( 31 ޖަނަވަރީ 2024 ގައި ޝާއިޢުކުރި ބަޔާ ގުޅޭ )
ހާރިސްގެ ވާހަކަ އެހިސާބަށް ދިޔަތަނާ ، އޮފީސް ނިންމާފައި ނޫރުއައިސް ގެޔަށް ވަނެވެ. ދަބަސް މޭޒުމަތީ ބޭއްވުމަށްފަހު ، ބައްޕަމެންގާތަށް އައިސް ސަލާމް ގޮވައިލިއެވެ. އެއްވެސް މީހަކު ނޫރުގެ ސަލާމް ބަލައެއް ނުގަތެވެ. އެންމެން ތިބީ އިސްދަށަށް ޖަހައިގެންނެވެ.
ނޫރުއާ ގުޅޭކަމެއްގައި ނުބެހޭނަމޭ ބުނެފައި އޮތަސް ، ނޫރުއާ މިފަހަރު ކުރިމަތިލީ ހާރިސް އެވެ. ނޫރު އެކުރަމުން ގެންދަނީ ކޮންކަމެއްތޯ ހާރިސް ސުއާލު ކުރިއެވެ. ނޫރުގެ އަމިއްލަ ޙައިޞިއްޔަތަށް ނުބެލިކަމަށްވިޔަސް ، އެންމެ ދެރަވެގެން ، އެމީހުންގެ އަބުރާ ޢިއްޒަތަށް އަރައި ނުގަތުމަށް ހާރިސް އެދުނެވެ. މިހިސާބު ގަނޑުގެ މީހުން އެމީހުންނާމެދު ދެކޭނީ ކޮންގޮތަކަށް ހެއްޔެވެ ؟ މައިންބަފައިންގެ އަގަކީ ނޫރުއަށް އެއްވެސް އެއްޗެއް ނޫނެވެ. ނޫރުގެ ޝަކުވާ ހިފައިގެން މިއަދު އެއައީ ޙަފުޞައްތައެވެ. މާދަމާ އަންނާނީ އެހެންމީހެކެވެ.
" އެމީހުންނަށް އަހަރެމެން ދޭނީ ކޮން ޖަވާބެއް ހެއްޔެވެ ؟ އަންހެން ކުއްޖެއްގެ ދިރިއުޅުން ބަރުބާދުވެގެންދާނީ ކިހިނެއްކަމުގެ އިޙްސާސެއް ނޫރުއަކަށް ނުލިބެއެވެ. އެންމެން މިދޭ ނަޞޭޙަތުގެ އެއްވެސް އަގެއް ނެތެވެ. " ހާރިސް ބުންޏެވެ.
އެމީހުން އެދައްކަނީ ކޮން ވާހަކައެއްކަމެއް ނޫރުއަކަށް ނުވިސްނުނެވެ. ނޫރުގެ ޝަކުވާ ހިފައިގެން ޙަފުޞައްތަ އަންނަންޖެހުނީ ކޮން ސަބަބަކާ ހުރެތޯ ނޫރު ސުއާލު ކުރިއެވެ. ނޫރުއަށް ކުރެވުނީ ކޮން ކުށެއް ހެއްޔެވެ ؟
އެސުއާލަށް ޖަވާބުދޭން ކެރޭނެ މީހަކަށް އެތާހުރީ ރައިދާ އެކަންޏެވެ. މުރުތަޟާއާއި ނޫރުއާ ދެމީހުން ، އަދިވެސް ބައްދަލުކުރާކަމަށް އެ ދެކެވެނީ ތެދުވާހަކައެއްތޯ ރައިދާ ސުއާލު ކުރިއެވެ.
އެމީހުން ބައްދަލުކުރާކަމަށް ، އެއްވެސް ޖެހިލުމެއްނެތި ނޫރު އެއްބަސްވިއެވެ. އަދި އެކަމުގައި އޮތީ ކާކުގެ ކޮން މައްސަލައެއްތޯ ސުއާލު ކުރިއެވެ.
އެހިސާބުން ، ވަޞީމަކަށް ހިމޭނަކުން ނުއިނދެވުނެވެ. ރުޅިއައިސް ރަތްވެފައި ކޮޅަށް ރެދުވެ ނޫރުއާ ދިމާއަށް ހަޅޭއްލަވައިގަތެވެ.
" މިހާރު ދެން ކަންކަން ތިދަނީ މާމައްޗަށެވެ. އެއްޗެއް ބުނުމުގެ ކުރިން ރަނގަޅަށް ވިސްނާފައި އެވާހަކައެއް ބުނާށެވެ ! ކެތްތެރިކަމާއެކު ، ރަނގަޅަށް ކަނުލައި އަޑުއަހާށެވެ. ނޫރުގެ ތިމާގެ މީހުންނާއި ބޮޑެތިމީހުން މި ދައްކާ ވާހަކަ އަޑުއަހާށެވެ ! " ވަޞީމު ބުންޏެވެ.
ޖެހިގެން ހުރި ގޮނޑީގައި އިށީނދެލައި ހަމަޖެހިލުމަށްފަހު ، އެވާހަކައެއް ބުނެ އިއްވުމަށް ނޫރު އެދުނެވެ.
" އަހަރެމެން އެންމެންނަށްވެސް ފެންނަނީ ، ނޫރު މީހަކާ އިނުމުގެ ވަގުތު އައިސް ޖެހިއްޖެ ކަމުގައެވެ. މުރުތަޟާއާ ބައްދަލުކޮށް އުޅުމަކީ ، ނޫރުގެ މުސްތަޤްބަލް އަނދިރިވެގެން ހިނގައިދާނެ ކަމެކެވެ. އަދި އަމްދުން ، ސިއްރުން ދެމީހުން ބައްދަލުކޮށް ހެދުމަކީ ދެމީހުންނަށްވެސް އޭގެ ގެއްލުން ކުރިމަތިވާނެ ކަމެކެވެ. ކައިވެނީގެ ގުޅުން ޤާއިމްކޮށްދޭ ބަޔެއްގެ ގާތަށް ، އަހަރެންނާއި ރައިދާ ، މިއަދު ދިޔައިމެވެ. ނޫރުއާ ދެވާނެ މީހަކު އަހަރެމެން މިއައީ ހޮވާފައެވެ. އެއީ ނޫރުއަށް ކަމުދާނެ ކަހަލަ މީހެކެވެ. އަހަރެމެން ބޭނުންވަނީ ، އެމީހަކާއެކީ ދިރިއުޅުމެއް ފެށޭތޯ ނޫރު ، މަސައްކަތް ކުރުމަށެވެ. " ހާރިސް ބުންޏެވެ.
ނޫރުގެ ދިރިއުޅުމުގެ އެހާބޮޑުކަމެއް ، އޭނާކުރެން އަހައިލުމެއްނެތި ، ބޭބެ އެކަނި ނިންމަން ހުއްދަދިނީ ކާކުތޯ ނޫރު ސުއާލު ކުރިއެވެ.
އެކަން ، އެމީހުންނަށް ނުކުރެވޭންވީ ކީއްވެތޯ ހާރިސް ސުއާލު ކުރިއެވެ. ހާރިސްއަކީ ނޫރުއަށްވުރެ ބޮޑު ، ނޫރުގެ ބޭބެއެވެ. ނޫރުގެ މައްޗަށް އެމީހުންގެ ޙައްޤެއްވެސް އޮންނާނެއެވެ. އެހާބޮޑަށް މިނިވަންވެގަނެގެން އުޅުމުގެ ވިސްނުން ދޫކޮށްލުމަށާއި ، ނޫރުއާ ބެހޭކަމެއް ނިންމުމަށް ، ނޫރުގެ އިޒުނަ ހޯދަން އެމީހުންނަށް ޖެހޭނެކަމަށް ނުދުށުމަށް ޙާރިސް ބުންޏެވެ.
ހާރިސް އެބުނަނީ ރަނގަޅު ވާހަކައެއް ކަމަށާއި ، އެމީހުން އެންމެންގެވެސް ނިންމުމަކީ އެއީ ކަމަށް ވަޞީމުވެސް ބުންޏެވެ. އެއްވެސް އެއްޗެކޭ ނުބުނެ ހަނުއިނދެގެން އެމީހުންގެ ވާހަކަ އޭނާ އަޑުއަހައިފިކަމުގައި ބުނެ ނޫރު ތެދުވިއެވެ. އަދި ، ދިން ލަފަޔަށް ޝުކުރު އަދާކުރުމަށްފަހު ، އޭނާގެ ކޮޓަރިޔަށް ދިޔައެވެ.
*************************
އަރުސަލާންގެ ފިލާވަޅުތައް ނަގައިދީ ، ހޯމްވޯކް ޗެކްކުރުމަށްޓަކައި ، ސިޓިންގރޫމުގައި ޠާހިރާ އިނެވެ. އަރުސަލާން ފިލާވަޅުތައް ހަދާފައިހުރީ ޠާހިރާ ކިޔައިދިން ގޮތަކަށް ނޫނެވެ. އެކަމާ ހިތްހަމަ ނުޖެހިގެން އަރުސަލާންއާ ވާހަކަ ދައްކަމުން ދަނިކޮށް ، މުރުތަޟާ ، ބޭރުން އައިސް ވަނެވެ. މުރުތަޟާއަށް އެމަންޒަރު ފެނުމާއެކު ، އަރުސަލާން ހަމަޖައްސައިލުމަށް މަސައްކަތް ކުރިއެވެ. ދައްތައަށް ސަލާމް ގޮވާލައި ޙާލު ކިހިނެއްތޯ އެހި ސުއާލަށް މުރުތަޟާއަށް ، ޠާހިރާގެ ފަރާތުން ލިބުނީ ފިނި ޖަވާބެކެވެ. ޠާހިރާ އިނީ ރުންކުރު ވެފައެވެ. މުރުތަޟާއާ މާގިނަ ވާހަކައެއް ދައްކަން ބޭނުންނޫން ގޮތަކަށެވެ.
ޙަފުޞާވެސް އެވަގުތު ބޭރަށް ނުކުމެ ސިޓިންގރޫމް ތެރެޔަށް ވަނެވެ. މަންމައަށް ސަލާމް ގޮވައިލުމުން ، މަންމަގެ ޖަވާބާއެކު މުރުތަޟާއާ ކުރިމަތިވީ ، އޭނާ ހީވެސް ނުކުރާކަހަލަ ސުއާލެވެ. ތަހުނިޔާ ވީތަނެއް އެނގޭތޯ ، މުރުތަޟާއާ ޙަފުޞާ ސުއާލު ކުރިއެވެ.
" ތަހުނިޔާ ، އޭނާގެ ގެޔަށް ހިނގައްޖެއެވެ. ތަހުނިޔާ މިގެޔަށް އަނބުރާ އަންނާނީ ، ނޫރުލްޢައިނުއާއި މުރުތަޟާއާ ދެމެދު އޮތްގުޅުން ކަނޑައިލިކަން އެންމެންގެ ކުރިމަތީ އިޢުލާންކޮށް ، ނޫރުލްޢައިނާ ، މުރުތަޟާއާ އޮތްގުޅުން ކަނޑައިލި ދުވަހަކުންނެވެ. " ތަހުނިޔާ ބުންޏެވެ.
ވެގެން އުޅޭގޮތެއް މުރުތަޟާއަކަށް ސާފެއް ނުވިއެވެ. ތަހުނިޔާ ދިޔައީ މުރުތަޟާގާތު ބުނެފައެއް ނޫނެވެ. ދައްތަމެން އެދައްކަނީ ކޮންކަހަލަ ވާހަކައެއްތޯ މުރުތަޟާ ސުއާލު ކުރިއެވެ.
އެއީ ކޮންކަހަލަ ވާހަކައެއްތޯ ސާފުކުރަން ، ތަހުނިޔާގާތަށްގޮސް އެހުމަށް ޙަފުޞާ ބުންޏެވެ. އަދި ، ތަހުނިޔާ ނުލައި އެގެޔަށް އެނބުރި ނައުމަށް ބުނެ ، ޙަފުޞާ އަމުރު ކުރިއެވެ. މަންމަ އެބުނި ވާހަކަޔަކުން ، ކަންބޮޑުވެގެންގޮސް ، ޠާހިރާއަށްވެސް ކުއްލިޔަކަށް ކޮޅަށް ތެދުވެވުނެވެ. ޙަފުޞާހުރީ ، ރުޅިއައިސްގެންގޮސް ، އަވަދިވާވަރު ވެފައެވެ.
މުރުތަޟާއާއި ނޫރުލްޢައިނު ، އަދިވެސް ވާހަކަ ދައްކާކަން ޙަފުޞާމެންނަކަށް ނޭނގެއެވެ. އެމީހުން އެކަން އެކުރަނީ ، އެންމެންނަށް ސިއްރުންނެވެ. އެހެނަސް ، އެކަން އެނގެންޖެހޭ މީހުންނަށް ވަރަށް ސާފުކޮށް އެކަން އެބަ އެނގެއެވެ.
މުރުތަޟާވެސް ، އޭނާގެ ދިފާޢުގައި އަނގަ ހުޅުވައިލިއެވެ. މުރުތަޟާގެ ނަޒަރުގައި އޭނާއަކީ ސިއްރުން ކަންތައްކުރާ މީހެއްނޫނެވެ. ނޫރުލްޢައިނާއި މުރުތަޟާއާ ދެމެދު އޮތްގުޅުމަކީ ، ކައިވެނީގެ ކުރިންވެސް ތަހުނިޔާއަށް އެނގޭ ގުޅުމެކެވެ. އެ ގުޅުމުގެ ހުރިހާ ސިއްރެއް ތަހުނިޔާއަށް އެނގޭނެއެވެ. ތަހުނިޔާ ، އޭނާއާ ކައިވެނި ކުރުމަށް އެއްވެސް މީހަކު ، ތަހުނިޔާއަށް މަޖުބޫރެއް ނުކުރެއެވެ. މުރުތަޟާއަށް ނުވިސްނޭ އެއްޗަކީ ، ކައިވެނީގެ ފަހުގެ ކަންކަމެވެ. ކުރިން ވެދިޔަކަމެއް މާޒީއާ ޙަވާލެވެ. އެހެނަސް ، ކައިވެނީގެ ފަހުން ، މުރުތަޟާއާއި ނޫރުއާ ދެމެދު އެ ހިނގަމުންދަނީކީ ، ކައިވެނިވާ އަންހެންކުއްޖާއަށް ތަޙައްމަލު ކުރެވިދާނެފަދަ ކަންކަމެއްނޫނެވެ.
ކައިވެނީގެ ފަހުން ، ނޫރުލްޢައިނާއި މުރުތަޟާ ބައްދަލުކުރުމަކީ ، ތަހުނިޔާ ނުޤަބޫލުކަމެއްކަމުގައިވާނަމަ ، އެކަމުގައި ތަހުނިޔާގެ ކުށެއް ނެތެވެ. އެކަން މަނާކުރުމުގެ ފުރިހަމަ ޙައްޤު ، ތަހުނިޔާއަށް ލިބިގެން ވެއެވެ.
ޠާހިރާއާއި ޙަފުޞާ އެދައްކަނީ ، އެމީހުން ދައްކަން ހަމަ އެންމެ ރަނގަޅު ވާހަކަތަކެކެވެ. މުރުތަޟާވެސް އެކަން ޤަބޫލު ކުރެއެވެ. އެހެންނަމަވެސް ، މުރުތަޟާގެ ވާހަކަވެސް އަޑުއަހައިލުމަކީ ، ކުރަންޖެހޭނެ ކަމެއްކަމަށް މުރުތަޟާ ޤަބޫލު ކުރެއެވެ. ނޫރުއާއި މުރުތަޟާއަކީ ، އެންގޭޖްވެފައި ތިބި ބައެއް އެކަންޏެއްނޫނެވެ. އެދެމީހުންނަކީ ތިމާގެ ދެމީހުންނެވެ. ދެ ރަޙުމަތްތެރިންނެވެ. އަވަށްޓެރިންނެވެ. އެ ދެމީހުންގެ އޮފީސް ހުންނަނީ ވަރަށް ކައިރީގައެވެ. ވަރަށްގިނައިން ދިމާވާނެއެވެ. މުރުތަޟާއަކަށްވެސް އަދި ނޫރުއަކަށްވެސް ، މޫނު ކުނިކޮށްފައި އެކަކު އަނެކަކު ނުފެންނަކަމަށް ހަދައިގެންނެއް ނޫޅެވޭނެއެވެ. ނޫރުއާއި މުރުތަޟާގެ ލޯބީގެ ޙަޤީޤަތަށް ބަލާއިރު ، އިންސާނާގެ ހިތަކީ ރޮބޮޓުންހެން މަސައްކަތްކުރާ އެއްޗެއްކަމަށް ދެކިގެން ނުވާނެއެވެ. ހިތުގައި އުފެދިފައި އޮންނަ ލޯބީގެ އިޙްސާސްތަކެއް ނައްތައިލުމަށް ވަގުތު ބޭނުންވާނެއެވެ. ދުވާލުވެސް އަންނަނީ ރޭގަނޑަށް ވަގުތު ދިނުމަށްފަހުގައެވެ. މުރުތަޟާ ބޭނުންވަނީ އެ ވަގުތެވެ. އޭނާ ، އެކަމުން ދުރުވެ ، ސަލާމަތްވާން ބޭނުންވާ ވަގުތެވެ.
" ތިހުރިހާ ވާހަކައެއް ، މުރުތަޟާގެ އަންހެނުންގާތު ދައްކައި އޭނާ އެއްބަސް ކުރުވާށެވެ. އަދި ، އެވާހަކަތަކަށް ތަހުނިޔާ އެއްބަސް ވެއްޖެނަމަ ، އަނބުރާ މިގެޔަށް ގެންނާށެވެ. އެހެން ނޫނީ .......... " ޙަފުޞާގެ ވާހަކައަށް ހުއްޓުން އެރިއެވެ.
އެހެން ނޫނީ ވާނީ ކިހިނެއްތޯ މުރުތަޟާ ، އޭނާގެ މަންމައާ ސުއާލު ކުރިއެވެ.
މުރުތަޟާގެ މަންމަ ، ޙަފުޞާ މިހާރު އެހުރީ މުރުތަޟާއާއެކުގައި ނޫންކަމަށް ޙަފުޞާ ބުންޏެވެ. ޙަފުޞާ މިހާރު އެހުރީ ، ތަހުނިޔާއަކީ ، އޭނާގެ ޅީދަރިއެއްގެ ބަދަލުގައި ދަރިއެއްކަމުގައި ބަލައިގެން ، ތަހުނިޔާއާ އެކުގައެވެ. ޙަފުޞާ ކަންބޮޑުވާނީ ތަހުނިޔާއާ މެދުގައެވެ. މުރުތަޟާއަކަށް ، ޙަފުޞާއެއް ނުވިސްނާނެއެވެ.
ޠާހިރާވެސް ހުރީ ތަހުނިޔާއާ އެކުގައެވެ. މުރުތަޟާގެ އަމިއްލަ ގޭގައި އޭނާއާމެދު ވިސްނައިލާނެ މީހަކު ނެތުނީއެވެ. އޭނާ އެކަނިވެރިވީއެވެ. އަރުސަލާން ކައިރިކޮށްލާފައި ތަހުނިޔާގެ ހިތުގައި އޮތް ރުޅިގަނޑު އަރުސަލާނަށް ބޭލިއެވެ.
" ތިކުރަނީ ކޮންކަމެއް ހެއްޔެވެ ؟ އެއްވެސްކަމެއް ރަނގަޅަކަށް ނުކުރެއެވެ. މމިކިޔައިދޭ އެއްޗެއް ވިސްނޭނީ ކޮން ދުވަހަކުން ހެއްޔެވެ ؟ " ޠާހިރާ ، ރުޅިއަރައިގެންފައި އަރުސަލާންއާ ދިމާއަށް ބުންޏެވެ.
އައިސްފައިހުރި ރުޅީގައި ، ޠާހިރާ ނަގައިގެން އިން ފޮތްތައް މޭޒުމައްޗަށް ޖެހިއެވެ. ޠާހިރާގެ އެވާހަކަ ތަކަކީ ، އަރުސަލާންއަށް އަމާޒުކުރި ވާހަކަ ތަކެއްނޫނެވެ. އެއީ މުރުތަޟާއާ ދިމާއަށް ބުނަން އޭނާގެ ހިތުގައި ހުރި ވާހަކަ ތަކެކެވެ. ޠާހިރާއަކީ ، ދުވަހަކުވެސް ، އަޑަށް ބާރުލާފައި އަރުސަލާންއާ ދިމާއަށްވެސް ، އަދި މުރުތަޟާއާ ދިމާއަށްވެސް އެއްވެސް އެއްޗެކޭ ބުނި މީހެއްނޫނެވެ. ދައްތައަށް ވެފައި އިންގޮތް މުރުތަޟާއަށް ވިސްނުނެވެ. އަދި ، އެވާހަކަތައް އެބުނީ އޭނާއާ ދިމާއަށްކަން ، މުރުތަޟާ ވިސްނައި ގަތެވެ. އިރުކޮޅަކު މަޑުކޮށްލުމަށްފަހު ، މުރުތަޟާ ގެއިން ނުކުތެވެ.
*************************
ތަހުނިޔާމެންގޭގައިވެސް ، ހޫނުކަން ވަކި ކުޑައެއްނޫނެވެ. ތަހުނިޔާ ، ކުއްލިޔަކަށް ގެޔަށް އައުމުން ސާޖިދާއަށް ލިބުނު ޙައިރާންކަން ވަކި ކުޑައެއްނޫނެވެ. އެތައް ސުއާލެއް ކުރިއިރުވެސް ، ތަހުނިޔާ ހުރީ އަނގައިން ނުބުނެއެވެ. އެގޭގައި އޭނާ މަޑުކުރަންޖެހޭ އެންމެ ސަބަބެއްވެސް ދެއްކުމަށް ، އޭނާގެ މަންމަގާތު ، އެންމެފަހުން ތަހުނިޔާ އެހިއެވެ.
ތަހުނިޔާގެ މައިދައިތައާއި ފަހަރިއާ ދެމީހުންތިބީ ތަހުނިޔާއާ އެކުގައި ކަމަށް ސާޖިދާ ބުންޏެވެ. މުރުތަޟާއާ ދެމީހުންގެ މެދުގައި އުފެދޭ ހިތްހަމަ ނުޖެހުމެއް ސަބަބަކަށް ދައްކާފައި ، އެގޮތަށް އެގެއިން ނުކުމެގެން އަންނާކަށް ނުޖެހެއެވެ. ތަހުނިޔާ އެގެޔަށް ގެންދިޔައީ އެމީހުންގެ ހިތުން ރުހުމުންނެވެ. ނުހަނު އުފަލުންނެވެ. އެމީހުންގެ ލޯތްބަށް ފުރަގަސްދީ އިޙްތިރާމް ކުޑަކުރުމަކީ ، ތަހުނިޔާ ކޮށްގެންވާނެ ކަމެއްނޫންކަމަށް ސާޖިދާ ބުނަމުން ގެންދިޔައެވެ.
ތަހުނިޔާ އެދައްކަނީވެސް ރަނގަޅު ވާހަކައެކެވެ. ތަހުނިޔާ ކައިވެނިކުރީ މުރުތަޟާއާއެވެ. މުރުތަމާގެ ހިތުގައި އޭނާގެ މައްޗަށް އެއްވެސް ޖާގައެއް ނެތްއިރު ، އެގޭގައި އޭނާހުރުމަކީ ހިތަށް ލިބޭ އިތުރު ތަކުލީފެކެވެ.
އިތުރު ވާހަކަ ނުދައްކައި ، ތިރިޔަށްގޮސް މުރުތަޟާއާ ވާހަކަ ދެއްކުމަށް ސާޖިދާ އެދުނެވެ. މުރުތަޟާ އޭރުހުރީ އެގެޔަށް އައިހެވެ. ތަހުނިޔާއާއެކު ، ސާޖިދާވެސް ދާނެކަމަށް ބުންޏެވެ. އެހެނަސް ، ތަހުނިޔާ އެކަން މަނާކޮށް ، ދާނީ އޭނާ އެކަނިކަމަށް ބުންޏެވެ.
ސާޖިދާ މަސައްކަތް ކުރަމުން އެގެންދަނީ ވާހަކަ ދައްކައިގެން އެމައްސަލަ ޙައްލު ކުރުމަށެވެ. ތަހުނިޔާގެ ބައްޕަ ، ޢާޞިފަކަށްވެސް އެކަމެއް އަދި ނޭނގޭނެއެވެ. ޢާޞިފަށް އެކަން އެނގިއްޖިއްޔާ ކަންބޮޑުވެދާނެތީ ، ސާޖިދާ އެއުޅެނީ އެކަން ފިރިމީހާއަށް ނާންގައި ޙައްލު ކުރެވޭތޯއެވެ. އެހެނަސް ، ސާޖިދާއަށް އެކަން ކުރެވޭނީ ، މުރުތަޟާއާއި ތަހުނިޔާ އެކަމަށް ވާގިވެރިވެގެންނެވެ. އެދެމީހުންގެ މެދުގައި ވާހަކަ ދައްކައިގެން އެކަން ޙައްލުކޮށްގެންނެވެ. ހަމަޖެހިލައިގެން ، މަޑުމައިތިރިކަމާއެކު މުރުތަޟާއާ ވާހަކަ ދެއްކުމަށް ސާޖިދާ އެދުނެވެ. ތަހުނިޔާ ހުރީ ، ދޫދޭގޮތަކަށްނޫނެވެ. ލައްކަ ފުރުޞަތާއި ވަގުތު މުރުތަޟާއަށް ދެވިއްޖެއެވެ. ތަހުނިޔާ މިހާރު އެހުރީ ، އެކަން ، ކޮޅެއްގައި ޖައްސާފައިނޫނީ ، އޭނާގެ ގެއިން ނުކުމެގެން ނުދާގޮތަށް ނިންމައިގެންނެވެ. ( ނުނިމޭ )
Varah varahves reethi