ފަލްސަފާ (54)

( 11 ފެބުރުއަރީ 2024 ގައި ޝާއިޢުކުރި ބަޔާ ގުޅޭ )

މުރުތަޟާ ގޮވައިގެން ޙަފުޞާގެޔަށްދިޔައިރު ، ޠާހިރާއާއި އަރުސަލާން ގޯތިތެރޭގައި ތިއްބެވެ. މަންމަ އައިގޮތުން ، ކަމެއް ގޯސްވެގެން އުޅޭކަން ޠާހިރާއަށް ވިސްނުނެވެ. އެހެންކަމުން ، އަވަސްއަވަހަށް އަރުސަލާން ގޭތެރެޔަށް ފޮނުވައިލިއެވެ.

ޙަފުޞާ ދިޔައީ ތަހުނިޔާ ބަލައިކަން ޠާހިރާއަށް އެނގެއެވެ. އެކަމަކު ، ތަހުނިޔާއެއް ފެންނާކަށް ނެތެވެ. އޭގެ ބަދަލުގައިހުރީ މުރުތަޟާއެވެ. ތަހުނިޔާ ނައުމުން ޠާހިރާ އެކަމާ މަންމައާ ސުއާލު ކުރިއެވެ.

" އަހަރެންނާއެކީ ތަހުނިޔާ މިގެޔަށް އައެވެ. އައިމަގުމަތީ ތަހުނިޔާގެ ނަސީބު ދެރަކަމުން ފެނުނު މަންޒަރަކުން ، އަނބުރާ ގެޔަށް ހިނގައްޖެއެވެ. މިހިރަ ފެންނަ ، އަހަރެންގެ ފިރިހެންދަރި ، އަންހެނެއްގެ އަތުގައި ހިފައިގެން ޕާކުތެރޭ ހުރިތަން ފެނުމުން ، ތަހުނިޔާ އަނބުރާ ގެޔަށް ދިޔައީއެވެ. " ރުޅިއައިސްފައިހުރެ ޙަފުޞާ ބުންޏެވެ.

ޠާހިރާއަށް ލިބުނު ހާސްކަމުގައި ، އެއުޅެނީ ކިހިނެއްވެގެންތޯ މުރުތަޟާއާ ސުއާލު ކުރިއެވެ. ބުނާނެ ވަކި އެއްޗެއް ނޭނގި ، މުރުތަޟާ ހުރީ ހިމޭނުންނެވެ. މުރުތަޟާއަށް ބުނެވޭނީ ކީކޭ ހެއްޔެވެ ؟

" މަންމާއެވެ ! އިންސާނަކު އޭނާގެ ދިފާޢުގައި ވާހަކަދައްކަމުންގޮސް ވަރުބަލިވުމުން ، އެއްވެސް ކަމަކާ އަދި އެއްވެސް މީހަކާ ދޭތެރޭގައި ވިސްނާކަށް ނޭނގޭނެއެވެ. އަހަރެން މި މަސައްކަތްކުރަނީ ، ނޫރުއަށް ވިސްނައިދީގެން ކަންކަން ޙައްލު ކުރެވޭތޯއެވެ. އެކަމަކު ، މަންމައާއި ދައްތަގެ ޢަމަލުތައް ހުރިގޮތުން ، އަހަރެން މިކުރާ މަސައްކަތް ދަނީ ބޭކާރު ވަމުންނެވެ. " މުރުތަޟާ އޭނާގެ ދިފާޢުގައި ބުންޏެވެ.

މުރުތަޟާގެ ހިތުގައި އޮތް އެއްޗެއް ދެނެވޮޑިގެންވާނީ ﷲ އެވެ. އެކަމެއް ޙަފުޞާމެންނަކަށް ނޭނގޭނެއެވެ. މުރުތަޟާ އެގެންދަނީ ، ތަހުނިޔާއާ ދިމާއަށް އެއްފިޔަވަޅު އެޅިއްޔާ ނޫރުއާ ދިމާއަށް ދެފިޔަވަޅު އަޅަމުންނެވެ. އެކަން އެހެންކޮށްގެން ރަނގަޅު ، އެއްވެސް ނަތީޖާއެއް ނުނުކުންނާނެކަން ، ޙަފުޞާ އޭނާގެ ދެދަރިންނަށް ހަނދާން ކޮށްދިނެވެ. އެކަމުން ، އެއްވެސް މީހެއްގެ ހިތަކަށް ހަމަޖެހުމެއްވެސް ނުލިބޭނެއެވެ.

ޙަފުޞާ އެއައީ ، މުރުތަޟާގެ މޫނުމަތީގައި އަތުގެ ނެތްބާރުލާފައި އެތިފަހަރެއް ޖަހާފައެވެ. އެއީ އޭނާގެ ހިތަށް އުނދަގޫވާ ކަމެކެވެ. އެހެނަސް ، އެއަށްވުރެ ބޮޑު ތަދެއްގެ އިޙްސާސް ޙަފުޞާގެ ހިތަށްދަނީ ލިބެމުންނެވެ. ތަހުނިޔާއާއި އޭނާގެ މައިންބަފައިންގެ ކުރިމަތީ ، ޙަފުޞާމެން އެދަނީ އަގުވެއްޓި ފަޟީޙަތް ވަމުންނެވެ. މުސްކުޅިވީ ދުވަހު ، ޙަފުޞާއާ އެކުރިމަތިވީ އޭނާގެ ދަރިންނާމެދު އުއްމީދުކުރި ގޮތެއްނޫނެވެ. އެހުރިހާ ތަކުލީފެއް އެލިބެނީ ނޫރުލްޢައިނުގެ ސަބަބުންނެވެ. ﷲ އަށްޓަކައި ، އޭނާގެ ގޭގެ ހަމަޖެހުމާއި އަމާންކަން ގެނެސްދިނުމަށް ޠާހިރާއާއި މުރުތަޟާގާތު އާދޭސްކޮށްފައި ޙަފުޞާ އެދުނެވެ. އެމީހުންގެ އަމިއްލަ ނަފުސަށްނޫންކަމަށް ވަންޏާ ، އޭނާއަށްޓަކައި އެކަން ކޮށްދިނުމަށް އެދެމުން ޙަފުޞާ ގޭތެރެޔަށް ވަދެގެން ދިޔައެވެ.

***************************

ދިޔަލެކަށްވުރެ އަވަހަށް ، ރޮމުންރޮމުން ތަހުނިޔާ އައިސް ގެޔަށް ވަނެވެ. ސާޖިދާހުރީ ހަދާނެގޮތް ބޮޑުވެފައެވެ. ވެގެންއުޅޭގޮތެއް އޭނާއަކަށް ނޭނގެއެވެ. ތަހުނިޔާގެ ބައްޕަ ، ޢާޞިފްވެސް ގޭގައި އެބައުޅެއެވެ. އެއިންކަމެއް ޢާޞިފަށް އެނގިދާނެތީ ، ސާޖިދާހުންނަނީ ވަރަށް ކަންބޮޑުވެފައެވެ. ތަހުނިޔާގެ ރުއިމަކަށް ބަދަލެއް ނާދެއެވެ. ވެގެން އުޅޭގޮތެއް ސާފުކުރުމަށް ، މަޑުމަޑުން ، ސާޖިދާ ، ތަހުނިޔާއާ ސުއާލުކުރަމުން ގެންދިޔައެވެ.

" އަހަރެމެން ގެޔަށްދިޔަ މަގުމަތީ ، ޕާކުތެރޭގައި ނޫރުލްޢައިނާއި މުރުތަޟާ އަތުގައި ހިފައިގެން ތިއްބާ ފެނިއްޖެއެވެ. މިހާރުވެސް މުރުތަޟާ އެހުރީ ، ނޫރުލްޢައިނާ އެކުގައިކަމަށާއި މުރުތަޟާއަކީ އޭނާގެ ޙައްޤެއްކަމަށް ، ނޫރުލްޢައިނު ބުންޏެވެ. މުރުތަޟާގެ އިޙްސާސްތަކާއި ޖަޒުބާތާ އަދި  ލޯތްބާއި ދިރިހުރުންވެސް އޮތީ ، ނޫރުލްޢައިނަށް ޚާއްޞަކޮށްފައި ކަމަށްވެސް ނޫރުލްޢއިނު ހާމަކުރިއެވެ. މުރުތަޟާ ކަހަލަ މީހެއްގެ ގާތަށްގޮސް އަހަރެން އުޅޭނީ ކިހިނެއްކަން މަންމަ ބުނެބަލާށެވެ. އެގޭގައި އަހަރެންގެ އެއްވެސް އެއްޗެއް ނެތެވެ. " ރޮމުންރޮމުން ތަހުނިޔާ ކިޔައިދެމުން ގެންދިޔައެވެ.

ސާޖިދާގެ ލޮލުންވެސް ކަރުނަ ހިލިގެންދިޔައެވެ. ތަހުނިޔާ ، އޭނާގެ މަންމަގެ ގައިގާ ބައްދައިގަނެ ، ކޮނޑުގައި ބޯއަޅާލައިގެން އޮވެ ރޮމުން ގެންދިޔައެވެ.

މުރުތަޟާއާ ދިމާއަށް އެތިވަރު ގޮވައިގެންފައި ، ކޮޓަރިޔަށް އައިސް ވަތްތަނުން ޙަފުޞާގެ ފޯނު ރިންގވާން ފެށިއެވެ. އެއީ ސާޖިދާއެވެ. ސާޖިދާ ގުޅާނެކަން ޙަފުޞާއަށް އެނގެއެވެ. ފޯނުނަގައި ސަލާމް ގޮވައިލުމަށްފަހު ، ޙާލު ކިހިނެއްތޯ ޙަފުޞާ ސުއާލު ކުރިއެވެ. ބުނާނީ ކީކޭކަމެއް ސާޖިދާއަކަށް ނޭނގެއެވެ. އޭނާގެ އަޑުގައިވެސް ވަނީ ރިހުމާއި ހިތްދަތިކަމެވެ.

ތަހުނިޔާގެ ޙާލަތު ފެނިފައި ، ކެތް ނުކުރެވޭ ވަރަށް ، އޭނާގެ ހިތަށް އަސަރު ކުރެއެވެ. އެއީ ހަމައެކަނިހުރި ދަރިފުޅެވެ. ދަރިފުޅަށް އެ ލިބޭ ހިތްދަތިކަމަށް ، ސާޖިދާގެ ލަގޮނޑިއަކަށް ކެތެއް ނުކުރެވޭނެއެވެ. ޙަފުޞާގެވެސް ޙާލަކީ އެއީއެވެ. ނޫރުގެ ޢަމަލުތަކުން އެދެ ޢާއިލާގެ އުފާވެރިކަން އެއޮތީ ، ނަރަކަޔަކަށް ހަދާފައެވެ. ޙަފުޞާގެ ވާހަކަ ސާޖިދާއަކަށް ޤަބޫލެއް ނުކުރެވެއެވެ. އެއީ ނޫރުގެ އެކަނި ކަމެއްނޫނެވެ. މުރުތަޟާގެ އުޅުން އެހުރީކީ ، އެމީހުން ހީކުރި ގޮތަކަށް ނޫނެވެ. ފިރިހެނަކު ފުރުޞަތުދީގެން ނޫނީ އަންހެނަކަށް އެވައްތަރަކަށް ނޫޅެވޭނެއެވެ. ކުށްވެރިޔަކީ މުރުތަޟާއެވެ. ސާޖިދާއަށް ވީ އެންމެ ރަނގަޅަކަށް ތަހުނިޔާއަށް ވިސްނައިދީ ، ނަޞޭޙަތް ދީފިއެވެ. ތަހުނިޔާގެ ހިތުގައި މުރުތަޟާގެ މައްޗަށް އިތުބާރު ނުއުފެދެނިސް ، އެކަމެއް ޙައްލެއް ނުވާނެއެވެ. މުރުތަޟާގެ ވިސްނުމާއި ފިކުރަށް ބަދަލު އަންނާނީ ކިހިނެއް އަދި ކޮންއިރަކުންކަމެއް ، އެއްވެސް މީހަކަށް ނޭނގެއެވެ. އެތަކުލީފުތަކަށް ކެތްކޮށްގެން ތަހުނިޔާ ހުންނަންވީ ކިހާ ދުވަހަކު ހެއްޔެވެ ؟ އެއީވެސް އެއްވެސް މީހަކަށް އެނގޭ އެއްޗެއްނޫނެވެ. ޙަފުޞާގެވެސް ކަންބޮޑުވުމަކީ އެއީއެވެ. ޠާހިރާއާއި ޙަފުޞާއާ ދެމީހުން އެތިބީ ތަހުނިޔާއާ އެކުގައެވެ. މުރުތަޟާ ހަމަޔަކަށް އެޅުވޭތޯ މަސައްކަތް ކުރުމަކީ ޙަފުޞާގެ ކަމެކެވެ. އެކަން ވަކި ގޮތަކަށް ނުނިމެނިސް ، ތަހުނިޔާ އެގެޔަކަށް ނުދާނެއެވެ.

މުރުތަޟާ މިވަގުތު އެހުރީ ޖަޒުބާތުގައި ޖެހި ، ރަނގަޅާއި ނުބައި ވަކިނުވާވަރަށް ނޫރުގެ ނުފޫޒުގައި ޖެހިފައެވެ. އެއީ ގޯސްމީހެއްނޫނެވެ. އެ ހުރިހާމީހުންގެވެސް އުއްމީދަކީ ، ހުރިހާ ކަމެއްވެސް ރަނގަޅު ވުމެވެ. ތަހުނިޔާއަކީ ހަމައެކަނި ސާޖިދާގެ ދަރިއެއް ނޫނެވެ. އެއީ ޙަފުޞާގެވެސް ދަރިއެކެވެ. މުރުތަޟާއަށް ހުރިހާކަމެއް ވިސްނިގެން ، ތަހުނިޔާ ބަލައި އެގެޔަށް ދާނެކަމަށް ޙަފުޞާ ބުންޏެވެ. ޙަފުޞާއަށްޓަކައި އަދި އެއްފަހަރު ، މުރުތަޟާއަށް މަޢާފުކޮށްދިނުމަށް ، ތަހުނިޔާގެ ކިބައިން ޙަފުޞާ އެދޭވާހަކަ ، ތަހުނިޔާގާތު ބުނެދިނުމަށްވެސް ޙަފުޞާ އެދުނެވެ.

" މަންމަގެ ހިތަކީ ބަރަކާތްތެރި އަދި ހެޔޮދުޢާއިން ފުރިގެންވާ އެއްޗެކެވެ. ޙަފުޞާގެ އެ އެދުމަށް އިންކާރު ނުކުރުމަކީ ، މަންމަގެ ވަރަށްބޮޑު އެދުމެކެވެ. ދަރިފުޅާއެވެ ! މުރުތަޟާއަކީ ރަނގަޅު މީހެކެވެ. ނޫރުލްޢައިނުގެ މައްސަލަ ޙައްލު ކުރުމަށްޓަކައި ، މުރުތަޟާއަށް އެންމެ ރަނގަޅަށް މަސައްކަތް ނުކުރެވެނީކަމަށް ވެދާނެއެވެ. އެހެނަސް ، މަންމަގެ ހިތްބުނަނީ ، މުރުތަޟާއަށް ރަނގަޅުގޮތް ވިސްނި ، އެކަންކަން އޮތް އެންމެ ރަނގަޅަކަށް ޙައްލުކުރާނެކަމުގައެވެ. މުރުތަޟާގެ މުސްތަޤްބަލް އޮތީ ދަރިފުޅާއެކުގައިކަން ، މުރުތަޟާއަށް އިޙްސާސްވާކަށް ލަހެއް ނުވާނެއެވެ. " ސާޖިދާ އޭނާގެ ދަރިފުޅަށް ނަސޭޙަތް ދެމުން ގެންދިޔައެވެ.

އެދެމައިން ، ވާހަކަ ދައްކަން ތިއްބާ ، ކެއްސާލަމުން ، ޢާޞިފްވެސް ކޮޓަރިން ނުކުތެވެ. ޢާޞިފް އުޅެނީ ކުޑަކޮށް ބަލިވެއެވެ. ދެލޯ ފުހެލައި ބައްޕަޔަށް ސަލާމް ގޮވައިލަމުން ، ބައްޕަޔާ ދިމާއަށް ތަހުނިޔާ އެނބުރިލިއެވެ. ދެމައިން އެ ދައްކަނީ ކޮންވާހަކައެއްތޯ އަހައި ، ތަހުނިޔާގެ ބޮލުގައި ފިރުމާލަމުން ، އޭނާވެސް އެވާހަކައިގާ ބައިވެރިކުރުމަށް ޢާޞިފް އެދުނެވެ. އަދި ތަހުނިޔާއާ ޖެހިގެން އިށީނދެލިއެވެ. ސާޖިދާ ، ތަހުނިޔާއާ ދިމާއަށް ބަލައިލިއެވެ. އެކަމާބެހޭގޮތުން ، ބައްޕަގާތު އަދި އެއްވެސް ވާހަކައެއް ނުދެއްކުމަށް މަންމަ އެދޭކަން ، ސާޖިދާގެ ލޮލުން ތަހުނިޔާއަށް ސާފުވިއެވެ.

އެވާހަކަ  ނުދެއްކިނަމަވެސް ، ތަހުނިޔާގެ ހިތުގައިވާ ހާސްކަމެއް އޭނާއަކަށް ނުފޮރުވުނެވެ. ކޮންމެވެސް ކަމެއް ގޯސްވެގެން އެބައުޅޭކަން ، ތަހުނިޔާގެ ޙަރަކާތުން ޢާޞިފް ދެނެގަތެވެ. އަދި ސުއާލުމާކުން ފުރިފައިވާ ގޮތަކަށް ސާޖިދާއާ ދިމާއަށް ބަލައިލިއެވެ. އެހެނަސް ، ބައްޕަގާތު އެއްވެސް ވާހަކައެއް ތަހުނިޔާއަކަށް ނުބުނެވުނެވެ.

***************************

ހެނދުނު ހޭލިއިރުވެސް ޙަފުޞާގެ ރުޅިގަނޑު މައިތިރިއެއް ނުވެއެވެ. ސައިބޯކަށްވެސް ނޫޅެއެވެ. ގޭތެރޭގައި ނުއިންނަންވެގެން ، ގޯތިތެރެޔަށް ނުކުމެ ، އަރަމުންދާ އަވީގެ ހޫނަށް ހަށިގަނޑު ދޫކޮށްލައިގެން ، އަވީގައި ޖައްސާލައިގެން ތުންފިއްތައިގެން އިންދާ ، އޮފީހަށްދާން މުރުތަޟާ ނުކުތެވެ. މުރުތަޟާ އައިސް ، މަންމަޔަށް ސަލާމް ގޮވައިލިއެވެ. ޙަފުޞާއަށް ސަލާމް ބަލައިގަނެވުނީވެސް ، ކުޑައިރުކޮޅެއް ކޮށްލާފައެވެ. މުރުތަޟާދެކެ ރުޅިއައިސް އިންކަން އަންގާލަން ޙަފުޞާ ބޭނުންވީއެވެ. މުރުތަޟާއާ ދިމާއަށް ބަލައިވެސް ނުލައެވެ.

ޙަފުޞާ އެއިނީ ސައިނުބޮއެކަން މުރުތަޟާއަށް އެނގެއެވެ. އެހެން ނުހެދުމަށް މަންމަގެ ކިބައިން މުރުތަޟާ އެދުނެވެ. އަމިއްލަ ގޭގައި ބީރަށްޓެއްސަކަށްވެގެން އުޅުމަކީ ، ހިތަށް ތަކުލީފުލިބޭނެ ކަމެކެވެ.

މަންމަމެންނާ މެދު މުރުތަޟާ ވިސްނާނެކަމެއް ނެތެވެ. އެންމެންގެ ކުރިމަތީގައި ، އެމީހުންނަކީ ކުށްވެރިންކަމަށް ހަދައިފިއެވެ. ދިފާޢުގައި އެއްޗެއް ބުނަން އަނގަހުޅުވާލެވެންވެސް ނެތް ވަރަށެވެ. ސާޖިދާމެންގެ ކުރިމަތީވެސް ، އެމީހުންގެ އަގު ވެއްޓިއްޖެއެވެ. އެމީހުންނަށް ދައްކާނީ ކޮން މޫނެއް ހެއްޔެވެ ؟ ތަހުނިޔާއަކީ އެމީހުންގެ ހުރި ހަމައެކަނި ދަރިފުޅެވެ. ވެގެން އުޅޭގޮތް އެނގުނީމަ އެމީހުންގެ ހިތުގައި އަޅާނެ ވޭނުގެ އިޙްސާސެއް މުރުތަޟާއަކަށް ނުކުރެވެއެވެ.

" މަންމާއެވެ ! ކައިވެނީގެ ފުރަތަމަ ދުވަހުން ފެށިގެން މިއަދާ ހަމަޔަށްވެސް ، އަހަރެން މިއަންނަނީ މީހުންކުރާ ސުއާލަށް ޖަވާބުދެމުންނެވެ. އެކަން ކޮށްކޮށް އަހަރެން ވަރުބަލި ވެއްޖެއެވެ. އެކަން މިގޭގެ އެންމެންނަށްވެސް އެނގޭނެކަމަށް ހީކުރަމެވެ. " މުރުތަޟާ ބުންޏެވެ.

ބޭކާރު ވާހަކަ ދެއްކުން ހުއްޓާލައި ، މުރުތަޟާގެ އަމިއްލަ ދިރިއުޅުމަށް ހުރިހާކަމެއް ޚާއްޞަކުރުމަށް ޙަފުޞާ އެދުނެވެ. ތަހުނިޔާއާއި ޢާއިލާގެ އެހެންމީހުންނަށްވުރެ އިސްވާންޖެހޭނެ އެހެން އެއްވެސް މީހަކު ، މުރުތަޟާއަށް މިހާރު އޮވެގެން ނުވާނެއެވެ. އެދުވަހު އޮފީސް ނިންމާފައި ގެޔަށް އަންނަންވާނީ ތަހުނިޔާ ގޮވައިގެންކަމުގައި ބުނެ ، ޙަފުޞާ މުރުތަޟާއަށް އިންޒާރު ކުރިއެވެ.

ކުރިންވެސް އެއްފަހަރު ، ތަހުނިޔާ ބަލައި މުރުތަޟާ ހިނގައްޖެއެވެ. ތަހުނިޔާއެއް ނުގެނެވުނެވެ. އަނެއްކާވެސް އެގެޔަށްގޮސް ، ކިތަންމެ ވަރަކަށް އާދޭސްކުރިޔަސް ، ތަހުނިޔާ އަންނާނެކަމާމެދު މުރުތަޟާއަށް ޝައްކެވެ. އަނެއްކާވެސް ފަޟީޙަތްވެ މުރުތަޟާގެ އަގުވެއްޓިގެންދާން ވީއެވެ. ތަހުނިޔާ އެގެޔަށް ގެނެސްދޭނެކަމުގެ ޔަޤީންކަމެއް ، އޭނާގެ މަންމައަކަށް މުރުތަޟާއަށް ދެވޭކަށް ނެތެވެ.

ރުޅިއައިސް ރަތްވެފައި ޙަފުޞާ ކޮޅަށް ތެދުވިއެވެ. އަދި އަމިއްލަ ނަފްސު ފަޟީޙަތްކޮށްފައި ވިޔަސް ، ތަހުނިޔާ ގޮވައިގެން ނޫނީ ހަވީރު އެގެޔަށް އައިސްގެން ނުވާނެކަމުގައި ޙަފުޞާ ބުންޏެވެ. އެއީ މަންމައެއްގެ އެދުމެއްނޫނެވެ. އަމުރެކެވެ. މުރުތަޟާއަކީ ، މަންމަ ބޭނުންވާގޮތަކަށް މީގެ ކުރިންވެސް ޢަމަލުކުރަމުން އަންނަ މީހެކެވެ. އެކަން ޙަފުޞާއަށްވެސް ރަނގަޅަށް އެނގޭނެއެވެ. އެހެންނަމަވެސް ، އޭނާއަށް ނުކުރެވޭ ހުރިހާ ކަމެއްގެ އިލްޒާމު ، އޭނާގެ ބޮލުގައި އެޅުވިގެންދާކަށް މުރުތަޟާ ބޭނުމެއްނޫނެވެ. އެއީ އިންސާފެއްނޫނެވެ. މުރުތަޟާއަކީވެސް އިންސާނެކެވެ. މަޢުދަނުން ހަދާފައިހުރި މަޞްނޫޢީ އެއްޗެއްނޫނެވެ. އިންސާނުންނަށް ކުރެވޭ އަދި ކުރެވޭނެ ކަންކަމާއި ނުކުރެވޭނެ ކަންކަން ހުންނާނެއެވެ. އެހެންމީހުންގެ ވިސްނުމާއި ފިކުރު ބަދަލު ކުރުމަކީ ، އެހާ ފަސޭހަކަމެއްނޫނެވެ. ކިތަންމެ ޢުމުރުން ގިނަދުވަސްވެފައި ތަޖުރިބާ ލިބިފައި ހުއްޓަސް ، ޙަފުޞާގެ ނުފޫޒަށް ނުގުޑާ ކަންކަންވެސް ހުންނާނެއެވެ.

އޮފީހަށްގޮސް ، މަސައްކަތަށް ސަމާލުކަން ދޭން އުޅެއުޅެ ، ނޫރުއަކަށް އެކަމެއް ނުކުރެވުނެވެ. މޭޒުމަތީ އޮތް ލިޔުމުގައި ، އޭނާގެ އަތުގައި އޮތް ގަލަމުން ކުރަހައިގަތެވެ. ހިތުގައިވާ އުދާސްތައް ބޭރުކޮށްލެވޭތޯއެވެ. ކުރީރޭ ، އޭނާއާ ދިމާއަށް ޙަފުޞައްތަ ބުނި ބަސްތައް އަދިވެސް ހަނދާނުގައި އެބަހުށްޓެވެ. މުރުތަޟާގެ ކަންކަށިމަތީ އެޖެހި ޖެހުމަކީ ނޫރުގެ ކަންކަށިމައްޗަށް ވީއްލާލި އެތިފަހަރެއްކަން ، ނޫރުއަށް އެނގެއެވެ. ޚުދު ޙަފުޞާވެސް އެވާހަކަ އެއޮތީ ބުނެފައެވެ.

" ނޫނެކެވެ. ޙަފުޞައްތާއެވެ ! މުރުތަޟާގެ މޫނުމަތީ އެޖެހި ޖެހުމަކީ ، އަހަރެންނަށް އަމާޒުވި އެއްޗެއްނޫނެވެ. އެއީ ، ތަހުނިޔާގެ ނަޞީބަށް އަމާޒު ކުރެވުނު އެއްޗެކެވެ. މުރުތަޟާއަކީ އަހަރެންނާ އެއްފެންވަރެއްގެ މީހެއްކަން އަނގައިދިނީތީ ޝުކުރިއްޔާއެވެ ! " ނޫރުގެ ހިތާހިތާ ބުނެލެވުނެވެ. ބޮލުގައި ބާރަށް ހިފައި ފިތައިގަންނަމުން މޭޒުމަތީގައި  ނޫރުގެ ބޯ ބާއްވާލިއެވެ. މަޑުމަޑުންގޮސް އޭނާއަށް ގިސްލެވެން ފެށުނެވެ. ހިތުގައި އަޅަމުން އެދާ ވޭނަށް ކެތްނުވެގެން ، ލޮލުން ފައިބަމުންދިޔަ ކަރުނަތައް މޭޒުމައްޗަށް އޮހެމުން ދިޔައެވެ. ( ނުނިމޭ )