މާތް ﷲ ގެ ހެޔޮ ރަޙުމަތްފުޅަކީ ، އިންސާނާއަށް އެއާނުލައި ދުނިޔެ ނުފެންނާނެ ، މަތިވެރި ސިފަފުޅެކެވެ. 26 މެއި 2023 ވީ ހުކުރުދުވަހު ، މުޅިރާއްޖޭގެ ހުރިހާ މިސްކިތްތަކެއްގައި ކިޔުނު ހުކުރު ޚުތުބާގައި ، ނަޞޭޙަތް ދެއްވާފައިވަނީ ، މި މަވްޟޫޢުގެ މައްޗަށެވެ. ކީރިތި ޤުރުއާނާއި ރަސޫލު ޞައްލަﷲ ޢަލައިހި ވަސައްލަމަގެ ސުންނަތުން މިސާލު ނަންގަވައި ، މާތް ﷲ ގެ ރަޙުމަތްފުޅު ، އެ ޚުރުބާގައި ވަރަށް ރަނގަޅަށް ސާފުކޮށްދެއްވާފައި ވެއެވެ.
އަޅުގަނޑުމެން ދިރިއުޅެމުން މިގެންދާ ދުނިޔެއަކީ ، ﷲ ގެ ރަޙުމަތާއި ނިޢުމަތުން ފުރިގެންވާ ތަނެކެވެ. އެމަތިވެރި ރަޙުމަތާއި ނިޢުމަތް ދުނިޔޭގައި ލެއްވީ އިންސާނާއަށްޓަކައެވެ. ދުނިޔެއަކީ އިންސާނާގެ ދިރިއުޅުމަށް ފަސޭހަތަނެއްގެ ގޮތުގައި ، ދުނިޔޭގެ ވަށައިގެން ބުރުޖަހާގޮތަށް އިރު ލެއްވިއެވެ. އަދި ދުނިޔެއާއެކު ބުރުޖަހާގޮތަށް ހަނދު ލެއްވިއެވެ. އިންސާނާ ނޭވާލުމަށްޓަކައި ، ދުނިޔޭގައި އޮކްސިޖަން ލެއްވިއެވެ. ކަނޑާއި އެއްގަމުގެ ރޯދިބަރަކާތާއި ، ފެނާއި ވަޔާ އަދި އުޑުން ވާރޭވެއްސެވުން އެއީ ﷲ ގެ ރަޙުމަތެވެ. އިންސާނާއަށްޓަކައި ލައްވާފައިވާ ކޮޅެއްނެތް ، ދެމިގެންވާ ރަޙުމަތެވެ. އާޚިރަތާ ހަމަޔަށެވެ.
އިންސާނާގެ މައްޗަށް ފަރުޟުކުރައްވާފައިވާ ފަސްނަމާދާއި ، އެނަމާދުތަކާ ގުޅިގެންނާއި ނުގުޅި ސުންނަތުގެ ގޮތުގައި ކުރެވޭ އެތައް ސުންނަތް ނަމާދެއްގައި ، ކީރިތި ﷲ ގެ ރަޙުމަތްފުޅުގެ މަތިން އިންސާނާ ހަނދުމަ ކުރެއެވެ. ހަށަންބަތް ތަކުބީރަށްފަހު ، އަލްޙަމްދުން ފެށޭ ނަމާދުގެ ތެރޭގައި އެތައް ފަހަރަކު ﷲ ގެ ރަޙުމަތްފުޅުގެ މަތިން އިންސާނާ ހަނދުމަކުރެއެވެ.
ﷲ އަށް އުރެދޭމީހުންނަށްވެސް ، އެކަލާނގެ ޙަޟުރަތަށް އެނބުރި އައުމުގެ ފުރުޞަތު ދެއްވުމަށްޓަކައި ރަޙުމަތް ލައްވައެވެ. ﷲ އީ ، އެކަލާނގެ ޚަލްޤުކުރެއްވި އެންމެހައި އިންސާނުންނަށް ރަޙުމާނުވަންތަ އަދި ރަހީމުވަންތަ ރަސްކަލާނގެއެވެ. އެކަލާނގެޔަށް އީމާންވާ މީސްތަކުންނާއި ކާފަރުންނަށްވެސް މެއެވެ. އެބައިމީހުންނަށް ، ދުނިޔޭގެ އަރާމާއި ލައްޒަތު ދެއްވައެވެ. ދަރިންނާއި އަނބިން ދެއްވައެވެ. ފައިސާ އާއި މުދާ ދެއްވައެވެ. ފުރިހަމަ ޞިއްޙަތާއި ދުޅަހެޔޮ ދިރިއުޅުމެއް ދެއްވައެވެ. ބިރަކާނުލައި ދުނިޔެ ހޯދައި ދުނިޔޭގައި އުޅުމަށް އަމާންކަން ދެއްވައެވެ. އެބައިމީހުން ﷲ އަށް ޝަރީކުކޮށް ކާފަރުވާއިރުވެސް މެއެވެ. ﷲ ވޮޑިގެންވާކަންވެސް ޤަބޫލު ނުކުރާ ހިނދުއެވެ. އެއީ ކީރިތި ﷲ ގެ ރަޙުމަތްފުޅުގެ ބޮޑުކަމުންނެވެ. ﷲ ގެ ރަޙުމަތްފުޅުން ، އެބައިމީހުންނަށް ވަގުތުން ޢަޒާބެއް ނުދެއްވައެވެ. ﷲ ގެ ޙަޟުރަތުން ފޮނުއްވާ ރަޙުމަތެއްގެ ގޮތުގައެވެ. އެހެނަސް ، އެބައިމީހުންގެ މައްޗަށް ލަޢުނަތް ލައްވާ ގޮތުގައި ، އެބައިމީހުން މަރުވަންދެން ، ދުނިޔޭގައި އުޅުމަށް ފުރުޞަތު ދެއްވައެވެ. އާޚިރަތްދުވަހުން އެމީހުންގެ ގޮވައްޗަކަށްވާނީ ނަރަކައެވެ. ތަވްބާވެ ، ތަޤްވާވެރި ދިރިއުޅުމަކުން ، ﷲ ގެ ޙަޟުރަތަށް އެނބުރި ރުޖޫޢަ ނުވެއްޖެ ޙާލަތެއްގައެވެ. ﷲ ގެ ޙަޟުރަތަށް އެނބުރި ރުޖޫޢަ ވެއްޖެނަމަ ، އެބައިމީހުންގެ މައްޗަށް ، އެކަލާނގެ ރަޙުމަތްފުޅު ތަނަވަސް ކޮށްދެއްވައެވެ. އެހެނީ ، އެކަލާނގެއަށް ތަވްބާވެ ، ޢަމަލުތައް އިޞްލާޙު ކޮށްފިމީހަކީ ، އެކަލާނގެ ރުއްސަވާމަގު އިޚުތިޔާރު ކޮށްފި މީހެކެވެ. އެކަލާނގެއީ ގިނަގިނައިން ފާފަ ފުއްސަވާ ރަސްކަލާނގެއެވެ.
ﷲ ސުބްޙާނަހޫ ވަތަޢާލާގެ ރަޙީމުވަންތަކަމަކީ ، މުއުމުނިންނަށް ޚާއްޞަކުރައްވާފައިވާ ސިފަފުޅެކެވެ. މި ރަޙުމަތްފުޅު ޚާއްޞަކުރައްވާފައިވަނީ ، އެކަލާނގެޔަށް އީމާންވެ ތަޤްވާވެރިވާ މުއުމިނު އަޅުތަކުންގެ މައްޗަށެވެ. ﷲ އަށް އަޅުކަންކޮށް ، ރުކޫޢުކޮށް ސަޖިދަކޮށް އެކަލާނގެ ޙައްޤުތައް އަދާކުރާ އިންސާނުންގެ މައްޗަށެވެ. އެއީ އެކަލާނގެ ރުހިވޮޑިގަތުން ލިބިގެން ، ތެދުމަގު ލިބިގެންދާ ލޮބުވެތި ރަޙުމަތެކެވެ.
ﷲ ގެ ރަޙުމަތްފުޅު ، އެކަލާނގެ ކޯފާވެވޮޑިގަތުމަށްވުރެ އިސްކުރައްވައި ، ޢަރުޝީގައި ، ކޯފާއަށްވުރެ މަތީގައި ރަޙުމަތްފުޅު ލިޔުއްވާފައިވާކަމުގައި ، ރަސޫލު ޞައްލަﷲ ޢަލައިހި ވަސައްލަމަ ޙަދީސް ކުރައްވާފައި ވެއެވެ. ﷲ ގެ މަތިވެރި ނިޢުމަތާއި ރަޙުމަތްފުޅު މިބިންމަތީ ނުވާނަމަ ، ދިރޭ އެއްވެސް އެއްޗަކަށް މިދުނިޔެމައްޗަކު ނޫޅެވޭނެއެވެ.
މާތް ﷲ ، ކީރިތި ޤުރުއާން ބާވައިލައްވާފައިވަނީ ، ޢާލަމްތަކަށް ރަޙުމަތެއްގެ ގޮތުގައި ، އަދި ހިދާޔަތާއި ތެދުމަގު ބަޔާންކޮށްދެނިވި ހެކިތަކެއްގެ ގޮތުގައެވެ. އިންސާނާގެ ޙަޔާތް އެކަލާނގެ ރުހިވޮޑިގެންވާ ތެދުމަގަށް މިސްރާބު ހިފައިދޭ ސަމުގާއަކީ ކީރިތި ޤުރުއާނެވެ. އެފޮތަކީ ، ފުރާނައިގެ ކާނާއެވެ. ބަލިތަކުގެ ޝިފާއެވެ. ﷲ ދެނެގަތުމަށް ، އަދި އެކަލާނގެ ޙަޟުރަތުގައިވާ ސިފަފުޅުތައް އެނގެން ބޭނުންވާނަމަ ، ޤުރުއާން ކިޔަވާށެވެ. އީމާންކަން ހަރުދަނާކުރުމަށް އެދޭނަމަ ޤުރުއާން ކިޔަވާށެވެ. ސުވަރުގެ ޙައްޤުވާމަގުން ދަތުރުކުރަން އެދޭނަމަ ، ޤުރުއާން ކިޔަވާށެވެ. ކަންބޮޑުވުމާއި ހާސްކަން ފިލުވަން އެދޭނަމަ ، ކިޔަވަންވީ ޤުރުއާނެވެ. ޞިއްޙީ ޚިދުމަތްތެރިންގެ އެހީއިން އެކަނި އެކަމެއް ޙާޞިލެއް ނުވާނެއެވެ. ތިމާގެ ނަފުސާއި ރޫޙަށް ދިރުންލިބިގެންވުމަށް ބޭނުންނަމަ ، ޤުރުއާން ކިޔަވާށެވެ.
މިއުއްމަތުގެ ނަބިއްޔާ މުޙައްމަދު ޞައްލަﷲ ޢަލައިހި ވަސައްލަމައަކީވެސް ، މުޅި އިންސާނިއްޔަތުގެ މައްޗަށް ﷲ ގެ ޙަޟުރަތުން ފޮނުއްވުނު ، ރަޙުމަތެކެވެ. ކޮންމެ އިންސާނަކީވެސް ، ރަޙުމުކުރާ މީހަކަށްވާން ޖެހެއެވެ. އެންމެ ފުރަތަމަ ، ރަޙުމުކުރަންޖެހެނީ ، ތިމާގެ އަމިއްލަ ނަފުސަށެވެ. އުރެދުންތަކަށް އަރައިގަތުމުން އެއްކިބާވެގެންނޫނީ ، އަމިއްލަ ނަފުސަށް ރަޙުމެއް ނުކުރެވޭނެއެވެ. މީސްތަކުންގެ އަބުރަށް އަރައި ޙައްޤުތަކަށް އަރައިގަނެ ، އަބުރާއި ޢިއްޒަތަށް އަރައިގަތުމުން ދުރުހެލިވާން ޖެހެއެވެ. އަމިއްލަ ނަފުސަކީ ، ﷲ އަށް ކިޔަމަންތެރިކަން އަދާކުރާ އެއްޗަކަށްވާން ޖެހެއެވެ. ﷲ ގެ ކޯފާއިން ތިމާގެ އަމިއްލަ ނަފުސު ސަލާމަތް ކުރެވޭނީ އެމަގުން ހިނގައިގެންނެވެ. އާޚިރަތް ހަނދާންނުކޮށް ، ވެރިކަމާއި ދުނިޔެ ހޯދަން އިންސާނާ ކުރާ މަސައްކަތުގައި ، ފާސިޤު ޢަމަލުތަކުން ތަޣައްޔަރުވެ ، ގެއްލިގެންދާނީ ތިމާގެ އާޚިރަތެވެ. ( މަޢުލޫމާތު : 26 މެއި 2023 ގެ ހުކުރު ޚުތުބާ )
