ފަލްސަފާ (66)

( 15 މާރިޗު 2024 ގައި ޝާއިޢުކުރި ބަޔާ ގުޅޭ )

ތަހުނިޔާގެ ހިތުގައި ފުނިޖެހި ޖަމާވެފައިވާ ޝަކުވާގެ އުދާސްތަކުގެ އަސަރު ، އޭނާގެ މޫނުމަތިން ، ޢާޞިފަށް ފާޅުވެއެވެ. އަދި އެކަމަށް ވިސްނައިލުމަށް ސާޖިދާއަށް ޢިޝާރާތް ކޮށްލަމުން ، ފެންވަރާލައިގެން ކާން ނުކުންނާނަމޭ ބުނެ ޢާޞިފް ކޮޓަރިޔަށް ވަނެވެ.

ޢާޞިފް ދިއުމާއެކު ، ތަހުނިޔާއާއި ސާޖިދާއާ ދެމައިން އެކަނިވިއެވެ. އެދެމައިންނަކީ ، ކޮންމެ ވާހަކައެއްވެސް ދައްކަން އާދަވެފައިތިބި ދެމައިންނެވެ. ހަވީރު އެގެޔަށް އައުމަށް މުރުތަޟާގާތު ބުނުމަށް ، ސާޖިދާގާތު ތަހުނިޔާ އެދުނެވެ. މުރުތަޟާއާ ބައްދަލުކޮށްލުމަށް ސާޖިދާހުރީ ބޭނުންވެފައެވެ. އެއީ ، ކޮންކަމަކުކަމެއް ސާޖިދާއެއް ނުބުނެއެވެ.

މުރުތަޟާއާއި ނޫރުގެ ބައްދަލުވުން އަދިވެސް ނުނިމެއެވެ. ނޫރުއަށްވެސް ޤަބޫލުކުރެވޭ ގޮތުގައި ، މުރުތަޟާއަށް ނިންމަން ޖެހިފައިއެވަނީ ، އުނދަގޫ ނިންމުމެކެވެ. އެކަމަކު ، މުރުތަޟާގެ ޙަޔާތުގައި ހުރުމަށް އެންމެ ރަނގަޅުވާނީ ، ތަހުނިޔާއަށްވުރެ ބޮޑަށް ނޫރުކަމުގައި ބުނާކަށް ނޫރު ، ޖެހިލުމެއް ނުވިއެވެ. އެދެމީހުންނަށް އުފަލުގައި އުޅެވޭނީ ، މުރުތަޟާ ، ތަހުނިޔާ ދޫކޮށްލައިގެންކަމަށް ނޫރު ބުނަމުން ގެންދިޔައެވެ. ނޫރުއަށް ހުރީ ރޮވިފައެވެ. ހިތުގައި އަޅާ ވޭނަށް ކެތްނުވެގެން ، މާނޭވާ ލެވިލެވި އެވެ. މުރުތަޟާއަށްވެސް ފެނުނުގޮތުގައި ، ނޫރުއާއި ތަހުނިޔާއަށްވެސް ، އަދި މުރުތަޟާއާ ތަހުނިޔާއާ މުރުތަޟާއާއި ނޫރުއަށްވެސް އެންމެ ރަނގަޅުވާނެ ގޮތަކީ ، އޭނާގެ ޙަޔާތުން ތަހުނިޔާ ވަކިވުމެވެ. އެއްވެސް މީހަކަށް ، އޭނާގެ ފަރާތުން ތަކުލީފެއް ލިބުމަކަށް މުރުތަޟާ ބޭނުމެއް ނުވެއެވެ. ތަހުނިޔާ ދޫކޮށްލައިގެން ، ތަހުނިޔާއަށް ތަކުލީފެއްލިބުމަކީވެސް ، މުރުތަޟާ އެދޭކަމެއްނޫނެވެ. އެކަން އެހެންކޮށްފިނަމަ ، މުރުތަޟާއަށް ފަހުން އެކަމާ ދެރަވާން ޖެހިދާނެއެވެ. އަދި ، ޢުމުރުދުވަހަށްވެސް އެކަން އެގޮތުގައި ދެމިވެސް އޮވެދާނެއެވެ. ތަހުނިޔާ ވަރިކުރުވަން ނޫރު އެކުރަމުންދާ މަސައްކަތަކީ ، މުރުތަޟާގެ ހިތަށް އެހާ ފަސޭހަ ކަމެއްނޫނެވެ. މުރުތަޟާގެ ހަވަނަ ޙިއްޞު އެކަމަކަށް ހުއްދައެއްވެސް ނުދެއެވެ. އެވާހަކަ ނޫރު ދެއްކިދެއްކިހެން ، މުރުތަޟާގެ ބޮލަށް އުނދަގޫވަމުން ދިޔައެވެ.

މުރުތަޟާއާ ވަކިވެގެން ، މާގިނަދުވަހެއް ނުވެ ތަހުނިޔާ އެހެން މީހަކާ އިދެފާނެއެވެ. އަދި ހަމަޖެހޭ ދިރިއުޅުމެއް ފަށާފާނެއެވެ. އޭރަށް ، ހުރިހާކަމެއްވެސް ތަހުނިޔާގެ ހިތުން ފިލައިގެން ހިނގައިދާނެއެވެ. މުރުތަޟާ އެގޮތަށް ވިސްނުމަށް ނޫރު އެދެމުން ގެންދިޔައެވެ. ތަހުނިޔާއާއި މުރުތަޟާ ދުރުކުރުވަން ނޫރުގެ ހިތަށް އިބިލީސް ވައްދާފައިވާ ވަސްވާހުން ، ނޫރުއަކަށް ސަލާމަތެއް ނުވެވެއެވެ. އެއީ މާބޮޑުކަމަކަށް ހަދައިގެން ، އިރުއިރުކޮޅާ ފަށަފަށައިގެން ދައްކަން އެއީ އެހާ ފަސޭހަކަމެއްނޫނެވެ. އެނޫން ވާހަކައެއް ނޫރުއަކަށް ނުދެއްކެއެވެ. އެމީހުން މިއަދު ބައްދަލުކުރަން އެއައީ ، ކައިވެނީގެ ދުވަހާއި ތާރީޚު ކަނޑައެޅުމަށް ، އެވާޙަކަ ދައްކައިލާށެވެ. އެތައް އިރެއްވީއިރުވެސް ، އެވާހަކައެއް އަދިވެސް ނުދެއްކެއެވެ. ނޫރުއަށް ދެއްކެނީ ވަރިއެއްގެ ވާހަކައެވެ.

ނޫރުގެ ވާހަކަތަކުން ހިތަށް އުނދަގޫވެގެން ، މުރުތަޟާ ކުއްލިޔަކަށް ތެދުވިއެވެ. އަދި ބިލަށް ފައިސާ ދައްކަން ، މޭޒުމަތީ ރުފިޔާކޮޅެއް ބާއްވާފައި ނުކުމެގެން ދާން ހިނގައިގަތެވެ. ނޫރު ގޮވާގޮވާވެސް މުރުތަޟާ ނުހުއްޓުނެވެ. ފަހަތުން ދުވެގޮސް މުރުތަޟާއާ ހަމަކޮށް ، އެހާ މުހިންމު ވާހަކައެއް އެހިސާބަށް ގެންގޮސްފައި މުރުތަޟާއަށް އެގޮތަށް ނުދެވޭނެކަމަށް ނޫރު ބުންޏެވެ. ނޫރު ބޭނުންކަމަށްވިޔަސް ، ނޫރު އެބުނާ ގޮތްގޮތް ހެދުމަކީ މުރުތަޟާއަށް އެހާ ފަސޭހަ ކަމެއްނޫނެވެ. އެކަން ބަލައިގަތުމަށް މުރުތަޟާ އެދުނެވެ. އެޙާލަތަކީ ، ވަކިގޮތެއް ނިންމަން އެއްވެސް މީހަކަށް ފަސޭހަ ޙާލަތެއްނޫނެވެ. މުރުތަޟާއަށްވެސް ، ތަހުނިޔާއަށްވެސް އަދި ނޫރުއަށްވެސް އެއީ  ފަސޭހަކަމެއް ނޫންކަމަށް ނޫރު ބުނަމުން ގެންދިޔައެވެ. ނޫރުއަށްހުރީ ރޮވިފައެވެ. އެކަމަކު ، ކޮންމެވެސް އެއްގޮތަކަށް ނިންމަން އެބަ ޖެހެއެވެ. އެހެންނޫނީ މާލަސްވެދާނެއެވެ. ލިބިފައި އޮތް ފުރުސަތުގެ ފޮނިމީރުކަން ، ނޫރުއަށް ގެއްލިދާނެއެވެ. އެއީ ހިތްދަތި ، ހަތަރުފަސް މަހެއްގެ ތަކުލީފާއި ކެކުޅުމުގެ ތެރެއިން އުފެދިގެން ، ނޫރުއަށް ފަހިވަމުންދިޔަ ފުރުސަތެކެވެ. އެ ފުރުސަތު ގެއްލިއްޖެނަމަ ، ނޫރުގެ ދުވަސް ދިޔައީއެވެ. އެކަމާ އިތުރަށް ހަނގުރާމަކުރުމުގެ ހިތްވަރު ،  ނޫރުގެ ކިބައިގާ ނެތިދިއުމަކީ ، އެކަށީގެންވާ ކަމެކެވެ.

ފިރިހެނަކަށްވުމަށް ، މުރުތަޟާގާތު ނޫރު ބުންޏެވެ. އެނބުރޭ އުނދޯއްޔެއްހެން ، ނޫރުއާއި ތަހުނިޔާއާ ދެމެދު ދެކޮޅަށް ހެއްލެން ނުހުރުމަށް އެދުނެވެ. ފިރިހެނެއްގެ ވިސްނުމުން ވިސްނައިގެން ، އަންހެނދުޅާ ނުވެ ، އެކަމާ ކުރިމަތިލުމަށް މުރުތަޟާއަށް ހިތްވަރުދެމުން ގެންދިޔައެވެ.

" މިއަދު ގެޔަށްގޮސް ، މުރުތަޟާއާއި ތަހުނިޔާ ވަކިވާން ނިންމައިފިންކަމަށް ، ތަހުނިޔާގާތު މުރުތަޟާ ބުނާށެވެ ! " ނޫރު ބުންޏެވެ.

މުރުތަޟާގެ ދެބުމަ ގޮށްޖެހުނެވެ. ވަކި ޖަވާބެއްނުދީ ، މުރުތަޟާ ހިނގައިގަތްތަނާ ، މުރުތަޟާގެ އަތުގައި ނޫރު ހިފެހެއްޓިއެވެ. ނޫރުގެ އަތްއޮތީ ތުރުތުރު އަޅައަޅައެވެ. އިރުކޮޅަކު ހިފަހައްޓައިގެން ހުރުމަށްފަހު ، މުރުތަޟާގެ އަތުން ނޫރު އަތްދޫކޮށްލިއެވެ. މުރުތަޟާވެސް ނޫރުއާ ދިމާލަށް ބަލަހައްޓައިގެން ހުރުމަށްފަހު ، އެދިޔަގޮތަށް ހިނގައްޖެއެވެ.

މުރުތަޟާ ގެޔަށްދިޔަ މަގުމަތީ ، ނޫރުގެ ބައްޕަ ވަޞީމުގެ ފޯނެއް އައެވެ. ވަޞީމުއެދުނީ ، އޭނާއާ މުރުތަޟާ ބައްދަލުކޮށްލުމަށެވެ. ބޭބެ ބޭނުން ގަޑިއެއްގައި ބޭނުންތާކު އޭނާ ބައްދަލުކުރާނެކަމަށްބުނެ ، މުރުތަޟާ ޖަވާބު ދިނެވެ. ހާރިސްއާއި ރައިދާގެ ޙާޟިރުގައި ގޭގައި އެވާހަކަ ދެއްކުމަކީ ، ވަޞީމު ބޭނުންވާ ކަމެއްނޫނެވެ. އެހެންކަމުން ، ވަޞީމު އެދަނީ ބޭރަށް ، ގޭ ކުރިމަތީ އޮތް ޕާކަށްކަމުގައި ބުންޏެވެ. ވަޞީމު އެދުނީ ، މުރުތަޟާވެސް އެ ޕާކަށް އައިސް އޭނާއާ ބައްދަލުކޮށްލުމަށެވެ.

ޢާޞިފާއި ސާޖިދާވެސް އެނބުރި އަތުވެއްޖެއެވެ. ތަހުނިޔާވެސް ވީ އެގެޔަށް ގޮހެވެ. އަމިއްލަ ދިރިއުޅުމުގައި ކުރިމަތިވެފައިވާ ޙާލަތު ، މައިންބަފައިންނަށް ސިއްރުކޮށް ފޮރުވައިގެން ، ތަހުނިޔާ ނުހުންނާނެކަމަށް ޙަފުޞާ ނިންމިއެވެ. އެކަމާ އޭނާ އެހުންނަނީ ހަދާނެގޮތް ބޮޑުވެފައެވެ. ޢާޞިފުމެންނަށް އޭނާ ދައްކާނީ ކޮން މޫނެއް ހެއްޔެވެ ؟ މުރުތަޟާއާ ދެވައިގެން ، އެމީހުންގެ އަންހެންދަރިފުޅު ، އެގެޔަށް ގެނެސް ވެއްދީ ވަރަށް ފޮނި އުއްމީދުތަކަކާ އެކުގައެވެ. އެކަން މިހާ އަވަހަށް އެއޮތީ އެކޮޅުކޮޅުން ޖެހިފައެވެ. ދެން ހަދާނީ ކިހިނެއް ހެއްޔެވެ ؟

" އަހަރެމެންގެ އަމިއްލަ އިޚްތިޔާރުގައި ނުހުންނަ ކަންކަން ހުންނާނެކަމަށް މަންމަ ބުނަމެއް ނޫން ހެއްޔެވެ ؟ އެކަހަލަ ކަންކަމުގައި އެންމެ ރަނގަޅުވާނީ ، ދެންވާނެގޮތެއްގެ ފޮނި އުއްމީދުގައި ، ކެތްތެރިކަން އިސްކުރުން ކަމަށްވެސް ބުނަނީ މަންމައެވެ. އެކަމާ މާބޮޑަށް ހާސްވެ ކަން ބޮޑު ނުވާށެވެ ! ތަޤްދީރުގައި ހުރިގޮތެއްނޫނީ ނުވާނެއެވެ. " ޠާހިރާ އޭނާގެ މަންމަގެ ކަންބޮޑުވުމުގައި ބައިވެރިވަމުން ބުންޏެވެ.

ކެތްތެރިކަމަކީވެސް އެމީހުންގެ އިޚްތިޔާރުގައި އޮންނަ ކަމެއްނޫނެވެ. އަންނާނެ އިރަކުން އައިސް ހިނގައިދާނެއެވެ. އެހެންނޫނީ ކެތްތެރިކަން ކޮޅުން ލާނެއެވެ. މިހާރު އެވަނީ އެޙާލަތަށް ގޮހެވެ. އެހާބޮޑުކަމެއްގައި މުރުތަޟާގެ ވިސްނުން ބަދަލުކޮށް ، ޙަފުޞާމެންނަށް އެހާބޮޑު ހިތާމައެއް ދޭނެކަމަކަށް ޙަފުޞާ ހީކޮށްފައެއް ނުވެއެވެ.

މުރުތަޟާވެސް އެއުޅެނީ ތަކުލީފުން ފުރިގެންވާ ޙާލަތެއްގައިކަމަށް ޠާހިރާ ބުންޏެވެ. މުރުތަޟާއަކީ ކޮންކަހަލަ މީހެއްކަން އެނގިހުރެ ، ނޫރުލްޢައިނު އެގެންދަނީ ، އިންސާނަކު މަގުފުރައްދަން ، އިބިލީސް ވަސްވާ ދޭ ގޮތަށް ، މުރުތަޟާގެ ހިތާ ކުޅެމުން ވަސްވާސް ދެމުންނެވެ. މުރުތަޟާވެސް އެހުރީ ، ނޫރުގެ ޖާދޫގައި ޖެހި ތާށިވެފައެވެ. ހަދާނެގޮތެއް ނޭނގި މަގުއޮޅިފައެވެ.

ނޫރު ކިތަންމެ މޮޅަސް ، ކިތަންމެ މޮޅު ރޭވުމެއް ރޭވިޔަސް ، ﷲ އިރާދަކުރައްވާ ގޮތެއްނޫނީ ނުވާނެއެވެ. ތަޤުދީރުގެ ކުރިމަތީގައި ނޫރުއަށް ކުޅެވޭނީ ކޮން ކުޅިވަރެއް ހެއްޔެވެ ؟ ޙަފުޞާގެ ކަންބޮޑުވުމަކީ ، ސާޖިދާމެންނެވެ. އެމީހުންނަށް ޙަފުޞާ ދޭނީ ކޮން ޖަވާބެއް ހެއްޔެވެ ؟ ދެން އޮތްހާވެސް ގޮތަކީ ﷲ އަށް ވަކީލުކޮށް ، ހުރިހާކަމެއްވެސް  އެންމެ ރަނގަޅަށް މިންވަރު ކޮށްދެއްވުން އެދި ދުޢާ ކުރުމެވެ. ހުރިހާކަމެއްވެސް ވާނީ އެންމެ ރަނގަޅަށެވެ. ﷲ އިރާދަ ކުރައްވާ ގޮތަކަށެވެ. އެކަލާނގެ ، އެއްވެސް އިންސާނަކަށް ދެރަގޮތެއް އިރާދައެއް ނުކުރައްވާނެއެވެ. ޙަފުޞާއިނީ ، ﷲ ގެ ހެޔޮ ރަޙުމަތްފުޅުން ، މުޢުޖިޒާތެއް ދައްކަވައިގެންނަމަވެސް ، މުރުތަޟާގެ ޙަޔާތުން ނޫރުލްޢައިނު ވަކިވެގެންދާނެ ގޮތެއް މިންވަރުކޮށްދެއްވުން އެދި ދުޢާ ކޮށްކޮށެވެ.

ވަޞީމަށް ޕާކަށް ދެވުނުއިރު ، މުރުތަޟާގޮސް އޭނާގެ އިންތިޒާރުގައި ހުއްޓެވެ. އިށީނދެ ހަމަޖެހިލައިގެން ވާހަކަ ދައްކާލާނީއޭ ބުނެ ކައިރީގައިހުރި ގޮނޑިއެއްގައި ދެމީހުންގޮސް އިށީނެވެ.

' މުރުތަޟާއެވެ ! ނޫރުލްޢައިނަކީ އަހަރެންގެ އަންހެން ދަރިފުޅެވެ. ކޮންމެ ބަފަޔަކުވެސް އެންމެ އެދޭކަމަކަށް ވާނީ އޭނާގެ ދަރިފުޅަށް ހަމަޖެހޭ އުފާވެރި ދިރިއުޅުމެއް ލިބުމެވެ. ކޮންމެ ބަފަޔަކުވެސް ، އަމިއްލަ އުފަލަށްވުރެ ، ދަރިފުޅުގެ އުފާ އިސްކުރާނެއެވެ. ތަހުނިޔާއަކީވެސް މީހެއްގެ އަންހެން ދަރިއެކެވެ. އެމީހުންގެ ލޮލުގެ އަލިކަމެވެ. ބައެއްގެ ދިރިއުޅުން ރޫޅާލައި ، ތަކުލީފުތަކެއް ޖެއްސުމަށްފަހު ، އަހަރެންގެ ދަރިފުޅުގެ ޙަޔާތް އާބާދުކުރާކަށް އަހަރެން ބޭނުމެއްނޫނެވެ. އަހަރެން މިއަހަނީ މުރުތަޟާ ގާތުއެވެ. އެހާ ބޮޑުކަމެއް ނިންމިއިރު ، މުރުތަޟާ އެގޮތަށް ނިންމީ ކޮން ވިސްނުމެއްގައި ހެއްޔެވެ ؟ " ވަޞީމު ސުއާލު ކުރިއެވެ.

އެކަން އެގޮތަށް ކުރަން މުރުތަޟާ ބޭނުންނަމަ ، ކުރިން އެކަން ނުކުރީ ކީއްވެތޯ ވަޞީމު ސުއާލު ކުރިއެވެ.  އެމީހުން އެންމެންނަކީ އަވަށްޓެރީންނެވެ. އެކުގައި އުޅޭތާ އެތައް ޒަމާންތަކެއް ވެއްޖެއެވެ. މުރުތަޟާމެން އެގޮތަށް އެކަން ކޮށްފިނަމަ ، ތަހުނިޔާޣެ ބައްޕަ ، ޢާޞިފު މެންނަށް ވަޞީމު ދައްކާނީ ކޮން މޫނެއް ހެއްޔެވެ ؟ މުރުތަޟާއާއި ނޫރުގެ ނިންމުމާ ގުޅިގެން ، އެތައް ބަޔެއްގެ ދިރިއުޅުން ބަރުބާދުވެގެން އެބަދެއެވެ.

" ބޭބޭއެވެ ! އިންސާނަކު މޫދާދިމާއަށް ދުވަމުންދާއިރު ، އޭނާގެ ހިތުގައި އަނދަމުންދާ އަލިފާން ، އެއްވެސް މީހަކަށް އިޙްސާސެއް ނުވާނެއެވެ. އިޙްސާސްވާ އެއްޗެއްވެސް އަދި އަތުންފައިން ހެދޭ ގޯހެއްވެސް އެނގޭނީ ، އެމީހަކު ކަނޑަށް އެރި މިދުނިޔެ ދޫކޮށް ދިއުމުންނެވެ. މީހުން ހިތަށް އަރާނީ ، އެމީހަކު ދުނިޔެދެކެ ފޫހިވެ ބާކީވީ ކަމުގައެވެ. ކަނޑު އަޑިޔަށް ގެނބިގެންދާއިރުވެސް ، އެހެންމީހުންނަކަށް ، އެއްވެސް ޙަޤީޤަތެއް ނޭނގޭނެއެވެ. އެކަން އެނގޭނީ ޚުދު އެމީހާއަށެވެ.

ހިތްވަރުގަދަ މީހުންނަކީ ، އެމީހުން ނިންމާ ނިންމުމުގެ މަތީގައި ދެމިތިބޭ ބަޔެކެވެ. ޙުއްޖަތް ދައްކައިގެން އެމީހުންގެ ނިންމުން ބަދަލުކުރާކަށް ނުވިސްނާނެއެވެ. އެމީހުން އެހެންމީހުންނަށް ވިސްނައިދޭނީއެވެ. ވަޞީމު ، މުރުތަޟާއަށް ނަސޭޙަތް ދިނެވެ.

ތަހުނިޔާ ވަރިކޮށްފައި ، ނޫރުލްޢައިނާ ކައިވެނިކުރުމަށް ، މުރުތަޟާ އެ ނިންމަނީ ކޮންބޭނުމަކުތޯ ވަޞީމު ސުއާލު ކުރިއެވެ. މުރުތަޟާގެ ޖަވާބަކަށްވީ ، އޭނާ ނޫރުލްޢައިނުއާ އިންނަން ނިންމާފައިވާ ކަމުގައެވެ. ތަހުނިޔާ ވަރިކުރާނީ ، ތަހުނިޔާ އެކަމަށް އެދިއްޖެ ޙާލަތެއްގައި ކަމުގައެވެ.

އޭގެ މާނަޔަކީ ، މުރުތަޟާ ބޭނުންވަނީ ، މާސިންގާ ކަނޑެއްގެ މެދަށް ތަހުނިޔާ ދޫކޮށްލުންކަމަށް ވަޞީމަށް ފެނުނެވެ. މައްސަލަޔަކީ އެއީއެއްނޫނެވެ. ކުރިމަތީގައިވާ ޙާލަތާމެދު ، ވަޞީމު ރަނގަޅަށް ވިސްނައިލުމަށް މުރުތަޟާ އެދުނެވެ. މުރުތަޟާއާއި ނޫރުލްޢައިނު ނިންމި ނިންމުމަކީ ، ފަހަރެއްގައި ގޯސް ނިންމުމަކަށް ވެދާނެއެވެ. މުރުތަޟާއާއި ނޫރުއަށް ، އެކަކު އަނެކަކާ ނުލައި ނުއުޅެވޭނެކަން ، ދެމީހުންނަށްވެސް އެނގިއްޖެއެވެ. އެހެންވީމާ ، އެދެމީހުންގެ ނިންމުމަކީ ، ޤާނޫނީ ގޮތުންނާއި ޝަރުޢީގޮތުން ޙައްޤު ގޮތުގައި ދެމީހުން ދިރިއުޅުމެއް ފެށުމެވެ. ނޫރުއަށް މުރުތަޟާ ދެރަގޮތެއް ނުހަދާނެއެވެ. އޭނާ ، ނޫރު އުފަލުގައި ބަހައްޓާނެއެވެ. އަދި ، ތަހުނިޔާގެ ޙައްޤުތައްވެސް އެންމެ ފުރިހަމަގޮތުގައި ދަމަހައްޓާނެއެވެ. ތަހުނިޔާއަކަށްވެސް ދެރަގޮތެއް ނުހަދާނެއެވެ. އެކަމަށް ، މުރުތަޟާވަނީ ، ތަހުނިޔާއަށް ވަޢުދުވެސް ވެފައެވެ.

މުރުތަޟާގެ ވާހަކައިން ، ވަޞީމު ދިޔައީ ސިއްސައިގެންނެވެ. އޭގެ މާނަޔަކީ ، ތަހުނިޔާއަށް އެހުރިހާ ކަމެއްވެސް އެނގޭކަމެވެ. މުރުތަޟާއާއި ނޫރުއާ ދެމެދު އެ ހިނގަމުންދާ ހުރިހާކަމެއްވެސް ތަހުނިޔާއަށް  އެނގޭކަން ،  ވަޞީމަށް މުރުތަޟާ ކަށަވަރު ކޮށްދިނެވެ. އަދި ، ނޫރުލްޢައިނުއާ އޭނާ ކައިވެނިކުރަން ތަހުނިޔާ ހުއްދަދީފައިވާކަމުގައި މުރުތަޟާ ބުންޏެވެ. ވަޞީމަށް ލިބުނު ޙައިރާންކަން ވަކިން ބޮޑުވިއެވެ. އިތުރު އެއްޗެކޭ ބުނާނެ ތަނެއް މިހާރަކު ނެތެވެ. ހުރިހާކަމެއް އެއޮތީ ބޮޑުތަނުގައި ޖެހިފައެވެ.

ތަހުނިޔާ އޭނާގެ ކޮޓަރީގައި އެކަނި އިނދެގެން ، އޭނާއަށް ކުރިމަތިވެފައިވާ މައްސަލަޔާމެދު ވިސްނަމުން ގެންދިޔައެވެ. މުރުތަޟާ ، ދެއަނތްބަށް ނޫރުލްޢައިނާ ކައިވެނިކުރަން އުޅޭވާހަކަ ، އޭނާގެ މަންމައާއި ބައްޕަގާތު ބުނާނީ ކިހިނެއް ހެއްޔެވެ ؟  (ނުނިމޭ)