ކުރެންދޫ ދާއިރާއަށް އިންތިޚާބުވި ޝާމިން ހަބީބު، ވެރިކަންކުރާ ޕާޓީ ޕީއެންސީއަށް މިއަދު ސޮއިކޮށްފިއެވެ.
މިއާއެކު 20 ވަނަ މަޖިލީހުގައި ޕީއެންސީ ތަމްސީލުކުރާ މެންބަރުންގެ އަދަދު 74އަށް އަރާނެއެވެ.
ޝާމިންގެ ކުރިން ވެސް އަމިއްލަގޮތުން ވާދަކުރެއްވި ހަތް މެންބަރަކު ވަނީ ޕީއެންސީއަށް ސޮއިކޮށްފައެވެ. އެއީ ޑރ. އަނާރާ ނައީމް - ހުރާ ދާއިރާ، ޔާސީން އަބްދުﷲ - ނައިފަރު ދާއިރާ، އާޒިމް އަބްދުލްއަޒީޒް - ވިލިނގިލި ދާއިރާ، ހަސަން ޒަރީރު - މަތިވެރި ދާއިރާ، އަހުމަދު ޒަމީރު - މައްޗަންގޯޅި މެދު ދާއިރާ އަދި މުހައްމަދު ރަޝީދު - ނޮޅިވަރަމް ދާއިރާ އެވެ.
އަމިއްލަގޮތުން އިންތިޚާބުވި މެންބަރުންތަކެއް ޕީއެންސީއަށް ސޮއިކޮށްފައިވާއިރު، އަމިއްލަގޮތުން ހޮވޭ މެންބަރުން ދައުރުގެ ތެރޭގައި ޕާޓީއަކަށް ސޮއިކޮށްފި ނަމަ މެންބަރުކަމުން އިސްތިއުފާ ދޭންވާނެ ކަމަށް ބުނެ އެމްޑީޕީގެ މެޖޯރިޓީން އޮތީ އެންޓި ޑިފެކްޝަން ގާނޫނެއް ފާސްކޮށްފައެވެ. އެ ގާނޫނު ރައީސް ޑރ. މުހައްމަދު މުއިއްޒު ވަނީ ތަސްދީގު ވެސް ކުރައްވައިފައެވެ.
އެކަމަކު، އަމިއްލަގޮތުން ވާދަކުރައްވާ މެންބަރުން ދައުރުގެ ކުރިން ޕާޓީއަކަށް ސޮއިކޮށްފިނަމަ، ވާނެ ގޮތެއް ގާނޫނުގައި ބަޔާންކޮށްފައެއް ނެތެވެ.
ގޮނޑި ގެއްލޭ އިސްލާހު ގާނޫނުއަސާސީގައި ވެސް ހިމަނަން މިހާރު މަޖިލީހުގައި ބިލެއް އެބައޮތެވެ.
ވިހިވަނަ މަޖިލީހުގެ މެންބަރުން ހުވާކުރުން އޮންނާނީ އަންނަ މަހުގެ 28 ގައެވެ.
