިޙްސާން އޭނާ ހުއްޓުވިއެވެ.

އިޙްސާން އޭނާއާ ދޭތެރޭ ޢަމަލްކުރަމުން އެގެންދާ ގޮތުގެ ސަބަބު ސާފުކޮށްދިނުމަށް މުރުތަޟާ އެދުނެވެ. އިޙްސާން ބުނި ރިޕޯޓް ނުގެނެސްދިނަސް ، އެރިޕޯޓް އެއޮތީ ނިމިފައެވެ. އޭނާ އޮފީހަށް އައިސް އެވަނީ ، ހަމަ ދެންމެއެވެ. ކުރިންވެސް ، އޭނާއާ ކުންފުނިން ޙަވާލުކުރި ކޮންމެ މަސައްކަތެއް އޮތީ ގަޑިޔަށް ނިންމާފައެވެ. ރޭގަނޑު ގެޔަށްނުގޮސް ، އޮފީހުގައި ވަގުތު ހޭދަކޮށް ، ކޮންމެ މަސައްކަތެއްވެސް އޮތީ ، ވަގުތުން ނިންމާފައެވެ. އޭނާދެކެ ، އިޙްސާން އެހާ ރުޅިއަންނަންޖެހޭ ސަބަބަކީ ކޮބައިތޯ ، މުރުތަޟާ ސުއާލު ކުރިއެވެ.

މުރުތަޟާދެކެ އިޙްސާން ރުޅިއަންނަންޖެހޭ ސަބަބު ، އެންމެ ރަނގަޅަށް އެނގޭނީ މުރުތަޟާއަށްކަމުގައި އިޙްސާން ބުންޏެވެ. އެހެންކަމަށް ވަންޏާ ، އޭނާގެ މައްޗަށް އޮތް ޙުކުމަކީ ކޮބައިތޯ ، މުރުތަޟާ ސުއާލު ކުރިއެވެ.

" މުރުތަޟާއަށް ކަނޑައެޅިފައިވާ ޙުދޫދުގެ ތެރޭގައި ހުންނާށެވެ ! އަމިއްލަ ޙައިޞިއްޔަތު ދެނެގަނެ ، މާބޮޑުވެގެން ، ފެންމައްޗަށް އަރައިގެން ނޫޅޭށެވެ ! އެހެން ނޫންކަމަށްވަންޏާ ، މިކުންފުނީގައި ކީއްކުރަން ހެއްޔެވެ ؟ ކަރާޗީގައިވެސް ، މުރުތަޟާ ދިރިއުޅުނަކަ ނުދޭނަމެވެ. ނޫރުލްޢައިނުއަކީ ، އެއްޒަމާނެއްގައި މުރުތަޟާއާ ކައިވެނި ކުރެވެން އުޅުނު އަންހެންކުއްޖެއްކަން ހަނދާން ނައްތައިލާށެވެ ! ނޫރުލްޢައިނަކީ ، މުރުތަޟާގެ ސާހިބުމީހާގެ އަންހެނުންކަން ، އަބަދުވެސް ހަނދާން ބަހައްޓާށެވެ ! " އިޙްސާން ބުންޏެވެ.

އިޙްސާން ދައްކަމުންގެންދިޔަ ، ތާކުންތާކު ނުޖެހޭ ވާހަކަތައް އަޑުއަހަން ، މުރުތަޟާހުރީ ޙައިރާން ވެފައެވެ. އަމީން އިޙްސާނަށް ދޮގު މަޢުލޫމާތުދީ ، މުރުތަޟާއާއި ނޫރުލްޢައިނުގެ ނުބައި ތަޞައްވުރެއް ދެއްކީ ކާކުކަމެއް ، މުރުތަޟާއަކަށް ނޭނގެއެވެ. މުރުތަޟާއަށް އެނގޭހާވެސް އެއްޗަކީ ، މިސިޒް އަމީން އިޙްސާނަކީ ، އޭނާގެ ކުރިމަތީގައި ، ވަރަށް ޤަދަރުވެރި ، އިޙްތިރާމް ލިބިގެންވާ ޝަޚުޞެއްކަމެވެ.

އިޙްސާން އޭނާގެ ވާހަކަ ބުނެ އިއްވައިފިކަމަށް ބުންޏެވެ. އިތުރަށް އޭނާއަށް ސާފުކޮށްދޭންޖެހޭ އެއްޗެއް ނެތެވެ. ނިންމާފަ އޮތް ރިޕޯޓް އޭނާގެ މޭޒުމައްޗަށް ގެނެސްދިނުމަށް އިޙްސާން ބުނީ ، ރުޅިވެރިކަމާއެކު ، ދަތްކުނޑި ވިކައިގެން ހުރެއެވެ. އޭނާގެ ކުންފުނީގައި ، މުރުތަޟާގެ މަޤާމް ދެމިއޮތުން ބިނާވެފައި އޮންނާނީ އެރިޕޯޓްގެ މައްޗަށްކަމުގައި ، އިޙްސާން ބުންޏެވެ. ވޭތުވެދިޔަ ހައެއްކަ މަސްދުވަހުގެ ތެރޭގައި ، މުރުތަޟާގެ މުސާރަ ދެގުނަޔަށް ބޮޑުވީ ، ކޮން މަސައްކަތެއް މުރުތަޟާއަށް ކުރެވިގެންކަން އެނގެން ، އިޙްސާންވެސް ބޭނުންވިއެވެ. އެވަރުގެ ބޮޑުކަމެއް މުރުތަޟާ ޙާޞިލްކުރީ ކޮންފަނޑިތައެއް ހަދައިގެންކަން އެނގެން ކޮންމެ މީހަކުވެސް ބޭނުންވާނެއެވެ. އިޙްސާންގެ މަލާމާތަށް ރައްދު ދިނުމަކީ ، މުރުތަޟާ ބޭނުންވި ކަމެއްނޫނެވެ. ކުޑައިރުކޮޅަކު މަޑުކޮށްލުމަށްފަހު ، މުރުތަޟާ އެތަނުން ނުކުތެވެ.

ރައިދާއާއި ނޫރު ، ބަދިގެ ތެރޭގައި ކެއްކުމުގެ މަސައްކަތް ކުރަމުން ގެންދިޔައެވެ. އެކި ވާހަކަތައް އެދެފަހަރިންގެ މެދުގައިވެސް ދެކެވެމުން ދިޔައެވެ. ރައިދާ އާއި ހާރިސްއަށް ، ނޫރުގެ އެހީބޭނުންވާ ކަމުގައި ، ކުއްލިޔަކަށް ރައިދާ ބުންޏެވެ. ބައްޕަޔަށް އެއްޗެއް ވިސްނައިދޭން އެބަ ޖެހެއެވެ. ބައްޕަޔަށް ވިސްނައިދޭންޖެހެނީ ކޮން އެއްޗެއްތޯ ނޫރު ސުއާލުކުރިއެވެ.

ހާރިސްގެ ވަޒީފާ ، އިސްލާމްއާބާދަށް ބަދަލުވެއްޖެއެވެ. ހާރިސްމެންނާއެކީ އިސްލާމްއާބާދަށް ދާކަށް ބައްޕަ ބޭނުމެއް ނޫނެވެ. ބައްޕަ އެކަނި އެގޭގައި ހުންނަން ދޫކޮށްލާފައި ދިއުމަކީ ، ހާރިސްއަށް ވަރަށް އުނދަގޫ ކަމެކެވެ. ވަޞީމުގެ ޙާލު މިހާރު އެހާ ރަނގަޅެއްނޫނެވެ. އެކަނި ގެޔަށް ދޫކޮށްލާފައިދާން ހެޔޮ ނުވާނެއެވެ. ރައިދާމެންނަށް އެއުޅެނީ އެމައްސަލަ ޙައްލު ނުކުރެވިގެންނެވެ. އެކަން ކުރެވޭނީ ނޫރުއަށެވެ. ނޫރު ބުނެފިއްޔާ ، ރައިދާމެންނާއެކީ ، ވަޞީމު ހިނގައިދާނެއެވެ. ހާރިސްގެ ވަޒީފާ ބަދަލުނުކޮށް ވާނެ އެއްވެސް މަގެއް ނުފެނުނެވެ. އެކަން ހުއްޓުވުމަށް ، ހާރިސް ވަރަށް މަސައްކަތް ކޮށްފިއެވެ. އިސްލާމްއާބާދަށް ނުގޮސްވާން ނެތިއްޔާ ،  ވަޒީފާ ދޫކޮށްލާ ވާހަކަވެސް ، މިހާރު ދެކެވިއްޖެއެވެ. އިސްލާމްއާބާދަށް ނުދަންޏާ ، ހާރިސްގެ ވަޒީފާގެ ކުރިއެރުމެއް ނުލިބޭނެއެވެ. އެމީހުންނާއެކީ އިސްލާމްއާބާދަށް ދިއުމަށް ، ބައްޕަޔާ ވާހަކަ ދައްކައިދިނުމަށް ، ނޫރުގެ ކިބައިން ރައިދާ އެދުނެވެ.

ބައްޕަޔާ އެވާހަކަ ދައްކައިދޭން ނޫރު އެއްބަސްވިއެވެ. ނޫރުގެ ވާހަކަ އަބަދުވެސް ، ބައްޕަ ޤަބޫލުކުރާނެއެވެ.

ތަހުނިޔާ އޮފީހަށްގޮސް މުޙުޞިނާއާ ބައްދަލު ކުރިއެވެ. ތަހުނިޔާ އޮފީހަށް ނުދާތާ މިހާރު ތިންދުވަސް ވެއްޖެއެވެ. މަސައްކަތްތައް އޮތީ ފުނިޖެހިފައެވެ. ރެޔާއި ދުވާލު މަސައްކަތްކޮށްގެންވިޔަސް ، މިހާރުހުރި އޯޑަރުތައް ތާރީޚަށް ނިންމުމަށް މުޙުޞިނާ އެދުނެވެ. އިތުރު އެހެން ވާހަކައެއްވެސް މުޙުޞިނާ ބުންޏެވެ.

" އަހަރެމެން ދެމަފިރިން ޑުބާއީއަށްގޮސް އެތަނުގައި ވަޒަންވެރިވުމަށް ނިންމައިފީމެވެ. ޑުބާއީގައިވެސް އަހަރެމެން ކުރާނީ ހަމަ މިވިޔަފާރިއެވެ. ޕާކިސްތާނުގެ އެކިސިޓީތަކުގައި ހިންގަމުންގެންދާ އެމީހުންގެ ވިޔަފާރީގައި ދެން ، އެންމެ އިސްކޮށް ހުންނާނީ ތަހުނިޔާއެވެ. " މުޙުޞިނާ ބުންޏެވެ.

އެއީ ތަހުނިޔާއަށް ލިބުނު ވަރަށް އުފާވެރި ޚަބަރެކެވެ. އެއޮއްބޮޑު ވިޔަފާރި އޭނާ ހިންގާނީ ކިހިނެއްކަން ޚުދު ތަހުނިޔާއަކަށްވެސް ނުވިސްނެއެވެ. މިއޮއް ހުރިހާ ދުވަހު ، ތަހުނިޔާ މަސައްކަތްކުރީ ، މުޙުޞިނާގެ ބެލުމުގެ ދަށުންނެވެ. އެވަރުގެ ބޮޑު ޒިންމާއެއް ތަހުނިޔާއަށް އުފުއްލޭނެކަމާމެދު ، ތަހުނިޔާގެ ހިތުގައިވެސް ޝައްކުތަކެއް އުފެދުނެވެ. މުޙުޞިނާމެންނާ އެއްވަރުގެ ތަޖުރިބާއެއް ތަހުނިޔާގެ ކިބަޔަކު ނުހުންނާނެއެވެ. މުޙުޞިނާއާއެކީ ތަހުނިޔާ މަސައްކަތްކުރީ ދެލޯމަރައިގެން ، މުޙުޞިނާގެ އަތުގައި ހިފައިގެންނެވެ.

" މިހާރު މިއޮތީ ، ތަހުނިޔާ ލޯހުޅުވައިލާ ، މީހެއްގެ އަތުގައި ނުހިފައި ، އަމިއްލަޔަށް ކުރިޔަށް ދިއުމުގެ ގަޑި ޖެހިފައެވެ. ތަހުނިޔާއަށްވުރެ ހުނަރުވެރި ، ތަޖުރިބާހުރި މީހަކު މި ވިޔަފާރި ހިންގަން އަހަރެންނަށް ގެނެވިދާނެއެވެ. ވަޒީފާއަށް ކަމުދާމީހަކު ހޯދިދާނެއެވެ. އެކަމަކު ، އެކަން ކުރާކަށް އަހަރެން ބޭނުމެއްނޫނެވެ. ސަބަބަކީ ، ތަހުނިޔާއަށް އިތުބާރުކުރާވަރަށް ، އެހެން އެއްވެސް މީހަކަށް ، އަހަރެންނަކަށް އިތުބާރެއް ނުކުރެވޭނެއެވެ. ކުރާހިތުން ، ފަރުވާތެރިކަމާއި ވިސްނުންތެރިކަމާ ، ރޭވުންތެރިކަމާއެކީގައި ތަހުނިޔާ މަސައްކަތް ކުރަމުންދާތަން ، އަހަރެންނަށް ފެނިއްޖެއެވެ. އަހަރެމެންގެ ބްރޭންޑް ފުޅާކޮށް ކުޑަދުވަސްކޮޅެއްގެ ތެރޭގައި ، ހޯދި މަޝްހޫރުކަން އެއީ އަހަރެންނަށްވެސް ނުކުރެވޭނެ ކަމެކެވެ. މިއަދު މިއީ ، ތަހުނިޔާ އުދުހިގަންނަންވީ ވަގުތެވެ. " މުޙުޞިނާ ބުންޏެވެ.

ތަހުނިޔާއަށް ލިބުނު އެ ޚަބަރުން ، އުފަލުންގޮސް ލޮލުން ކަރުނަ ހިލުނެވެ. ކޮޅަށް ތެދުވެގެން މުޙުޞިނާގާތަށްގޮސް ، ކުރިމަތީ ހުއްޓިހުރެ ، އޭނާއަށް އެކަން ކުރެވިދާނެތޯ ޔަޤީންކޮށްލުމަށް ، އެ ސުއާލު ތަކުރާރު ކޮށްލިއެވެ.

މުޙުޞިނާއަށް ، ތަހުނިޔާއަށް ބަރޯސާވެވޭނެ އެތައް ޙާލަތެއް ވަނީ ތަޖުރިބާ ކުރެވިފައެވެ. ތަހުނިޔާގައި އެ ފެންވަރާއި ހިތްވަރާއި ހުނަރު އެބަހުށްޓެވެ. އެކަން ، ތަހުނިޔާއަށް ނުކުރެވެންވީ އެންމެ ސަބަބެއްވެސް މުޙުޞިނާއަކަށް ނުފެނެއެވެ. މުޙުޞިނާއަށް ޝުކުރު އަދާކުރުމަށްފަހު ، އޭނާގެ ޢާއިލާގެ މީހުންނާ އެވާހަކަ ދައްކާލާފައި ނޫނީ ، ގޮތެއް ނިންމަން އުނދަގޫކަމަށް ތަހުނިޔާ ބުންޏެވެ.

އެދުވަހުގެ މަސައްކަތް ނިންމާފައި ، ތަހުނިޔާ ގެޔަށްދިޔައީ ފޮނިކާއެއްޗެއް ހިފައިގެންނެވެ. ގެޔަށްގޮސް ، ޙަފުޞާއާއި ޠާހިރާ އަދި އަރުސަލާނަށް ގޮވައި ގެނެސް ، ސިޓިންގރޫމަށް އެންމެން ނެރުނެވެ. ވެގެންއުޅޭގޮތެއް އެއްވެސްމީހަކަށް ނޭނގެއެވެ. ތަހުނިޔާ މަޑުކުރަމުން އެގެންދަނީ ، މުރުތަޟާ އަންނަންދެނެވެ. އެ އުފާވެރި ޚަބަރު އިޢުލާންކުރާނީ މުރުތަޟާގެ ޙާޟިރުގައެވެ. މާގިނައިރެއްނުވެ ، މުރުތަޟާވެސް އައިސް ގޭތެރެޔަށް ވަނެވެ. އެންމެންވެސް ތިބީ ކެތްމަދުވެފައެވެ.

" މިސިޒް ފާރޫޤުގެ ދެމަފިރިންގެ ދިރިއުޅުން ޑުބާއީއަށް ބަދަލުކުރަން ނިންމައިފިއެވެ. ޕާކިސްތާނުގެ ހުރިހާ ސިޓީތަކުގައި ހުޅުވާފައިވާ އެމީހުންގެ ވިޔަފާރި ހިންގުމުގައި ،  އިސްކޮށް ހުންނާނީ އަހަރެންކަމަށް ، އެމީހުން ނިންމައިފިއެވެ. އޭރަށް އަހަރެންގެ މަޤާމަކީ ، ކުރިން މިސިޒް ފާރޫޤުގެ މަޤާމެވެ. " ތަހުނިޔާ ބުންޏެވެ.

ﷲ އަށް ޙަމްދުކޮށް ، ހުރިހާމީހުންވެސް ވަކިވަކިން ، ތަހުނިޔާއަށް މުބާރިކްބާދީ އަދާކޮށް ، އެ އުފަލުގައި ބައިވެރިވިއެވެ. ކޮފީއެއް ގެނެސްދޭށޭ ބުނަމުން ، ރުންކުރުވެފައިހުރެ މުރުތަޟާ ކޮޓަރިޔާދިމާއަށް ހިނގައިގަތެވެ.

ކޮޓަރިތެރޭގައި ، މުރުތަޟާއިނީ ލެޕްޓޮޕް ހިފައިގެން މަސައްކަތެއްގައި އަވަދިނެތިއެވެ. ތަހުނިޔާއަށް ލިބުނު ކާމިޔާބީއަށް މުރުތަޟާ އެހާ ހިތްހަމަ ޖެހޭކަމަކަށް ތަހުނިޔާއަކަށް ނުފެނެއެވެ. އޭނާ ، އެކަމާބެހޭގޮތުން ، މުޙުޞިނާއަށް ދޭނީ ކޮން ޖަވާބެއްތޯ މުރުތަޟާއާ ސުއާލު ކުރިއެވެ. ތަހުނިޔާއަށް ފެންނަ އެންމެ ރަނގަޅުގޮތަކަށް ހެދީމާ ރަނގަޅުވާނެކަމަށް މުރުތަޟާ ބުންޏެވެ. މުރުތަޟާއަކަށް އަދިވެސް ، ތަހުނިޔާ އެދައްކާ ވާހަކަޔަށް ފުންކޮށް ވިސްނައިލާނެ ފުރުޞަތެއް ނުލިބެއެވެ. އެއަށްވުރެ ބޮޑަށް އޭނާ އެ ކުރަމުންގެންދާ މަސައްކަތް މުހިންމެވެ.

މުރުތަޟާގެ ފަރާތުން އެކަމުގައި އެލިބުނު ފިނި ތަރުޙީބަށް ، ތަހުނިޔާ ހިތްހަމައެއް ނުޖެހުނެވެ. އެކަމާބެހޭގޮތުން ތަހުނިޔާ ދައްކަމުން ގެންދިޔަ އެއްވެސް ވާހަކައެއް ، މުރުތަޟާގެ ކަންފަތަކަށް ނުފޯރައެވެ. އެންމެފަހުން ، ތަހުނިޔާވެސް ހިތްހަމަ ނުޖެހުނެވެ. އެވާހަކަ ، ތަހުނިޔާގެ މައިންބަފައިންގާތަކުވެސް އަދި ނުބުނެއެވެ. މަންމަމެންގާތު އެވާހަކަ ބުނާނީ ، މުރުތަޟާގެ ފަރާތުން އޭނާއަށް ހިތްހަމަޖެހޭ ޖަވާބެއް ލިބުނީމައެވެ. އެކަމުގައި އެންމެ ބޮޑު އެހީތެރިކަމަކާއި ހިތްވަރެއް ، ތަހުނިޔާއަށް ބޭނުންވާނީ މުރުތަޟާގެ ފަރާތުންނެވެ. އެހެނަސް ، މުރުތަޟާއަކަށް ، ތަހުނިޔާގެ އެއްވެސް ވާހަކަޔަކަށް ސަމާލުކަމެއް ނުދެވުނެވެ. ތަހުނިޔާ އަނގަ ގަދަކުރަން ފެށީމަ ، މުރުތަޟާގާތަށް ރުޅިއައެވެ. ތަހުނިޔާ އޭނާއަށް އުނދަގޫ ކުރަނީކަމަށް ބުނެ ، ހިތްހަމަނުޖެހިގެން އެއްޗެތި ކިޔަމުން ، ކޮޓަރިން ނުކުމެގެން ދިޔައެވެ. މުރުތަޟާ ކަންތައް ކުރިގޮތުން ، ތަހުނިޔާވެސް ވަރަށް ފޫހިވިއެވެ. ހިތަށް ތަދުވިއެވެ. އޭނާއަށް ލިބުނު ކާމިޔާބީއަށް މުރުތަޟާ ހިތްހަމަނުޖެހިގެން އެއުޅެނީ ކޮންސަބަބަކާ ހުރެ ހެއްޔެވެ ؟ ތަހުނިޔާގެ ހިތަށް ލިބުނު ތަދަށް ތަސައްލީއެއް ހޯދުމަށްޓަކައި ، އައިމަލް އުރައިލާ ލޯބިކޮށްލިއެވެ. ހިތަށް ލިބުނު އުދާސްތައް ދުއްވާލައި ހިނިތުން ވެލިއެވެ. ( ނުނިމޭ )