މިއަދު ހެނދުނު 8:00 ގައި ފެށި މާލޭ ސިޓީ ކައުންސިލުގެ މޭޔަރު އިންތިހާބުކުރުމަށް ބާއްވާ އިންތިހާބުގެ ވޯޓުލުމަށް މިހައިތަނަށް ނުކުތީ އެންމެ 11 ޕަސެންޓުކަމަށް އިލެކްޝަންސް ކޮމިޝަން (އީސީ) އިން ވިދާޅުވެއްޖެއެވެ.
އެ ކޮމިޝަނުން ހާމަކުރެއްވި ތަފާސް ހިސާބުން ދައްކާގޮތުގައި މިެަދު މެންދުރު 12 ޖެހިއިރު ވޯޓުލާފައިވަނީ 6201 މީހުންނެވެ. އެއީ 11.07 ޕަސެންޓެވެ. އަދި ވޯޓު ނުލާ 49،801 މީހުން ތިބިއިރު، އެއީ 88.93 ޕަސެންޓެވެ.
މިހައިތަނަށް 2596 އަންހެނުންނާއި 3606 ފިރިހެނުން ވަނީ ވޯޓުލާފައެވެ.
ވޯޓުލީ ފަރާތްތަކުގެ ތެރޭގައި މި އިންތިހާބުގައި ވާދަކުރައްވާ ފަސް ކެންޑިޑޭޓުން ކަމަށްވާ ޝުއައިބު އަލީ އާއި ހުސައިން ވަހީދު އާއި އައިޝަތު އާޒިމާ ޝަކޫރު އާއި ސައިފް ފާތިހު އަދި އާދަމް އާޒިމް ވަނީ ވޯޓުލައްވާފައެވެ.
މީގެ އިތުރުން ރައީސް ޔާމީން އާއި ރައީސް ނަޝީދު ވެސް ވަނީ ވޯޓު ލައްވާފައެވެ.
މިއަދު ކުރިއަށްދާ މި އިންތިހާބުގެ ވޯޓުލުން ހަވީރު 5:00 އާއި ހަމައަށް ކުރިއަށް ގެންދިއުމަށް ވަނީ ނިންމާފައެވެ. އެއީ މޫސުން ލަފާކުރާގޮތަށް ރިޔާއަތް ކޮށްފައެވެ.