އިދިކޮޅު ސިޔާސީ ހަރަކާތްތަކުގެ އެންމެ ކުރީ ސަފުގައި ތިއްބެވި ސިޔާސީ ލީޑަރުންނަކީ މުނާފިގުން ކަމަށް ޕީޕީއެމްގެ ނައިބު ލީޑަރު އަދި ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު އަބްދުއްރަޙީމް އަބްދުﷲ ވިދާޅުވެއްޖެއެވެ.
ރޭ ޕީޕީއެމްގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އަދުރޭ ވިދާޅުވީ އިދިކޮޅު ހުރިހާ ލީޑަރުންނަކީވެސް މުނާފިގުން ކަމަށް ވިދާޅުވަނީ ދީނުގައި އަންގަވާފައިވާ ގޮތަށް މުނާފިގުންގެ ކިބައިން ފެންނަ ތިން ސިފަވެސް އިދިކޮޅު ލީޑަރުންގެ ކިބައިން ފެންނާތީއެވެ.
''ވައުދެއް ވެއްޖިއްޔާ އެއާ ޚިލާފުވޭ، އަމާނާތެއް ރައްދު ކޮށްދިނުމަށް ހަވާލުކޮށްފިނަމަ އެއަށް ޚިޔާނާތްތެރިވޭ، ވާހަކަ ދައްކައިފިނަމަ ދޮގުހަދާ، މި ތިން ސިފަ ފެންނަ ކަމަށްވެއްޖެއްޔާ އެއީ މުނާފިގެކޭ ބުނެވިދާނެ'' އަދުރޭ ވިދާޅުވިއެވެ.
ރޭ ބޭއްވި ބައްދަލުވުމުގައި އެމްޑީޕީގެ ކުރީގެ ޗެއާޕާސަން އަދި ތޮއްޑޫ ދާއިރާގެ މެމްބަރު އަލީ ވަޙީދުއަށާއި ޖުމްހޫރީ ޕާޓީގެ ލީޑަރު ގާސިމް އިބްރާހިމްއަށްވެސް އަދުރޭގެ ބަހުގެ ހަމަލާތައް ފޮނުވާލެއްވިއެވެ. އެގޮތުން ގާސިމްގެ ވިލާ ކުންފުނިން ދައުލަތަށް ދައްކަން އޮތް ފައިސާގެ ކަންކަން ކޯޓު ތަކުން އަވަސް ކޮށްދެއްވުމަށްވެސް އަދުރޭ ވަނީ ގޮވާލައްވާފައެވެ.
