މާލޭ މޭޔަރުކަމަށް ކުރިމަތިލައްވާފައިވާ ކުރީގެ ބަންޑާރަ ނައިބު އައިޝަތު އާޒިމާ ޝަކޫރަށް ތާއީދު ހޯދުމަށް ސައިކަލު ބުރެއް ބޭއްވުމަށް ނިންމައިފިއެވެ.
ޕީޕީއެމް/ޕީއެންސީގެ ފަރާތުން، މާލޭ ސިޓީ ކައުންސިލްގެ ކުރިޔަށް އޮތް މޭޔަރ ބައި އިލެކްޝަންގައި ވާދަކުރައްވާ އާޒިމާ ޝަކޫރުގެ ކެމްޕޭން ސައިކަލް ބުރު ބޭއްވުމަށް ނިންމާފައިވަނީ މިއަދު ހަވީރު މާލޭ ސިޓީގައެވެ.
އާޒިމާ ކެމްޕޭން ޓީމުން ބުނީ މި ސައިކަލްބުރު އޮންނާނީ މިއަދު ހަވީރު 3:45 އިން ފެށިގެން، އިއްޒުއްދީން މަގު (ހައުސިންގ މިނިސްޓްރީ ކައިރި) އިން ފެށިގެން ކަމުގައެވެ.
މި ސައިލަކް ބުރުގައި ނާއިބު ރައީސް ހުސެއިން މުހައްމަދު ލަތީފްވެސް ބައިވެރިވެވަޑައިގަތުމަށް ވަނީ ހަމަޖެހިފައެވެ.
މާލޭ ސިޓީގެ މޭޔަރުކަމަށާއި، އަދި ކައުންސިލުން ހުސްވެފައިވާ ގޮނޑިތަކަށް ބޭފުޅުން އިންތިހާބު ކުރުން އޮންނާނީ އަންނަ ހޮނިހިރު ދުވަހުއެވެ.
މާލޭގެ މޭޔަރު ކަމަށް ވާދަކުރައްވާނެ ބޭފުޅުންގެ ތެރޭގައި ދެން ހިމެނެނީ އެމްޑީޕީގެ ޓިކެޓުގައި އެމްޓީސީސީގެ ކުރީގެ ސީއީއޯ އާދަމް އާޒިމްއާއި، މިހާރު މާލޭ ސިޓީ ކައުންސިލްގެ ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު އާއި ކުރީގެ ޕޮލިސް ކޮމިޝަނަރު ހުސައިން ވަހީދުގެ އިތުރުން އަމިއްލަގޮތުން ވާދަކުރާ ފުރަހަނު ޝުއައިބުއެވެ.
