މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއާ އޮޕަރޭޓަރސް (މަޓާޓޯ) އިން އިންޑިއަން އެސޯސިއޭޝަން އޮފް ޓުއާ އޮޕަރޭޓަރސް (އަޔާޓޯ) އާއި އެކު އެއްބަސްވުމެއްގައި ސޮއިކޮށްފިއެވެ.
މި އިސްތިރާޖީ ގުޅުމުގެ މަޤްޞަދަކީ ދިވެހިރާއްޖެއާއި އިންޑިއާއާއި ދެމެދު ފަތުރުވެރިކަމުގެ އެއްބާރުލުން އިތުރުކޮށް ފަތުރުވެރިކަމުގެ ސިނާޔަތާއި ގާތް ގުޅުމެއް އުފެއްދުމާއި ދެފަރާތުގެ ކުރިއެރުމަށް މަސައްކަތްކުރުމެވެ.
މި އެއްބަސްވުމަކީ މަޓާޓޯ އާއި އަޔާޓޯގެ ނެޓްވޯކްތައް އަދި ވަސީލަތްތައް ބޭނުންކޮށްގެން ދަތުރުފަތުރާއި ސަޤާފީ ކަންކަމަށް ފުރުޞަތުތައް މަގުފަހިކުރުމަށާއި އުފެއްދުމަށް އަދި ދެ ޤައުމުގެ މެދުގައި ފަތުރުވެރިކަން ކުރިއެރުވުމުގައި މުހިންމު މޭލުދަނޑިއެކެވެ.
މި އެމްއޯޔޫގެ މުހިންމު މަޤުސަދުތަކުގެ ތެރޭގައި ޖޮއިންޓް މާކެޓިން އިނިޝިއޭޓިވްސް މެދުވެރިކޮށް ބައިލެޓަރަލް ޓޫރިޒަމް ކުރިއެރުވުމާއި، ޚިދުމަތުގެ މިންގަނޑުތަކާއި އޮޕަރޭޝަނަލް އެފިޝަންސީތައް ރަނގަޅު ކުރުމަށް އެންމެ ރަނގަޅު އުޞޫލުތައް ޙިއްސާކުރުމާއި، ގުޅިގެން އިވެންޓްތަކާއި ރޯޑްޝޯ އަދި ފެއާތައް އިންތިޒާމްކުރުމާއި، ދެގައުމަށް ވެސް ފައިދާހުރި ދެމެހެއްޓެނިވި ފަތުރުވެރިކަމުގެ އުޞޫލުތައް ޕްރޮމޯޓްކުރުން ހިމެނެއެވެ.
އެމްއޯޔޫގައި ސޮއިކުރުމަށްފަހު މަޓާޓޯއިން ވަނީ އިންޑިއާއިން ރާއްޖެއަށް ކަނޑައަޅުއްވާފައިވާ ހައިކޮމިޝަނަރ، ހިޒް އެކްސިލެންސީ މުނޫ މަހާވަރުއާއި ބައްދަލުކޮށްފައެވެ. މީގެކުރިންވެސް މަޓާޓޯއިން އެމަނިކުފާނާއި 9 އޭޕްރީލް 2024 ގައި ބައްދަލުކުރިއެވެ އަދި މިއީ އެބައްދަލުވުމުގެ ފޮލޯއަޕް ބައްދަލުވުމެކެވެ.
ކުރިއަށްއޮތް ރޯޑްޝޯއަކީ ދިވެހިރާއްޖޭގެ ފަތުރުވެރިކަން އިންޑިއާގެ ބާޒާރަށް ދައްކާލުމަށް ފަރުމާކޮށްފައިވާ، އެންމެ ރަނގަޅު ފްލައިޓްގެ ދަތުރުފަތުރު އޮންނަ މުމްބާއީ، ނިއުދިއްލީ އަދި ބެންގަލޫރުފަދަ ބޮޑެތި ސިޓީތަކުގައި ބޭއްވުމަށް ހަމަޖެހިފައިވާ ބޮޑު އިވެންޓެކެވެ. މި މަޝްވަރާތަކުގައި ފަތުރުވެރިކަމުގެ ގުޅުން ބަދަހިކުރުމުގައި ރޯޑްޝޯގެ މުހިންމުކަމަށް އަލިއަޅުވާލައި، ފަތުރުވެރިކަމުގެ ގުޅުންތައް އިތުރުކުރުމަށް އެއްބާރުލުން އިތުރުކުރުމާއި، އެންމެ ފައިދާކުރުވަނިވި ގޮތަށް ރޯޑްޝޯ ކުރިއަށްގެންދާނޭގޮތުގެ ތަފްސީލީ ޕްލޭންތަކާއި، ދެފަރާތުގެ ވިސްނުމާއި ސަޤާފީގުޅުން ބަދަހިކުރުމާއި، އެއްބާރުލުން ހޯދުމަށް އެއްބަސްވިއެވެ. އަދި ރޯޑްޝޯ ކާމިޔާބުކަމާއިއެކު ކުރިއަށްގެންދިއުމަށް އެއާލައިންތަކާއި ހޮޓަލްތަކާއި ޓްރެވަލް އެޖެންސީތައް ހިމެނޭ ގޮތަށް ސްޓޭކްހޯލްޑަރުންގެ ވާގިލިބުމުގެ މުޙިއްމުކަމަށްވެސް މަޝްވަރާކުރެވުނެވެ.
މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއާ އޮޕަރޭޓަރސް (މަޓާޓޯ) އަކީ ދިވެހިރާއްޖޭގައި ފަތުރުވެރިކަމާއި ދަތުރުފަތުރުގެ ސިނާޢަތް ތަރައްޤީކޮށް ކުރިއެރުވުމަށް ޚާއްސަ ޖަމްޢިއްޔާއެކެވެ. މަޓާޓޯއަކީ ޓްރެވަލް އޭޖެންޓުންނާއި ޓުއާ އޮޕަރޭޓަރުންގެ މަސްލަޙަތު ތަމްޞީލުކޮށް، ފަތުރުވެރިކަމުގެ ސިނާޢަތަށް ފައިދާހުރި ސިޔާސަތުތަކަށް ވަކާލާތުކޮށް، ދިވެހިރާއްޖެއަކީ ފަތުރުވެރިކަމުގައި އެންމެ މަތީ މަންޒިލެއްގެ ގޮތުގައި ދަމަހައްޓަން މަސައްކަތްކުރާ މުއައްސަސާއެކެވެ.
އިންޑިއަން އެސޯސިއޭޝަން އޮފް ޓުއާ އޮޕަރޭޓަރސް (އަޔާޓޯ) އަކީ މުޅި އިންޑިއާގެ 1،800 އަށް ވުރެ ގިނަ ޓުއާ އޮޕަރޭޓަރުން ތަމްޞީލުކުރާ އިންޑިއާގެ އެންމެމަތީ ޓްރެވަލް ޓްރޭޑްގެ އެއް މުއައްސަސާއެވެ. އަޔާޓޯއަކީ އިންޑިއާގައި ފަތުރުވެރިކަން ކުރިއަރުވައި ތަރައްޤީކުރުމާއި، މަތީ ފެންވަރުގެ ޚިދުމަތެއް ކަށަވަރުކުރުމާއި، ޒިޔާރަތްކުރާ ފަރާތްތަކަށް ދަތުރުފަތުރުގެ ތަޖުރިބާ ރަނގަޅުކުރުމަށް ބައިނަލްއަޤްވާމީ ޕާޓްނަޝިޕްތައް އުފެއްދުމަށް ކެނޑިނޭޅި މަސައްކަތްކުރަމުންދާ ޖަމްޢިއްޔާއެކެވެ.
