( 7 ޖަނަވަރީ 2024 ގައި ޝާއިޢުކުރި ބަޔާ ގުޅޭ )
ތަހުނިޔާމެންނަށް ރެސްޓޯރެންޓަށް ވަދެވުނުއިރު ، މުރުތަޟާ އިނީ ފޯނެއްގައެވެ. ތަހުނިޔާމެން ފެނުމާއެކު ، ފަހުން ވާހަކަ ދައްކާނަމޭ ބުނެ ފޯނު ކަނޑައިލިއެވެ. މުރުތަޟާ ގުޅައިގެން ވާހަކަ ދެއްކީ ނޫރުގެ އޮފީހުގައި އުޅޭ ، މުރުތަޟާގެވެސް ރައްޓެއްސަކާއެވެ. އޭނާއާ ގުޅައިގެން ، މުރުތަޟާ ބޭނުންވީ ނޫރު އެދަތުރު އައުމަށް ރޭވިގޮތް ސާފު ކުރުމަށެވެ. އެކަން ސާފުކުރުމަށްފަހު ، އެދަތުރު ދިއުމަށް ނޫރު ރޭވިގޮތް ، އޭނާ ، މުރުތަޟާއަށް ކިޔައިދިނެވެ.
ތަހުނިޔާމެން ވަނުމާއެކު ، ރަނގަޅަށް އަނގަ ތަޅައިލެވިއްޖެހޭ އަހައި މުރުތަޟާ ސުއާލު ކުރިއެވެ. އެސުއާލަށްވެސް ޖަވާބުދިނީ ނޫރުއެވެ. ވަރަށް ވާހަކަ ދެއްކިއްޖެކަމަށްބުނެ ، ތަހުނިޔާއަށާއި މުރުތަޟާއަށް ނޫރު ، ޝުކުރު އަދާކުރިއެވެ. އޭނާއަށް ވަގުތުކޮޅެއް ޚާއްޞަކޮށްލަދިން ކަމަށްޓަކައެވެ. އެހެން ނޫންނަމަ ، ފޫހިވެގެންގޮސް ނޫރު އަވަދިވާނެއެވެ. އެދެމީހުން ނޫނީ އަނގައިން ބުނެލާނެ އެއްވެސް މީހަކު ނެތެވެ. މުރުތަޟާއާއި ނޫރުއަށް ކުޑަ ވަގުތުކޮޅެއް ދިނުމަށްޓަކައި ، ތިމަންނަ މިދަނީ ފާޚާނާއަށޭ ބުނެ ތަހުނިޔާ އެތަނުން ދުރަށް ހިނގައިގަތެވެ.
" ނޫރުލްޢައިނުއެވެ ! ވާހަކައެއް ބުނަން ހެއްޔެވެ ؟ ނޫރުލްޢައިނު ތިޖަހާ ސަކަރާތުން އެންމެ ބޮޑު ގެއްލުމެއްލިބޭނެ މީހަކީ ، ޚުދު ނޫރުލްޢައިނުއެވެ. އެކަން ހަނދާން ބަހައްޓައްޗެވެ. " މުރުތަޟާ ބުންޏެވެ.
ނޫރު އިނީ ބުނާނެ އެއްޗެއް ނޭނގި ބަސް ހުއްޓިފައެވެ. މުރުތަޟާއާ ދިމާއަށް ބަލައިލާކަށް ނޫރުއަކަށް ނުކެރުނެވެ. ދުރުބަލަހައްޓައިގެން އިނދެ ، މުރުތަޟާވެސް ތިކުޅެނީ ކުޅިވަރެއް ނޫންހޭ ބުންޏެވެ. ދެ ބިއްލޫރި ތަށްޓެވެ. ކޮންމެ ތަށްޓެއްވެސް ހުރީ އަޅައިފާ އެހުރި އެއްޗަކުން ނުފުރި މެދާހަމައިގައެވެ. އެތަނުން އެއްތަށިހުރީ މެދާހަމަޔަށް ފުރިފައެވެ. އަނެއްތަށިހުރީ މެދުންމައްޗަށް ހުސްކޮށެވެ. ފުރިހަމަވެފައިވަނީ އެތަނުން ކޮން ތަށްޓެއްކަމެއް ނޭނގެއެވެ.
" ނޫރުއެވެ ! ތިކުޅޭ ކުޅިވަރު ހުއްޓާލާށެވެ. ތި ކުޅިވަރުން ބަލިވެއްޖެނަމަ ، ހިތްދަތިވެގެންގޮސް ، ނޫރު މޮޔަވާނެއެވެ. މޮޅުވެއްޖެނަމަ ، މޮޅުވުމުން ލިބުނު އުފަލަށްވުރެ ، ހިތުގެ ރިހުން ގަދަވާނެއެވެ. އޭރުންވެސް ނޫރު މޮޔަވާނެއެވެ. " މުރުތަޟާ ބުންޏެވެ.
ނޫރު އިށީނދެއިން ގޮނޑި ، މުރުތަޟާއާ ގާތަށް ދަމާލައި ، މުރުތަޟާއާ ގާތަށް ޖެހިލިއެވެ. އަދި ، މުރުތަޟާއަށް ހީވަނީ ކިހިނެއްކަމަށްހެއްޔޭ އެއްސެވެ. ނޫރުއާއި މުރުތަޟާއާ ދެމީހުން ރުޅިވިފަހުން ، ދެމީހުންކުރެ އެކަކަށްވެސް ހަމަޖެހުމުގެ ނޭވާއެއް ލެވުނުތޯ ، ނޫރު ސުއާލު ކުރިއެވެ. ދެމީހުންވެސް އެތިބީ މޮޔަވެފައެވެ. އަމިއްލަ ނަފްސުގެ މައްޗަށް ، އެކަކަށްވެސް ބާރެއް ނުފޯރުވެއެވެ. ކުރާކަމެއް ކުރެވެނީ ބޭ އިޚްތިޔާރުގައެވެ. ހިތުގައި އަޅަމުންދާ ވޭން ތަޙައްމަލު ކުރަމުންނެވެ. ހިތަށް ލިބެމުންދާ ތަކުލީފުތައް ދުނިޔެއަށް ސިއްރު ކުރަމުންނެވެ. ސިކުނޑިން ބޭރުކުރާ ގޭސްތަކުން ، އެންޒައިޓީއަށް މަގުފަހިވެ ، ސިކުނޑި އެދަނީ ގޮވަމުންނެވެ. އެކަންކަމަކީ މުރުތަޟާއަށް ކުރިމަތިނުވާ ކަންތައްތަކެއްނަމަ ، އަމިއްލަ ނަފްސަށް ދޮގުހެދުން ނޫންމަގެއް އިޚްތިޔާރު ކުރާކަށް ނުއޮންނާނެއެވެ. އަމިއްލަ ހިތަށް އަނިޔާދީ ތަކުލީފުތަކުން އެހިތް ކުދިކުދިވުން ނޫންގޮތެއް ނުފެންނާނެއެވެ.
ނޫރުއަކީ ، ދުނިޔެ ދައްކާ މަގުން ހިނގާ މީހެކެވެ. ނޫރު ބޭނުންވާ ކަންކަމާއި ބޭނުންވާގޮތް އިސްކޮށްގެން އެކަންކަން ނުފޮރުވައި ، އެކަންކަން ޙާޞިލްކުރުމަށް މަސައްކަތްކުރާ މީހެކެވެ. ހިތުގައި އެއްބައި ފޮރުވާފައި ، އަނެއްބައި ބޭރުކުރާއިރު ، ދޮވެ ސާފުކޮށްފައެއް ނޫރުއަކަށް އެއެއް ބޭރެއް ނުކުރެވޭނެއެވެ. ނޫރުގެ މޫނުމަތިން ފެންނާނީ ނޫރުގެ ހިތެވެ. ހިތަށް އޮޅުވާލައިގެން އެހިތުގައި އޮތް އެއްޗެއް ބަދަލުކޮށް ، ދުލުން ބޭރުކުރުމަކީ ނޫރު ދަންނަ ކަމެއްނޫނެވެ.
މުރުތަޟާއަކީ ނަފްސުގެ އަޅެކެވެ. މުރުތަޟާގެ ހިތުގައިވާ އެއްވެސް އެއްޗެއް އެއޮތްގޮތަކަށް ބޭރުކުރުމުގެ އިޚްތިޔާރެއް އޭނާގެ ނަފުސަކަށް ލިބިފައެއް ނުވެއެވެ. މަންމައާއި ދައްތަ ޖަހާހާ ބެރަކަށް ނަށަން މަޖުބޫރުވެފައިހުރި ފިރިހެނެކެވެ. އޭގެ ތެރެޔަށް މިހާރު އެވަނީ ، ތަހުނިޔާވެސް ވަދެފައެވެ. ފިރިހެނަކަށް ، ތިންހަތަރު އަންހެނުން ބޭނުންވާ ގޮތްތަކަށް ތަބާވެގެން އުޅުމަކީ ކިހާވަރެއްގެ ކަމެއްކަން ސާފުކޮށްލަން ބޭނުންވާ މީހަކު ހުރިއްޔާ ، އެވާހަކަ މުރުތަޟާގާތު އަހާށެވެ. މުރުތަޟާއަކީ އެކަމުގެ މާހިރެކެވެ. އަތުގައިވާ އެއްޗެއް ބީވެގެންދިޔަޔަސް ، ހިތް ފޮތިފޮތިވެ ކިތަންމެ ކެކުޅުމެއް އެޅިޔަސް ، މުރުތަޟާ އިޚްތިޔާރު ކުރާނީ މަންމަބުނާ ގޮތެވެ. ނޫރުއާއި މުރުތަޟާއާ ދެމީހުންގެ ތަފާތަކީ އެއީއެވެ. ތެލާއި ފެނާ އެކުވާނެ ގޮތެއް އެއީ އޮންނަގޮތެއްނޫނެވެ. އެހެންކަމުން ، ނޫރުއާއި މުރުތަޟާގެ ރުޅިވުމަކީ ، އެފަދަ ކަމެކެވެ.
" މުރުތަޟާ ތިދައްކަނީ ކޮންކަހަލަ ވާހަކައެއް ހެއްޔެވެ ؟ އަހަރެން ކުޅިއެއް ކުޅުނުނަމަ ، މުރުތަޟާގެ އަނތްބެއްގެ ގޮތުގައި މިއަދު އިންނާނީ މި ނޫރުއެވެ. އަހަރެން ، ކުޅިއެއް ނުކުޅުނުކަން ނަސީބެއް ނޫންހެއްޔެވެ ؟ " ނޫރު ، ވައިއަޑުން ވާހަކަ ދައްކަމުން ގެންދިޔައެވެ. އެތާ ތިބި މީހުންނަށް އަޑުއިވިދާނެތީއެވެ.
ވާހަކަ އެހިސާބަށް ދިޔަތަނާ ، ތަހުނިޔާވެސް އަތުވެއްޖެއެވެ. ނޫރުއާއި މުރުތަޟާއާއި ދެމީހުންވެސް ހިނިމޫނެއް ދައްކައިލާ އެދެމީހުން ވާހަކައެއް ދެއްކިކަމަށްވެސް ނުހެދިއެވެ. ކާތަކެއްޗަށް އޯޑަރު ކުރުމަށްފަހު ، އެއެއްޗެތި އަންނަންދެންވެސް ، ތިންމީހުންކުރެ މީހަކު ވާހަކައެއް ނުދައްކައެވެ. އިރުއިރުކޮޅުން ، އެކަކު އަނެކަކަށް ބަލައިލުމަށްފަހު ، ހީލުންފިޔަވައި އިތުރުކަމެއް ނުހިނގައެވެ.
**************************
ނޫރުގެ ފްލައިޓް އޮތީ ހަވީރުއެވެ. އެއީ ، ތަހުނިޔާމެންވެސް ފުރަން އޮތް ގަޑިއެވެ. އިއްތިފާޤަކުން ކަމަށްވިޔަސް ، ތިންމީހުންވެސް މަރީން އެފުރަނީ އެއްގަޑިއެއްގައެވެ. އެއަރޕޯޓަށްދާން ކާރަށް އެރުމަށްފަހު ، އަލްވަދާޢުގެ ނޯޓެއް ނޫރު ލިޔެލިއެވެ. އަދި އިރުކޮޅަކު ވިސްނަން އިނުމަށްފަހު ، މުރުތަޟާއަށް އެނޯޓު މެސެޖްކޮށްލިއެވެ. އޭރު ތަހުނިޔާ އުޅެނީ ޕެކްކުރުމުގެ މަސައްކަތުގައެވެ. މުރުތަޟާވީ ފާޚާނާގައެވެ. މުރުތަޟާގެ ފޯނަށް މެސެޖެއް އައި އަޑަށް ތަހުނިޔާއަށް ބަލައިލެވުނެވެ. އެއީ ނޫރުގެ މެސެޖެކެވެ. ވަރަށް ކުރެވެ. ލިޔެލާފައިވަނީ ހަމައެކަނި " އަލްވަދާޢު " އެވެ. މުރުތަޟާ ފާޚާނާއިން އައިސް ފޯނަށް ބަލައިލިއިރު ނޫރުގެ މެސެޖެއް އައިސް އޮތެވެ. ފޯނު ބޭއްވިފައި އޮތީ ތަހުނިޔާ އިށީނދެލައިގެން އިން ގޮނޑީގެ ކުރިމަތީގައެވެ. އެ މެސެޖް އައިކަން ތަހުނިޔާއަށް ސިއްރެއް ނުވާނެއެވެ. އެއީ ނޫރުގެ މެސެޖެއްކަމަށް ، ތަންކޮޅެއް ބާރަށް ތަހުނިޔާއަށް ބުނެވުނެވެ. މުރުތަޟާއަށް އަލްވަދާޢު ކިޔައިލީއެވެ. އެމެސެޖްގެ މަޤްޞަދަކީ ކޮބައިކަމެއް ތަހުނިޔާއަކަށް ނޭނގެއެވެ. އެކަމުގައި މުރުތަޟާ ބުނާނީ ކީކޭ ހެއްޔެވެ ؟ އެއީ އޭނާއާ ބެހޭކަމެއްނޫނެވެ. ނޫރު ކޮންމެ މެސެޖެއް ފޮނުވިޔަސް ، އޭނާ ކަހަރުވަކެކޭވެސް ހިތަށް ނާރައެވެ.
" ނޫރުގެ ދަތުރު ނިންމާފައި އެނބުރި އެދަނީ ކަރާޗީއަށެވެ. އެ މެސެޖުން ދޭހަވާ އެނޫންމާނައެއް ކޮބައި ހެއްޔެވެ ؟ " މުރުތަޟާ ބުންޏެވެ.
ތަހުނިޔާއަށް އެއީ މައްސަލައެއްނޫނެވެ. އެކަމަކުވެސް އޭނާގެ ހިތަށް ކޮންމެވެސް އެއްޗެއް އެރުމަކީ އެކަށީގެންނުވާ ކަމެއްނޫނެވެ. ތަހުނިޔާގެ ފޯނަކަށް އެއްވެސް މެސެޖެއް ނާދެއެވެ. ތަހުނިޔާއާއި ނޫރުއަކީ ، މިޒަމާނުގެ ގޮތަށް ބުނާނަމަ ، ބެސްޓް ފްރެންޑުންނެވެ. ކުރިން ، ލޯބީގެ ގުޅުމެއް އޮތް ފިރިހެނަކީ ، ބެސްޓް ފްރެންޑަކަށްވުރެ ގާތްމީހެއްކަމަށް ވެދާނެއެވެ. އެނަތީޖާގައި ، މުރުތަޟާއަށްވުރެ ތަހުނިޔާ ، ނޫރުއާ މާ ދުރެވެ. އެކަން މުރުތަޟާއަށް ނޫރު އެފޮނުވި މެސެޖުން ސާބިތު ކޮށްދީފިއެވެ.
ޙަޤީޤަތުގައިވެސް ތަހުނިޔާއާއި ނޫރުއަކީ ، ވަރަށް ގާތް ދެ އެކުވެރިންނެވެ. މުރުތަޟާއަކީ ، ނޫރުގެ ކުރީގެ ލޯބިވެރިޔާއެވެ. ކުރިންވެސް ، ތަހުނިޔާއަށްވުރެ ބޮޑަށް ނޫރު އިސްކުރަމުން ދިޔައީ މުރުތަޟާއެވެ. އެންމެ ފުރަތަމަ މުރުތަޟާއެވެ. ދެން ، އެހެންމީހުންނާއި ކަންކަމެވެ. މިއަދުވެސް ، އެންމެގާތް ރަޙުމަތްތެރިޔާ ، ތަހުނިޔާއަށްވުރެ ގާތީ ، ކުރީގެ ލޯބިވެރިޔާ މުރުތަޟާއެވެ. އެ ޙަޤީޤަތް މުރުތަޟާއާއި ތަހުނިޔާގެ ކުރިމަތީގައި މިއަދުވެސް އެދިޔައީ ސާބިތުވެގެންނެވެ.
ތަހުނިޔާއަށް އެއީ އެހާ ބޮޑުކަމެއްނޫނެވެ. އެހުރިހާކަމެއް އެއީ އޭނާއާ ކުރިމަތިވާނެ ތަކުލީފުކަމުގައި ތަހުނިޔާ ހުންނަނީ ޤަބޫލުކޮށްގެންނެވެ. އެހެންކަމުން ، ކަންބޮޑުވުމުގެ އެއްވެސް އަސަރެއް ތަހުނިޔާގެ މޫނުމަތިން ، ފާޅެއް ނުވެއެވެ. އޭނާގެ މޫނުމަތީގައިވަނީ ، ހަމަޖެހުމާއި އުފާވެރިކަމެވެ. ފަރި ، ހިނިތުންވުމެކެވެ.
މުރުތަޟާއަށް އެއީ މައްސަލައެކެވެ. ނޫރުގެ ޢަމަލުތަކާއި އެޢަމަލުތަކުގެ މަޤްޞަދު އެންމެ ސާފުކޮށް އެނގޭނީ މުރުތަޟާއަށެވެ. މުރުތަޟާހުރީ ، އެކަމާބެހޭގޮތުން ބުނާނެ އެއްވެސް އެއްޗެއް ނޭނގި ކަންބޮޑުވެފައެވެ. އެއްޗެކޭ ބުނަން ބޭނުންވެގެން ، އަނގަ ހުޅުވައިލައެވެ. އެހެނަސް ބުނާނީ ކީކޭކަމެއް އޭނާއަކަށް ނޭނގެއެވެ.
" ތަހުނިޔާއެވެ ! އެއީ ، އަންހެނެކެވެ. ފިރިހެނުން ހައްލައިލައިގެން ، އެ އަންހެނަކާ ދުރަށް ނުދެވޭނެގޮތް ވަރަށް ރަނގަޅަށް އެ އަންހެނަކަށް އެނގެއެވެ. ދެން ، އެހެން އަންހެނެކެވެ. ފިރިހެނަކު ، އަންހެނަކާ ދުރަށް ދިއުމަށް އުފުއްލަމުން އެގެންދަނީ ކިހާވަރެއްގެ ތަކުލީފެއްކަން ، އަދި ކުރަމުން އެގެންދަނީ ކިހާ މަސައްކަތެއްކަން ، އެ އަންހެނާއަކަށް ، އިޙްސާސްވެސް ކޮށް ނުލެވެއެވެ. ތަހުނިޔާއެވެ ! އަހަރެންނަށް މަޢާފު ކުރާށެވެ ! " މުރުތަޟާ އޭނާގެ ވާހަކަ ނިންމާލައި ތަހުނިޔާއާ ދިމާއަށް ބަލަހައްޓައިގެން ހުށްޓެވެ.
މުރުތަޟާ އެބުނީ ކީކޭކަން ، އަދި މުރުތަޟާ އެބުނި ވާހަކައެއްގެ މާނަޔަކީ ކޮބައިކަން ، ވަރަށް ފަސޭހައިން ތަހުނިޔާ ވިސްނައިގަތެވެ. ކުރިންވެސް އެދެމީހުންގެ މެދުގައި ދެކެވިފައިވާ ވާހަކަތަކަށް ވިސްނާއިރު ، މުރުތަޟާއަށްވެސް އަދި ނޫރުއަށްވެސް ، ތަހުނިޔާގެ އެހީތެރިކަން ބޭނުންވާކަމުގައި ތަހުނިޔާއަށް ވިސްނުނެވެ. އަޞްލު ، ޙަޤީޤަތަށް ބަލާއިރު ، ތަހުނިޔާއަށް ކަނޑައެޅިގެން ދެރައެއްދޭކަށް ނޫރު ބޭނުމެއް ނުވާނެއެވެ. ތަހުނިޔާގެ ދިރިއުޅުން ބަރުބާދުވެގެންދިއުން އެއީ ނޫރު އެދޭނެކަމެއްނޫނެވެ.
ދެންހުރީ މުރުތަޟާއެވެ. މުރުތަޟާއަކީ ، ތަހުނިޔާގެ ފިރިމީހާއެވެ. ނޫރުގެ ކުރީގެ ލޯބިވެރިޔާއެވެ. މުރުތަޟާއަށް އެއުޅެނީ ނޫރުގެ ކިބައިން ސަލާމަތް ނުވެގެންނެވެ. ތަހުނިޔާއަށް ދެރައެއްދޭކަށް ، މުރުތަޟާވެސް ، ތަހުނިޔާއަކާ ނުއިންނާނެއެވެ. އަދި އަމްދުން ، ތަހުނިޔާގެ ފިރިޔަކަށްވެ ، ތަހުނިޔާގެ ޒިންމާ ކޮނޑުއަޅައިގެންހުރެ ، އިންސާނިއްޔަތަށްޓަކައިވެސް ، ތަހުނިޔާއާމެދު މުރުތަޟާ ވިސްނާނެއެވެ. މުރުތަޟާއަކީ ، ހެޔޮލަފާ މީހެކެވެ. ނޫރުއަކީ ، ހެޔޮލަފާ އެހެނަސް ، ގޮތްދޫނުކުރާ އަދި އަމިއްލަ އެދުމަށް ވިސްނާ މީހެކެވެ. ދެމީހުންނަކީވެސް ، ތަހުނިޔާއަށް މުހިންމު ދެމީހުންނެވެ. ތަހުނިޔާވެސް ، މުރުތަޟާވެސް ، އެކަމާބެހޭގޮތުން އިތުރު ވާހަކައެއް ނުދައްކައެވެ. ތަހުނިޔާގެ މޫނުމަތިން ފާޅުވަމުންދިޔަ ހިނިތުންވުމަށް ބަދަލެއް ނާދެއެވެ. އަދި ، މުރުތަޟާގެ މޫނުމަތީގައިވާ ހާސްކަމަށްވެސް ބަދަލެއް ނާދެއެވެ.
********************
ދަތުރު ނިންމައިލުމަށްފަހު ، ކަރާޗީއަށްގޮސް ގެޔަށް ވަތްތަނުން ނޫރުއާ ފުރަތަމަވެސް ދިމާވީ ، ފަހަރި ، ރައިދާއާއެވެ. ދަތުރު ކިހިނެއްތޯ ސުއާލު ކޮށްލުމާއެކު ، އެއީ ވަރަށް ފުރިހަމަ މަޖާ ދަތުރެއްކަމަށް ނޫރު ބުންޏެވެ. ބޯ ހަމަޖައްސައިލުމަށްޓަކައި ، ދޭތެރެޔަކުން އެކަހަލަ ދަތުރު ރާވާލަންޖެހޭކަމުގައި ނޫރު ބުންޏެވެ.
ދަތުރާބެހޭ އެއްވެސްކަމެއް އެނގޭކަމަށް ހަދާކަށް ރައިދާ ބޭނުމެއް ނުވިއެވެ. އެހެނަސް ، އެއީ އޭނާއަށް އެހާ ފަސޭހަކަމަކަށް ނުވިއެވެ. ރައިދާގެ އަނގަވެސް ހިސާބަށްވުރެ ގަދައީއެވެ. މުރުތަޟާއާއި ތަހުނިޔާވެސް ، މަރީއަށް ގޮސް އުޅޭވާހަކަ އަޑުއިވިފައިވާކަމުގައި ރައިދާ ބުނުމާއެކު ، ސިޑިން މައްޗަށް އަރަމުންދިޔަ ނޫރުއަށް ހުއްޓުން އެރިއެވެ. އެމީހުންނާ ނޫރުއާ ދިމާވިތޯވެސް ރައިދާ އެހިއެވެ. ރައިދާގެ ބޭނުމަކަށްވީ ވާހަކަ ހޯދުމެވެ. ނޫރު އުޅެމުން އެގެންދާ ގޮތާއި ކުރަމުން އެގެންދާ ކަންކަމުގެ މަޢުލޫމާތު ، ރައިދާއަށްވެސް އެނގޭކަން އަންގައިލުމެވެ.
" އެހެން ހެއްޔެވެ ؟ އެމީހުން އެތަނުގައި އުޅޭކަމެއް އަހަރެންނަށް އެނގިފައެއް ނެތެވެ. " ވަރަށް ހަމަޖެހިލައިގެންހުރެ ނޫރު ބުންޏެވެ.
ނޫރުގެ ފަރާތުން ރަނގަޅު އެއްވެސް މަޢުލޫމާތެއް ނުލިބޭނެކަން ރައިދާއަށް އެނގެއެވެ. ދެން އިތުރަށް އެވާހަކަ ދެއްކުމުގެ ބޭނުމެއް ނެތެވެ. ދެފަހަރިންގެ މެދުގައި ހިތްހަމަ ނުޖެހުން އުފެދުން ނޫންކަމެއް ނުވާނެއެވެ.
" ނޫރު އިންނާނެ ރަނގަޅު ކުއްޖަކު ހޯދައިދޭން ، ބައްޕަ އަހަރެންގާތު ބުނެފިއެވެ. " ރައިދާ ބުންޏެވެ.
ރައިދާގެ އެބަސް ، ނޫރުގެ ކަންފަތަށް އިވުނީ ގަދަ ގުގުރިއެއްގެ ބިރުވެރި އަޑެއްގެ ގޮތުގައެވެ. އަތުން ހިފައިގެންހުރި ސޫޓްކޭޝް ސިޑިމައްޗަށް ވެއްޓުނެވެ. ދެއަތުން ދެކަންފަތް ނިވާކޮށް ، ފިއްތާލައި ރައިދާއާ ދިމާއަށް ބަލައިލާ ދެލޯ ބޮޑުކޮށްލަމުން ބުންޏެވެ.
" އެއީ އަހަރެން އެއްވެސް ވަރަކަށް ބޭނުންވާކަމެއްނޫނެވެ. އަހަރެންގެ އަމިއްލަ އެކަހަލަ ކަންކަމާ ނުބެހުމަށް އެތައްހާސް ފަހަރަކު ، ރައިދާގާތު ބުނެފީމެވެ. އަހަރެންގެ ދިރިއުޅުން އަހަރެން ބޭނުންވާގޮތަކަށް ކުރިޔަށް ގެންދަން ދޫކޮށްލަ ދޭށެވެ. ﷲ އަށްޓަކައި ބުނަމެވެ. އަހަރެން ބޭނުންވާ ވަކިގޮތްތަކެއް ހުރިއިރު ، އެކަންކަމަކީ ޙައްލުނުކުރެވޭ ކަންކަމަށްވާއިރު ، އަހަރެންނަކީ މައްސަލައަކަށް އެބަ ވެއެވެ. އެހެންކަމަށް ވަންޏާ ، އަހަރެންނާ މުރުތަޟާގެ ތަފާތަކީ ކޮބައި ހެއްޔެވެ. އޮތީ ކޮން މައްސަލައެއް ހެއްޔެވެ ؟ (ނުނިމޭ)
varah varahves reethi shukuran
ރެސްޓޯރެންޓަށް ތިންމީހުން ކާންދިއުން . ނޫރުގެ މެސެޖް މުރުތަޟާއަށް ލިބި ، ތަހުނިޔާއާއި މުރުތަޟާއާ ދެމެދު ނުތަނަވަސްކަން އުފެދުން . ނޫރުއާއި ތަހުނިޔާއާ މުރުތަޟާ ، މަރީން ފުރައިގެން ކަރާޗީއަށް އެނބުރި އައުން. ނޫރު ކައިވެނިކުރާނެ ފިރިހެނަކު ހޯދައިދިނުމަށް ނޫރުގެ ބައްޕަ ، ރައިދާގާތު ބުނެފައިވާތީ އެކަން ނޫރުއަށް ރައިދާ އެންގުން. އެއްދުވަހުން ، ކިހާކަމެއް އަދި ކޮންކަމެއް ނުހިނގައިގެންބާ މައްސަލަޔަކަށްވަނީ. ވާހަކަ ލިޔުންތެރިޔާ ތަރުޖަމާކުރުމުގައި ، އެ ތަރުޖަމާއެއްގެ އަސްލު ނުގެއްލޭގޮތަށް ބަލާނެކަމަށް ފެނޭ. ވާހަކައެއްގެ އަސްލު ތަރުޖަމާއެއްގައި ވާހަކަތަކެއް ތަކުރާރުވާނަމަ އެކަމުގެވެސް ބޭނުމެއް އޮންނާނެކަމަށް ފެނޭ. އެއީ ވާހަކަ ތަރުޖަމާކުރާ މީހެއްގެ މައްސަލަޔަކަށް ނުވެދާނެ.
ވާހަކައިގެ ސެހެރީބައި މާދިގުވެފައި އަބަދު އެއްވާހަކަޔެއް ތަކުރާރުވެފައި ކަމެއްނުހިގައި ނިމެނީ ކޮންމެދުވަހަކު،